kuvendi procesverbal drejton mbledhjen: ulsi manja ... · shamati, relator do të jetë zoti bledar...
TRANSCRIPT
1
KUVENDI
Komisioni për Çështjet Ligjore, Administratën Publike dhe të Drejtat e Njeriut
PROCESVERBAL
Tiranë, më 18.04.2018, ora 10:00
Drejton mbledhjen:
Ulsi Manja - kryetar i Komisionit
Rendi i ditë:
1. Shqyrtimi në parim i projektligjit “Për disa shtesa dhe ndryshime në ligjin nr. 10385,
datë 24.2.2011 “Për ndërmjetësimin në zgjidhjen e mosmarrëveshjeve”
2. Miratimi i projektrezolutës “ Për vlerësimin e veprimtarisë së Institutit të
Krimeve dhe Pasojave të Komunizmit në Shqipëri për vitin 2017”.
3. Miratimi i projektrezolutës “Për vlerësimin e veprimtarisë së Autoritetit për të
Drejtën e Informimit mbi Dokumentet e ish-Sigurimit të Shtetit për vitin 2017”
4. Miratimi i projektrezolutës për vlerësimin e veprimtarisë së Departamentit të
Administratës Publike për vitin 2017.
5. Shqyrtimi i projektvendimit “Për miratimin e procedurës paraprake për
plotësimin e një vendi vakant për anëtar të Autoritetit për Informimin mbi Dokumentet e ish-
Sigurimit të Shtetit të Republikës Popullore Socialiste të Shqipërisë”.
Marrin pjesë:
Ulsi Manja, Klotilda Bushka, Vasilika Hysi, Adnor Shameti, Bashkim Fino, Bledar
Çuçi, Edmond Leka, Alket Hyseni, Jurgis Çyrbja, Xhemal Qefalia, Arben Pëllumbi.
Mungojnë:
Saimir Tahiri, Enkelejd Alibeaj, Oerd Bylykbashi, Gent Strazimiri, Dhurata Çupi,
Astrit Veliaj, Fatmir Mediu, Nasip Naço, Silva Caka, Tom Doshi.
Të ftuar:
Etilda Saliu – Ministre e Drejtësisë
Katrin Treska - Drejtore e Përgjithshme e Çështjeve Rregullatore te
Drejtësisë
Adrian Shega - Drejtor i Përgjithshëm i Kodifikimit
2
Koraljka Bumči – eksperte nga misioni “EURALIUS”
Tedi Dobi – ekspert nga misioni “EURALIUS”
Mirela Prifti – përkthyese nga misioni “EURALIUS”
Drita Avdyli - kryetare e Dhomës së Kombëtare të Ndërmjetësve
3
HAPET MBLEDHJA
Ulsi Manja – Mirëdita!
Fillojmë mbledhjen e komisionit me rendin e ditës, meqenëse kuorumi është formuar.
Më lejoni ta nis me një urim!
Dje shqiptarët kanë marrë një lajm të mirë, pasi Komisioni Europian ka rekomanduar
pa kushte çeljen e negociatave me Shqipërinë. Natyrisht që është një krenari dhe një gëzim
legjitim. Ne e kemi lexuar raportin jo vetëm si përgjegjësi, por edhe si një sfidë. Sot më shumë
se dje si ligjvënës, por edhe si Komision për Çështjet Ligjore, Administratën Publike dhe të
drejtat e Njeriut, na presin shumë punë përpara dhe ndihemi mirë, sepse kryereforma më e
vlerësuar në raportin e komisionit ishte ajo në drejtësi dhe rezultatet e prekshme të vetingut, ku
pa dyshim një meritë të madhe ka jo vetëm Komisioni i Posaçëm i Reformës në Drejtësi, por
edhe Komisioni i Ligjeve, i cili, tashmë, me vendim të Kuvendit, do të përmbyllë pjesën e
fundit të paketës së ligjeve të reformës në drejtësi, me të cilën po fillojmë sot rendin e ditës së
kësaj mbledhjeje.
Edhe një herë, urime Shqipërisë dhe shqiptarëve dhe na shkoftë mbarë! Uroj që ta
përmbyllim me sukses këtë proces, i cili ka nisur meritativ dhe do të jetë i tillë deri në fund për
Shqipërinë!
Jo më kot rekomandimi ishte i qartë dhe i pastër, Shqipëria meriton çeljen e
negociatave.
Faleminderit!
Vazhdojmë me pikën e parë të rendit të ditës, që është “Shqyrtimi në parim i
projektligjit “Për disa shtesa dhe ndryshime në ligjin nr. 10385, datë 24.02.2011 “Për
ndërmjetësimin dhe zgjidhjen e mosmarrëveshjeve”. Kjo është nismë e deputetit Adnor
Shamati, relator do të jetë zoti Bledar Çuçi dhe ne jemi komision përgjegjës në shqyrtimin e
këtij projektligji. E thashë pak më parë, ky projektligj, që ne do të nisim sot, është pjesë e
paketës së ligjeve të reformës në drejtësi bashkë me disa ligje të tjera, si ligji “Për Avokatinë
në Republikën e Shqipërisë”, ligji “Për noterinë”, ligji “Për shërbimin përmbarimor privat në
Republikën e Shqipërisë”, ligji “Për Policinë Gjyqësore”, si dhe ligji “Për strategjinë e edukimit
ligjor”.
Duke filluar nga sot, Komisioni i Ligjeve ka në kalendarin e punimeve të gjitha këto
projektligje dhe, me miratimin e tyre, Kuvendi përmbyll miratimin e paketës së plotë të ligjeve
të reformës në drejtësi, që fillojnë me ndryshimet kushtetuese, me 7 ligjet kryesore dhe me një
paketë tërësore prej rreth 40 ligjesh.
4
Kanë konfirmuar pjesëmarrjen nga Ministria e Drejtësisë, zonja Etilda Saliu, zonja
Katrin Treska, drejtoreshë e Përgjithshme e Çështjeve Rregullatore të Drejtësisë dhe zoti
Adrian Shega, drejtor i Përgjithshëm i Kodifikimit, nga misioni EURALIU-s kanë konfirmuar
pjesëmarrjen zonja Korjalka Bumçi, eksperte dhe zoti Tedi Dobi, ekspert. Po ashtu, nga Dhoma
Kombëtare e Ndërmjetësve ka ardhur zonja Drita Abdyli, kryetare.
Pa humbur kohë, fjalën po ia jap nismëtarit të këtij projektligji, kolegut tim, zotit Adnor
Shameti për të bërë një prezantim të projektligjit “Për ndërmjetësimin dhe zgjidhjen e
mosmarrëveshjeve”.
Fjala për ju, zoti Shameti.
Adnor Shameti – Faleminderit, zoti kryetar!
Sot kemi për shqyrtim në Komisionin e Ligjeve disa shtesa dhe ndryshime në
projektligjin “Për ndërmjetësimin dhe zgjidhjen e mosmarrëveshjeve”. Nga dokumenti i
analizës së sistemit të drejtësisë është evidentuar se deri tani procedura e ndërmjetësimit në
Shqipëri është aplikuar në mënyrë të kufizuar dhe impakti i ndërmjetësve nuk ka pasur efektin
e pritshëm. Kjo është arsyeja kryesore që janë paraqitur këto ndryshime në këtë ligj, pasi
vazhdimisht ka rezultuar se gjykatat nuk kanë qenë aktive në thirrjen e ndërmjetësve. Zbatimi
i projektligjit “Për ndërmjetësimin dhe zgjidhjen e mosmarrëveshjeve” nuk ka qenë i
suksesshëm, edhe për shkak të mungesës së harmonizimit me pjesën tjetër të legjislacionit. Në
kushtet kur ky komision dhe ky Kuvend janë në kufijtë e kompletimit të paketës ligjore të
reformës në drejtësi, është i domosdoshëm harmonizimi i kësaj pjese të legjislacionit. Prandaj,
një nga objektivat e strategjisë së reformës në drejtësi është rritja e përdorimit dhe e nivelit të
shërbimit të ndërmjetësimit, si dhe profesionalizmi, përgjegjshmëria dhe llogaridhënia e
ndërmjetësve, duke fuqizuar profesionin e ndërmjetësit dhe kualifikimin e tyre me anë të
trajnimeve më të mira fillestare dhe vazhduese, duke rritur kapacitetet e Dhomës së
Ndërmjetësve, si dhe duke promovuar standardet me të mira të etikës dhe sjelljeve
antikorruptive. Ndërsa ligji aktual për ndërmjetësimin ka sanksionuar disa procedura që kanë
të bëjnë me rolin e gjykatës në dërgimin e çështjeve për zgjidhje me marrëveshje, në projektligj,
ky proces është detajuar më tej.
Me qëllim rritjen e eficiencës së institucionit të ndërmjetësit, propozohet që gjykatat
duhet të kenë detyrime më të qarta që të përfshijnë sa më shumë ndërmjetësit në zgjidhjen e
çështjeve, pasi në këtë mënyrë do të ulet edhe volumi i punës së gjykatave, sidomos në trajtimin
e çështjeve familjare apo ato tregtare.
Një nga risitë e projektligjit është forcimi i strukturave të lidhura me profesionin e
ndërmjetësit, si dhe i mënyrës së veprimtarisë së tyre. Më konkretisht është parashikuar forcimi
5
dhe pavarësia e Komisionit të Licencimit të Ndërmjetësve, si dhe janë specifikuar disa
kompetenca të Dhomës Kombëtare të Ndërmjetësve në drejtim të programit të trajnimit të
vazhdueshëm, si dhe hartimit të akteve që rregullojnë veprimtarinë e ndërmjetësimit.
Gjithashtu, projektligji synon përfshirjen e ndërmjetësimit në çështje që kanë të bëjnë
dhe me të miturit, bazuar në Kodin e Drejtësisë për të Miturit i miratuar së fundi në kuadrin e
reformës në drejtësi. Një risi tjetër e projektligjit është edhe përfshirja e ndërmjetësimit për disa
kategori në skemën e ndihmës juridike falas sikurse e kemi parashikuar edhe në ligjin për
ndihmën juridike.
Në këto kushte do të ftoja të gjithë anëtarët e komisionit që të mbështesin këtë nismë
ligjore për plotësimin e tyre dhe pasqyrimin e këtyre risive në ndryshimet e ligjit për
ndërmjetësimin. Faleminderit!
Ulsi Manja - Faleminderit!
Relatori, zoti Çuçi, e ka fjalën.
Bledar Çuçi - Faleminderit!
Ashtu siç tha edhe kolegu propozues, këto ndryshime kanë për qëllim, e para, të
përmirësojnë kuadrin ligjor që ta bëjë më efikas profesionin e ndërmjetësit, me qëllim që të
shmangin disa vështirësi që janë hasur në zbatimin e ligjit aktual në praktikë.
E dyta, është edhe një synim për të harmonizuar legjislacionin në fuqi për
ndërmjetësimin me direktivën e BE-së 2008/52 EC për disa aspekte të ndërmjetësimit në
çështjet civile dhe tregtare.
Ashtu siç vuri re edhe propozuesi, në fakt, nga një analizë që i është bërë sistemit të
drejtësisë dhe nga vlerësimi për situatën aktuale, lidhur me këtë profesion të ndërmjetësit, ka
rezultuar se ligji në fuqi, ligji aktual nr.10385/2011 nuk e ka arritur qëllimin e tij plotësisht,
pasi nuk është harmonizuar me pjesën tjetër të legjislacionit, kryesisht kodet, të cilat nuk i japin
hapësirën e duhur ndërmjetësit. Kjo ka bërë që praktika gjyqësore të jetë e kufizuar me njohjen
dhe zbatimin e institutit të ndërmjetësit.
Nga ana tjetër, vetë gjykatat nuk janë treguar aktive në thirrjen e ndërmjetësuesit për
t’u adresuar palëve zgjidhjen për disa lloj çështjesh, veçanërisht ato të karakterit familjar dhe
pasuror në vlerë të vogël. Megjithëse ky institut mbetet relativisht i ri, veçanërisht në aspektin
institucional, konstatohet se nuk ka gjetur zbatimin e duhur në fushën e së drejtës.
Së fundi, nga të dhënat e regjistrit të ndërmjetësve, rezulton se janë licencuar si
ndërmjetës rreth 500 subjekte ndërsa efektivisht vetëm 79 subjekte e ushtrojnë këtë rol.
6
Edhe po ta shohim në një nivel krahasues me vendet e BE-së dhe të rajonit,
ndërmjetësimi është një institut që në fakt njihet dhe zbatohet pothuajse në të gjitha vendet e
Bashkimit Europian edhe në rajon.
Nga vështrimi krahasues mbi format e ndërmjetësimit në vendet e BE-së rezulton se në
përgjithësi ose pothuajse tek të gjitha, me përjashtime të vogla, ndërmjetësimi bëhet me baza
vullnetare, siç është rasti i Holandës, Gjermanisë, Kroacisë, Austrisë, Rumanisë, Malit të Zi,
ose i kombinuar, siç është rasti i Francës që e ka edhe të detyrueshëm ndërmjetësimin, por edhe
vullnetar. Ose tërësisht të detyrueshëm siç e ka Italia. Pra, rast që aplikohet në Itali, siç po e
implementon së fundi edhe Kosova.
Për sa i përket rolit të Ministrisë së Drejtësisë në mbikëqyrjen e profesionit të
ndërmjetësit, vihet re një rol aktiv i kësaj ministrie në të gjitha vendet që aplikojnë
ndërmjetësimin. Mendo një përjashtim shumë të rallë, siç është Holanda, por që gjithsesi prapë
Ministria e Drejtësisë në disa aspekte e ka rolin e saj.
Trajnimi fillestar, pavarësisht se nga cili organizohet, nga Ministria e Drejtësisë apo
ministria përgjegjëse për drejtësinë, apo Dhoma e Ndërmjetësve, në të gjitha legjislacionet,
është kusht për hyrjen në profesion në të gjitha vendet.
Për sa i përket formalizimit apo pjesës formale të ushtrimit të profesionit, pra të së
drejtës për të ushtruar profesionin, në disa vende kërkohet regjistrimi pranë organit përkatës
pas përfundimit të trajnimit fillestar dhe plotësimit të kritereve, siç është kryesisht Gjermania,
Austria, Greqia. Në vende të tjera regjistrimi bëhet direkt nga Ministria e Drejtësisë, siç janë
rastet e Kroacisë, Maqedonisë, Malit të Zi, apo Kosovës.
Mendoj se në parim duhet ta miratojmë si një domosdoshmëri këtë paketë ndryshimesh
të propozuara dhe për çështjet për diskutim, gjatë kalimit nen për nen, duhet të kemi vëmendje
në disa aspekte që lidhen me përputhshmërinë e projektit me Kodin e Procedurës Civile, me
Kodin e Procedurës Penale, me Kodin e Drejtësisë për të Mitur, dhe për ndonjë legjislacion
tjetër që ndoshta nuk e kam përmendur për momentin. Gjatë shqyrtimit nen për nen, komisioni
duhet të vlerësojë në mënyrë të veçantë aspektet që lidhen me pjesën e trajnimit fillestar dhe
vazhdues të ndërmjetësve, me qëllimin, siç e thamë, ashtu siç e kanë pothuajse të gjitha vendet
e BE-së dhe të rajonit, që të përmirësojmë nivelin e shërbimit të këtyre profesionistëve.
Gjithashtu, duhet marrë parasysh se një nga qëllimet kryesore të propozimit është
disiplinimi i profesionit të ndërmjetësit. Për këtë mendojmë që gjatë shqyrtimit nen për nen të
shohim në mënyrë specifike një rregullim më të plotë të trupave disiplinore dhe masave për
çdo shkelje të ndërmjetësve.
7
Për sa më sipër, unë do të bëj edhe paketë sugjerimesh, kur t’i shqyrtojmë nen për nen,
por mendoj që projektligjin ta kalojmë në parim. Jemi plotësisht dakord dhe ftoj të gjithë
anëtarë e komisionit për ta miratuar. Faleminderit!
Ulsi Manja- Faleminderit, zoti Çuçi!
Para se të kalojmë me pyetjet dhe diskutimet në lidhje me projektligjin, duke qenë se
profesionet e lira janë sferë e përgjegjësisë direkt të Ministrisë së Drejtësisë dhe duke
shfrytëzuar pjesëmarrjen e ministres, zonjës Etilda Saliu sot në komision, më lejoni t’ia jap
fjalën ministres për të dhënë një opinion lidhur me projektligjin për ndërmjetësimin dhe
zgjidhjen e mosmarrëveshjeve.
Fjala për ju, zonja Ministre!
Etilda Saliu – Faleminderit, zoti kryetar!
Të nderuar anëtarë të komisionit, ashtu siç u përmend nga ju, ky projektligj është pjesë
e paketës së reformës në drejtësi dhe është shumë e rëndësishme që, të katër projektligjet, që
presin për t’u diskutuar, të shqyrtohen sa më shpejt me qëllim që të kemi mundësinë të
finalizojmë të gjithë paketën e ligjeve të reformës në drejtësi. Të katër profesionet e lira janë
ndër objektivat kryesorë të ministrisë së drejtësisë, për t’u reformuar jo vetëm në aspektin
legjislativ, por edhe në aspektin rregullator, mbikëqyrës dhe organizativ, me qëllim që qytetarët
të marrin shërbimin që duhet jo vetëm në aspektin profesional, por edhe pa abuzime, të cilat
shpeshherë i kemi evidentuar edhe gjatë inspektimeve që Ministria e Drejtësisë ka kryer.
Projektligji është vlerësuar me vëmendje nga strukturat përgjegjëse të Ministrisë së
Drejtësisë dhe është parë në këndvështrimin e adresimit të problematikave, që janë ndeshur
gjatë këtyre viteve jo vetëm për licencimin e ndërmjetësimit, por edhe të administrimit të
ankesave të qytetarëve, të ardhura në adresë të Ministrisë së Drejtësisë. Ligji parashikon
organizimin e ndërmjetësve në Dhomën Kombëtare të Ndërmjetësve, si edhe licencimin nga
komisioni i licencimit pranë Ministrisë së Drejtësisë, si kusht për ushtrimin e profesionit të
ndërmjetësit. Gjithashtu, ligji parashikon përfundimin e programit të trajnimit fillestar dhe
formimit profesional të ndërmjetësve, të miratuar nga Dhoma Kombëtare e Ndërmjetësve, si
kusht për marrjen e licencës së ndërmjetësit, si dhe detyrimin e tyre për t’iu nënshtruar trajnimit
vazhdues.
Aktualisht rezulton që kriteret ligjore të parashikuara për të qenë ndërmjetës nuk
garantojnë nivel të lartë profesional të tyre. Për rrjedhojë edhe cilësia e shërbimit të ofruar deri
tani mbetet shumë e ulët. Përzgjedhja e aplikantëve për të qenë ndërmjetës aktualisht bëhet
vetëm në bazë të shqyrtimit të dokumentacionit të paraqitur, duke bërë që procesi i licencimit
të ndërmjetësve të mos kalojë në filtra të mirëfilltë ose në testimin e kandidatëve, gjë që është
8
totalisht ndryshe me profesionet e tjera të lira. Edhe vetë procesi i trajnimit fillestar nuk
garanton nivel të kënaqshëm të cilësive të ushtrimit të profesionit. Deri sot kanë munguar edhe
mekanizmat efektivë jo vetëm për ushtrimin e kontrollit të veprimtarisë së ndërmjetësve, por
edhe kontrollit në cilësinë trajnimit. Vende, si: Franca, Italia dhe Gjermania, që u përmendën
nga zoti Çuçi, kanë kritere më të forta të licencimit të ndërmjetësit duke iu kushtuar vëmendje
të veçantë kritereve, si: profesionalizmi, trajnimi vazhdues, ushtrimi efektiv i aktivitetit të
ndërmjetësit ose dhe pastërtia e figurës. Ne sot po kërkojmë pastërtinë e figurës të punonjësve
të rangjeve shumë më të ulta dhe ka sens të kërkojmë, gjithashtu, edhe integritetin e figurës të
atyre që ofrojnë shërbime dhe janë profesionet e lira.
Për garantimin e kritereve dhe standardeve të sipërcituara është e rëndësishme që
projektligji të përcaktojë se programet e trajnimit të miratohen paraprakisht nga Ministria e
Drejtësisë, si ministria rregullatore e profesioneve të lira për të garantuar cilësinë e
kandidatëve që kualifikohen për t’u licencuar. Kjo jo për të kufizuar kompetencat e dhomës
kombëtare, por me qëllim kalimin e një filtri, më shumë të një prej hapave mjaft të rëndësishëm
për t’u licencuar dhe më pas duke u pasuar me ushtrimin efektiv të këtij profesioni.
Sot, ashtu siç u përmend, jemi para faktit që janë licencuar 567 ndërmjetës, por, që, për
fat të keq, efektivisht e ushtrojnë këtë aktivitet vetëm 73 ndërmjetës. Nuk po flasim për cilësinë
si ofrohet ky shërbim, por për ata që ushtrojnë efektivisht këtë shërbim.
Ministria e Drejtësisë ka qenë dhe është gjithnjë e gatshme në bashkëpunim me
Dhomën Kombëtare të Ndërmjetësve të japë kontributin dhe mbështetjen për forcimin dhe
fuqizimin e profesionit të ndërmjetësit. Cilësia e ndërmjetësve lidhet me forcimin e besimit të
publikut në këtë formë të zgjidhjes së mosmarrëveshjes duke ndikuar në uljen e numrit të
mosmarrëveshjeve që i drejtohen gjykatës, për të ulur ngarkesën e gjykatave, koston për palët,
por njëkohësisht edhe kohën që harxhojnë efektivisht pranë sistemit gjyqësor. Ministria e
Drejtësisë, nisur nga problematikat e hasura në praktikë nga zbatimi i tij e deri më tani, duke e
harmonizuar në kuadrin ligjor në fuqi, sugjeron që projektligji të ketë parashikime specifike,
të cilat mungojnë sot në projektligj lidhur me rregullat për pezullimin e ushtrimit të
veprimtarisë. Bëhet fjalë për ata, të cilët janë licencuar, por nuk e ushtrojnë efektivisht
profesionin e tyre. Ne kemi propozuar që për një periudhë kohore, nëse ndërmjetësit nuk e
ushtrojnë veprimtarinë e tyre pas licencimit, mbase një sugjerim është deri në 2 vjet, licenca e
tyre të hiqet.
E dyta, duhet të parashikohet procedura disiplinore, shkeljet dhe masat disiplinore,
mekanizmat që kryejnë mbikëqyrjen e veprimtarisë së tyre në aspektin profesional dhe
rregullime për trajnerin fillestar dhe vazhdues. Deri më sot nuk rezulton që Ministria e
9
Drejtësisë të ketë kryer kontrolle ndaj veprimtarisë së ndërmjetme. Nga njëra anë ligji
parashikon kompetencën e strukturës monitoruese në Ministrinë e Drejtësisë, por nuk ka
përcaktuar mekanizmin e qartë të procedimit disiplinor që konsiderohet shumë i rëndësishëm
me qëllim që të ushtrohet ky kontroll.
Ndaj, për këtë arsye sugjerojmë që ligji duhet të ketë parashikime lidhur me përcaktimin
e kritereve, procedurave të qarta dhe të plota për të rregulluar masat disiplinore dhe kushtet për
dhënien e tyre në përputhje me parimin e proporcionalitetit, të parashikojë rregulla të detajuara
mbi procedurën që ndiqet për procedimin disiplinor, strukturën kompetente dhe marrëdhënien
e saj me Dhomën Kombëtare të Ndërmjetësimit, të parashikojë procedura të sakta për
administrimin e të dhënave mbi ndërmjetësit, duke administruar informacion mbi ndërmjetësit,
sidomos atyre që procedohen në rrugë disiplinore, sepse nuk kemi vetëm ndërmjetës të
proceduar disiplinorë, por mund të kemi edhe ndërmjetës të proceduar në rrugë penale, të cilët
mund të mbajnë përgjegjësi.
Të garantohet me mjete sa më të përshtatshme ligjore ushtrimi efektiv i veprimtarisë së
ndërmjetësve, për të arritur një raport proporcional mes numrit të atyre që licencohen dhe
numrit të popullatës apo nevojave që ka secili qytet. Aktualisht me ndryshimet e fundit të
dispozitave të Kodit të Procedurës Civile dhe veçanërisht me miratimin e Kodit të Drejtësisë
Penale për të Miturit është synuar nxitja e përdorimit të institutit të ndërmjetësimit si mjet
efektiv për zgjidhjen e mosmarrëveshjeve dhe kjo lloj vëmendje ndaj këtij instituti na vë sot
para detyrimit, për të reflektuar në këtë projektligj standardet e përcaktuara nga këto kode,
veçanërisht kur bëhet fjalë për ndërmjetësim në zgjidhjen e mosmarrëveshjeve ku preken direkt
edhe interesat e të miturve. Niveli i kualifikimit të ndërmjetësve duhet të jetë në nivele të tilla
profesionale që të garantojë interesin më të lartë të fëmijës.
Ndaj vlerësojmë se projektligji që është sot për diskutim në parim duhet të garantojë
përcaktimin i një standardi më të lartë në kërkesat e edukimit dhe diplomimit, duke reflektuar
idenë e një ndërmjetësimi që rrjedh nga një rrugëtim i veçantë arsimor ose status profesional
dhe duke garantuar monitorimin efektiv të këtij shërbimi. Prandaj sugjerojmë që është thelbësor
edhe saktësimi i rolit të Ministrisë së Drejtësisë si organ që ka detyrimin jo vetëm rregullator,
por edhe të sigurojë profesionalizmin e profesioneve të lira, si dhe shërbimin ndaj qytetarëve.
Komentet tona për sa i përket projektligjit në parim, por edhe nen për nen i kemi paraqitur, do
të jemi të pranishëm në të gjitha diskutimet që do të bëhen për projektligjin, por njëkohësisht
shprehemi shumë besimplotë se projektligji, që është paraqitur, duhet të miratohet në parim,
pasi kështu na garanton se do të kemi një shërbim më profesional që të ofrohet nga ndërmjetësit.
Faleminderit!
10
Ulsi Manja – Faleminderit, zonja Ministre!
A ka pyetje nga kolegët?
Po, zonja Hysi.
Vasilika Hysi – Faleminderit, zoti kryetar!
Faleminderit zonja Ministre për praninë tuaj dhe të stafit!
Në fakt, ndihem mirë që ka filluar diskutimi i paketës së fundit të projektligjeve në
kuadër të reformës në drejtësi. Ky ligj dhe ligjet e tjera që ne tashmë i kemi futur në procedurën
parlamentare kanë qenë pjesë e diskutimeve shumë të gjata gjatë vitit 2016 dhe 2017, në
kuadrin e komisionit ad hoc të reformës në drejtësi dhe të konsultimit publik që ka filluar edhe
nëpër tryeza me ekspertë vendas dhe ndërkombëtarë me të gjithë ndërmjetësuesit, avokatët,
gjyqtarët dhe prokurorët. Janë paraqitur shumë komente, rekomandime, sugjerime për t’u
pasqyruar. Pyetjen e kam edhe për relatorin, edhe për përfaqësuesit e ministrisë që kanë punuar
së bashku për ta përmirësuar projektin. Sa janë marrë në konsideratë të gjitha gjetjet e tryezave
të konsultimit publik të 2017-ës? E para.
E dyta, lidhet me fushën e zbatimit të ligjit. Deri më sot ne kemi një numër të pakët të
veprave penale për të cilat mund të bëhet ndërmjetësimi në çështjet penale, ndërkohë që në
Kodin e Drejtësisë Penale për të Miturit i kemi dhënë një mundësi shumë të madhe aplikimit
të ndërmjetësimit. Cila është qasja e institucionit që ju drejtoni lidhur me fushën e zbatimit, pra
me numrin e veprave penale për subjektet e rritura, jo për të miturit, për të cilat mund të
zbatohet ndërmjetësimi? A jeni në favor të rishikimit të fushës së zbatimit për ta zgjeruar, për
të forcuar rregullat, për ta bërë sistemin të funksionojë ashtu siç funksionon në të gjitha vendet?
E treta, ka të bëjë me rekomandimet e Komitetit të Ministrave të Këshillit të Europës
për ndërmjetësimin, pozicionin e ndërmjetësuesit e të tjera. Sa dhe si duhet rekomandimet e
Komitetit të Ministrave të Këshillit të Europës në këtë fushë të pasqyruara në projekt, meqenëse
ministria është një ndër institucionet që ka lidhje, pra që i kontrollon deri diku profesionet e
lira, brenda fushës së veprimit të saj. Si e keni menduar reflektimin e këtyre rekomandimeve?
Faleminderit!
Ulsi Manja – A ka nismëtari një përgjigje për pyetjet e koleges?
Urdhëroni, zoti Fino!
Bashkim Fino – Janë shumë interesante dhe të detajuara dhe kam përshtypjen, me sa
dëgjova nga relatori dhe nga ministrja, se ne sot do ta kalojmë në parim këtë projektligj. Kur
të vijmë te votimi nen për nen, natyrisht që ka nevojë për një përgjigje më të specializuar.
Prandaj, do të thosha se duhet të përqendrohemi për çështjet në parim për projektligjin, mendoj
unë. Nuk e di çfarë mendimi keni ju, por kur ta kalojmë nen për nen, natyrisht, që mund të
11
bëjmë pyetje, mund ta rregullojmë nenin, sepse edhe propozuesi i projektligjit, edhe relatori
thanë se ka ndryshime.
Me sa vura re në fjalën e ministrit, edhe ministria ka, dhe ka të drejtë të ketë, opsione
të tjera për nene të caktuara, sepse ky propozim është bërë prej kohësh.
Prandaj, që të mos e ngatërrojmë situatën të flasim në parim, nëse jemi dakord me gjithë
procedurën, që tha relatori. Jemi dakord? Pastaj kur të fillojmë nen për nen, natyrisht, do të
marrim në konsideratë, për mendimin tim, sugjerimet e relatorit, sugjerimet e ministrisë, të
ekspertëve dhe të miratojmë më të mirën.
Ulsi Manja – Faleminderit, zoti Fino!
Urdhëroni, për procedurë!
Bledar Çuçi – Jam shumë dakord me kolegun Fino. Në fakt, ky ishte edhe qëndrimi
që do të mbaja unë. Thjesht për informacion, në përgjigje edhe të koleges Hysi, unë si relator,
pa diskutim, i kam parë të gjitha diskutimet që kanë qenë bërë edhe në momentet kur është
diskutuar paketa, por jemi në diskutim dhe jemi duke analizuar edhe me ministrinë, edhe më
ekspertët për t’i parë të gjitha çështjet, që janë ngritur nga të gjitha palët e interesuara për ta
përmirësuar këtë legjislacion.
Prandaj, ju thashë që sot ta miratojmë në parim dhe kur të shkojmë te votimi nen për
nen, do të propozojmë pikërisht ato ndryshime, që u referohen sugjerimeve që vijnë nga
ministria, nga ekspertët apo edhe nga diskutime që nuk janë bërë në draft, të cilat mund të jenë
të rëndësishme për ta bërë sa më funksional këtë institut kaq të rëndësishëm, siç është
ndërmjetësimi. Faleminderit!
Ulsi Manja - Faleminderit, zoti Çuçi!
Urdhëroni, zoti Shameti!
Adnor Shameti – Duke falënderuar kolegen Hysi për ndërhyrjen dhe sugjerimet, dua
t’i bëj të dituar komisionit, në vijim të atyre që tha edhe relatori, zoti Çuçi, se në hartimin e
këtij drafti të paraqitur për miratim në komision janë marrë në konsideratë, me përgjegjësi të
lartë, të gjitha rekomandimet përkatëse të paraqitura, kështu që edhe në analizën që do t’i bëjmë
ligjit dhe miratimit nen për nen, do të jenë të pasqyruara dhe do të gjejnë shprehje të gjitha
këto gjetje dhe rekomandime. Faleminderit!
Ulsi Manja - Faleminderit!
Urdhëroni, zonja Ministre!
Etilda Saliu – Doja të theksoja se Ministria e Drejtësisë gjatë kësaj periudhe, jo vetëm
për projektligjin “Për ndërmjetësimin”, por edhe për tre projektligjet e tjera për profesionet e
lira, ka ndërmarrë një studim shumë të detajuar krahasues për të gjitha vendet, kryesisht të BE-
12
së, por njëkohësit edhe atyre të rajonit. Një ndër shembujt që vlen të përmendet dhe u përmend
pak nga zoti Çuçi është pikërisht edhe Kosova. Sugjerimet tona pas kësaj analize shumë të
detajuar për të marrë praktikat më të mira nga vendet e rajonit dhe vendet e BE-së, janë
reflektuar në sugjerimet. Gjithashtu, reflektim kanë edhe rekomandimet e Komitetit të
Ministrave, siç edhe zonja Hysi përmendi, por gjithashtu ne kemi punuar gjatë kësaj periudhe
në bashkëpunim dhe ngushtësisht edhe me ekspertët e EURALIS-it, për të nxjerrë dhe për të
dhënë sugjerime konkrete, sugjerime të cilat të reflektojnë dhe të jenë në përputhje me
standardet ndërkombëtare, si dhe t’i përshtaten praktikës dhe realitetit, por edhe kuadrit ligjor
shqiptar, siç është Kodi i Procedurave Civile dhe Kodi i Drejtësisë Penale për të Miturit. Duke
pasur në konsideratë që vetë shërbimi që ofrojnë ndërmjetësit është i tillë, ka një interes,
sidomos për targetgrupet, siç janë të miturit, ne jemi shumë të gatshëm që ky projektligj në
shërbimin që ofrojnë ndërmjetësit të përfshijë edhe kategorinë ose shërbimin që ofrohet për të
miturit në bazë të parashikimeve të Kodit të Drejtësisë Penale për të Miturit.
Ulsi Manja – Faleminderit, zonja Ministre!
A ka pyetje apo diskutime nga kolegët?
Po, zonja Hysi.
Vasilika Hysi – Faleminderit, zoti kryetar!
Në fakt, e vlerësoj shumë vullnetin tuaj për të filluar diskutimin e këtij projektligji. Unë
dua t’u bëj me dije të gjithë kolegëve, por edhe medias që Shqipëria në muajin qershor është
vendi mikpritës i Konferencës Botërore të Ndërmjetësve dhe janë 300 pjesëmarrës nga e gjithë
bota, ku ekspertët më të mirë të drejtësisë restauruese do të jenë në Shqipëri dhe kjo zhvillohet
nën kujdesin e ministres së Drejtësisë.
Në fakt, ka qenë një koincidencë që Kuvendi e ka filluar diskutimin për këtë projektligj
dhe unë ndjehem shumë mirë që ne presim me një ligj të përmirësuar ekspertët më të mirë të
botës në këtë fushë. Uroj që ky ligj të kalojë në seancë plenare dhe të ketë hyrë në fuqi përpara
zhvillimit të konferencës.
Gjithashtu, kam edhe një sugjerim. Ky është një ligj shumë i rëndësishëm, i cili ka
nevojë të promovohet, të njihet më mirë nga publiku dhe nga profesionistët. Do të rekomandoja
më shumë trajnime, kualifikime, por mbi të gjitha edukimin e publikut, me qëllim që të ulim
kostot e drejtësisë që njerëzit të gjejnë zgjidhjet më të thjeshta, më të shpejta, më me pak
dhimbje dhe që në themel kanë të drejtat e viktimës, jo vetëm të autorit, që komuniteti të jetë i
përfshirë dhe të zgjidhë një sërë plagësh që neve na kanë rënduar në këto vite post tranzicionit.
Prandaj, dua t’ju inkurajoj ta miratojmë sa më shpejt këtë ligj, të hyjë në fuqi dhe ju si ministre
të keni se me çfarë të krenoheni atë ditë, pasi jemi një ndër vendet e para që kemi miratuar
13
ligjin për ndërmjetësimin, sepse këto janë ndryshimet për ligjin e tretë që po bëjmë.
Faleminderit!
Ulsi Manja- Faleminderit, zonja Hysi!
Para se të votojmë në parim, dua të pyes zonjën Bumçi, nga misioni Euralius dhe
kryetaren e Dhomës së Ndërmjetësve nëse janë dakord.
Po, zonja Avdyli.
Drita Avdyli- Falënderoj Komisionin e Ligjeve dhe ministren që sot e hapin mbledhjen
me ligjin për profesionet e lira, sepse ky është një ligj i rëndësishëm.
Dhoma Kombëtare e Ndërmjetësve është një ent publik, i cili ka 4 vjet që punon.
Sigurisht edhe me mbështetjen e Komisionit Europian për përforcim kapacitetesh apo për
ndërhyrjet ligjore, i cili është një projekt twining, patëm asistencën e dy gjyqtarëve finlandezë
dhe cekë pranë Dhomës Kombëtare të Ndërmjetësve, të cilët ishin pjesë e përmirësimit të
kurrikulave për trajnimin fillestar dhe trajnimin e vazhduar për Dhomën Kombëtare të
Ndërmjetësve.
Gjithashtu, falënderoj ministren e Drejtësisë për ndërhyrjet që ka bërë. Sikurse e tha
edhe nismëtari në fjalën e hapjes, që, megjithëse janë bërë shumë ndryshime ligjore, ky draft
duhet të harmonizohet edhe me ligje të tjera, pasi ka 6 muaj që Kodi i Procedurës Civile është
miratuar, por që nga gjykata nuk kemi raste të referuara. Kështu që përmirësimi i këtij ligji do
të ishte shumë i mirë.
Ulsi Manja- Faleminderit, zonja Avdyli!
Bashkim Fino – Kam një pyetje. Ministrja dhe relatori thanë, unë kam besim më shumë
te relatori, që mbi 500 subjekte kanë marrë të drejtën e licencimit të ndërmjetësimit, ndërkohë
që e kanë ushtruar atë jo më shumë se 73, tha ministrja. Ju si Dhomë e Ndërmjetësimit, a mbani
përgjegjësi që të gjithë këta që kanë marrë licencën, as 1/10 e tyre nuk e ushtrojnë një gjë të
tillë?
Me të drejtë ministrja tha që në projektin e ri ne do të vëmë sanksione të forta, sepse
nuk keni pse t’i jepni licencën dikujt dhe të mos e përdorë. Unë këtë e kam më shumë për
kulturë, ju e dini këtë dhe kjo nuk ka lidhje me votimin në parim.
Ulsi Manja- Faleminderit, zoti Fino, për ndërhyrjen, prandaj ky quhet profesion i lirë.
Zonja Avdyli, ju lutem një përgjigje sa më të shkurtër, sepse kjo nuk është pjesë e
diskutimit.
Drita Avdyli – Pyetja e zotit Fino është shumë e drejtë. Ky ka qenë shqetësim ynë, por
edhe i Ministrisë së Drejtësisë. Komisioni i Licencimit, që është një komision ad hoc i
14
Ministrisë së Drejtësisë dhe Dhomës Kombëtare të Ndërmjetësve kanë dhënë licencën në bazë
të disa akteve nënligjore, ku ka pasur një V
KM për kriteret e dhënies së licencave. Ne u kemi bërë thirrje herë pas here të gjithë
licencuesve që të hapin NIPT-et dhe të ushtrojnë këtë profesion. Ndërhyrja e ministres për të
vënë sanksione nëse nuk e ushtron këtë profesion deri në 5 vjet, është me vend.
Ulsi Manja - Faleminderit, zonja Avdyli!
Kalojmë në votimin në parim të projektligjit “Për disa shtesa dhe ndryshime në ligjin
nr. 10385, datë 24.02.2011 “Për ndërmjetësimin në zgjidhjen e mosmarrëveshjeve”.
Kush është dakord? 11 pro. Kundër? Abstenim? Nuk ka.
Miratohet në parim projektligji “Për disa shtesa dhe ndryshime në ligjin nr. 10385, datë
24.02.2011 “Për ndërmjetësimin në zgjidhjen e mosmarrëveshjeve në Republikën e
Shqipërisë”.
Këtu e mbyllim diskutimin për pikën e parë të rendit të ditës.
Faleminderit, zonja ministre, zonja Bumçi dhe zonja Avdyli!
15
KUVENDI
Komisioni për Çështjet Ligjore, Administratën Publike dhe të Drejtat e Njeriut
PROCESVERBAL
Tiranë, më 18.04.2018, ora 10:30
Drejton mbledhjen:
Ulsi Manja - kryetar i Komisionit
Rendi i ditës:
Miratimi i projektrezolutës “Për vlerësimin e veprimtarisë së Institutit të Krimeve dhe
Pasojave të Komunizmit në Shqipëri për vitin 2017”.
(Komision përgjegjës)
Marrin pjesë:
Ulsi Manja, Klotilda Bushka, Vasilika Hysi, Adnor Shameti, Bashkim Fino, Bledar
Çuçi, Edmond Leka, Alket Hyseni, Jurgis Çyrbja, Xhemal Qefalia, Arben Pëllumbi.
Mungojnë:
Saimir Tahiri, Enkelejd Alibeaj, Oerd Bylykbashi, Gent Strazimiri, Dhurata Çupi,
Astrit Veliaj, Fatmir Mediu, Nasip Naço, Silva Caka, Tom Doshi.
16
Ulsi Manja – Kalojmë në pikën e dytë të rendit të ditës, në miratimin e projektrezolutës
“ Për vlerësimin e veprimtarisë së Institutit të Krimeve dhe Pasojave të Komunizmit në
Shqipëri për vitin 2017”. Relator është kolegu Çyrbja. Komisioni ynë është komision
përgjegjës.
Zoti Çyrbja, dje lamë që teksti të dakordësohej edhe me sugjerimet e kolegut Hyseni.
Kolegët e kanë projektrezolutën përpara.
Urdhëroni, zoti Çyrbja!
Jyrgis Çyrbja - Faleminderit, zoti kryetar!
Ne u dakordësuam me propozimet që bëri kolegu Hyseni, që t’i analizojmë paraprakisht
botimet nga studiues shkencor, që vijnë nga radhët e botës akademike dhe që merren me
studimet e periudhës komuniste në Shqipëri, si dhe të tërhiqemi nga kërkesa për të përfshirë në
programet shkollore këto lloj tekstesh, sepse ndërhyjmë në programet e Ministrisë së Arsimit.
Faleminderit!
Ulsi Manja – Faleminderit, zoti Çyrbja!
Urdhëroni, zonja Hysi!
Vasilika Hysi – Faleminderit, zoti kryetar!
Unë shikoj në projektrezolutë një kërkesë të Kuvendit të Shqipërisë, një propozim, që
thuhet: “Të filtrojë paraprakisht botimet nga studiues shkencor që vijnë nga radhët e botës
akademike dhe që merren me studimet e periudhës komuniste”. Çfarë keni dashur të thoni? Do
të thoni se çdo akademik, Institutit i Historisë, çdo profesor, nuk mund të botojë botime pa i
parë ky institut?
Jyrgis Çyrbja - Thamë “të analizojë çdo botim paraprakisht para se të botohet, nga
studiues të së drejtës”. Ky ishte propozimi i kolegut Hyseni, për të cilin ramë dakord, sepse
nuk keni qenë dje në diskutim.
Vasilika Hysi - Zoti Çyrbja, shikoj se zoti Çuçi dhe unë ndajmë të njëjtin mendim.
Problemi është se: akademikët, historianët, profesorët do të shikojnë botimet e institutit, apo
punonjësit e këtij instituti do të kontrollojnë punën shkencore akademike të akademikëve?
Ulsi Manja - Zonja Hysi, në raportimin që bëri drejtori ekzekutiv i Institutit, zoti Tufa,
në përgjigje të pyetjes së kolegut Hyseni, u tha se ka një bord pranë Institutit, i cili filtron të
gjitha botimet që bëhen për llogari të Institutit.
Pra, instituti ka një bord të tijin, i cili, përpara se të miratojë botimin e studiuesve të
ndryshëm, duhet të kalojë detyrimisht në bord. Ky bord shkencor, nuk bëhet fjalë për filtrim
nga bota akademike. Pra, vetë instituti ka bordin shkencor të redaktimit të botimeve, që bëhen
me paratë publike për llogari të këtij instituti.
17
(Ndërhyrje pa mikrofon)
Vasilika Hysi – Unë vij nga bota akademike dhe ka një rregull për botimet shkencore.
Pra, në botimet shkencore ka oponenca. Botimi shkencor qoftë nga akademikët, qoftë nga
profesorë, qoftë nga Instituti i Historisë e të tjerë, nuk mund të bëhet pa kaluar në dy recensione.
Nëse ne duam që bordi shkencor, që me të drejtë tha kryetari dhe e saktësoi, bordi, jo instituti
vetë, të bëjë një recension të botimit, është tjetër gjë, nuk mund të themi të analizojë. Por mund
të themi se Kuvendi i Shqipërisë i kërkon bordit të Institutit të Studimeve të Krimeve të
komunizmit të paraqesë opinionin ose vlerësimin e tij për botimet shkencore-akademike, që
lidhen me periudhën e komunizmit në Shqipëri. Si do ta njohë instituti?
Ulsi Manja – Dakord, ju vini nga bota akademike dhe është normal një riformulim i
kësaj pike. Kolegu Hyseni paraqiti një shqetësim, sepse nga bordi i institutit janë financuar disa
botime në lidhje me këtë pjesë të historisë sonë. Këtu u tha se ka një bord shkencor, që i
redakton paraprakisht, bën njëfarë oponence apo recense për këto botime. Normalisht Kuvendi
duhet ta bëjë pjesë të rezolutës, që botimet, që kalojnë apo financohen nga ky institut, të
kalojnë patjetër nëpërmjet bordit shkencor.
(Ndërhyrje pa mikrofon)
Urdhëroni, zoti Baku!
Artur Baku – Faleminderit, zoti kryetar!
Gjatë diskutimit ideja ishte: botimet e institutit, përpara se të botohen, duhet të
filtrohen nga ky bord shkencor. Bëhet fjalë për botimet institutit, jo t’i kemi botime bruto, pa
kaluar në një filtër shkencor. Pra, për këtë bëhet fjalë.
(Ndërhyrje pa mikrofon)
Ulsi Manja – Zoti Baku, në tekstin e rezolutës duhet të gjejë vend formulimi i saktë i
rekomandimi i Kuvendit, sepse bëhet fjala për paratë publike, që ne japim nga taksat tona për
këto botime. A jeni dakord me projektrezolutën?
Po, zonja Hysi.
Vasilika Hysi – Është thënë këtu “të ndërkombëtarizohet historia e komunizmit në
Shqipëri nëpërmjet zgjerimit të rrjeteve të aktiviteteve të partnerëve ndërkombëtarë”. Mos e
keni fjalën që të forcojmë dhe të shkëmbejmë përvoja me institucionet homologe, sepse kur
thoni “të ndërkombëtarizohet historia e komunizmit”?
(Reagim pa mikrofon)
Ulsi Manja – Ju lutem, zonja Hysi, kjo pikë e vendosur në rezolutë kam përshtypjen se
bëhet për ta....
(Diskutime pa mikrofon)
18
Zonja Hysi, a keni pyetje apo sugjerime të tjera?
Kush është dakord me projektrezolutën për vlerësimin e veprimtarisë së Institutit të
Studimeve të Krimeve dhe Pasojave të Komunizmit në Shqipëri për vitin 2017, me sugjerimet
e bëra nga kolegia Hysi? Kundër nuk ka. Abstenim nuk ka.
Miratohet projektrezoluta për t’ia kaluar seancës plenare.
19
KUVENDI
Komisioni për Çështjet Ligjore, Administratën Publike dhe të Drejtat e Njeriut
PROCESVERBAL
Tiranë, më 18.04.2018, ora 10:15
Drejton mbledhjen:
Ulsi Manja - kryetar i Komisionit
Rendi i ditës:
Miratimi i projektrezolutës “Për vlerësimin e veprimtarisë së Autoritetit për të Drejtën
e Informimit për Dokumentet e Ish-Sigurimit të Shtetit për vitin 2017”. (Komision përgjegjës)
Marrin pjesë:
Ulsi Manja, Klotilda Bushka, Vasilika Hysi, Adnor Shameti, Bashkim Fino, Bledar
Çuçi, Edmond Leka, Alket Hyseni, Jurgis Çyrbja, Xhemal Qefalia, Arben Pëllumbi.
Mungojnë:
Saimir Tahiri, Enkelejd Alibeaj, Oerd Bylykbashi, Gent Strazimiri, Dhurata Çupi,
Astrit Veliaj, Fatmir Mediu, Nasip Naço, Silva Caka, Tom Doshi.
20
Ulsi Manja – Kalojmë në miratimin e projektrezolutës “Për vlerësimin e veprimtarisë
së Autoritetit për të Drejtën e Informimit për Dokumentet e Ish-Sigurimit të Shtetit për vitin
2017”.
Zoti Shameti, keni fjalën lidhur me projektrezolutën.
Adnor Shameti – Pas kemi qenë pjesë e dëgjesës me përfaqësuesit e Autoritetit për të
Drejtën e Informimit për Dokumentet e Ish-Sigurimit të Shtetit, kemi paraqitur këtë
projektrezolutë, e cila në vetvete përmban të gjitha gjetjet dhe rekomandimet e raportit të
paraqitur nga Autoriteti i Dosjeve të Ish-Sigurimit të Shtetit. Në këto kushte, pasi i kemi
analizuar në detaje ditën e djeshme, në dëgjesën që patëm me përfaqësuesit e Autoritetit, ftoj
të gjithë anëtarët e komisionit për ta miratuar bashkërisht.
Faleminderit!
Ulsi Manja – Faleminderit, zoti Shameti!
Po, zonja Hysi.
Vasilika Hysi – Faleminderit!
Unë kam një pyetje për pikën 5 të rezolutës, ku ngarkohet Kuvendi i Shqipërisë që të
ofrojë ekspertizë për amendamentet e këtij ligji. Shoh që kërkohet të amendohet ligji i vitit
2015 në tri fusha, plus amendimi i Kodit Zgjedhor. Nuk e kuptoj këtë pikën 3, e cila kërkon që
Instituti të përfshihet në faktimin e krimeve të kryera përpara instalimit të diktaturës komuniste.
Për çfarë bëhet fjala, sepse në dijeninë time, periudha kur e shtrin veprimtarinë Instituti lidhet
me Ish-Sigurimin e Shtetit?
Ulsi Manja – Po, zoti Shameti.
Adnor Shameti – Ka mundësi që zonja Hysi të mos ketë qenë prezente kur e kemi
diskutuar. Në relatimin që ka bërë kryetarja e Autoritetit të Dosjeve ka kërkuar që të mos jenë
striktë me këtë periudhë kohore, pra nga ’44-tra, pas Çlirimit, deri në vitin 1991, por të kenë
një fleksibilitet edhe në disa muaj më parë, pasi ka pasur kërkesa për trajtimin e tyre. Pra, është
thjesht një periudhë disamujore. Ky ishte si rekomandim. Nuk ka asnjë gjë të keqe nëse....
Vasilika Hysi – Atëherë amendohet komplet ligji.
Ulsi Manja – Zoti Shameti, në fakt, do të duhet ta shohim këtë pikë të rezolutës.
Adnor Shameti – Ishte një periudhë e shkurtër kohore...
Ulsi Manja – Në fakt, Autoriteti dje pati një qasje për ndryshime në ligjin nr. 45/2015
“Për të drejtën e informimit për dokumentet e Ish-Sigurimit të Shtetit të Republikës Popullore
Socialiste të Shqipërisë”, por, për sa kohë ligji është në fuqi, është ky ligj me të cilin ata
punojnë, unë do të sugjeroj ta rishohim edhe një herë.
(Ndërhyrje pa mikrofon)
21
Zonja Hysi, unë sugjeroj që së bashku me kolegun Shameti, por edhe me zonjën Hysi
ta rishohim edhe një herë projektrezolutën për vlerësimin e veprimtarisë së Autoritetit,
meqenëse është projektrezoluta e parë, sepse ky institucion është i ri dhe ka raportuar për herë
të parë sivjet në Komisionin e Ligjeve dhe e shoh të udhës të hartojmë një projektrezolutë që
rri brenda kufijve të ligjit. Është kjo pikë, por mund të kemi edhe disa riformulime të tjera.
Po, zoti Fino.
Bashkim Fino – Në fakt, duhet t’ju ndihmojë edhe Shërbimi i Monitorimit. Mua më
duket shume e tepërt miratimi i këtyre rezolutave të institucioneve që varen nga ne. Më duket
absurde, sepse duket sikur po tallemi me veten. Ato vijnë raportojnë këtu çdo vit; vijnë për
buxhetin; ne kemi të drejtë t’i marrin në analizë çdo tre muaj; mund t’i shkarkojmë; mund t’i
emërojmë, sepse varen nga ne. Çfarë po u themi ne? Vjen këtu raporton ai, i themi: shiko, po
të vë disa detyra unë me këtë rezolutën dhe ti mundësisht zbato detyrat në funksion të ligjit që
ke, sepse këtu nuk bëhet fjalë për një rezolutë ndërkombëtare.
Zoti kryetar, më ndiqni pak, se është...
(Diskutime në sallë)
Ulsi Manja – Ta ndjekim, sepse...
Bashkim Fino – Është thelbësore.
Këtu nuk bëhet fjalë për një rezolutë ndërkombëtare që, po themi, parlamenti shqiptar
bën një rezolutë, ku e di unë, në mbështetje të një shteti e të tjerë. Është tjetër rezoluta që bën
parlamenti shqiptar për çështje ndërkombëtare, pra parlamenti ynë mbështet kështu, ashtu, dhe
tjetër gjë është rezoluta që bëjmë për institucionet që vijnë e raportojnë te ne.
Madje, meqenëse raportojnë te ne dhe meqenëse ne i themi: ke punuar mirë, bravo të
qoftë...
(Ndërhyrje pa mikrofon)
...ose nuk ke punuar mirë, një, dy, tre, katër duhet t’i rregullosh, mund edhe ta heqim,
sepse e kemi ne në dorë.
(Ndërhyrje pa mikrofon)
Tani, kujt ia bëjmë ne këtë rezolutë? Ne e bëjmë këtë rezolutë dhe i themi, në rastin
konkret kësaj kryetares, e cila mua më pëlqeu dje në informimin që bëri, apo edhe atij tjetrit të
studimeve, se bëra edhe një kërkesë tjetër, pasi nuk ka lidhje një institut studimesh me këtë,
atëherë kujt do t’ia bëjmë ne këtë rezolutë? Ia bëjmë vetes sonë? Ua bëjmë atyre për t’u thënë:
“Shiko...”? E merr ajo...
22
Sipas kësaj, po t’i zgjidhë ajo këto katër-pesë pika që kemi vënë ne këtu, ajo qenka në
rregull me punën? Jo, mor, jo! Ajo duhet të jetë në rregull me ligjin që ka dhe të jetë korrekte.
Pra, nuk është se duhet të jetë në rregull me rezolutën që miratojmë ne.
Rezolutat e institucioneve që kemi në varësi, kam përshtypjen, më jepni drejtimin
juridik, ju lutem, për mendimin tim nuk duhet të miratohen këtu. Ata të vijnë, të raportojnë dhe
kaq, madje po të duan le të vijnë të raportojnë edhe në seancë plenare. Por pse duhet t’i bëj unë
rezolutë atij?
Në qoftë se duhet të marr masë për ta shkarkuar, i them: “Ti nuk ke punuar mirë, kështu
që ik!”, por në qoftë se është në rregull, çfarë do t’i them unë? T’i jap detyra shtëpie kot?
Adnor Shameti – Ju jeni për miratimin në heshtje?
Bashkim Fino – Jo, nuk jam për miratim në heshtje, nuk jam fare për rezolutë!
Ulsi Manja – Edhe nëse ka, në rregullore është, përcaktim...
Bashkim Fino – Parlamenti duhet ta përdorë rezolutën për të tjera gjëra: rezoluta
ndërkombëtare, rezoluta që kanë lidhje me vendet e tjera, e të tjerë. Nuk ka rezolutë me një
institucion që vjen këtu dy herë në vit. Vjen çdo tri herë në muaj ose një herë në vit, vjen edhe
në fund të vitit që merr buxhetin. E çfarë i zgjidh unë me këtë rezolutë? Prandaj unë them që
duhet ta shikoni pak nga pikëpamja juridike. A ka vlerë kjo? Se ne zihemi tani për të formuluar
një fjali është ose jo kështu. Pra, grindemi kot për një fjali, që nuk ka asnjëlloj vlere: jo po e
kemi kështu, e kemi ashtu. Pse duhet ta bëjmë këtë debat kot? Nuk e kam për debatet që bëjmë,
të kuptohemi, shumë mirë që...
Ulsi Manja – Dakord.
Bashkim Fino – Por nuk ka asnjë vlerë, asnjë nuk e lexon këtë. Madje as ata që e
marrin, që janë në varësi, nuk e lexojnë, lëre më pastaj ne që ta kemi parasysh.
Ja më thoni, çfarë ka mbajtur parasysh, jo te kjo, se kjo është për herë të parë, ajo e
mëparshmja, që ka nja gjashtë vjet që është krijuar? Flas për rezolutën e Institutit të Studimit
të Krimeve dhe Pasojave të Komunizmit. Më thoni për rezolutat në fjalë të viteve që kemi
miratuar për të, çfarë ndryshimi kanë? Asnjë. Janë pothuajse njësoj, copy-paste, nuk kanë asnjë
vlerë.
Ulsi Manja – Faleminderit, zoti Fino!
Po, zonja Hysi.
Vasilika Hysi – Faleminderit, zoti kryetar!
Në fakt, zoti Fino ngriti një problem esencial, që ka të bëjë në përgjithësi me funksionin
e dytë të parlamentit, kontrollin parlamentar nëpërmjet raportimit të institucioneve të pavarura
kushtetuese ose të krijuara me ligj. Kjo mund të jetë pjesë e diskutimit të ndryshimit në
23
Rregulloren e Kuvendit, por nuk bëhet dot tani, sepse është një proces tashmë i rregulluar në
Rregulloren e Kuvendit. Ndërkohë, ne kemi miratuar edhe një mekanizëm vitin e kaluar...
(Ndërhyrje pa mikrofon)
Po, i dëgjojmë edhe në seancë plenare.
Ulsi Manja – Është pjesë e Rregullores.
(Deputeti Fino flet pa mikrofon.)
Vasilika Hysi – Në Kuvendin e Shqipërisë kemi miratuar me vendimin nr. 49 të vitit
2017 një mekanizëm të ndjekjes sistematike të përmbushjes së rekomandimeve, që
institucionet e pavarura kushtetuese dhe të krijuara me ligj bëjnë për qeverinë, por edhe se si
ato përmbushin detyrat që u lë Kuvendi.
Në fakt, rezoluta duhet të jetë detyra që u rekomandojmë ne institucioneve, në kuptimin
se çfarë duhet të përmirësojnë në punën e tyre.
Bashkim Fino – Çfarë lidhjeje ka kjo?
Vasilika Hysi – Sepse jemi ne që i monitorojmë...
(Deputeti Fino flet pa mikrofon.)
Ekzakt dhe ne u lëmë disa detyra.
Tani, për të ardhur te...
(Deputeti Fino flet pa mikrofon.)
Për herë të parë, Kryetari i Kuvendit do të raportojë në seancë plenare në dhjetor lidhur
me zbatimin e të gjitha rekomandimeve që institucionet e pavarura kanë bërë për institucionet
e qeverisë dhe Këshillin e Ministrave dhe çfarë ka bërë qeveria, i ka zbatuar, apo jo.
Pra, për herë të parë, në vitin 2018 do të kemi një raportim të tillë.
Lidhur me pikën 5, zoti kryetar...
(Ndërhyrje pa mikrofon)
Ulsi Manja – Zonja Hysi!
Vasilika Hysi – Lidhur me pikën 5 sugjeroj të bëjmë një riformulim të tillë.
(Diskutime në sallë)
Ulsi Manja – Ju lutem, ta mbyllim këtë pikë të rendit të ditës, sepse u zgjatëm paksa!
Vasilika Hysi – Në rast se do të jetë dakord edhe kolegu...
Adnor Shameti – Shprehem dakord.
Vasilika Hysi – ...e para, Kuvendi i Shqipërisë kërkon nga Autoriteti të ofrojë
mendime, opinione dhe gjetjet e kërkimit për zbatimin e ligjit nr. 45 e të tjerë. Në radhë të parë,
ne duhet të njihemi, sepse është shumë shpejt dhe nuk mund të thuash për një ditë që ligji nuk
funksionon.
24
Ulsi Manja – Zonja Hysi, që të jemi më efiçientë te puna...
Vasilika Hysi – Elementet e tjera të hiqen.
Ulsi Manja – Unë propozoj që pika 5 të hiqet fare, nuk ka pse të jetë në tekstin e
rezolutës.
(Ndërhyrje pa mikrofon)
Kush është dakord me projektrezolutën “Për vlerësimin e veprimtarisë së Autoritetit
për Informimin mbi Dokumentet e Ish-Sigurimit të Shtetit për vitin 2017”, duke hequr pikën 5
dhe me sugjerimet dhe komentet e kolegëve Hysi dhe Shameti, të cilat do të bëhen pjesë e
tekstit të rezolutës?
Bashkim Fino – Unë shprehem kundër.
Ulsi Manja – Atëherë, me dhjetë vota pro, një votë kundër, asnjë abstenim, miratohet
edhe kjo projektrezolutë.
(Deputeti Fino flet pa mikrofon.)
(Ndërhyrje pa mikrofon)
Bashkim Fino – Ulu, Xhemal!
Meqenëse...
Xhemal, dëgjoje, se është edhe për ty, do të të bëj për vete, do të votosh edhe ti kundër!
(Ndërhyrje pa mikrofon)
Meqenëse Zëvendëskryetarja e Kuvendit së bashku me kryetarin e komisionit nuk më
kthyen ndonjë përgjigje, unë bëra një propozim konkret: këto rezoluta janë copa letre, të cilat
ne i harxhojmë kot. Institucionet që ne kemi në varësi, tallen me ne. 140 deputetë ngremë dorën
atje dhe themi se kjo është rezoluta jonë, e cila nuk lexohet, nuk studiohet, nuk zgjidh asgjë
dhe pas një viti bëjmë një rezolutë tjetër pak a shumë, si kjo. Prandaj, po ju them se
institucionet që ne kemi në varësi, nuk kanë nevojë për rezolutë. Ato kanë nevojë për kontroll
në zbatimin e ligjit. Nëse e zbatojnë ligjin, do t’u japim mbështetje, nëse nuk e zbatojnë ligjin,
kur vijnë këtu për analizë t’u thuhet se nuk kanë punuar mirë dhe ne do të propozojmë sipas
procedurës për t’i shkarkuar dhe për të vënë dikë tjetër në atë vend. Kjo është puna jonë, meqë
i kemi zgjedhur ne. Nuk është puna jonë të bëjmë rezoluta. Ne këtu nuk bëjmë rezoluta
ndërkombëtare.
Më vjen keq!
Prandaj jam kundër këtyre rezolutave.
(Ndërhyrje pa mikrofon)
25
Rezolutat që janë për institucionet që i kemi në varësi, ku ne kemi të drejtë kontrolli,
që vijnë dhe raportojnë këtu, janë tjetër gjë. Ne nuk kemi pse të bëjmë rezolutë për ta. Këtë
kisha.
Ulsi Manja - Zoti Fino,
Jemi shumë dakord me ju, por për sa kohë është kjo Rregullore e Kuvendit në fuqi, ne
jemi të detyruar ta ushtrojmë veprimtarinë tonë në përputhje me këtë Rregullore.
Këto sugjerime, meqenëse jemi në fazën e ndryshimeve në Rregulloren e Kuvendit,
mund të bëhen pjesë e diskutimeve dhe e debateve që të reflektohen në Rregulloren e re që do
të ketë Kuvendi.
Për sa kohë është në fuqi kjo Rregullore e Kuvendit, ne jemi të detyruar të operojmë në
këtë mënyrë.
26
KUVENDI
Komisioni për Çështjet Ligjore, Administratën Publike dhe të Drejtat e Njeriut
PROCESVERBAL
Tiranë, më 18.04.2018, ora 10:30
Drejton mbledhjen:
Ulsi Manja - kryetar i Komisionit
Rendi i ditës:
Miratimi i projektrezolutës për vlerësimin e veprimtarisë së Departamentit të
Administratës Publike për vitin 2017. (komision përgjegjës)
Marrin pjesë:
Ulsi Manja, Klotilda Bushka, Vasilika Hysi, Adnor Shameti, Bashkim Fino, Bledar
Çuçi, Edmond Leka, Alket Hyseni, Jurgis Çyrbja, Xhemal Qefalia, Arben Pëllumbi.
Mungojnë:
Saimir Tahiri, Enkelejd Alibeaj, Oerd Bylykbashi, Gent Strazimiri, Dhurata Çupi,
Astrit Veliaj, Fatmir Mediu, Nasip Naço, Silva Caka, Tom Doshi.
27
Ulsi Manja - Kalojmë te pika e katërt e rendit të ditës, te miratimi i projektrezolutës
“Për vlerësimin e veprimtarisë së Departamentit të Administratës Publike për vitin 2017”.
Relatori, kolegu Hyseni, e ka fjalën!
Alket Hyseni - Faleminderit, zoti kryetar!
Po përpiqem të jem sa më konciz, sepse kolegët e kanë përpara draftrezolutën. Në
mbledhjen e kaluar diskutuam veprimtarinë e Departamentit të Administratës Publike për vitin
2017 dhe ne gjykuam të paraqesim këtë draftrezolutë:
“Kuvendi i kërkon DAP-it për vitin 2018 fokusimin në këto drejtime:
- Të përmbyllet procesi i miratimit të planit të ri të aktiviteteve për periudhën 2018-
2020 dhe vlerësimit të nevojave financiare për zbatimin e Strategjisë Ndërsektoriale për
Reformën në Administratën Publike për trevjeçarin e ardhshëm.
- Të vijojë përmirësimi i procesit të rekrutimit, në drejtim të zvogëlimit të numrit të
konkurrimeve, duke realizuar një ndarje sa më efektive të grupeve, si dhe për të siguruar
transparencën e nevojshme dhe vlerësimin objektiv të kandidatëve që marrin pjesë në
konkurrim.
-Të plotësohen vendet vakante në institucionet e administratës shtetërore.
- Të garantojë zbatimin e procedurave ligjore për verifikimin paraprak dhe referimin në
organet përgjegjëse, bazuar në ligjin 138/2015, “Për garantimin e integritetit të personave që
zgjidhen, emërohen ose ushtrojnë funksione publike”, i ndryshuar, si dhe ndjekjen e rasteve të
ndalimit të ushtrimit të funksionit publik, duke bashkëpunuar me institucionet e administratës
publike.
-Të vijojë punën për zbatimin e vendimeve gjyqësore të formës së prerë, duke
bashkëpunuar me të gjitha institucionet e tjera.
-Të përfundojë rishikimi funksional strukturor i institucioneve të varësisë në
administratën shtetërore.
- Të përfundojë standardizimi i përshkrimeve të punës për të gjitha grupimet e
pozicioneve të punës në shërbimin civil, si dhe të miratojë përshkrimet e punës për çdo pozicion
pune në institucionet e administratës shtetërore.
- Të marrë masat e nevojshme si dhe të ushtrojë kompetencat e tij, duke përdorur
mekanizmat ligjorë që disponon për të evidentuar institucionet, të cilat ende nuk e kanë
plotësuar Sistemin Informatik të Menaxhimit të Burimeve Njerëzore (HRMIS) me të dhëna,
duke u kërkuar përmbushjen e detyrimit të tyre ligjor në lidhje me këtë aspekt dhe të
përfundojnë procesin e plotësimit të sistemit me të dhëna.
28
-Të realizohet gjenerimi i pagave nëpërmjet HRMIS-it për të gjitha institucionet e
administratës shtetërore pjesë e shërbimit civil, si dhe të koordinojë punën me institucionet e
pavarura dhe njësitë e qeverisjes vendore për arritjen e këtij objektivi. -ASPA duhet të vijojë
punën, si ofrues i trajnimeve për shërbimin civil.”Mendoj se këto janë shumë të rëndësishme,
pa hapur debat me kolegun e shumë të çmuar nga eksperienca dhe nga vlera, zotin Fino...
(Ndërhyrje pa mikrofon)
I paçmuar nga vlera.
(Ndërhyrje pa mikrofon)
Ulsi Manja – Mund të vazhdoni, zoti Hyseni!
Alket Hyseni - Mendoj se i vetmi mekanizëm që ne të komunikojmë me institucionet
e varësisë është një dokument në të cilin ne përveç detyrave të mëdha që ka, parlamenti gjykon
që nga kjo tërësi detyrash ligjore, 1-2-3-5 janë parësore, në gjykimin tonë, si kontrollues.
Të mos ta ngatërrojmë termin “rezolutë”, e cila në shqip mund të kishte edhe një
përkthim tjetër, por çështja është se si parlament na rezulton se këto janë detyrat.
Megjithatë, mendoj se nuk është ky momenti për ta diskutuar. Ju ftoj ta miratojmë këtë
projektrezolutë!
Ulsi Manja – Faleminderit, zoti Hyseni! Urdhëroni, zoti Fino për pyetje!
Bashkim Fino – Unë si zakonisht do të votoj kundër, sepse sapo e thashë.
Për t’ju bindur edhe juve që të votoni kundër, po ju citoj një pikë të kësaj rezolute, të
cilën do ta votojë Vasilika dhe relatori. Çfarë thotë relatori këtu, që na propozon ta votojmë?
Po e lexoj ngadalë: “Të plotësohen vendet vakante në institucionet e administratës shtetërore.
Veprimtaria e DAP-it të fokusohet në drejtim të rritjes së besimit të kandidatëve të interesuar
për të marrë pjesë në procesin e rekrutimit me qëllim rritjen e pragut të cilësisë së kandidatëve.”
Kjo është e përgjithshme.
(Ndërhyrje pa mikrofon)
Prit! Unë, zoti Kryetar, kam marrë pjesë aktivisht në takimin, kur këtu ishte edhe
Zëvendëskryeministrja, të cilën e pyeta: “Sa janë punonjësit që i mbulon DAP-i, nga 108 mijë
punonjës që përballon buxheti i shtetit?”. Ajo m’u përgjigj se ishin 10 mijë.
(Ndërhyrje pa mikrofon)
Prit Vasilika, se nuk ke qenë ti!
(Ndërhyrje pa mikrofon)
Ti ke humbur gjënë më të bukur, se nuk ishe këtu, ishe në Suedi.
Ajo m’u përgjigj se ishin 10 mijë. Në fakt, janë 108 mijë punonjës që paguhen nga
buxheti i shtetit. Edhe nëse janë 10 mijë puno
29
njës, që i mbulon DAP-i, numri i vendeve vakante qe 1082, pra qenë 10% e numrit të
përgjithshëm.
(Ndërhyrje pa mikrofon)
Dakord, dua të pyes relatorin. Zoti relator, dua të të pyes, se kjo është evazive. Këto
1082 vende vakante me këtë rezolutë që ke përgatitur ti, a do të plotësohen, apo do të
vazhdojmë përsëri kështu dhe vitin tjetër, do të themi përsëri se do të plotësohen vendet vakante
në përgjithësi? Unë dua ta di para se ta votoj këtë, sepse unë nuk do t’i votoj më rezolutat, por
për hatrin tënd po e votoj edhe këtë. Këto 1082 vende vakante a do të plotësohen deri në
qershor, deri në shtator, deri në dhjetor apo do të rrinë përsëri vakante?
Ulsi Manja – Zoti Fino!
Bashkim Fino – Jo, unë kam të drejtë ta bëj këtë pyetje.
Ulsi Manja – Faleminderit! Zoti Hyseni, ju lutem, flisni shkurt, në të kundërt do
detyrohem ta ndërpres pesë minuta mbledhjen për të shkuar në Konferencën e Kryetarëve,
sepse po na presin. Po, zoti Hyseni.
(Ndërhyrje pa mikrofon)
Alket Hyseni - Mendoj se pyetje të tilla kanë rëndësi. Pse duhet rezoluta? Këtu doli
problemi që DAP-i nuk kishte realizuar detyrën ligjore për plotësimin e vendeve dhe për këtë
dha disa arsye.
(Ndërhyrje pa mikrofon)
Jo, shkaqet që dha na u dukën të arsyeshme. Pra, fakti që pati një bllokim nga qeveria
për shkak të fushatës dhe ristrukturimi i aparateve, ishin arsyet që e bënë të pamundur. Në këto
kushte, ne i kërkojmë që këtë vit të shtrëngohet që të mos ketë ...
(Ndërhyrje pa mikrofon)
Ulsi Manja – Faleminderit, zoti Hyseni!
Hedhim në votim projektrezolutën “Për vlerësimin e punës së Departamentit të
Administratës Publike për gjendjen në Shërbimin Civil për vitin 2017”.
Kush është pro? 10 vota pro. Kundër? 1 votë kundër. Abstenim? Nuk ka. Miratohet
projektrezoluta me sugjerimet përkatëse.
30
KUVENDI
Komisioni për Çështjet Ligjore, Administratën Publike dhe të Drejtat e Njeriut
PROCESVERBAL
Tiranë, më 18.04.2018, ora 10:30
Drejton mbledhjen:
Ulsi Manja - kryetar i Komisionit
Rendi i ditës:
Shqyrtimi i projektvendimit “Për miratimin e procedurës paraprake për plotësimin e një
vendi vakant për anëtar të Autoritetit për Informimin mbi Dokumentet e ish-Sigurimit të Shtetit
të Republikës Popullore Socialiste të Shqipërisë”. (komision përgjegjës)
Marrin pjesë:
Ulsi Manja, Klotilda Bushka, Vasilika Hysi, Adnor Shameti, Bashkim Fino, Bledar
Çuçi, Edmond Leka, Alket Hyseni, Jurgis Çyrbja, Xhemal Qefalia, Arben Pëllumbi.
Mungojnë:
Saimir Tahiri, Enkelejd Alibeaj, Oerd Bylykbashi, Gent Strazimiri, Dhurata Çupi,
Astrit Veliaj, Fatmir Mediu, Nasip Naço, Silva Caka, Tom Doshi.
31
Ulsi Manja – Kalojmë në pikën e fundit të rendit të ditës
(Ndërhyrje pa mikrofon)
Zoti Fino, a ka mundësi ta trajtojmë pikën e fundit të rendit të ditës, sepse është me
rëndësi?
(Ndërhyrje pa mikrofon)
Pika e fundit e rendit të ditës ka të bëjë me shqyrtimin e projektvendimit “Për miratimin
e procedurës paraprake për plotësimin e një vendi vakant për anëtar të Autoritetit për Informim
mbi Dokumentet e ish-Sigurimit të Shtetit të Republikës Popullore Socialiste të Shqipërisë.
Relator është kolegu Shameti, kurse komisioni ynë është komision përgjegjës.
Më lejoni të sjell në vëmendjen e komisionit se njëri nga anëtarët e Autoritetit për
Informim mbi Dokumentet e ish-Sigurimit të Shtetit, zoti Daut Gumeni, ka paraqitur
dorëheqjen në datën 20. 03. 2018 në Kuvendin e Shqipërisë.
Mbi bazën e një materiali të përpiluar nga Shërbimi i Monitorimit të Institucioneve të
Pavarura të Kuvendit pas dhënies së dorëheqjes, Komisioni për Çështjet Ligjore, Administratën
Publike dhe të Drejtat e Njeriut, bazuar në nenin 8 të ligjit 45\2018 “Për të drejtën e informimit
mbi dokumentet e ish-Sigurimit të Shtetit të Republikës Popullore Socialiste të Shqipërisë,
përcakton përbërjen e autoritetit, zgjedhjen dhe mandatin e anëtarëve të tij.
Zoti Gumeni ka qenë përfaqësues i propozuar nga shoqatat e të përndjekurve politikë
nga radhët e kandidatëve të mbështetur nga jo më pak se 28 deputetë.
Në fakt, për ta trajtuar më gjerë çështjen do t’ia jap fjalën këshilltarit, zotit Baku, për të
na sqaruar gjithë ecurinë dhe procedurën që do të ndjekë ky komision për plotësimin e këtij
vendi vakant.
Fjala është për ju zoti Baku.
Artur Baku – Faleminderit, zoti kryetar!
Pasi jemi njohur me dorëheqjen e zotit Gumeni, kemi përgatitur një memo për Kryetarin
e Kuvendit dhe Komisionin e Ligjeve.
Siç e thatë edhe ju, zoti Daut Gumeni ka qenë propozim i shoqatave të të përndjekurve
politikë dhe i mbështetur nga 28 deputetë.
Duke qëndruar te precedenti i ndjekur para një viti e gjysmë, kur është zgjedhur zoti
Daut Gumeni dhe anëtarët e tjerë të bordit, Kuvendi i Shqipërisë ka miratuar një vendim, i cili
ka disponuar lidhur me shpalljen publike që duhet të bëjë Kuvendi për kandidaturat që vijnë
32
nga shoqatat e të përndjekurve. Duke qëndruar te precedenti i vendimit të mëparshëm, kemi
hartuar një projektvendim, i cili disponon lidhur me shpalljen e vakancës nga Kuvendi në faqen
zyrtare të Kuvendit dhe pastaj me shqyrtimin e kandidaturave që do të vijnë.
Gjithashtu, dua të sjell në vëmendjen tuaj se ligji “Për të drejtën e informimit mbi
dokumentet e ish-Sigurimit të Shtetit”, kërkon paraprakisht që anëtarët të pajisen me certifikatë
sigurie personeli. Besoj se procesi do të marrë rreth 4 muaj kohë, sepse procedurat për pajisje
me certifikatë sigurie janë të tilla. Prandaj, sugjeroj që të bëhet shpallja publike, të pajisen
kandidaturat me certifikatë sigurie dhe më pas komisioni të verifikojë kriteret ligjore. Sipas
nenit 111 të Rregullores, kandidaturat që përmbushin kriteret ligjore vazhdojnë procedurën
nëse marrin mbështetjen e 28 deputetëve.
Faleminderit!
Ulsi Manja – Faleminderit, zoti Baku!
Po, zonja Hysi, por ju lutem shumë shkurt.
Vasilika Hysi – Faleminderit, zoti kryetar!
Jam dakord me çfarë tha zoti Baku. Unë sugjeroj të saktësohet te pika 1 se cili do të
jetë afati që shërbimet e Kuvendit do të bëjnë njoftimin. Mendoj se afati prej 20 ditësh do të
ishte i mjaftueshëm me kushtin që prezantimi i këtij vendimi në faqen e Kuvendit të jetë i qartë,
i dukshëm dhe jo vetëm shpallje njoftimi: “Shpallje vakance për një anëtar të Autoritetit ...”.
Meqenëse kriteret janë të forta, duhet certifikatë sigurie, e të tjera, stafi i Kuvendit duhet
ta publikojë në të gjitha mediat me qëllim që të kemi kandidatura sa më të mira.
Faleminderit!
Ulsi Manja – Faleminderit, zonja Hysi!
Pas administrimit të dorëheqjes së zotit Gumeni, protokolluar me shkresën nr.10\40,
datë 20. 03. 2018 në Kuvendin e Shqipërisë dhe të raportit me numër protokolli 1040\1, datë
12.04.2018 të Shërbimit të Monitorimit të Institucioneve të Pavarura të Kuvendit të Shqipërisë,
është hartuar projektvendimi përkatës, që relatoi zoti Baku.
Hedhim në votim projektvendimin “Për miratimin e procedurës paraprake për
plotësimin e një vendi vakant për anëtar të Autoritetit për Informimin mbi Dokumentet e ish-
Sigurimit të Shtetit të Republikës Popullore Socialiste të Shqipërisë sipas tekstit që ju keni mbi
tavolinë.
Kush është pro? 11 vota pro. Asnjë kundër. Asnjë abstenim. Miratohet projektvendimi
“Për miratimin e procedurës paraprake për plotësimin e vendit vakant të krijuar në Autoritetin
për Informimin mbi Dokumentet e ish- Sigurimit të Shtetit të Republikës Popullore Socialiste
të Shqipërisë”.
33
Me miratimin e këtij projektvendimi, mbyllim mbledhjen e Komisionit të Ligjeve për
ditën e sotme.
Mbledhja e radhës do t’ju njoftohet nga sekretaria e komisionit së bashku me rendin e
ditës.
Faleminderit dhe ditë të mbarë!
MBYLLET MBLEDHJA