final paper - teo antonio tulambuhay
TRANSCRIPT
TEO T. ANTONIO: ISANG TULAMBUHAY
ni JOSELITO D. DELOS REYES
Ph. D. ARALING FILIPINO – WIKA, KULTURA, MIDYA
Isinumite kay
Dr. FEORILLO PETRONILO A. DEMETERIO III
Bilang kahingian sa
AFL 521-D RISERTS SA ARALING FILIPINO
24 AGOSTO 2013
Abstrak
Nilalaman ng munting papel-riserts na ito, bilang pangwakas
na kahingian sa sabjek na Riserts sa Araling Filipino, ang
topograpiya at landas na tatahakin ng pagsulat ng biyograpiya ng
isang makatang maituturing na muhon ng kasaysayang pampanitikan
sa bansa, si Teo T. Antonio. Binigyang diin ang dahilan kung
bakit dapat pasimulan ang proyektong biyograpiya; kung bakit
dapat pang sumulat ng biyograpiya sa malawak na pagtanaw sa mundo
ng panitikan at pagsulat; at ang mungkahing proseso sa pagsulat
at pakikipagniig sa proyekto ng mananaliksik.
Inilalahad ng mananaliksik ang paglalapat ng bahagyang
iniakmang metodo na ipinapanukala ni Edel Leon (1973) sa
konteksto ng lokal na pagsulat ng biyograpiyang pampanitikang may
tuon sa makatang ayon kay Mike Bigornia ay may kakayahang
magbigay ng danas sa mambabasa ng “[bawat tula’y] isang abentura,
isang kabayanihan, isang pag-ibig.” Bagay na hindi dapat ipagkait
1
sa pamayanang akademiya at tumatangkilik sa panitikan sa ating
bansa sa kabuuan tungo sa malapit na hinaharap.
Keywords: Literary Biography, Poetics, Filipino Poetry
I. Panimula
Ganito inilarawan ng makata at aktibistang si Romulo A.
Sandoval ang makatang si Teo T. Antonio sa una niyang aklat, ang
Biro-biro Kung Sanlan: “Mapanudyo’t mapanuligsa sa mga nagpapahirap
sa sambayanan; tapat, mapagmahal at may masidhing malasakit sa
malawak na masa ng kababayan... Masasabing napulsuhan niya at
patuloy na napupulsuhan ang masa.” (1982:9) Matapos ang mahigit
dalawampung taon buhat nang malathala ang unang kalipunan ng
2
tula, maraming kamatayan ng kaibigan (kasama na si Sandoval at
Mike Bigornia), kontrobersiyang politikal, ilampung panulukang
bato ng kasaysayang pampanitikan, labindalawang kalipunan ng
tula, hindi mabilang na parangal at pagdakila, paglipat-bahay at
bansa, inihayag ni Antonio na
“Pag dumarating na iniisa-isa ang
kakulangan, pagkakamali, at pagmamalabis sa
sarili, higit na nakikilala ang pagkatao ng
tao.
“Doon nagsisimula ang pagdistrungka sa
sarili o pagbaklas sa mga kalawang na matagal
nang nakaligtaang tanggalin sa pagkatao.
“Habang gumugulang ang karanasan at
inuunawa ang kahulugan at kabuluhan ng buhay,
lalong sumusugat sa puso’t diwa ang mga
nakaligtaang isagawa o ipahayag.” (Antonio
2011:1)
Tulay ang buhay at panulaan ni Teo T. Antonio ng malaking
pulo ng nagbagong panulaan sa bansa. Natatawid ni Antonio, ang
ayon sa wika ng makata-kritikong si Virgilio S. Almario ang
Balagtasismo at Modernismo ng panulaang Filipino. Ang buhay ni
Antonio bilang anak ng “Hari ng Balagtasan” na si Emilio Mar.3
Antonio ay tanda ng matagumpay na pagtawid mula sa buhay-
panulaang sumusunod sa tradisyon ni Francisco Balagtas, Jose
Corazon de Jesus, Florentino Collantes, at marami pang ibang
tagapamansag ng Balagtasismo taglay ang panulaang karaniwang
didaktiko at tigib ng kasawian (Almario, 1984:95). Inihayag pa ni
Almario sa isa pang aklat ng makata-kritiko, ang Mutyang Dilim
(2001), ang pagpapatingkad sa kakayahan ni Antonio sa pagtawid,
“[S]a pangkat ng mga makatang sumikat sa panahon ng rehimeng
Marcos ay itinatangi si Teo T. Antonio bilang makatang may
matalik na pagkakaunawa sa pagtulang tradisyonal... Ang totoo,
kailangan lamang sulyapan ang kaniyang talambuhay upang makita na
waring sinuso niya ang pagtulang tradisyonal.” (2001:99)
Wala isa mang makata sa bansa ang maaaring ituring ngayong
nabuhay mula’t sapul sa kandili ng panulaan. Wala isa man, bukod
kay Teo T. Antonio ang mabisang nagpunyagi upang isulong ang
panitikang Filipino sa kabuuan. Sa tulang “Supling” na nalathala
sa Liwayway noong 22 Nobyembre 1948, at muling inilathala bilang
pambungad sa maituturing na pinakatanyag na kalipunan ng tula ni
Teo T. Antonio, ang Taga sa Bato (1991), inihayag ng tulang-alay sa
4
kaarawan ni Teo T. Antonio ng kaniyang si Emilio Mar. ang
propetikong pangitaing kasasapitan ng anak sa hinaharap: “Ibig
kong huwag kang maging damong-parang / Na ayaw abutin ng sikat ng
Araw; / Nais ko ay maging baging ka ng buhay / Na laging may
katas ng kadakilaan; / Huwag kang tumulad / Sa batong nagkalat...
/ Na gayong may tigas at kahalagahan, / Nananayag siklutin at
tisurin lamang; / Ang ibig ko bunso’y iyong matutuhan / Sa
pagkalalaki, ikaw ay igalang... //” (1984:3).
Na siya ngang nangyari dahil isa si Teo T. Antonio sa
iginagalang ngayong makata ng bayan. Katunayan ang pagiging
tanyag ni Antonio sa maliit na sirkulo ng panitikan sa bansa.
Kinakatawan ng pagkilala at paggalang na ito ang impluwensiya at
kakinatalang natamo ng mga iginagalang na nakababatang makata sa
kasalukuyan buhat kay Antonio tulad ng binanggit Louie Jon
Sanchez, premyadong makatang tatlong ulit nang itinanghal bilang
Makata ng Taon ng Komisyon sa Wikang Filipino, na nagwika na:
“Mangingibig ng anyo si [Sir] Teo, bagay na kahanga-hanga sa
panulaan, at bagay na agad-agad na pumukaw sa akin sapagkat
kalkulado ang himig at pahayag. Mahusay ang kaniyang pandinig sa
5
tugma at sadyang napakadalisay ng kaniyang salita.” (email sa
mananaliksik, 10 Disyembre 2012)
Ganito rin halos ang kakintalan ng mga tula at buhay ni
Antonio kay Prop. Romulo Pascual Baquiran ng Unibersidad ng
Pilipinas: “[ang kakintalang naiiwan] ay isang daigidig na
pamilyar sa atin. Narito ang mabuti at nariyan ang masama. Sa mga
tula ni G. Antonio, malinaw ang tunggalian ng dalawang ito. At
ibig ng mga tula, na maabot ng makata at ng mambabasa ang
kalugurang hatid ng pagpapanatili ng kaayusang bumubukal sa
kabutihang loob ng tao.” (email sa mananaliksik, 10 Disyembre
2012)
Samantala, inihayag ni Enrique Villasis, makatang tatlong
magkakasunod na taong nagtamo ng unang gantimpala sa pagtula sa
Gantimpalang Carlos Palanca ang “saligan” niya sa pagtula na
nagbuhat kay Antonio: “Bilang makata, saligan ko ang mga tula ni
Ser Teo kung papaano hahalughugin ang mga talinghaga sa mga
karaniwang karanasan. May higit siyang nasasabi ukol sa pag-aani,
o kahit ang simpleng pag-inom ng serbesa.” (email sa
mananaliksik, 11 Disyembre 2012)
6
Sa labas ng sirkulo ng panitikan sa bansa, tanyag ang
kaniyang akda dahil sa makailang ulit na pagkatawan sa mga
bigkasan sa mga mababa at mataas na paaralan. Napakaraming
pagkakataon na ginagamit at pinagkakakitaan ang tula ni Antonio
(na minsa’y walang paalam at walang pakundangang ilalathala) sa
mga batayang aklat ng mababa at mataas na paaralan. Ang
pinakamalaking dahilan ng popular na pagtanggap na ito ay ang
malinaw niyang kakayahang kilatisin ang mga pangyayari na ayon
muli kay Baquiran ay
“Madalas na ang kabatiran (insight) ay
hindi kahindik-hindik. Hindi ito ibig sabihin
na payak ang pagtula ni G. Antonio kung hindi
isang estilong malapit sa pabigkas at folk na
sensibilidad. Bahagi ng komunidad ang makata
at tagapakinig at ang konteksto ng teksto ay
‘batid natin kapuwa ang sinasabi ko’ at
‘nagbabahagihan tayo ng matulaing
pagpapahayag ngayon’ ang nasa likod ng
pahayag.”
Bukod sa kakayahang paigitingin ang pagkilatis ni Antonio sa
karaniwan, na sinasabi naman ni Sanchez na “naglarawan sa7
panulaan niya (Antonio) bilang ‘kombersasyonal’ at nakatanim sa
danas-kalye at pang-araw-araw na buhay,” taglay din ng kaniyang
tula ang hapdi ng katotohanan ng buhay-buhay. Ngunit ang
karamihan sa kaniyang pagsipat na ito ay nagagawa niya sa
pamamagitan ng siste.
Pansinin ang pamagat ng una niyang kalipunan: Biro-biro kung
sanlan. Taglay ang “patama” lalo’t, ayon sa uugod-ugod na
karunungang-bayan, “totoo kung tatamaan” ngunit sa kawili-wiling
danas ng tula, ang siste, na binigyang diin ni Villasis bilang
“[ang] himig na may kintal ng pagpapatawa ngunit umuukit sa
dibdib at kamalayan.”
Maraming ulit na makakaengkuwentro ng sinumang may mataos na
pagmamahal sa panitikang Filipino ang mga maparikalang tulang
tulad ng “Barong Tagalog” na tumatalakay sa kasuotang ayon kay
Antonio ay “...dapat tangkilikin, / barong noo’t ngayo’y damit
din ng taksil.” (1991:10) at ang “Doon po sa amin” na tula batay
sa tradisyon ng awiting-bayang “Doon po sa amin, bayan ng San
Roque.” Ilan lamang ang tulang itong kumakatawan sa kaniyang
8
mabisang panggagagad sa mga pangyayari sa lipunan na inilalahad
sa atin ng kaniyang tulang may saltik ng hapdi.
At bilang pagbibigay-diin sa bukana ng kaniyang huling
koleksiyon, na pinarangalan bilang natatanging kalipunan ng tula
sa pamamagitan ng National Book Awards nitong 2012, kailangang
ulitin ko ito: “Habang gumugulang ang karanasan at inuunawa ang
kahulugan at kabuluhan ng buhay, lalong sumusugat sa puso’t diwa
ang mga nakaligtaang isagawa o ipahayag.”
Maging kasangkapan nawa ang riserts na ito sa nais niyang
ipahayag, sa mga madudukal pang kaalaman mula sa makatang
nakasisigurong tatawid sa imortalidad ng Panitikang Filipino. At
para sa kabatiran ng lahat ng mambabasa, tumatangkilik mang lubos
o bantulot sa pagtangkilik ng Panitikang Filipino, tandaan ang
sinabi ng yumaong makatang Mike Bigornia: “Memorable at
napakagandang karanasan ang pagbasa sa mga tula ni Antonio; bawat
tula’y isang abentura, isang kabayanihan, isang pag-ibig.”
(1982:14)
Layunin ng Riserts
9
Pangunahing layunin ng riserts na ito na ipakilala sa
pamamagitan ng biyograpiya ang makatang si Teo T. Antonio sa
pamamagitan ng patalakay sa kaniyang mga tulang kumakatawan sa
iba’t ibang panahon ng kaniyang buhay bilang makata.
II. Mga Kaugnay na Pag-aaral at Literatura
Naratibo ng Biyograpiya Bilang Pundasyon ng Riserts
Prominenteng binanggit na ito ni Cristina Pantoja-Hidalgo sa
kaniyang akdang Creative Nonfiction, A Manual for Filipino Writers. Ang ibang
unibersidad sa Estados Unidos at Gran Britanya ay kumikilala na
sa genre ng pagsulat ng biyograpiya sa ilalim ng rubrics ng
creative nonfiction. Nag-aalok na ang mga unibersidad sa lupalop na
iyon ng daigdig ng mga kurso tulad ng “Literary Biography and
Autobigraphy” at “Writing Lives: Literary Biography and
Autobiography in Theory, History and Practice.” Katunayan, ang
mga unibersidad na ito ay nagbibigay ng pagkakataon sa kanilang
mag-aaral na sumulat ng isang critical study o “exercise in
writing biography.” (2005:8-9)
10
Ayon pa rin kay Hidalgo, ang Texas A&M University sa Estados
Unidos ay nagdaos na ng kumperensiyang may tuon sa
“Autobiography, the Scholar, and the Essay” hinggil sa pagtanggap
ng akademiya sa riserts na may tuon sa pagsulat ng talambuhay.
Tinalakay dito ang mga kakaharaping suliranin sa pagsulat ng
naratibo sa larang ng biograpiya. Sa ganitong linyang tinatahak
ng riserts sa akademiya sa ibayong dagat, marapat lamang na
pagsimulan ito ng mga nangungunang unibersidad sa bansa tulad ng
Pamantasang De La Salle at Unibersidad ng Santo Tomas na mayroong
maringal na kasaysayan ng riserts at inobasyon sa riserts bilang
rekisito sa mga guro.
Hindi na bago ang biyograpiya bilang mulaan ng pagkilala sa
isang “bantog” na tao sa larang ng nakalathalang pamamahayag.
Nariyan sina Nick Joaquin na nagsulat hinggil sa buhay ng
bayaning sina Gregorio Del Pilar at Antonio Luna. Sumulat din si
Joaquin ng kasaysayan ng pamilyang Aquino ng Tarlac. Sa larang ng
akademiya, may mangilan-ngilang pag-aaral na inilahad batay sa
biyograpiya tulad ng pag-aaral at pagtitipon ni Almario sa mga
tula ni Jose Rizal, Jose Corazon De Jesus at Lope K. Santos.
11
Ngunit ito man ay hindi maipapaloob sa kategorya ng biyograpiya,
sa halip, dapat tingnan ang mga pag-aaral at riserts na ito
bilang insidental na biyograpiya tungo sa paglalahad ng kabuuan
ng mga tula ng mga makatang nabanggit, dahil ito naman talaga ang
unang dahilan kung bakit ito isinulat at inilathala.
Idagdag pa sa mga halimbawa ng kalipunan/biyograpiya ang
katotohanang mga yumao na ang mga makatang paksa ng biyograpiyang
ito. Malungkot isiping kailangan pang yumao ang makata/manunulat
upang kilalanin at parangalan ng isang biyograpiya. Ganito rin
ang kaso sa manunulat/makata sa Ingles, lalo na ang sa mag-
asawang Tiempo ng Silliman University sa lungsod ng Dumaguete.
Kung kailan sumakabilang-buhay saka pa lamang nabibigyan ng
atensiyong gawan ng biyograpiya. O sadyang ito ang napapanahon?
Sa bilis ng pagpapalit ng impormasyon sa panahon ng
internet, may malaking tsansang malimot agad ng mambabasa ang
isinulat at iniwang bakas ng mga manunulat at makata. Dapat, at
bilang susog sa mungkahi ni Hidalgo, ngayon pa lamang ay sumabay
na ang nasa akademiya sa pagpapakalat ng kaalaman hinggil, hindi
lamang sa naisulat kung hindi maging sa buhay ng manunulat.
12
Ang Biograpiya ng Ibang Makata-Manunulat Bilang Gawaing Akademiko
Malinaw ka Jun Cruz Reyes na ang maging paksa ng riserts ay
pagkakahon. Malupit itong parusa sa sinumang magiging bilanggo ng
kahong ito. Mapaniil ito lalo pa’t pinag-ukulan ng mahabang
panahon upang mabuo ang kahon, upang maging depinitibo ang kahon
na siyang sisisiil sa paksa. Taglay ng kapangyarihan ng kahong
ito ang maparikalang kulungan upang maitanghal. Ikinukulong ang
anuman at sinuman sa kahon upang kaipala’y maitanghal sa madla,
sa mambabasa: saksihan ninyo, ito ang kaniyang buhay, ito ang
kung anumang mayroon siya.
Nauunawaan ni Jun Cruz Reyes, iginagalang na manunulat at
propesor sa Unibersidad ng Pilipinas, ang kapangyarihan ng kahong
ito. Dito niya sinimulan ang kaniyang pagkakahon, ang ilatag muna
ang nilikhang kahon ng iba, na sinundan ng kaniyang nililikhang
kahon na pamamahayan ni Ka Amado V. Hernandez, Pambansang Alagad
ng Sining sa Panitikan at primera-klaseng lider-manggagawa kung
kaya ibinunsod ang “Ka Amado”.
13
Sa kahong nililikha niya para kay Ka Amado, ipinaliwanag ni
Reyes na isa lamang siyang “kuwentista na umaastang investigative
journalist, na laging naghahanap ng clue para lamang may
maidugtong pa sa nalalaman na.” (xiii) Ang mga nalalamang ito ay
ang mga nauna ngunit “kulang” sa kabuuang kahon na binuo ng mga
Almario, Lumbera, at Torres-Yu. Mga kahong sa unang malas ay
malalaki, mabubulas, kumpleto ngunit ayon sa riserts ni Reyes, ay
“kulang na kulang” dahil ang mga naunang kahon ay nagtatanghal
lamang kay Hernandez sa isang makitid na paksa, makata halimbawa,
o lider-manggagawa. Wala ang Hernandez na tao, ordinaryong tao na
may mga kaibigan, makatang mayroong impluwensiya, ang kaniyang
kakayahang ekonomiko, sa madali’t salita, mumunting detalyeng
hindi itinatanghal ng mga naunang bumuo ng kahon.
Diumano, nabuo ni Reyes ang kahon ni Ka Amado sa pamamagitan
ng “paghahalungkat, pangangapa, at pagkakalkal.” (xvii) Ang mga
gawaing ito ay malayong matawag na istandard ng pagbuo ng riserts
lalo pa’t ang batayan ay ang riserts na mahigpit na itinatakda ng
akademiya. Pero iba si Reyes bilang akademiko. Iba ang kaniyang
sinuong, isang maparikalang kurso: doktorado sa malikhaing
14
pagsulat. Iba ang unibersidad na tuntungan niya, Unibersidad ng
Pilipinas.
Gayung iba ang paraan niya ng pagbuo ng tanghalan—hindi ang
katulad ng inirereseta ng ibang akademiko—pareho pa rin ang
pinaghuhugutan ni Reyes ng itatanghal sa pagbuo ng talambuhay ni
Ka Amado: “ano ang sinabi ng mga tala ng mga nakakakilala sa
taong ginagawan ng pag-aaral na nasa anyo ng isang kritisismo? O
mga biyograpi na ikinomisyon ng isang pamilya. Pangalawa, ano ang
isinulat niya tungkol sa sarili? Pangatlo, ano ang sinasabi mismo
ng kanyang mga akdang pangliteratura.” (xiii)
Pero dahil ang kay Reyes ay biyograpiya sa ilalim ng rubriks
ng Malikhaing Pagsulat, hindi dapat asahang nakapaloob lagi ang
biyograpiya ni Ka Amado itinakda niya mismong paghuhugutan ng
materyal upang mabuo ang kahon. Dapat asahang kagila-gilalas ang
panulat, kathang-isip man, hinugot sa tunay-na-buhay, o
kombinasyon ng mga ito.
Dahil tumatalakay ang “Ka Amado” sa buhay, natural—at inamin
ito ni Reyes—na may simula at wakas: Kung kailan unang huminga sa
labas ng sinapupunan at kung kailan nalagutan ng hininga. Ito,
15
kasama pa ang ibang detalyeng pang-curriculum vitae ang mga
Google-material, na dapat asahan sa isang talambuhay. Sino ang
kaniyang magulang at nuno? Saan siya nag-aral? Nasaan siya ng mga
panahon ng bansang inihilera ni Reyes? Anong pangyayaring
makasaysayan sa bansa ang kaalinsabay ng pangyayari sa buhay at
naging papel ni Ka Amado? Anong relasyon higit sa mag-asawa ang
namagitan kina Ka Amado at Honorata “Atang” de la Rama, ang
“Reyna ng Kundiman at Reyna na rin ng Tanghalan” (151) upang
madagdagan—at ito ang terminong ekstensibong ginamit ni Reyes—ang
leyenda ni Ka Amado? Ano ang masasabi ng maraming tao—buhay,
patay, nakasaksi man o hindi, naimpluwensiyahan—hinggil sa buhay
at naisulat ni Ka Amado?
Dahil makata si Ka Amado, rekisito ang pagsusuri sa kaniyang
mga tula, pagkakatalogo batay sa panahon, impluwensiya at paksa
at pagkakalathala. Dahil nobelista si Ka Amado, ilalapat ang
kaniyang mga pamosong nobela sa nangyari at nangyayari noon sa
bansa pati na ang paglalapat ng “realidad” na tinugis ni Reyes sa
kahabaan ng kaniyang riserts. Dahil lider-manggagawa si Ka Amado,
may ekstensibong talakay hinggil sa kaniyang mga gawaing may
16
kinalaman sa kaniyang bokasyong isulong ang kapakanan ng
manggagawang noong panahon ng kaniyang mortal na pag-iral ay
bago-bago pa lamang kinikilala sa ating bansa kung kaya may hibo
ng radikal na pagsulong mula sa makalumang paraan ng pagkilala sa
mga obrero. Dahil bilanggong-politikal si Ka Amado, naroon din,
at marapat na naroon din, ang hinggil sa kaniyang buhay sa
piitan, ang kaniyang mga iconic na tulang naisulat sa bawat
panahong inilagi sa bilibid at kung paano ito naipupuslit
palabas. Dahil mamamahayag si Ka Amado, ilalangkap ang milieu
nito sa riserts. Dahil guro si Ka Amado, taglay ng kahon ang
buhay niya sa akademiya hanggang sa huling sandali, totoong
huling sandali, ng kaniyang buhay na nagnais matsekan ang mga
papel sa pagsusulit ng kaniyang mga prominenteng mag-aaral tulad
nina Rose Torres-Yu at Lilia Antonio. At ito sa kabuuan ang laman
ng riserts. Ngunit masasabing karaniwan kung ito lamang. Kaya
higit pa rito ang halos buong buhay na pagtugis ni Reyes sa
buhay, tula, at leyenda ng makatang taga-Tundo at Hagunoy.
17
III. Metodolohiya at Limitasyon
Naratibo at Diakronikong Sampling
Kinikilala na ng akademiya ang dulog-riserts gamit ang
metodolohiyang naratibo o narrative sa Ingles sa ilalim ng mas
malawak na kategorya ng qualitative research. Sa mas tiyak na
pagtukoy, papailalim ang pagtatangkang pagsulat ng biograpiya sa
sinasabi ni Christine Bold (2012) na temang biographical data.
Ayon kay Bold, dapat intensiyon ng mananaliksik ang pagkolekta ng
biographical data bilang realistiko sa konteksto (9). Maaaring
maging kasangkapan sa riserts na ito ang pakikipamuhay sa sabjek
bilang ethnographic replication upang mabuo ang biyograpiya.
Sa riserts na ito, may dalawang landas na magkasabay na
tatahakin: una ang representasyon ng mga tula ni Antonio bilang
panulukan ng kaniyang buhay na lilimiin at ihahayag sa
pamamagitan ng diakronikong pagpili ng kaniyang mga tulang
kakatawan sa bawat panahon. Ikalawa, ang mismong pagsasalaysay ng
buhay ng makata na maaaring katawanin ng insidental na pagtula.
Sa ganoong pagtahak nang sabay sa dalawang landas, matatamo ang
19
daynamiks ng paglikha at buhay ng makata sa loob at labas ng
panitikan.
Gayunman, ayon kay Bold, ang paraan ng riserts gamit ang
naratibo bilang dulog ay mayroong kahinaan. Sinabi ni Bold, batay
sa kaniyang pagsipi kay Donald Polkinghorne, na ang naratibo ay
“always tentative and cannot provide certainties.” Sa kabila
nito, binanggit din naman ni Bold ang mahabang kasaysayan ng
naratibo sa riserts na ginagamit na sa larang ng kasaysayan at
teolohiya (17). Dagdag pa ni Bold tungkol sa bisa ng naratibo
bilang riserts:
“Narrative is central to human
experience and existence, providing
opportunity to share the nature and order of
events at a particular time of history. It
helps to define self and personal identity.”
(17-18)
Mahalagang punto ring binanggit ni Bold ang naratibo bilang
salaysay ng prosesong kung ihahakab sa mungkahing riserts hinggil
sa Tulambuhay ni Antonio, maisisiwalat ang proseso ng kaniyang
paglikha (19). Ang prosesong ito ay may lubos na pakinabang naman20
hindi lamang sa tumatangkilik sa kaniyang tula at buhay
(Tulambuhay) kung hindi maging sa mga nagnanais tumula. Maaaring
i-approximate ng mga nagnanais tumula ang anumang maisisiwalat na
proseso ng pagkatha ni Antonio. Bagay na makatutulong ng lubos sa
pagyabong ng nananamlay na larang ng panitikan sa bansa sa
pamamagitan ng pag-usbong ng iba pang makatang gagamit sa padron
ng paglikha ni Antonio.
Sa ikalawang landas na tatahakin naman, mariing
iminumungkahi ni Edel Leon (1973) ang kahalagahan ng higit na
deretsahang Literary Biography upang ayon sa kaniya ay “to restore
the very sense of life to the inert materials that survive an
individual’s passage on this earth,” na tumutukoy sa mga kathang
tiyak na maiiwan ng makata/manunulat sa kaniyang pagyao.
Idinagdag pa niya na ang biographical process ay “civilizing—a
humanizing—process.” Pinatingkad pang lalo ni Edel na ang
biyograpiya ay isang tala (record sa Ingles) gamit ang mga salita
na “...of something that is mercurial and as flowing, as compact
of temperement and emotion, as the human spirit itself. (1)
21
Mabigat na katangiang dapat taglayin ng mga nagnanais
sumulat ng biyograpiya na maging masinop, organisado at lohikal
sa paglalarawan ng “elusive flamelike human spirit” ng sinumang
ginagawan ng biyograpiya. May mahalagang pansin din si Edel
hinggil sa pagsulat ng biyograpiya na ang saligan ay buhay at
hindi lamang ang walang-buhay na katha (inert materials, ayon kay
Edel), na lalong nagpaningning sa pangangailangang isulat ang
buhay ng makatang patuloy na humihinga. Sabi ni Edel,
“The biographer that works from life...
has an extraordinary advantage over the
biographer who works from the document... He
ha seen his man in the flesh, he has been
aware of a three-dimensional being, drawing
breath and sitting in the midst of an age
they both share. In his mind he retains a
sharp image of his subject. He has heard the
voice and seen the gesture.” (23-24)
Sa ganitong linya ng pagbibigay ng dahilan sa pagsulat ng
biyograpiya, mangangailangan ng pagmamadali upang hindi abutin,
muli, ayon kay Edel, ng “[The latecoming biographer] hears only
the rustle of the pages amid the silence of the tomb.” (24) Isa22
pa ring malinaw na puntong mapanghahawakan na dapat isulat ang
biyograpiya hangga’t naririto sa daigdig ang paksa. Hangga’t wika
nga’y kapiling ng mananaliksik o biyograpo.
Samantala, batay pa rin sa proposisyong iminumungkahi ni
Edel ang prosesong dapat isakatuparan ng sinumang susulat ng
biyograpiya na inilahad niya sa pagkakasunod na kabanata ng
kaniyang aklat/manwal sa pagsulat ng biyograpiya. Una ang
pamimili ng sabjek na sa papel na ito ay nakatuon sa dakilang
makatang si Teo T. Antonio. Ikalawa, matapos ang rekisito ng
pagpili ng sabjek ay ang pangangalap at paghahanap ng materyal:
nalathala at hindi nalathalang tula, sanaysay, liham, at sa
kasalukuyan, komento at istatus sa social networks. Sa puntong
ito, papasok ang diakronikong pagpili ng kakatawang tula sa bawat
panahong isasalaysay ng mananaliksik hinggil sa buhay ni Antonio
bilang makata ng bayan: ang tradisyon ng nakamihasnan niyang
pagtula; mga tula sa panahon at matapos ang Batas Militar; at ang
kaniyang mga tula sa panahon ng Internet.
Ikatlo, at ang sinasabi ni Edel na pinakakritikal ay ang
kritisismo ng mga sampling ng akda ng sabjek na nakapaloob sa
23
labindalawang aklat, mangilan-ngilang publikasyong hindi pa
nakabibilang sa alinmang kalipunan, at mga tulang titipunin pa
lamang sa hinaharap. Tandaan na prolipiko si Antonio na gumagamit
na rin ng social media sa paglalathala ng kaniyang tula lalo’t
nakatira na siya, sana’y pansamantala, sa Estados Unidos.
Gayunman, upang higit na umakma sa kontekstong Filipino ang
riserts, tutumbasan ng maka-Filipinong panunuri ang mga sampling
na tula batay naman sa proposisyong pangkritika ni Virgilio S.
Almario, ang Bagong Pormalismong Filipino na
Ikaapat ang Psychoanalysis bilang paraan upang lubos na
makilala ang sabjek. Ayon sa mungkahi ni Edel, mabisang paraan
ang psychoanalysis upang bigyang kahulugan ang mga simbolong
nakapaligid sa buhay at pagkatha ng sabjek. Sinabi pa ni Edel na
“The psychoanalyst, reading the pattern
of the work, can attempt to tell us what was
wrong with the artist’s mental or psychic
health. The biographer, reading the same
pattern in the larger picture of the human
condition, seeks to show how the negatives
were converted to positives...” (95)
24
Ilang halimbawang ibinigay ni Edel ang transpormasyon ng
paglikha ni Proust buhat sa kaniyang dinaramdam na allergy at
“withdrawal from the pain of experience” tungo sa bagong mundo ni
Combray; si Virginia Woolf buhat sa kaniyang kalungkutan tungo sa
paglikha ng makatotohanang tauhan sa kaniyang akda. Dahil totoong
hindi naman talaga nagkakalayo ang sikolohiya at panitikan. Ayon
pa rin kay Edel, matagal nang ginagamit ang pag-unawa sa takbo ng
isip ng tao na inilalapat sa mga tauhan halimbawa sa dula ni
Shakespeare tulad ng Hamlet.
Sa bahaging ito, sisipatin ang mga detalye hinggil sa
panipat-sikolohiya na ipinapanukala nina Virgilio Enriquez na
Sikolohiyang Filipino. Naniniwala ang mananaliksik na higit na
liliwayway ang kahulugan ng kaniyang mga tula kung kikilanin ang
mga salik sa maka-Filipinong pagsusuri ng kaisipan.
Ikalima sa prosesong dapat daanan ng sumusulat ng
biyograpiya ang konsiderasyon sa oras, ang kulminasyon ng
kaniyang gawain bilang biyograpo kung kailan nagsasama-sama ang
katangiang kumilala, imbestigador, kritiko, at sikologo. Sinasabi
ni Edel na kritikal ang pagtimbang sa tanong na “kailan”.
25
Nakasalalay sa kamay ng biyograpo ang kaniyang isusulat: kung
kailan, at anong bahagi ng buhay magsisimula at magtatapos. (123)
Upang matugunan ang kahingiang ito, sasaklawin ng riserts
ang panahon buhat nang siya ay unang maglathala ng tula—o
bumigkas ng tula kung mayroong mapanghahawakang katibayan hinggil
dito—hanggang sa taong 2013, na malaking tsansang kabilang ang
mga tulang isinulat ni Antonio sa social network.
Tulambuhay
Masinop si Antonio. May mataos na paniniwala ang
mananaliksik na ang mga kalipunan niya ay sumasagisag sa bawat
bahagi ng kaniyang buhay kung kaya nga diakroniko. Taglay halimbawa
ng ilang mga tula sa kalipunang Taga sa Bato ang ilang detalye ng
kaniyang kabataan sa Bulacan, Bulacan. Kung paano ang danas ng
pangingisda at paglalaro sa mga pilapil ng palaisdaan. Nilalaman
din ng Taga sa Bato ang ilang dated na isyung panlipunan noong
panahong iyon na maaaring magkaroon ng panibagong sipat kung
ilalapat sa kasalukuyang isyung panlipunan.
26
Kaalinsabay nito, batay sa mungkahing proseso ng pagsulat ni
Edel, maraming kakaharaping hamon ang mananaliksik. Maaaring sa
kahabaan ng proseso, at bagay namang inaasahan ng mananaliksik,
ay tumining ang pangangailangang tumutok lamang sa isa o ilang
facet ng buhay ni Antonio bilang tao at makata. Maaari rin, at
malinaw itong posibilidad, na kailangang sipatin sa malayuan o
makrong pagtanaw ang pagsulat ng biyograpiya ng isang dakilang
makatang tulad ni Antonio. Sa kasalukuyang estado ng riserts na
ito, mahalagang ituon ang pansin at ikawing sa mabuting hangarin
ni Edel ang pagsulat ng biyograpiya ni Antonio: na isang
humanizing o pagsasataong proseso ang pagsulat ng biyograpiya.
Dahil bukod sa dakilang makata, mahalagang makilala si Antonio
bilang tao habang kapiling pa natin siya.
Batayang Konseptwal
27
Sanggunian
Aklat
Almario, Virgilio S. “Balagtasismo Versus Modernismo”. Ateneo De Manila University Press. Lungsod Quezon. 1984.
---. “Mutyang Dilim Ang Bagong Pormalismong Filipino sa Pagbasa ng Tula” Talingdao Publishing. Lungsod ng Marikina. 2001.
Antonio, Emilio Mar. “Ang Nayon Ko at iba pang tula”. Ateneo De Manila University Press. Lungsod Quezon. 1999.
Antonio Teo T. “Biro-biro Kung Sanlan”. Tagak Series. Kamuning, Lungsod Quezon. 1982.
---. “Taga sa Bato Mga Piling Tula 1973-1988.” Ateneo De Manila University Press. Lungsod Quezon. 1991.
---. “Distrungka.” University of Santo Tomas Publishing House. Manila. 2011.
28
PAGSUSURI SA MGA KUMAKATA WANG TULA AT PAG NG MAKATANG SI TEO T. ANTONIO
SIMULA NG PAGTULA
PANAHON NG BATAS MILITAR
MATAPOS ANG BATAS MILITAR
PANAHON NG INTERNET
LIPUNANG PILIPINO
Bigornia, Mike. Balani at Birtud ng Tula ni Teo T. Antonio. nasa “Biro-biro Kung Sanlan”. Tagak Series. Kamuning, Lungsod Quezon. 1982.
Bold, Christine. “Using Narrative in Research.” Sage PublicationsLtd. London. 2012.
Edel, Leon. “Literary Biography.” Indiana University Press. Bloomington. 1973.
Pantoja-Hidalgo, Critina. “Creative Nonfiction, A Manual for Filipino Writers.” The University of the Philippines Press. Quezon City. 2005.
Reyes, Jun Cruz. “Ka Amado.” The University of the Philippines Press. Quezon City. 2012.
Tesis
Delos Reyes Joselito D. “Sa Mataas na Upuan: Kasaysayan at Poetika ng High Chair” M.A. Thesis. De La Salle University, 2011.
Baquiran, Romulo Pascual. Email sa mananaliksik. 11 Disyembre 2012.
Sanchez, Louie Jon. Email sa mananaliksik. 10 Disyembre 2012.
Villasis, Enrique. Email sa mananaliksik. 11 Disyembre 2012.
29