TAQLEED OR FIQAH-E-JAFFARIYA…

For scan pages get me at : shiasolabirity@gmail.com

Apne parwardigar ki iss naimat per usski hamd baja laata hun jisney mujhey itni taufeeqaat se nawaza aur main iss qabil hua kay Quran o hadees k zareeay se koi baat kar sakoon aik nihayet he ehem aur ikhtilaafi mozoo jo kay shia k darmiyaan hai aur issper bohot se azhaan mutaasir horahey hain aur bohot se azhaan issey nagawaar jaantey hain aur masila Taqleed-e-Mujtahid ka hai jo hazraat taqleed k qayel hain wo khud ko usooli kehlaatey hain aur jo hazraat issey ghalat jaantey hain wo khud ko akhbaari kehlaatey hain in dono main se kiska moaqaf durust hai issper tafseelun guftugoo karney se qabl iss baat per aik nazar kartey hain kay akhbari khud ko akhbari kay naam se mosoof kyun kartey hain aur yeh kay wo kin aqayed kay motaqid hain aur kyun usooli khudko usooli kehtey hain aur kin aqayed kay motaqid hain….

AKHBARI AUR UNKEY AQAYED…

Akhbari lafz “mukhabir” se akhaz kiya gaya hai jo kay arabi zubaan ka lafz hai aur isska matlab hai khabar dainey wala Usool-e-Kafi Kitab-ul-Hujjat main hai kay Imam Jaffar Sadiq(as) ne farmaya “RasoolAllah(saw) mukhabir thay aur issi tarah unkey baad kay Ayma(asws)” lehaza akhbari uss qoum ko kehtey hain jinhon ne Mukhabir-e-Sadiq ki taqleed kay baghair her kisi ki taqleed ko apne leay haraam qaraar diya ho aur jo kay her haal main sirf uss mukhabir ki baat per aitmaad kartey hon aur usskey qol kay saamney her kisi kay qol ka rad kartey hon choonkey shia main akhbari hazraat maa siwaaey Quran aur Itrat(asws) kay kisi ki taqleed nahin kartey aur na inkey qol per kisi ko muqaddam kartey hain balkey khaalisattan apne aap ko Mukhabireen-e-Masumeen(asws) kay muqalideen kehlaatey hain issleay unhon ne apne aapko iss naam se mosoof kiya….

KYA AKHBARI GHER MUQALID HAIN?

Yeh Mashoor tou yaqeenun hai kay akhbari gher muqallid hain aur kisi ki taqleed nahin kartey magar yeh kehna durust nahin hoga kay wo gher muqallid hain kyunke wo tou khud kehtey hain kay hum Quran aur Ahl-e-Bait(asws) ki taqleed kartey hain aur isswaqt hum Imam-e-Zamana(a.j.f) ki taqleed main hain kyunke Masoom(saw) kay elawa kisi ki taqleed durust nahin choonkey taqleed ka lughwi maani itaat se ibaarat hai lehaza wo kehtey hain khuda ne humain ool-ul-Amr ki itaat ka hukm diya hai hum kyun ool-ul-amr kay elaawa kisi ki itaat karain kyunkey isski aik wajah yeh hai kay muqalideen ka yeh aqeedah hai kay jub kisi Faqih ki taqleed ki jaati hai tou usski baat

maan,na wajib hojaati hai aur choonkey Allah ne Apne aur apne Rasool(saw) aur ool-ul-Amr jo kay shion kay nazdeek Ayma(asws) hain ki itaat ka hukm diya hai aur kisi ki itaat ka hukm nahin diya lehaaza gher Masoom faqih ki taqleed wajib nahin balkey khilaaf-e-shariyyat hai…

TASHAHUD AUR AKHBARI….

Aur akhbarion kay aqaayed main se aik amr yeh bhi hai kay wo Tashahud main Ameer-ul-Momineen(asws) ki wilayet o khilafat ki gawahi bhi daitey hain aur isskey baghair namaz ko namukammil jaantey hain aur issey ain juzw-e-Namaz wajib kay tor per ada kartey hain….

USOOLI AUR UNKEY NAZARIYAAT…

Yeh wo doosra grow hai jo kay her tarah se akhbarion se bazaar hai yun tou usooli usool se ibaarat hai lehaza usool kay motaaqid wo afraad jo issey sharee tor per wajib samajhtey huey uss per amal kartey hain wo usooli hain aur usooli gher masoom ki taqleed kay bhi qaayel hain aur issper wo yeh daleel pesh kartey hain kay ager ajkal kay zamaaney main humain furooi masail poochney hon tou hum kis se dar-e-aaft karain?choonkey humaari iswaqt Imam(as) tak risaai mumkin nahin lehaza humain aik aisey shakhs ki taqleed karni chaheeay jo deen o fiqah ka mahir yani faqih ho aur hum uss se masail dar-e-aaft karain lehaza wo jo bhi fatwa dega hum uss per amal karaingey kyunke wo ilm main humse behter hai lehaza wo job hi baat kahega hum usski satah ko nahin paa saktey aur ussper aitraaz nahin karsaktey kyunke wo humse ziyada jaanta hai aur aisey fuqaha kay grow ko wo ulama kay naam se mosoof kartey hain….lekin usoolion kay iss istidlal ka akhbari jo jawab daitey hain ussey zara baad main biyaan kartey hain…

TASHAHUD AUR USOOLI…

Yeh masila tou usoolion kay darmiyaan bhi ikhtilaafi hai kyunke baaz najfi mujtahideen namaz main “Ali un waliullah” parhney ki ijaazat daitey hain magar aksariyyat main usooli issey ghallat aur mun gharrat tasawur kartey hain aur jo mujtahideen isey jaiz qarar daitey hain wo bhi issey wajib nahin kehtey balkey issey jaiz ya mustahab kehtey hain…

Ab hum iss ikhtilafi pehlu main se fareeqain kay nazariyaat ko mad-e-nazr rakhtey huey Quran o Hadis ki roshni main haq ko waazey karney ki koshish kartey hain kyunke Haq tou kisi aik jaanib he hai ya usooli sahih hain jo kay aksariyat main paaey jaatey hain ya phir akhbari durust hain agerchey qaleel hain lehaza hum ghor kartey hain kay aik mujtahid kay mutalliq usoolion ne jin khasaal o sifaat ka ehtimaal diya hai wo durust hai ya ghallat ain shia rijaal kay mutaabiq ager durust hain tou akhbarion ko apne qol per qayem rehtey huey Masoom(as) ki hadis per amal karna hoga aur ager wo sub gher Masoom(as) kay leay saabit nahin jiskey usooli motaaqid hain tou usool kay mutaabiq usoolion ko Masoom(sa) kay qol per amal karna hoga aur unkey qol per kisi kay qol ko muqaddam nahin karna hoga…

JAWAM-E-UL-ILM(Comprehensive Knowledge)

Murad iss se yeh hai kay kisi ka ehaata un tamam uloom per ho jinhain parwardigar ne insanon kay leay halaal qarar diya hai jesa kay Imam Jaffar Sadiq(asws) ne farmaya “Main janta hun jo kuch asman aur zameen main hai aur main janta hun jo jannat o dozakh main hai aur jo ho chukka aur jo honay wala hai phir kuch dair sukoot kay baad farmaya yeh sub mene jana kitab-e-khuda se kyunke wo fermata hai “ismey her shey ka biyan hai”

[Usool-e-Kafi Jild 2 Kitab-ul-Hujjat safa 179 baab 47 hadis 2 matboa zafar shameem publications Karachi]

Yeh thi jawam-e-ul-ilm ki tareef jo Masoom(sa) kay farman ki roshni main hum ne dekhi lekin kya aisey khasail aik gher Masoom(as) kay leay saabit hain?ager saabit hain tou usski taqleed durust hai kyunke ussper koi cheez posheedah nahin aur wo sub kuch janta hai lehaza uss se keay jaaney waaley sawal ka munaasib aur hujjat jawab milega iss lehaz se usski taqleed bilkul durust hai lekin ager aisey khasaal aik gher Masoom(as) kay leay saabit na hon usski taqleed durust nahin chahey wo Quran o tafseer o ahadees e Masoom(as) ka samaa kar chukka ho kyunke baaz auqaat ussper aisa sawal bhi kiya jasakta hai jiska hul ussey kaheen se na milega na quran se aur na hadees se aisey halaat main wo apni raaey se fatwa dega jo kay fiqah-e-jaffariya main haram aur takfeer hai aur mene shia rijaal main aisa kaheen nahin dekha kay koi gher Masoom(as) her masiley ka hul janta ho balkey isskey mukhallif umoor ko parha hai…

MUJTAHID HER MASLA NAHIN JANTAY…

(1)-Muhammad bin Hakeem ki riwayet hai kay mene Imam Moosa Kazim(as) se kaha main ap per fida hun hum ne ilm-e-deen hasil kiya aur Ap(as) ki wajha se doosron se

ilm haasil karney per be parwah hogaey yahan tak kay hum main se kuch log jub jalson main jaatey hain aur log humse sawal kartey hain tou hum unko jawab dey daitey hain isleay kay khuda ne hum per ehsaan kiya hai lekin baaz auqaat aisey sawalaat bhi saamney ajatey hain hum ne inka jawab na ap se haasil kiya na apky Aba-e-Tahireen(asws) se pus aisey moqey per jo humain aata hai isskey her pehlu per ghor kar(qiyaas kay zareeay) jawab dey daitey hain farmaya aye ibn-e-Hakeem afsos afsos kya yeh sahih hai?ismey halaakat hai jisney aisa kiya wo halaak hogaya phir farmaya Allah lannat karey abuhanifa per wo kehta hai kay iss masley main Ali(as) yeh kehtey hain aur main yeh kehta hun yaani mera qol inkey qol se behter hai ibn e hakeem kehtey hain kay mene Hashaam se kaha wallah main chahta tha kay deen main qiyaas ki jaazat mil jaati..

[Usool-e-Kafi Jild 1 Kitab-ul-Aqal o Jehal safa 118 baab 20 hadis 9 matboa Karachi]

(2) Abu Baseer(r.a) ki riwayet hai kay mene Imam Jaffar Sadiq(as) se poocha baaz auqat hum per aisey masail pesh keay jaatey hain jinka jawab humko na quran se milta hai na hadees main pus hum khud he ghor kar kay jawab dey daitey hain farmaya khabardar aisa hergiz na karna ager tumhara qiyaas theek hua tou tumhain isska ajar nahin milega aur ager tum ne ghalti ki tou Allah talla per jhoot bola…

[Usool-e-Kafi Jild 1 Kitab-ul-Aqal o Jehaal safa 119 baab 20 hadis 11 matboa karachi]

MAZKOORA RIWAYET KAY EHEM NUKAAT…

Ager in dono riwayaat ko ghor se her pehlu se parkha jaaey tou bohot se masail ka hul humaarey saamney aata hai aur bohot se haqaiq waazey hotey hain sub se pehle tou mujtahideen kay ilm-e-rijaal ka daawa jhoota saabit hota hai bila shubba usooli unsey jo bhi masail poochtey hain wo unka koi na koi hul zaroor bataatey hain magar wo yeh nahin bataatey kay Quran ki kis ayat ya Masoom(as) ki kis hadis ki roshni main yeh masla bata rahey hain phir in riwayaat se saabit hota hai kay mujtahideen her cheez ka ilm nahin rakhtey kyunke Abu Baseer aur ibn e hakeem jese khushnaseeb jinhain Ayma(as) ki sohbat ka sharf haasil hua aur jinhon ne bara-e-raast Ayma(as) se ilm seekha wo khud kehtey hain kay humain baaz masail ka hul maloom nahin hota ager wo log jo Masoom(as) se bara-e-raast seekhtey thay her cheez ka ilm nahin rakhtey tou aj takribun 1300 saal baad kay mujtahid jinhon ne Ayma(as) ko dekha tak nahin na unka zamana paya wo kese tamam cheezon ka ilm rakhtey hain?magar phir bhi wo her

aik masiley ka koi na koi hul zaroor bataatey hain jubkey yeh nahin batlaatey wo yeh masila kahan se ley rahey hain sukoot kitni bhalaai hai ager koi masila na pata ho tou keh dou main nahin janta magar unhain aisa kehtey huey sharam mehsoos hoti hai kay log humain masnad-e-qaza kay qabil nahin samjhaingey jubkey yeh saabit hogaya kay koi gher-e-Masoom(as) tamam cheezon ka ilm nahin rakhta tou issi tarah usski taqleed batil hojaati hai kyunke wo tou her shey ka ilm nahin rakhta aur wo logon ko kese masail bataega jubkey wo khud mohtaaj hai….

ULAAMA KON HAIN?

Yeh bhi nihayet he Qaabil-e-ghor baat hai jo hum ajkal her aik shakhs ko Alim keh daitey hain aam tor per yeh lafz mujtahideen kay leay istemaal hota hai magar yeh durust nahin Qol-e-Masoom(as) isskey baatil honay ka shahid hai kyunke Aba Sallat ki riwayet kay mutaabiq Imam Ali Raza(as) ne farmaya Ulama se Muraad All-e-Muhammad(asws) hain…

[Maani-ul-Akhbar Skeikh Sudooq baab 159 safa 226 hadis 1 Al kissa publishers Karachi]

Usoolion kay 2 moaqaf tou bilkul ghallat saabit hotey hain aik yeh kay mujtahideen kay pas ilm-e-rijaal hai aur doosra yeh kay wo ulama hain jubkey Masoom(as) kay qol kay mutaabiq ulama ka lafz sirf All-e-Muhammad(as) Ayma Masumeen(asws) kay leay istemaal kiya jasakta hai aur kisi bhi gher Masoom kay leay iss lafz ka istemaal Ayma(as) kay qol ki khilaaf warzi hogi…

MUJTAHID IMAM KA NAIB(aik afsaana)

Usoolion ne masla-e-taqleed main nihayet he mubaaligha araai se kaam liya hai aur her tarah se apne mujtahid kay tahafuz kay leay koi na koi afsaana gharr daala!!!!inhee main se aik qabil-e-ghor qissa yeh hai kay mujtahid Imam(as) ka naib hota hai aur Imam(as) se bara-e-raast ilm haasil karta hai jub uss se koi sawal poocha jata hai tou wo usska jawab Imam(as) se lekar deta hai aur Imam(as) khud usskey pas akar ussey jawab daitey hain jis se wo logon kay masail ko hul karta hai…

JAWAB FAQEER KA…

Jahil aur kum aqal ager aisi kahani bana ley tou taajub nahin hota magar aisa shakhs jo Quran o hadees se ashnaai rakhney kay bawajood aisey kahani ko khalq karey tou bohot ajeeb maloom hota hai lehaza iss silsiley main faqeer ka jawab yeh hai kay ager aisa hai tou yeh sub konsi sahih aur yaqeeni riwayet se saabit hai?balkey shia rijaal kay mutaabiq aisi koi riwayet nahin…ager yeh durust hai tou Qummi mujtahideen aur najfi mujtahideen kay darmiaan Tashahud kay masila per ikhtilaaf kyun hai?kyun baaz mujtahideen isski ijaazat daitey hain aur baaz kay nazdeek yeh batil hai(MAAZALLAH) kyunke yeh dor tou taqayyiah ka hai nahin ager hota tou isski taveel bhi mumkin thi taqayyiah na honay kay bawajood jub mujtahideen kay darmiaan ikhtilaaf hai tou kya isska matlab yeh hai kay Imam(as) qummi mujtahidon ko kuch aur bataatey hain aur najfi mujtahidon ko kuch aur ager taqayyiah hota tou phir issey Iraq main apnaya jata kyunke wahan shia aur sunni dono grow hai jubkey iran main tou aksariyyat shia ki hai hukoomat shia hai aur sarkari mazhab bhi Fiqah-e-Jaffariya hai aur na wahan shia ki jaan ko khatra hai lehaza yeh umoor humain waazey tor per bataatey hain kay mujtahid koi bhi bara-e-raast Imam(as) se ilm nahin leta aur aisa aqeedah rakhna Imam(as) per tohmat lagaaney kay baraber hai kay Imam(as) Iraq main kuch aur fatwa daitey hain aur iran main kuch aur….

FATAWA KA NUKTA-E-NAZR…

Mujtahideen kay wo fataawa jo awaam kay leay jaari keay jaatey hain aur jinkey baarey main mujtahideen aur unkey muqalideen ka yeh aqeedah hota hai kay yeh fatwa wo bara-e-raast imam se ley rahey hai ki buniyaad akser kitab o sunnat o Itrat(asws) kay bar khilaaf hotey hain jesa kay syedzadi kay aqad ka masila jo kay bila shubba Masoom(as) kay Qol kay mutaabiq ummati per haraam hai aur sadqa jo kay bani hashim per haram hai issper bhi mujtahideen Farameen-e-Masoom(as) ki khilaaf warzi kartey huey isskey bar’aks fatwa daitey hain issi leay Masoom(as) ne humesha faqih-e-sheher kay fatwa kay khilaaf amal karney ka hukm diya hai….

FAQIH-E-SHEHER KI MUKHALIFFAT KARO…

Ali bin asbaat se riwayet hai kay mene Imam Ali Raza(as) se poocha basa auqaat aisey bhi hota hai kay aik aisa waaqiya hua jiskey baarey main humaarey leay zaroori hai kay hum usska sharee hukm maloom karain lekin sheher main humara aisa koi dost nahin jis se hum isskey baerey main istifsaar kar sakain iss soorat-e-haal main humain kya

karna chaheeay? Imam Raza(as) ne farmaya faqih-e-sheher kay pas jao aur uss se istifsaar karo aur wo jo bhi fatwa dey usskey khilaaf amal karo issleay kay haq usskay khilaaf hai…

[Ayoon Akhbar-ul-Raza(as) baab 28 safa 303 hadis 11 matboa Muhammad Ali book agency G-9/2 Islamabad]

Imam(as) kay qol main yaqeenun suchaai hai aur Imam(as) per koi cheez posheeda nahin hoti issleay in logon kay fatawa kay khilaaf amal karney ki taqeed farmai aur yaqeenun jesa kay hum ne zikr kiya yeh log sadaat ko sadqa daina jaiz samajhtey hain aur syedzadi ka aqad ummati se jaiz samajhtey hain jubkey Masoom(as) ka qol isskey khilaaf hai lehaza humain inkey qol ko chor kar usskey mukhalif amal karna hai jo kay Masoom(as) ka raasta hai aqad-e-sadaani aur sadqa mozoo nahin hain issleay hum chund riwayaat bator-e-namoona pesh kartey hain…jinsey maloom hojaega kay mujtahideen kay fatwey Masoom(as) kay khilaaf hain…

SADQA…

Muhammad bin ismail bazeeh se riwayet hai kay Imam Ali Raza(as) ne aik maktoob main mujh ko tehreer farmaya kay sadqa bani hashim kay leay halaal nahin magar 2 sooraton main aik tou jub wo bohot piyaasey hon aur paani mil jaaey aur doosrey aik hashmi doosrey hashmi ka sadqa ley sakta hai…

[Manla Yahzar-ul-Faqih Jild 2 safa 31 hadis 1640 matboa Al kissa publishers Karachi]

Mujtahideen tou Fatimion per issey halaal qaraar dey rahey thay magar yeh tou Fatimi sadaat samait tamam bani hashim per haram saabit hota hai Masoom(as) ki hadis ki roshni main aur iss riwayet se yeh bhi saabit hota hai kay syedzadi ka kufv sirf syedzada he hosakata hai kyunke aik hashmi ka doosrey hashmi per sadqa halaal hai lehaza iss aitibaar se hashmi aik doosrey kay hum kufv hain aur hashmion per ummation ka sadqa haraam iss baat ki daleel hai syedzadi ummati mard se afzal hai aur wo usska hum kufv nahin bun sakta…

KYA AYMA(ASWS) NE AISA KIYA?

Siqa-tul-Muhadiseen Sheikh Abbas Qummi ne tareekh-e-Qum se naqal kiya hai kay Razaiya sadaat apni betion ki shaadi nahin kartey thay kyunke unhain apna humsar-o-

kufv nahin milta tha aur Hazrat Moosa ibn-e-Jaffar(as) ki 21 betiaan thieen aur kisi ne shaadi nahin ki aur yeh cheez inki betion ki adat hogai hai aur Imam Muhammad Taqi(as) ne madinah main 10 dihaat apni betion aur behno per waqf keay thay jinki shadi nahin hui thi aur isski aamdani se razaiya sadaat jo qum main muqeem thay unka hissa madinah se aata tha…

[Skheikh abbas qummi Muntahee-ul-Amaal Jild 2 safa 87 matboa imamia publications lahore]

Yeh riwayet waazey tor per bataati hai kay kisi bhi soorat ummati se syedzadi ka nikah haraam hai chahey wo kanwaari mar jaaey kyunke ajkal kay mujtahideen Imam Muhammad Taqi(asws) jo kay Allah talla ki hujjat hain aur novain Imam(as) unsey ziyada deen o shariyyat ko nahin jantey aur Imam Moosa Kazim(as) ki betion kay jin main Bibi Fatima Masooma(saw) Qumm bhi shaamil hain se ziyada deen o shariyyat kay qawaneen nahin jantey aur uswaqt Imam-e-Zamana(as) jubkey Imam-e-Jawad(as) aur sahib-e-wussat bhi thay jesa kay riwayet se saabit hai magar isskey bawajood Imam(as) ne kisi ki shadi nahin ki balkey apni behno aur betion ki shaadi bhi nahin ki lehaza yeh seerat-e-Masoom(as) se saabit hua kay syedzadi ka nikah ummati per her haal main haraam hai aur mujtahideen ka yeh fatwa bhi qol o fehel-e-Masoom(as) kay bilkul khilaaf hai…

IMAM-E-SADIQ(A.S) AUR AIK KHAARJI…

Aqa-e-Najfi ne Bihar se naqal kiya hai kay aik khaarji ne Imam Jaffar Sadiq(as) se khuwastgaari ki tou Imam(as) ne farmaya: Tumhara kufv tumhari qoum main hai zaat-e-ahdiyyat ne sadqa jo logon kay hathon ka mail hai hum Ahl-e-bait(a.s) per haraam kiya hai iss buniyaad per hum Allah kay is imtiaz ko barqaraar rakhna chahtey hain jo ussney humain doosron se diya hai aur hum apni iss fazeelat main jo Allah ne humain atta ki hai kisi aisey ko shareek nahin karsaktey jo issmey shareek nahin ho…kharji yeh sun kar utha aur kehta gaya aaj jis tarah Jaffar ibn-e-Muhammad(asws) ne mujhey lajawaab kiya hai aisey kabhi kisi ne nahin kiya…

[Adamatus Saakiba Jild 2 page 545 matboa wali ul asr trust jhang]

Khaarji ne Imam(as) ki gher Masoom dukhtar ki khuwastgari ki magar choonkey wo syedzadi thieen aur unkey leay khuda ki taraf se tehreem-e-sadqa thi issi leay Imam(as) ne inkar farmaya aur saabit hua mujtahideen Masoom(as) ki baat kay khilaaf fataawa daitey hain issi leay Imam Ali Raza(as) ne farmaya inkey fatwey kay khilaf amal karo kyunke haq inkey khilaaf hai aur yeh tamam fataawa apni khuwaish se daitey hain

kyunke ap ne dekha kay Masoom(as) ka qol inkey fataawa kay khilaaf hai magar dukh hota hai un logon per Masoom(as) ki baat ko nazar andaz kardaitey hain aur gher Masoom ki baat ko suntey hain aur aisey he logon kay leay irshad-e-Rab ul izzat hua kay “Aye Sun’ney walo haq ko chor kar logon ki khuwaishaat ki perwi(following) kyun kartey ho jubkey Khuda ne shariyyat tou tum sab kay leay aik he banaai hai”[Surah-e-Maida ayat 48]

Aur haq tou yaqeenun Ayma Masumeen(asws) kay aqwaal hain ager hum Masumeen(asws) kay aqwaal ko chor kar gher masoom mujtahideen ki batain sun’ney lagain aur un per amal karney lagain jubkey Masoom(as) ka qol isskey khilaaf ho tou emaan se bataaeay kya hum iss ayat kay khitaab qaraar nahin paatey?

AMEER-UL-MOMINEEN(A.S) KA KHUTBA…

Hazrat(as) ka kalaam jisey sahib-e-nahj-ul-balaghah ne naqal kiya hai kay Ap(as) ne farmaya:

“Jub in main se kisi kay saamney koi muaamla pesh kiya jata hai tou wo apni raaey se iska hukm lagaata hai phir wohi Masila baeeina doosrey kay saamney pesh hota hai tou wo iss se pehle kay hukm kay khilaaf hukm daita hai phir yeh tamam kay tamam qazi apne uss khalifah kay pas jama hotey hain jisney inhain qaazi bana rakha hai tou wo sub ki raaey ko sahih qaraar deta hai halaankey inka Allah aik hai inhain ghor tou karna chaheeay kay kya Allah ne inko ikhtilaaf ka hukm diya tha?aur ye ikhtilaf kar kay isska hukm baja laatey hain, ya ussney tou haqeeqatun ikhtilaf se mana farmaya hai! Aur ye ikhtilaf kar kay sarasar Allah ki nafarmaani karna chahtey hain?ya ye kay Allah ne deen ko adhoora chor diya tha? Aur insey takmeel kay leeay haath bataaney ka khuwaishmund hua tha?ya kya ye Allah kay shareek thay?kay inhain Allah kay ehkaam main dakhal dainey ka haq hua?aur kya Allah per laazim hai kay wo issper raza mand ho?ya ye kay Allah ne tou deen mukammil naazil kiya tha magar RasoolAllah(saw) ne isski tableegh kay biyan main kotaahi ki?Allah talla ne tou Quran main yeh farmaya hai kay hum ne kisi cheez kay biyaan main kotaahi nahin ki,aur issmey her cheez ka waazey biyaan hai aur yeh bhi kaha hai kay iss kitab kay baaz hissey doosrey hisson ki tasdeeq kartey hain,aur issmey koi ikhtilaf nahin,lehaza Allah ka irshad hai kay ager yeh Quran Allah kay elaawa kisi aur ka bheja hota tou tum issmey bohot sa ikhtilaf paatey aur yeh kay isska zahir khushnuma aur baatin gehra hai,na isskey ajaibaat mitney waaley aur naa isskey lataif khatam honay waaley hain zulmat ka parda issi se chaak kiya jata hai”

[Nahjul-Balaghah Khutba No: 18]

Mere khayal se iss khtubey main her uss sawal ka jawab mojood hai jo muqalideen hazraat uthaatey hain aur bohot waazey tor per Ameer(as) ne inkey apas main ikhtilaf ko batlaya aur yaqeenun ajkal kay zamaney ko nigah-e-Murtaza(as) dekh rahi thi kay aisey afraad jo kay ummat main peda hongay aur apne nafoos per zulm karaingey pus unki raah per chalney waaley bhi ajeeb andhon aur behron ki manand hain….aur hum dekhtey hain kay tamam mujtahideen ki tauzeeh-ul-Masail hain sada loo awam Quran or Hadis ko chor kar tauzeeh ul masail he ko apna sub kuch maan laity hain ager unsey kaha jaaey kay falaan masila aisey nahin balkey aisey hai tou wo kehtey hain nahin humaara moqaf he durust hai kyunke hum ne ayatollah ki tauzeeh main aisa he paya afsos sud afsos aisey afraad kay leay jo ghor nahin kartey aur kitabion ki raah per chal kay quran aur hadis ki waazey hujeet ko nazar andaz kardaitey hain chunaanchey irshad hua “Ager tum kuch kitabion ki raah per chal parhey tou yaqeenun wo tumhain tumhaarey emaan kay baad kafir kar daalaingey” [Surah-e-All-e-Imran]

LAFZ AYATULLAH KI HAQEEQAT…

Aik chota sa arabi seekhney wala bacha bhi iss baat ko janta hai kay ayat arabi ka lafz hai aur isska maani hai “Nishaani” ya “Hujjat” aur Ayatullah ka matlab hua Allah ki nishaani ya Allah ki Hujjat aur sharee tor per humaarey leay Allah Talla ki 14 hujjatain hain jo kay 14 Masumeen(asws) hain aur Ayat-e-Elahi hain bila shubba Masumeen(asws) hum per Allah ki taraf se hujjat hain kyunke Nabi(saw) sahib-e-wahhi aur Ayma(asws) sahibaan-e-Ilhaam hain lehaaza inka ilm bara-e-raast Allah se hai aur makhlooq per Allah ki hujjat wohi hota hai jo bara-e-raast parwardigar se ilm haasil karta ho jubkey mujtahideen kay leay koi bhi amar saabit nahin na tou wo sahiban e wahhi hain na he sahiban e ilham hain aur na he Masoom hain iss aitebaar se unko Ayatulllah(Allah ki Hujjat) pukaarna munaasib nahin aur khilaaf-e-shariyyat hai balkey Ayma(asws) ki ismat main unkey gher ko shareek karney kay barabar hoga…kyunke Masumeen(asws) ne bhi apne farameen main ye he bataya hai kay hum he Allah ki ayaat hain…aur issey aagey biyaan kartey hain…

USOOLION KI DALEEL…

Ussolion ne ayaat-e-Quran ko shahid banaya hai kay issmey jin nishaanion ka zikr hua hai unsey murad mujtahideen hain aur issper koi daleel pesh nahin jubkey ager Masoom(as) kay qol ki taraf rujuh kiya jaaey tou Masoom(as) ka aik he farman hai

ayaat-e-elahi hum hain chunaanchey dawood rakki ne Imam Jaffar Sadiq(as) ko farmatey huey suna kay “Ayaat se muraad Ayma(as) hain aur nazr(daraaney walon) se murad Ambiya(asws) hain…(1)

“Imam Jaffar Sadiq(as) ne farmaya Allah ki Alamaat hum hain” (2)

Yeh hadees aik aur sannad se Imam Jaffar Sadiq(as) se Manqol hai(3)

“Imam Ali Raza (as) ne farmaya Allah ki alamaat hum hain”(4)

“Imam Muhammad Baqir(as) ne farmaya Ayaat se murad tamam ausiya(asws) hain”(5)

1,5[Usool-e-Kafi Kitab-ul-Hujjat Jild 2 baab 17 Alaf safa 85 hadis 1,2 matboa karachi]

2,3,4[Usool-e-Kafi Kitab-ul-Hujjat Jild 2 safa 84 baab 17 hadis 1,2,3 matboa karachi]

Inn tamam riwayaat main waazey tor per Masumeen(asws) ne bataya kay Ayatullah hum hain aur yeh Masoom(as) ki sift hai lehaza kisi bhi gher-e-Imam ko ayatollah kehna nihayet he jahallat hai…

AYATULLAH-UL-UZMA…

Rahi baat ayatollah ul uzma ki tou jo mujtahid sub se ziyada awam kay nazdeek ilm rakhta hai ussey Ayatullah ul uzma kaha jata hai yaani Allah ki sub se bari nishaani lekin afsos kay yeh log Masoom(as) kay farmaan ko bhi parh laitey Momineen kay leay tou Ayatullah ul uzma sirf aur sirf Ameer-ul-Momineen Ali ibn-e-Abi Talib(asws) hain jo kay qol-e-Masoom(asws) se saabit hai…

ALI(A.S) AYATULLAH-UL-UZMA HAIN…

Imam Jaffar Sadiq(as) se riwayet hai kay Mola Ali(as) ne farmaya “Allah kay leeay mujh se bari koi ayat nahin aur na he mujh se bari koi khabar hai”

[Usool-e-Kafi Jild 2 Kitab-ul-Hujjat safa 86 baab 17 Alaf hadis 3 matboa karachi]

Yeh Qol-e-Masoom(as) se saabit hua kay Ayma(as) he Ayaatullah hain aur Ayatullah ul uzma Mola Ali(as) hain lehaza humain Masumeen(as) he kay farameen per amal karna hai aur ager hum Masoom(as) kay qol ko nazr andaz bhi kartey hain aur khudko shia bhi kehtey hain tou ye falsafah kum az kum meri aqal se tou balaatar hai kyunke khudko ayaat-e-elahi ka shia bhi kehlaana aur phir ayat-e-Elahi ka daweydaar bhi hona aik ajeeb o ghareeb baat hai kay jisski koi bhi daleel mojood nahin rahi baat uss riwayet ki kay “tum per humaari hadison ko biyaan karney waaley ravion ki taraf ruju karo kyunke wo tum per humaari taraf se hujjat hain aur hum Allah ki hujjat hain” iss hadis ko mukhtalif muhadiseen ne apni tasaneef main naqal kiya hai magar isski taveel wo nahin jo usooli karti hain…

LAMHA-E-FIKR…

Iss riwayet se ussolion kay taqleed waaley moaqaf ki taeed nahin hoti awal tou isskey rad main itni riwayaat waarid hui hain kay unkey baad iss riwayet ki koi hesiyyat nahin rehti dosrey yeh kay ager iss riwayet ko sahih bhi tasleem karlia jaaey tou bhi isski taveel wo nahin qarar paati jo usooli kartey hain kyunke issmey tou Masumeen(as) ne un ravion ki taraf ruju karney ka hukm diya hai jo Masoom(as) ki hadison ko riwayet kartey hain jo mard-e-adil aur siqa hotey hain jinsey muhadiseen ne ahadees ko riwayet kiya aur sannad kay taqaazey muqarrir keay jismey kisi gher-e-adil ravi ya gher-e-aqeedah se riwayet laina mamnoo hai aur ager kisi tarah sannad main koi aisa raavi aa bhi jaaey tou uss riwayet ko sahih tasleem nahin kiya jata rahi baat wo raavi humari taraf se tum per hujjat hain tou issmey bhi kuch karahat nahin kyunke iss se bhi wo Ayatullah saabit nahin hotey kyunke Ayma(as) ne yeh tou nahin kaha kay wo tum per Allah ki hujjat hain balkey Ayma(as) ne tou ye farmaya kay wo humari taraf se tum per hujjat hain aur saath ye bhi waazey kiya kay “aur hum Allah ki hujjatain hain” lehaaza Masumeen(as) ko apne un mukhlis raavion per aitemaad tha jisski wajha se Masumeen(as) ne unki riwayaat ki sehet ki zimedaari laitey huey unki riwayet karda ahadees ko hujjat qaraar diya ye he isski asal taveel hai kyunke wo raaviaan momineen thay ager aaj shia khudko momin kehtey hain tou aik momin kay leeay zaroori hota hai kay jub wo kisi momin ki maariffat karley tou usski baat per yaqeen karey aur kyunke wo jhoot nahin bolta wo jo sunta hai Masumeen(as) se ussey logon ko bataata hai aur yeh humain maloom hota hai raavion kay kirdaar o afhaal ki jaanch partaal karney se lehaaza iss riwayet ki awal tou sehet durust nahin yeh qaabil-e-aitbaar raavion se nahin aai doosrey issmey wuzaa ki alamaat bhi hain lekin ager sahih tasleem ki jaaey tab bhi isski taveel wo nahin ki jasakti jo ajkal usooli kartey phirtey hain aur mujtahideen ko raavion ka naam dey daitey hain bhala batayen! Mujtahid konsey Imam(as) se hadees riwayet kartey hain?ya aj tak koi fatwa daitey huey kisi mujtahid ne kaha kay mujh se biyan kiya Imam-e-Zamaana(a.j.f) ne?yeh wo raavi nahin…

MUJTAHIDEEN KI MOHTAAJI…

Balkey yeh tou awal khud un raavion ki riwayaat kay mohtaaj hain jo Masumeen(as) se hadeesain Suntey thay,

Phir yeh tou un muhadiseen kay aqwaal kay mohtaaj hain jinhon ne kisi raavi ki zindagi ko qalamband kartey huey usskey mutalliq raaey pesh ki,

Phir inhain un kitabon ki mohtaaji hai jin main in raavion kay zareeay Masumeen(as) se ahadees riwayet hueen,

Phir Inhain usski sharah ki mohtaaji hai jisey shaareh ne biyaan kiya aur isski haqeeqi taveel ko Quran o Hadis ki roshni main waazey kiya gaya,

Mohtaaji dar Mohtaaji phir bhi mazkoora riwayet kay misdaaq mujtahideen hogaey?kya ye he insaaf hai kay her hadees ki khudsaakhta taveel kar kay usskey zahiri maani aur usski taveel o mafhoom he ko badal daalo?

Ya phir yeh kay iss riwayet ko kese ajkal kay mujtahideen per mahmool kiya jasakta hai isski daleel kya aur kahan hai??

Maafi chahta hun magar issmey zara barabar sadaaqat se kaam nahin liya gaya aur raviaan-e-rijaal ko mujtahideen qaraar dey diya gaya jisper koi hujjat bhi waarid na hui thi lehaaza yeh hadis sahih tasleem keeay jaaney kay bawajood bhi mujtahideen per mahmool nahin ki jasakti…

RAD-E-TAQLEED…

Gher-e-Masoom ki taqleed kay rad main Masumeen(as) kay bohot se aqwaal waarid huey hain jin main kuch faqeer ne pehle pesh keeay aur kuch ko bator-e-namoona faqeer ab pesh karta hai hatta kay haq ki wazaahat hosakey aur iss zaman main hum Allah ki maddad kay talabgaar rahaingey….

MARDON KAY PEECHEY SAWAR HONA…

Sheikh Sudook Sannad-e-Motaber Abu Hamza Samaali(r.a) se riwayet kartey hain kay Imam Jaffar Sadiq(as) ne farmaya “Tum Riyasat o Sardari se bacho aur mardon kay peechey sawar honay se bacho” raavi ne arz ki main Ap(as) per fida hojaoun jahan tak riyasat ka taaluq hai tou isska tou mujhey pata hai aur jahan tak mardon kay peechey

sawar honay ka taalluq hai tou mere hath main mojood(umer) ka dou(2) tahaai hissa nahin hai magar yeh kay main mardon kay peechey sawar hua hun,Imam(as) ne farmaya jis taraf tum gaey ho wo mera murad-o-maqsood nahin,Tum bacho baghair hujjat o daleel kay kisi mard ko(rehnuma) nasb karney se kay phir tum isski her baat ki tasdeeq kartey phiro”

[Maani ul Akhbar baab 137 safa 214,215 hadis 1 ali kissa publishers karachi]

Usooli bhi yun he kartey hain awal tou unhon ne aik gher masoom gher e hujjat ko apna rehnuma nasb kiya phir usskey her aik fatwey ko baghair daleel kay qubool kiya aur yeh qol bhi inka hai kay jisski taqleed ki jaati hai usski her baat ki tasdeeq karna wajib hai jubkey Imam(as) ne farmaya kay “tum phir usski her baat ki tasdeeq kartey phiro gey”? lehaaza iss hadis se saabit hua kay mujtahid gher e Masoom(as) mard ki taqleed baatil hai aur Masoom(as) ne iss se manna farmaya hai…

ULAMA KAY UTHNEY SE ILM UTH JAATA HAI…

Sheikh Mufeed ibn-e-umer se riwayet kartey hain kay RasoolAllah(saw) ne irshad farmaya “Tehkeek logon kay darmiaan se Allah ilm ko khud ba khud nahin uthaata balkey ulama kay uthaney se ilm ko utha laita hai aur jub logon kay darmiaan ulama baaki na rahain tou log jahilon ko apna raees bana laitey hain aur unsey sawaal kartey hain wo jahil baghair ilm kay fatwey daitey hain pus wo khud bhi gumrah hotey hain aur doosron ko bhi gumrah kartey hain”

[Amaali Sheikh Mufeed Majlis no:3 safa 45,46 hadis 1 matboa idara minhaj-us-saliheen lahore]

Aur faqeer issey pehle biyaan kar chukka hai kay Imam Ali Raza(as) ne farmaya ulama hum hain lehaaza Rasool-e-Khuda ka iss hadis main ulama se muraad kon hain wo Imam Raza(as) ki hadis se maloom kiya jasakta hai…

RIYASAT TALBI KYA HAI?

Sheikh Sudook Sufiyan bin Khalid se riwayet kartey hain kay Imam Jaffar Sadiq(as) ne farmaya “aye sufiyan tumhain riyasat talbi se bachna chaheeay kyunke jis kisi ne issey tallab kiya hai wo halaak hua hai” ravi ne arz ki, beshuk hum tou halaak hogaey kyunke hum issi kay baashindey aur hum main se her koi yeh chahta hai kay isski taraf ruju kiya jaaey aur isski baat ko suna jaaey farmaya mera wo matlab nahin jo tum samjhey ho,balkey isska matlab tou yeh hai kay tum kisi shakhs ko baghair hujjat kay khara kardo aur isski her baat ki tasdeeq karo aur logon ko isskey qol ki dawwat dou…

[Maani-ul-Akhbar baab 158 safa 225 hadis 1 al kissa publishers karachi]

MOLA-E-KAINAAT(A.S) KA KHUTBA…

Siddique-e-Akber Mazhar-e-Parwardigar ka yeh kalaam bhi inhee afraad kay mutalliq hai jinhon ne baghair haq kay masnad-e-qazaa ko sambhaal lia chunaanchey Ap(as) ne farmaya:

“Tamam logon main khuda kay nazdeek sub se mabghooz 2 log hain aik wo jisey Allah ne ussky nafs kay hawaley kardiya ho jiskey baad wo seedhi raah se hatta hua hai biddat ki baton per fareefta aur gumrahi ki tableegh main mitta hua hai wo apne khuwahon kay leay fitna aur saabiqa logon ki hidayet se bargashta hai wo tamam un logon kay leay jo usski zindagi main ya usski mout kay baad usski perwi karaingey wo gumraahi main hain aur aisey logon ki manand hain jo doosron kay gunaahon ka bojh uthaaey huey hain aur khud apni khataaon main jakra hua hai aur doosra wo shakhs hai jisney jahallat ki baton ko idher udher se bator liya hai wo ummat kay jaahil logon main dhor dhoop karta hai aur fitno ki tareekion main madhosh o ghafil parha rehta hai aur aman kay faidon se aankh band karlaita hai chund insaani shakal o soorat se miltey jultey logon ne ussey Alim ka laqab dey rakha hai halaankey wo alim nahin wo aisey(bey sood) baton ko samaitney kay leay munh andherey nikal parhta hai kay jinka na hona honay se behter hai yahan tak kay wo iss gandey paani se sairaab ho laita hai aur la yaani baton ko jama karlaita hai tou logon main qazi ban kar beth jata hai “aur doosron per mushtaba rehney waaley masail kay hul ka zima lay laita hai” ager koi uljha hua masila isskey saamney pesh hota hai tou apni raaey se usskey leay bharti ki farsooda daleelain moheeya karta hai aur phir issper yaqeen bhi karlaita hai isstarah wo shubhaat kay uljhaao main phansa hua hai jistarah makri khud he apne jaaley kay andar! Wo khud yeh nahin janta kay ussney sahih hukm diya hai ya ghallat ager sahih baat bhi kahi ho tou ussey yeh andaisha hota hai kay kaheen ghallat he na ho, aur ghallat jawab dey tou ussey yeh tawaqo rehti hai kay shayed ye he sahih ho,wo jahalaton main bhatakney waala jahil aur apni nazar kay dhundley pan kay saath

tareekion main bhatakney waali sawarion per sawar hai na issney haqeeqat ilm ko parkha na isski teh tak pohancha wo riwayaat ko isstarah darham barham karta hai jistarah hawa sookhey huey tinkon ko Khuda ki qasam wo in masail ko hul karney ka ehel nahin jo iss se poochey jaatey hain aur na iss mansab kay qaabil hai jo issey supurd kiya gaya hai jis baat ka ussey ilm nahin hota uss muaamley ko koi hesiyyat nahin deta ussey koi ehmiyyat nahin deta aur jahan tak wo pohanchta hai usskey aagey yeh sochta he nahin kay koi doosra bhi pohanch sakta hai aur jo baat usski samajh main nahin aati ussey pee jaata hai kyunke wo apni jahallat ko khud janta hai Na Haq bahaaey huey khoon usskey na rawa faislon ki wajha se cheekh rahey hain aur gher mustahiq afraad ko pohanchi hui meerasain chilaa rahi hain,Allah he se shikwa hai un logon kay leeay jo jahallat main jeetey aur ussi main martey hain in logon main Quran se ziyada koi bhi qeemti cheez nahin jubkey ussey istarah pesh kiya jaaey jese pesh karney ka haq hai! Aur iss quran se ziyada in main koi qeemti aur maqbool cheez nahin usswaqt jub isski ayaat ka be mahal istemaal kiya jaaey inkey nazdeek naiki se ziyada koi buraai aur buraai se ziyada koi naiki nahin”

[Nahjul-Balaghah Khutba no:17]

Yahan mere Mola(a.s) ka kalaam tou khatam hojaata hai magar her ghor karney waaley usooli aur akhbaari ki aik martaba ankhain khul jaati hain aur jin logon ko masnad-e-qazaa per bitha rakha hai unka asli chehra saamney ajaata hai aur jo jo nishaaniaan Ameer(as) ne biyaan farmaeen wo bhi talash karney per her kisi ko mil jaati hain Khuda her kisi ko dagha baaz naam nehaad qaazion se mehfooz rakhey Elahiameen…

JAHANUMI HAI WO SHAKHS JO RUJU KARWAAEY

“Imam Jaffar Sadiq(as) ne farmaya jo shakhs issleay ilm haasil karey kay nadanon kay sath jhagra karey ulama kay muqaabiley main apne aap per fakhr karey ya phir issleay kay log usski jaanib ruju karain tou wo jahanumi hai yeh hadis Abu sallat ne jub Imam Ali Raza(as) kay saamney biyaan ki tou Ap(as) ne farmaya mere Jud(as) ne such farmaya aur kya tum samjhey issmey nadanon se murad kon hain?ravi ne arz ki nahin Farzand-e-Rasool(saw) tou Imam(as) ne farmaya wo jo humaarey mukhalifeen se humaarey qissey biyaan kartey hain aur kya tum samjhey kay issmey ulama se muraad kon hain?ravi ne arz ki nahin Aqa(as) Imam (as) ne farmaya ulama se murad All-e-Muhammad(as) hain aur kya tum samjhey kay issmey ruju karney se kya murad hai?ravi ne arz ki nahin Mola(as) Imam(as) ne farmaya baghair haq kay dawa-e-imamat karna aur jo aisa karega jahanum ki aag main hoga”

[Maani-ul-Akhbar baab 159 safa 226 hadis 1 al kissa publishers karachi]

Ab un afraad kay mutalliq nihaayet he afsos hota hai jo poorey ilm ka daawa kartey hain kyunke mukammil ilm tou Imam(as) he kay pas hai jese kay Allah ne irshad farmaya “Hum ne her cheez kay ilm ko Imam-e-Mubeen main jamma kardiya hai” (surah-e-Yaseen ayat no: 12) mujtahid bhi aur unkey muqalideen bhi ye he kehtey hain kay mujtahid kay pas her uss cheez ka ilm mojood hai jiska sawal unsey mutawaqey hai aur dar haqeeqat Ayma(as) kay ilm main khud ko shareek karna he Dawa-e-Imamat kehlaata hai aur ilm-e-rijaal aik jhoota uar mun gharrat tasawur qayem kiya gaya hai jiski misaal kisi afsaaney se ziyada aur kuch nahin aur hum saabit bhi kar chukkey hain kay Gher-e-Masoom mohtaaj hai aur mohtaajion kay saaye main parha hua hai lehaaza jo shakhs Imam-e-Mansoos Minallah kay elaawa aisa daawa karega wo Masoom(as) kay qol ki roshni main jahanum ka mustahiq qaraar paayega…

ITAAT KA MIYAAR…

Muffazil bin umer ne Imam Jaffar Sadiq(as) se poocha main Ap(as) per fida hun kya Khuda kisi khas banda ki itaat ko apne bandon per farz karta hai?aur iss khaas bandey se asmaani khabron ko posheeda rakhta hai?farmaya wallah wo ziyada raheem o kareem hai aur meherbaan hai apne bandon per ye kese mumkin hai kay wo kisi bandey ki itaat tou farz karta hai aur subah sham ki asmaani khabraib uss se chupaaey rakhta hai?...

[Usool-e-Kafi Kitab-ul-Hujjat Jild 2 safa 180 baab 47 hadis 3 zafar shameem publications karachi]

LAFZ-E-IMAM KA ISTEMAAL…

Aik aur nihayet he afsos kun baat ye kay usoolion ne Agha Khumaini kay naam kay sath Imam ka lafz jor daala aur aik pal kay leay bhi na socha kay Imam lafz istemaal karna shariyyat kay mutaabiq kesa hai ye lafz maa siwaaey 12 Imamon(as) kay kisi kay saath bhi istemaal karna kufr o takzeeb-e-Quran kay barabar hai…bohot si ayaat hain jin main irshad hua kay Imam(as) ka taeeun sirf Allah karta hai aur Imamat bhi nabuwat ki tarah aik mansab hai jesa kay irshad hua “tum nahin ho magar aik munzar(daraney wala) aur her qoum kay leeay aik hadi hai” (surah-e-raad ayat 7) iss silsiley main faqeer ne apne guzishta articles main bhi Ahl-e-sunnat ki riwayaat pesh ki hain kay Rasool(saw) ne farmaya main hun munzar aur Ali(as) hidayet karney wala hai her qoum

ki aur issi qism ki riwayaat shia kutub or tafaseer main aai hain jinkey zikr ki gunjaish nahin waqt ki qillat ki bina per albata inkey zikr ka maqsood yeh kay azhaan main ye baat mehfooz hojaaey kay Imamat khudaai mansab hai bilkul ussi tarah jese nabuwat khudaai mansab hai jesa kay faqeer ne arz ki iss silsiley main bht si Qurani ayaat hain magar hum sirf aik per iktifaa kartey hain “Jin Logon ko zameen main kamzor bana diya gaya hum ye chahtey hain kay un per ehsaan karain unhee ko logon kay imam bana dain aur unhain zameen kay waris qarar dain” (surah-e-qasis ayat 5) Baqol Parwardigar kay imamat sirf or sirf Elahi mansab hai aur Allah jisey chahey imamat dey dey isska ikhtiyar bandon ko nahin lehaaza kisi ko ye haq nahin pohanchta kay wo kisi gher e masoom kay naam kay sath imam kay lafz ko wussat dey bilkul usi tarah jese kisi aam insan ko nabi nahin kaha jasakta kyunke ye dono he manasib-e-Elahiyya hain aur dono ka he taeeun Khuda karta hai ager usoolion ko lafz-e-imam istemaal karney main kuch karahat nahin tou phir unhain kisi aam shakhs kay naam kay sath Lafz Nabi istemaal karney main bhi koi karahat nahin kyunke Imam arabi zuban ka lafz hai aur isskey maani peshwa kay hain aur nabi nabuwat se ibaarat hai jiskey maani bulandi kay hain tou yaqeenun usoolion apne qol kay mutaabiq kay khumaini unsey buland hain aur un per foqiat rakhtey hain tou karlain Nabi ka lafz bhi istemaal yahan kyun karahat hai?

RUJU KISKI TARAF KIYA JAAYE?

Ab jawab pesh kiya jata hai uss sawal ka kay hum deeni masail kis se dar-e-aaft karain?Tou isska jawab yeh hai kay koi bhi akhbari ya doosrey gher muqallid ye nahin kehtey kay sawal na karo kyunke sawal karna koi taqleed nahin,sawal kiya jaaey aur usska job hi jawab mujtahid faraham karey uss se poocha jaaey kay ye jawab ap Quran ki kis ayat ya Masoom(as) ki kis hadis se dey rahey hain? Aur akhbaari bechaarey bhi tou ye he kehtey hain aur iss jurm ki wajha se unhain kufr o shirk kay taaney sun’ney parhtey hain j okay usoolion ki jaanib se un per barsaaey jaatey hain kyunke baghair hawala-e-hujjat kay andhey munh her fatwey per aitbaar karney ko wajib samajhna he taqleed kehlaati hai jo kay kisi bhi tarah munaasib nahin aur issey aqal tasleem nahin karti aur Qol-e-Masoom(as) se bhi waazey hua kay kyat um phir inki her baat ki tasdeeq kartey phirogey?aur jub usooli doosron ko daawat daitey hain kay tum bhi mujtahid ki taqleed karo warna amaal baatil hojayengey tou isskay mutalliq Imam(as) ka farman kay kya phir logon ko usskey qol ki dawat daitey phirogey? Qom-e-shia apni ankhon ko kholo aur mat bhoolo yeh taqleed-e-gher-e-masoom qiyaas o ijma-e-ummat he tha jisney All-e-Muhammad(as) ko unkey huqooq se mehroom rakha aur isski bunyiaad usswaqt parhi jub saqeefa bani saada main ummat kay logon ne abubakar ko apna khalifah muqarrar karliya aur hadis e Rasool(saw) aur quraani nasoos ko rad kardiya kya tum bhi unhee logon ki manand ban’na chahtey ho aur haq ko chor kar qiyaas o ijma o taqleed-e-gher masoom ko apnao gey? Kehney aur likhney ko bohot kuch tha

magar waqt itna qaleel hai kay jiski wajha se mujhey majboorun hathon ko rokna parh rha hai aur khaatma iss baat per kay Khuda hum sabko Haq ki maariffat naseeb farmaaey Elahiameen…

Talib-e-Dua: Syed Jawad Raza Naqvi