PAKIKIPAGKAPWA BILANG KAYAMANAN NG BANSA CHAD PATRICK OSORIO

Ang tunay na kayamanang dapat pangalagaan ng sinumang tao ay ang

kayamanan ng puso at diwa, kayamanan sa pakikisama, kayamanan sa wastong

paggamit ng karunungan at karanasan, at ng kaalaman at kasanayan.

-Gob. Felicisimo T. San Luis

Ito ang mga salitang turan ng nag-iisang Buhay na Alamat ng Laguna tungkol sa kayamanan:

na hindi lamang pera at materyal na bagay ang maituturing na yaman; bagkus, ang bawat kasanayan

at kaalaman na nakalakip sa ating mga puso at isipan ang dapat nating pagpahalagahan at

paglinangin, dahil ang mga ito ang kayamanang hindi mananakaw sa atin.

Ngunit para saan pa nga ba ang kayamanan kung hindi natin ito mapapakinabangan para sa

ikabubuti ng lahat? Sa aking wari, ito ang tunay na layunin ng pakikipagkapwa. Mahalaga na hindi

lamang tayo marunong makisama; ang pakikipagkapwa ay ang pakikiisa at pakikibahagi ng ating

karunungan sa iba, upang tayoy magtulung-tulungan at sama-samang umunlad.

Sa tuwing naiisip ko ang Pakikipagkapwa ay naiisip ko ang aking Papa Menes. Tubong

Lumban, sa Laguna siya lumaki at nagkamalay. Tumira siya sa Estados Unidos ng mahigit tatlong

dekada, ngunit pagbalik niya sa Pilipinas ay pinili pa rin niyang manirahan dito sa aming bayan.

Ngunit kahit malayo na ang kanyang narating ay isa lamang ang kanyang nais: ang makatulong sa

mga taong bumangon mula sa kahirapan.

Naalala ko pa dati ay naiinis ako, dahil imbes na ipambili ng mga bagong laruan para sa akin

ay nagbibigay siya ng perang pambili ng mga libro para sa mga anak ng kanyang mga tauhan. Ang

pangarap niya, bukod sa makatapos kaming magkakapatid, ay talagang makatulong sa mga tao ng

walang hinihinging kapalit. Nang tumanda ako, saka ko pa lang nabatid ang dami ng mga taong

natulungan at nagkaroon ng edukasyon dahil kay Papa. Ngayon ay nais ko nang gawing halimbawa

ang Papa ko at sundan ang mga yapak niya, ang nagpapahalaga sa kapwa niya, dahil alam niyang

hindi tayo uunlad bilang isang bansa kung hindi natin tutulungan ang isat isa.

Noong nag-aaral pa ako ng kursong Sikolohiya, natutunan namin ang konsepto ng Kapwa, at

ayon sa Sikolohiyang Pilipino, ang Pakikipagkapwa ay isang pagpapahalaga na kinakailangan upang

maabot ang Kapayapaan ng isang pamayanan. Kalakip ng pakikipagkapwa ay ang katarungan,

karangalan at kalayaan.

Habang isinusulat ko ang sanaysay na ito ay napagmuni-muni ko na mahalaga ang

Pakikipagkapwa hindi lamang sa karaniwat araw-araw na pamumuhay. Sa halip, ito ay may malaking

bahaging ambag sa paglilinang ng ating kultura at pag-unlad ng ating bansa. Kailangan natin ng mga

pinunong may katangiang taglay ng tulad ni Gob at ni Papa Menes, na marunong makisalamuha at

makipagkapwa, upang kasihan ang ating mga mamamayang makiisa at magtulong-tulong para

maabot ang rurok ng tagumpay.