editoryal sa ika-51 ka tuig sang partido, ang ...transport strike ang mga 90% sang pangpubliko nga...
TRANSCRIPT
Tuig 42, Numero 5 Hiligaynon nga Edisyon Disyembre 2019
SA IKA-51 KA TUIG SANG PARTIDO, ANG REBOLUSYONARYO NGA GAHUM LABI NGA NAGABASKOG!
ingkwenta’y-uno anyos
na kita sa
rebolusyonaryong banas
sang demokratiko nga
rebolusyon sang banwa!
Aton ginapabugal kag
ginakalipay ang isa naman ka
tuig sang matinggas kag maisog
nga paglunsar sang demokratiko
nga rebolusyon sang banwa sa
idalom sang pagpamuno sang
Partido Komunista ng Pilipinas
(PKP). Isa ka tuig nga mas
nagapalapit sa aton sa pat-ud
nga kadalag-an.
Gani magkurog na ang
nagahari nga sistema nga
ginatiglawas ni Duterte. Lipas na ang inyo panahon.
Wala sang panghampol o pamigos nga programa
ninyo ang makasalbar sa dalayon nga pagkamudmud
sang litikon nga malakolonyal kag malapyudal nga
nagahari nga estado. Handa kag sigurado ang
rebolusyonaryong pwersa nga agawon ang gahum
pangpulitika sang estado kag subong amat-amat nga
ginatukod na ini sa mga baseng gerilya sa kaumhan.
Sang 2018, tikalon nga gindeklarar ni Duterte
kag sang iya AFP, nga katapusan na sang CPP-NPA sa
katung-anan sang 2019. Asod-asod nga nagpagwa
sang mga polisiya sa kontra-insurhensya – Oplan
Kapanatagan, Memo 32 kag EO70, nga kon sumahon
nagabutang sa indi-deklarado nga martial law ang
bilog nga pungsod. Ang matuod-tuod nga mga hitabo
mismo ang nagapamatuod sang pagkapaslaw ni
Duterte. Sa baylo nga malutos, labi nga nagabaskog
ang rebolusyonaryo nga hublag kag gahum sang
pumuluyo.
Diri sa Panay, pareho sa iban nga lugar sang
pungsod, pakusog nga ginpadeklarar sang AFP-PNP
sa mga LGU nga persona non grata ang NPA.
Kumbinasyon sang sulsol tubtob sa pamahog, mabug-
at sa buot nga nagdeklarar sang persona non grata ang
napilitan nga mga LGU. Pila sa ila ang nagapangayo
sang dispensa halin sa NPA samtang padayon gihapon
ang pagkooperar nila sa rebolusyonaryo nga hublag.
Kon indi ini rebolusyonaryo nga gahum, ano ini?
Sa panahon sang mid-term eleksyon, magahod
nga ginpaandaman sang AFP nga kasuhan ang mga
kandidato nga nagapaidalom sa polisiya sang
rebolusyonaryo nga gahum angut sa reaksyonaryo nga
eleksyon. Ang ini nga pamahog, daw hangin lang nga
naglabay, kay asod-asod nga mga kandidato ang
nakipag-istorya sa rebolusyonaryong gahum bisan ang
kuno mga suod nga tagasuporta ni D30. Kon indi ini
rebolusyonaryo nga gahum, ano ini?
S
Editoryal
2 DABA-DABA, DISYEMBRE 2019
Ginapasingki kag ginapadako sang AFP-PNP
ang ila programa sa kontra-insurhensya. Sining
Oktubre naglab-ot sa mas o menos 300 nga komposit
ukon gintingob nga pwersa sang 61st
IB, 33rd
DRC kag
kapulisan ang naglunsar sang focused military
operation (FMO) sa mabukid nga bahin sang dulunan
sang mga banwa sang Iloilo kag Antique —Tubungan,
Igbaras, Miag-ao, San Joaquin kag Sibalom. Pinaka-
ulihi ini sang sunod-sunod nga mga kampanya militar
nga ginlunsar sang AFP sini nga tuig. Gina-updan ang
mga atake militar sang saywar, wala untat nga serye
sang mga peke nga surinderi kag pangdakop sang mga
mangunguma. Pagpu-as sang mga inaway sini nga
tuig, katumbas sa isa ka daku nga platun sang AFP-
PNP ang ila kaswalidad bangud sa superyoridad sa
taktika sang NPA kag malapad nga suporta sang masa
sa kuno “terorista” nga NPA. Suma total, wala ni isa
ka larangang gerilya ukon bisan isa ka yunit sang NPA
ang nabungkag. Sa baylo, mas madamo nga masa ang
nalab-ot kag mas nag-aktibo sa rebolusyonaryong
hublag kag mas nagdako ang rebolusyonaryo nga
pwersa. Kon indi ini rebolusyonaryo nga gahum, ano
ini?
Samtang masako ang pagpatuman sang
rehimeng US-Duterte sang mga programa nga
nagaguba sa palangabuhian sang pumuluyo pareho
sang rice liberalization law (RLL), jeepney phase-out
(JPO) kag pagbugaw sang duna nga manggad sang
pungsod pabor sa mga dalagku nga dumuluong nga
negosyante, ang muklat kag organisado nga mga
mangunguma sa Panay padayon nga nagkampanya
para sa minimum nga reporma sa duta pareho sang
pagpataas sang produksyon sa kaumhan kag
pagpanubo sang usura. Wala man sang kataka ang ila
pagdemanda sang nagakadapat nga obligasyon sang
gobyerno sa panahon sang kalamidad katulad sang
tigbalagtik ukon El Niño kag sang bagyo Ursula.
Lampas sa direkta nga nalab-ot sang
rebolusyonaryo nga gahum sa kaumhan, ang malapad
nga pumuluyo nangin kabahin sa malapad nga prente
nga nagakontra sa mga mapanghalit nga polisiya sa
ekonomiya, pulitika kag militar ni Duterte. Agod
mapauntat ang JPO, nag-upod sa pungsudnon nga
transport strike ang mga 90% sang pangpubliko nga
transport sa Iloilo.
Ang malapad nga pumuluyo lakip sa Panay—
mangunguma, rice traders, konsumidor, manunudlo
kag estudyante, mga relihiyoso, kag pati mga opisyal
sa gobyerno sige-sige ang pagpamatok sa RLL paagi
sa mga petisyon, seminar kag mga aksyon masa.
Ang mga manunudlo kag estudyante, bangud
sang ila papel sa paghulma sang opinyon publiko, gina
‘redtag’ kag ginabansagan nga NPA ni Duterte.
Apang padayon ang ila pagbato upod sa ila kasektor sa
iban nga parte sang pungsod kag padayon nga
nagatulod sang ila tindog kontra sa nagakupos nga
badyet sa edukasyon, kontra sa pilitaryo nga ROTC,
kontra sa profiling (pagkuha sang AFP-PNP sang
kasaysayan kag personal nga datos kag aktibidad) kag
pagpasilabot sang armado nga pwersa sang estado sa
sulod sang mga eskwelahan.
Ang ini nga mga paghulag sang pumuluyo
nagapamuad sang madamo nga pilo sang
rebolusyonaryo nga gahum. Gani bisan sa pagbulos-
bulos sang pito ka rehimen nga tiglawas sang
malapyudal kag malakolonyal nga estado kag siyam
ka kontra-insurhensya nga mga programa ukon
OPLAN nga suportado sang lohistika kag taktika sang
pinakamabaskog nga imperyalista nga pungsod nga
US, padayon nga naga-angkon sang ganar ang
rebolusyonaryong hublag.
Ang malakolonya kag malapyudal nga sistema
nagapabilin nga kuribod bangod sang pagpangibabaw
sang moderno nga imperyalismong US. Makita ini sa
padayon nga kabos nga pagdebelopar sang pungsod
Pilipinas. Makita ini sa padayon nga pagdako sang
wala palamugnan, sa nagadako nga utang kag sa
nagadako nga lang-at sa nagahugakom nga manubo pa
sa 1% sang populasyon sang masobra 90% sang
manggad sang pungsod samtang ang malapad nga
pumuluyo nga Pilipino ginapakontento sa pakalimos
nga 4Ps, sa usura kag paligid nga utang, sa paggwa sa
pungsod kag sa lubos nga kapigaduhon.
3 DABA-DABA, DISYEMBRE 2019
Paabuton naton sa tuig 2020 ang mas mapintas
kag mas brutal nga pang-atake sang rehimeng US-
Duterte. Dapat handaan naton sang mas maalam kag
mas matalom nga mga taktika ang mga atake militar
sang pasistang tropa kag ila matam-is nga mga bala
pang-saywar. Indi magpakontento kag indi
magkampante sa daan nga mga kadalag-an, sa baylo
dugang nga magtuon, magkuha sang mga leksyon
halin sa mga ganar kag kapyerdihan kag dal-on ang
mga leksyon sa buhi nga praktika sang inaway.
Dugang nga magpadaku, magpalapad kag labi nga
konsolidahon ang baseng masa bilang pundasyon sang
armado nga paghimakas kag rebolusyonaryo nga
gahum pangpulitika. Padamuon ang mga pulang
hangaway kag kumander kag pabaskugon ang
ikasarang sang NPA sa inaway agud mas mataas ang
inisyatiba kag mas madamo nga
inaway ang madaog.
Nalipasan na sang panahon
ang sistema nga ginatiglawas sang
pasistang Duterte. Duna sa sistema
nga ginakapulan kag suhayan ni
Duterte ang pagkabagsak sini.
Napagkit na sa kasaysayan sang
kalibutan ang pagkagabok kag
sigurado nga pagbagsak sang amo
nga sistema sang magdaug ang
rebolusyong Ruso sang 1917 kag sang
rebolusyong Tsino sang 1949.
Sa ika 51 nga tuig sang pagpamuno
sang Partido Komunista ng Pilipinas sa
rebolusyonaryo nga hublag sa pungsod kag sa Panay,
nagapadayon ang pagpitik sang orasan sang
kasaysayan – sa panahon nga ang malakolonyal kag
malapyudal nga sistema lubos nga malubong sa
basurahan sang dumaan nga katilingban kag ang pag-
usbong sang bag-o nga demokratiko nga estado
pakadto sa sosyalismo.
Mag-amot sa labi nga pagsulong sang demokratiko
nga rebolusyon sang banwa (DRB) kag pagpaslaw sa
Task Force ELCAC! #DD
______________________________________________________ Deklarasyon sang untat-lupok, ginpatuman sang NPA, aktibo nga depensa sang NPA-NTC, nagtuga sang kaswalidad sa PNP
ubos nga ginpatuman sang tanan nga yunit
sang BHB sa Panay ang deklarasyon nga untat-
lupok nga ginpapanaog sang Komite Sentral
sang PKP kag National Operational Command – BHB
humalin alas 12 sang kaagahon sang Disyembre 23,
2019 tubtob sa tungang-gabi sang Enero 7, 2020.
Ang untat-lupok ang ginapatuman para
maghatag ligwa sa selebrasyon sang malapad nga
masa sa panahon sang paskwa kag pagsug-alaw sang
bag-ong tuig kag para ligwahan ang gina-antesepar
nga pag-umpisa sang liwat nga pagbukas sang
estoryahanay pangkalinungan sa tunga sang
Government of the Republic of the Philippines (GRP)
kag National Democratic Front of the Philippines
(NDFP).
Madumduman nga palugos nga gin-untat sang
reaskyunaryong gobyerno ni Duterte ang
estoryahanay pangkalinungan sang Nobyembre 23,
2017 paagi sa Proclamation Order No. 360 kag
gindeklarar nga terorista ang CPP-NPA paagi sa
Proclamation Order No. 374 sang Disyembre 5, 2017.
Apesar sang deklarasyon sang untat-lupok,
padayon nga nanggalugad ang pasistang tropa sang
Regional Mobile Battalion (RMB) kag Provincial
Mobile Force (PMF) sang PNP sa teritoryo sang
rebolusyonaryong gobyerno rason sang pag-ambus
sang isa ka yunit sang NPA - Napoleon Tumagtang
Command (NTC) sa nagapatrolya nga unit sang 1st
Provincial Mobile Force sadtong Disyembre 23 takna
alas 9:30 sang aga sa Brgy. Singon, Tubungan
probinsya sang Iloilo.
L
4 DABA-DABA, DISYEMBRE 2019
Nag-agum sang tatlo
ka pilason ang pasistang
kaaway paagi sa ginpalupok
nga command detonated
explosive ukon CDX.
Antes pa man ang
insidente, lima na ka adlaw
nga naga-operasyon ang
nasambitan nga tropa sang
kaaway sa ila gintawag nga
“Oplan Galugad” sa mga
kabaranggayan sang Leon
kag Tubungan. Bilang aktibo
nga depensa, nakamaniubra
kag naka-kontra opensiba ang
unit sang NPA-NTC nga
ginaatake sang kaaway.
Antes ang Disyembre
23 nga atake, nauna na nga
ginharas sang NPA-NTC ang
isa ka kolum sang naga-
operasyon nga tropa sang
PNP sa boundary sang Brgy.
Boloc kag Bato sa banwa
sang Tubungan sang aga sang
Disyembre 21. Tatlo diri ang
pilason nga gindala sa ospital
sang gabe sina nga adlaw.
Pormal nga nabaton
sang NDFP ang Suspension of
Military Operations (SOMO)
kag Suspension of Police
Operations (SOPO) sang
reaskyunaryong gobyerno
sang Disyembre 26, 2019
lang, suno kay Fidel Agcaoili,
NDFP panel head.
Ang tanan nga kumand
kag yunit sang NPA sa
rehiyon ang hugot nga
nagasunod sa gintalana nga
deklarasyon sang untat-lupok
sang PKP apang nagapabilin
nga alerto kag aktibo sa
pagdepensa batuk sa anuman
nga hingalit sang kaaway nga
isabotahe ukon lapason ang ini
nga deklarasyon sang untat-
lupok. (Ka Imbo, Daba-daba
correspondent)
______________________________________________________ Focused military operation sang 3RD-ID sa sur nga bahin sang Panay, ginpaslaw sang NPA
a pag-angat sang lebel sang rebolusyonaryo nga
paghimakas diri sa Panay, mas labi nga
ginpasingki sang reaksyunaryo nga armado ang
ila nga pagpang-atake batuk sa rebolusyonaryo nga
pwersa. Sang nagligad nga Oktubre, ginpamuan sang
3rd IDPA ang daku nga operasyon sang mga tropa
sang 61st IB, 1
st Scout Ranger Company, kag 33
rd
DRC sa kaumhan kapin sa sur nga bahin sang isla.
Nangin target sang focused military operations (FMO)
ang binukid nga bahin sang Igbaras, Miag-ao, kag San
Joaquin sa Iloilo kag banwa sang Sibalom sa Antique.
Bangud sa madamu nga patay kag pilason (16) nga
naagum sang 61st IB sa mga inaway sang tinalikdan
nga bulan sang Setyembre, bag-o pa lang nagpu-as
ang ila operasyon hot pursuit sa NPA, dayon nila nga
ginsugpon ang ining panibag-o nga operasyon.
Fragmented ang ila nga operasyon may duha
ka hut-ong. Sa kabilugan, naglawig ini sang tunga sa
bulan nga nag-umpisa sa una nga semana sang
Oktubre kag natapos sa ikatatlo nga semana sini.
Nagmobilisa sila sang daku nga pwersa nga naglab-ot
sa masobra 200 kag nag-imbolbar indi lang sang AFP
kundi pati sang PNP kag paramilitar nga CAFGU kag
RPA. Ginporma kag ginpahulag nila ang 9 ka kolum
nga nagtutok sa lindero sang mga nasambit nga mga
kabanwahanan sa duha ka probinsya. Nangin staging
points, ukon lugar nga ginahalinan sang ila nga
pwersa, ang lindero sang San Joaquin kag Sibalom,
intermidya nga bahin sang Miag-ao kag amo man ang
Igbaras.
Una nga hugnat
Unang semana sang Oktubre, namonitor ang
pagsulod sang 3 ka salakyan sa lindero sang Sibalom
kag San Joaquin, mga alas 3 sang aga. Malapit sa 70
ka pwersa nila ang karga sang mga ini. Sa Igbaras, kaagahun man sang may 2 ka salakyan ang nagsulod
nga naga-unod sang mas o menos 50 ka element sang
kaaway. Pagkasunod nga adlaw, namonitor na ang 2
ka howitzer nga dala nila. Samtang sa Miag-ao, may
umpisa na man nga paghulag sang masobra 30 ka
pwersa nila nga nagahagyo nga magsulod sa
kabukiran sini.
Surgical ang kinaiya sang operasyon nga
gingamit nila. Kaangay lang nga ginbusikad kag
gintahi-tahi nila ang kabukiran sang Miag-ao, Igbaras
S
5 DABA-DABA, DISYEMBRE 2019
kag Sibalom. Ang mayor nila nga target amo ang
Miag-ao kon sa diin natabo ang duha ka sunod-sunod
nga inaway sang Setyembre. Ginpokusan sang 3 ka
kolum nila ang naibabaw nga bahin sini. Sa San
Joaquin, may isa ka kolum ukon mas o menos 24 ka
pwersa nila ang ginbutang kag nagaserbe nga planker
pananglit nga makasaboy didto ang mga NPA nga
magtal-as halin sa ila nga pagpanglugas. May isa ka
daan nga kampo sang NPA nga ila ginsudlan apang
kapaslawan ini bangud wala man sila may nakuha
didto. Pagkatapos sang isa ka semana, namonitor na
ang ila nga pwersa nga nagapagwa. Nangin exit point
ang Sibalom sang main body nila nga nagsuyod sa
Miag-ao. Samtang, namonitor man ang mga pwersa sa
San Joaquin kag Igbaras nga nagapagwa.
Ikaduha nga hugnat
Pagkaligad sang isa ka adlaw, liwat na man
nga naghulag ang ila nga pwersa. Namonitor ang
pagsulod sang 3 ka salakyan sa intermidya nga bahin
sang Miag-ao nga nagatambi sa San Joaquin kag may
bag-o man nga pwersa nga nagtuhaw sa lindero sang
Igbaras, Miag-ao kag Sibalom. Didto sa San Joaquin,
ginpabalik ang pwersa nga nagpakita nga maggwa na
kun tani. Ginmanduan sila nga magbalik nga indi
mahinago nga kapoy kag nagareklamo na gani.
Ginpabilin sila para magtimbang sa pwersa nila sa
Miag-ao.
Naglawig sang masobra isa naman ka semana
ang ikaduha nga hugnat sang operasyon. Liwat naman
nga ginsuyod ang kabukiran kapin ang mga lugar nga
ginabasehan kuno sang NPA. Sa amo sini nga
panahon, tutok guihapon nila ang kabaryuhanan sa
lindero sang Igbaras, Miag-ao, San Joaquin kag
Sibalom. Sa tunga-tunga sining operasyon, naggamit
sila sang surveillance plane nga makapila ka beses
nga naobserbahan nga nagalupad-lupad, maliban pa
ini sa drone nga gamit sang ila operating troops.
Apang, ano pa man ang ila nga pagpaninguha,
makapila man ka beses nga suyudon ang kabukiran,
wala guid sang ganar ang ini nila nga operasyon
magluwas lang sa nakuha nila nga kakapoy, uyang
sang ila tiempo kag resorsa sang buhis sang
pumuluyo. Indi man nila mapabugal ang kampo sang
NPA nga ginsulod bangud wala man sang tawo kag
wala man sang malahalon nga nasapwan didto.
Nangin tampok man sa ila nga operasyon ang
pagpangguba sang kudal sa buruy-an, paglapak sang
mga pananom nga paray, ang pag-imponer sang
curfew kag polisiya nga indi na magpamanlo. Wala
guid ini nauyunan sang pumuluyo. Preska pa sa ila
pamensaron ang pagpamahog kag pagpanakit sang
mga elemento sang AFP sa isa ka mangunguma
matapos ang harassment sang NPA batuk sa ila. May
ulihi pa guid nareport nga pagpaniro sang 2 ka baka
sang mangunguma. Ini nga mga pagbayolar sa mga
kinamatarung sang pumuluyo sa kaumhan ang
padayon nga mangin tabid sa tagsa ka pag-operasyon
sang AFP.
Ano man ka engrande sang ila nga operasyon,
maski may focused military operation pa, bangud
wala sila ginasuportahan sang malapad nga pumuluyo,
pat-ud guid nga mangin kapaslawan lamang ini. Sa
pihak nga bahin, ang NPA, bangud ginasuportahan
sang malapad nga pumuluyo, wala natublag kag
padayon nga nagapakasampaton sa pagtuon sa hulag
sang iya nga kaaway. Amo nga lauman sang AFP ang
mas masingki nga mga taktikal nga opensiba nga
ihandos sang New People’s Army batuk sa ila. Indi
makasablag ang FMO sang Oplan Kapanatagan ni
Duterte sa paglab-ot sang malapad nga pumuluyo nga
agumon ang matuod-tuod nga kalinungan kag
kahilwayan. (Report halin sa NPA-Mt. Napulac
Command)
Ang kontra CPP-NPA rali sang TF-ELCAC isa ka komedya kag ilog-ilogan Pahayag ni Concha Araneta
Tagpamaba sang NDFP-Panay
Disyembre 2019
alpak ang pungsudnon kag koordinado nga
kontra-CPP-NPA rali nga ginpasimunuan sang
Task Force to End Local Communist Armed
Conflict (TF-ELCAC) sadtong mismo ika-51 nga
anibersaryo sang PKP. Ang ila lihok nagtuyo kuntani
nga magkuha sang simpatiya, suporta kag paghulag
P (Sinapol sang militar, pulis kag DILG tuhoy sa Task Force ELCAC sa syudad sang Iloilo sang tinalikdan nga Disyembre 5 kag 13, 2019.)
6 DABA-DABA, DISYEMBRE 2019
sang publiko batuk sa CPP-NPA, apang sa
kamatuoran, wala ginsapak sang pumuluyo ang ila
rali. Biskan ang midya nagreport sini bilang isa ka
hitabu, pero indi gani makabig nga isa ka scoop.
Sa Iloilo naman, ang lihok ginpasimunuan
sang PNP kag gin-updan sang mismo Iloilo Provincial
Commander nga si Col. Roland Vilela kag sang Iloilo
City Command Col. Martin Defensor, upod ang mga
personel halin sa IPPO, ICPO, BJMP, Coastguard kag
DILG. Si Mayor Tacsagon sang Tubungan, Iloilo,
upod ang pipila ka sibilyan, nag-upod man sa rali
bilang mga volunteers agud magprotesta batuk sa
CPP-NPA. Ginhamblan ni Vilela ang midya nga ang rali
may kadungan nga caravan. Apang, antes pa man
sang interbyu, naka-report na ang midya nga may
pagtililipon sa Provincial Capitol. Ti diin na da ang
caravan sa kilid sang dalanon nga wala nakita sang
midya? Bilang highlight, ginpresentar sang TF-
ELCAC ang kuno isa ka NPA surrenderee nga si Ka
Princess. Suno sa iya, ang rason sang iya pagsungka
amo ang trauma kag kakugmat nga naagum nya
pagkatapos nga gin-raid sang militar ang iya yunit.
Samtang may tabon ang nawong, mismo si Ka
Princess naghambal nga ang offensive strike sang
militar ang nagtulod sa iya mag-sungka. Ti diin dira
ang kuno terorismo sang NPA? Indi bala ang AFP
mismo ang nag-terrorize sa kay “Ka Princess”?
Ang makahalam-utan pa, ang kuno rali sang
PNP, imbes nga magpakamalaut, naghatag pa sang
pagkilala sa superyoridad sang NPA. Ang ila mga
plakards nagasiling: NO to NPA –IPPO, NO to
Terrorism, SALOT NPA –ICPO. Isa ka sibilyan-
militar nga institusyon sang gubyerno, nag-rali batuk
sa ila ginatawag nga maluya kag disorganisado nga
mga rebelde? Ano gid bala ang buot hambalon sang
TF-ELCAC?
Sa isa ka demokratiko nga katilingban, ang
mga rali, demonstrasyon kag protesta ginalunsar sang
mga agrabyado nga pumuluyo batuk sa gubyerno,
mga lehitimo nga otoridad ukon superyor nga entidad
parehas sang mga tag-iya sang kompanya, agud
hatagan sang remedyo ang ila mga reklamo ukon mga
demanda para sa mga kinamatarung ukon pribilehiyo
nga gindingut sa ila. Bangud ang CPP-NPA amo ang
ginaralihan sang PNP, buot silingon, ang CPP-NPA
isa na ka otoridad para sa PNP? Buot silingon, ang
CPP-NPA superyor nga pwersa sang sa Task Force-
ELCAC?
Kun ang mga ligal, demokratiko nga
organisasyon naga-protesta sa mga dalanon, ang AFP-
PNP nagapatindog sang mga checkpoints,
nagapamugong sang mga demonstrador,
nagademanda sang mga permit, pagkatapos ila
hambalon nga ang mga ralyista mga prente lang sang
CPP-NPA kay nagaprotesta sila batuk sa mga
patakaran sang gubyerno. Tapos subong, ginamit sang
PNP ang mismo rali para magreklamo batuk sa isa ka
rebolusyonaryo nga gahum pampulitika? Cheap,
second-rate copycat.
Ining mga utok-pispis nga bayaran nga
manugdilap-buli sang pasista nila nga commander-in-
chief nga si Duterte, daw mga lipong nga ginpakita
lang ang ila pagkadismaya kag desperasyon batuk sa
isa ka kaaway nga wala gid nila malutos sa sulod sang
51 anyos nga rebolusyonaryong paghimakas. Ang
NPA kaangay sang tunok sa ila kilid nga ginaantus
nila kun yara sila sa ila mga poste kag mas pa gid kon
ginamanduan na sila nga magkadto sa patag-awayan.
Indi mahimutig nga sa pagkamatuod,
ginakilala sang AFP-PNP Task Force-ELCAC ang
impluwensya kag kabaskugon sang CPP kag sang
bug-os nga rebolusyonaryo nga kahublagan sang
gintinguhaan gid nila nga malunsar ang pungsudnon
kag koordinado nga anti-CPP nga rali sa adlaw mismo
sang anibersaryo sang liwat nga pagtukod sang CPP.
Samtang wala ginsapak ang ika-84 ka tuig nga
anibersaryo sang pagtukod sang AFP, ang anibersaryo
sang CPP permi nagatatak sa mga pasista nga tropa
sang reaksyonaryo nga estado.
Matuod gid, ang Partido Komunista ng
Pilipinas indi malutos-lutos! #DD
(Grapik halin Ang Bayan, Mayo 7, 2019 isyu.)
7 DABA-DABA, DISYEMBRE 2019
(Halin sa fb.com/PanayToday)
PKP nanawagan nga buligan ang mga biktima sang Bagyo Ursula
agpapanaog sang direktiba ang Komite
Sentral sang Partido Komunista ng Pilipinas
sa tanan nga unit sang BHB nga imaksimisa
ang kahigayunan sang untat-lupok agud magbulig sa
mga nabiktima sang bagyong Ursula.
Sa Panay, liwat ginhanot sang bagyo ang daan
na nga mga probinsya nga gin-agyan kag ginhalitan
man sang bagyo Yolanda sang tuig 2013.
Sa pahayag sang PKP, kahigayunan ang tion
sang untat-lupok para magkondukta sang emergency
relief operations kag buligan ang malapad nga masa
nga apektado nga kay-uhon ang ila mga uma kag
patindugon-balik ang ila mga kabalayan.
Nagdangat na sa 50 ang napatay sa bagyo
Ursula kag naglab-ot sa masobra isa ka bilyon ka
pesos ang kahalitan sa mga pananom sang pumuluyo
ilabi na sa mga mangunguma sang mais, paray kag
mga mangingisda. Ang pinakagrabe nga igo sang
bagyong Ursula amo ang Western Visayas, ilabi na
ang isla sang Panay. Sa isla, ang pinakadaku nga
porsyento sang mga nahalitan yara sa Capiz, Aklan,
norte nga bahin sang Iloilo kag Antique, mga lugar
nga nahalitan man sadto sang bagyo Yolanda.
Daku ang pagkahangawa subong sang mga
biktima nga matabo liwat ang kriminal nga
pagpatumbaya sang gobyerno. Asta subong wala sa
gihapon mahatag ang nagakaigo nga ayuda sa mga
biktima sang bagyo Yolanda.
Gani, panawagan subong sang mga biktima
nga bug-uson liwat ang ila hanay kag idemanda sa
gobyerno ang dapat lang nila mabaton nga ayuda kag
bulig kaangay sang subsidyo sa pagkaon, kagamitan
sa pagpangisda, suporta para sa liwat nga pagtanom,
kag pagpakay-o sang ila kabalayan. (Ka Imbo, Daba-
daba correspondent)
Ampatuan, guilty! emporaryo nga naka-agum sang hustisya
matapos ang 10 ka tuig nga paghulat ang mga
himata kag kaabyanan sang 58 ka mga
indibidwal nga brutal nga ginpamatay sadtong
Nobyembre 23, 2009 sa banwa sang Ampatuan,
Maguindanao. Ginakabig ini nga pinakamalala nga
atake sa midya sa bilog nga kalibutan kag
pinakamadamu nga pagpatay sa midya nga may
kaangtanan sa eleksyon sa kasaysayan sang pungsod
Pilipinas.
Sa ginpapanaog nga mandu ni Judge Jocelyn
Solis-Reyes sang Quezon City Regional Trial Court,
ginpamatbatan sang 57 counts sang pagpatay sanday
Datu Andal Ampatuan, Jr., Datu Anwar Sajid
Ampatuan, Datu Anwar Ampatuan, Jr., Zaldy
Ampatuan kag Anwar Ampatuan, Sr., nga may
pinalidad sang indi magnubo sa 40 anyos nga
pagkapreso tubtob reclusion perpetua ukon tubtob
kamatayon nga pagkapreso.
Gin-acquit naman ukon ginpamatbatan nga
wala sala ang masobra 30 ka mga miyembro sang
kapulisan apesar sang ila papel sa nasambit nga
masaker.
Ang masaker natabo sang panahon nga mapasa
kuntani sang certificate of candidacy sa
pagkagobernador ang asawa ni Congressman Esmael
“Toto” Mangudadatu batuk kay Datu Unsay Mayor
Andal Ampatuan Jr., upod ang iya mga himata, mga
abugado kag 32 ka mga miyembro sang midya. Sang
sila ang malabay na sa Sitio Malating, Brgy. Salman,
didto na naga-checkpoint ang mga tropa sang
kapulisan kag mga miyembro sang pamilya
Ampatuan. Ginpapanaog ang mga nag-upod sa convoy
kag patarasak nga ginpamatay. Wala sang bilin nga
buhi kag nasalabat pa kag napatay ang anum ka
sibilyan nga naglabay lang.
Apesar sang pamatbat, nagpa-andam ang
National Union of Journalists in the Philippines
(NUJP) nga indi pa tapos ang away. Ini bangud
makaapelar pa ang pamilya Ampatuan sa Court of
Appeals kag Korte Suprema nga posible makabaliskad
sang mando kag masobra 80 pa ang wala
mapamatbatan.
N T
MGA BALITA
8 DABA-DABA, DISYEMBRE 2019
(Malipayon nga updanay sang mga hangaway kag masa sa anibersaryo sang Partido)
Ang pamilya Ampatuan ang may hugot nga
angot kay anay presidente kag subong kongresista
Gloria Macapagal Arroyo.
Ang masaker ang athag nga laragway sang
culture of impunity ukon kultura kon sa diin wala
salabton ang may sala. Ang pagluntad sini sa pungsod
kinaiya sang reaksyunaryo nga estado. Sa panahon ni
Duterte, nangin mas malala ang atake sa mga katapu
sang midya kaangay sang pagpamahug kag
pagpamatay, kag pagtapna sang kinamatarung sang
pumuluyo sa pagpahayag.
Gusto ni Duterte nga kontrolon ang midya kag
daloy sang impormasyon kag padayon nga ipaluntad
ang kakugmat kag sala nga impormasyon. Ini para
makontrol sini ang isip kag panglantawan sang
pumuluyo nga manami ang iya pagdumalahan sa
poder apesar nga kabaliskaran ang nagakatabo.
Dapat padayon nga batuan sang pumuluyo ang
sala nga impormasyon, pagpamahug kag handum ni
Duterte nga mangin diktador. (Ka Imbo, Daba-daba
correspondent)
Mga pumuluyo sa Panay, ginsaulog ang anibersaryo sang
Partido adinalag-on nga gintigayon sa lain-lain nga
bahin sang rehiyon ang pagsaulog sang
ika-51 nga anibersaryo sang liwat nga
pagtukod sang dungganon nga Partido Komunista ng
Pilipinas (PKP) sang Disyembre 26. Linibo nga mga
Partidista halin sa mga sanga sang Partido, mga
katapu sang likom nga organisasyon sang National
Democratic Front of the Philippines (NDFP),
hangaway sang New People’s Army, mga alyado kag
tagasuporta, kag mga pumuluyo ang nakig-bahin sa
mga aktibidad. Ginlunsar ang mga pulong-masa,
kultural nga programa, operasyon pinta-dikit, kag iban
pa nga mga nagkalian-lain nga aktibidad para
saulugon ang anibersaryo. Ginhiwat ang mga
aktibidad sa mga sentrong banwa, syudad, kag baseng
gerilya sa tunga sang tuso nga tiraniya sang rehimeng
US-Duterte.
Sa tanan nga mga aktibidad, ginpasidunggan
ang tanan nga mga rebolusyonaryong martir kag
baganihan sang pumuluyo sa tagsa ka mga larangan.
Labi nga ginhatagan sang pasidungog ang mga
kaupod nga naghalad sang ila kabuhi sa tuig 2019.
Tema sang ika-51 nga anibersaryo ang “Mag-
amot sa Pungsudnon nga Pagsulong sang
Demokratiko nga Rebolusyon sang Banwa”.
Sa Nasidlangan nga Panay
Sa pahayag sang Nonito Aguirre Sr.
Command, NPA-Eastern Panay, nasambit ang mga
kadalag-an sang rebolusyonaryo nga hublag sa
pagpamuno sang PKP kaangay sang pagpanubo sa
interes sa pautang, pagpasaka sang bili sang mga
produkto-agrikultural sang mangunguma. Dugang
man nga nagpalapad sang erya kag impluwensya kag
M
9 DABA-DABA, DISYEMBRE 2019
nagpadaku sang mga tago nga organisasyon sang
pumuluyo ang NPA sa bilog nga nasidlangan sang
Panay.
Sa Sentral Panay
Labi nga ginhatagan sang pasidungog sang
mga pumuluyo ang PKP sa iya mga naagum nga
kadalag-an sa patag sang pagsulong sang matag-adlaw
nga paghimakas batok sa pagsalakay sang mga
proyekto sang gobyerno para sa imperyalistang
pagdambong kag pagpanglanggab sang duta kaangay
sang megadam kag national greening program. Liwat
nga ginbalikan ang mga kadalag-an labi na sa
pagsulong sang armado nga paghimakas.
Sa Sur sang Panay
Ginapabugal sang mga kaupod sa Napoleon
Tumagtang Command kag amo man sang Mt.
Napulak Command ang mga kadalag-an sa mga
aksyon militar kag ang pagpaslaw sa mga kampanya
sang mersenaryo kag berdugo nga 3ID-PA. Daku ang
nangin papel sang suporta kag partisipasyon sang
pumuluyo sa pagpaslaw sang mga focused military
operations kag opensiba sang kaaway. Madamo nga
mga pamatan-on kag pumuluyo ang nag-entra sa New
People’s Army kag nangin katapu sang Partido.
Madinalag-on nga napumunuan sang Partido ang mga
paghimakas sang pumuluyo kag ang ila partisipasyon
sa inaway banwa.
Sa mga Sentrong Banwa kag mga Syudad
Ginpatigayon ang mga pulong-masa kag
kultural nga mga programa sa mga puti nga lugar kag
kabanwahanan sa tunga sang nagasingki nga atake
sang pasistang rehimen. Gintigayon man ang mga
operasyon pinta-dikit sang mga likom nga
organisasyon sa mga pampubliko nga lugar nga
nagadayaw sa anibersaryo sang Partido. Madamo man
nga mga streamer kag leaflets ang ginpagwa sa mga
baryo kag kabanwahanan.
Halin sa mga Rebolusyunaryo nga Organisasyon
Nagpaguwa sang pahayag sang suporta kag
pasidungog ang mga rebolusyonaryo nga
organisasyon sang ARMAS-Panay kag Pambansang
Katipunan ng Magbubukid-Panay. Hangkat sang mga
rebolusyonaryong organisasyon ang pagpabaskog sa
kaugalingon kag ang pagpadaku sang ila amot sa
armadong paghimakas kag sa pagsulong sang
pungsudnon-demokratiko nga rebolusyon.##DD
Kumperensya sa propaganda kag edukasyon, ginlusar sang PKP-Panay
adinalag-on nga ginlunsar sang PKP sa isla
sang Panay ang mga kumperensya sa
hilikuton edukasyon kag propaganda. Sa
tunga sang padayon nga pagpang-atake sang kaaway
sa bug-os nga isla, nagtipon ang mga kadre sang
nagkalain-lain nga organo sa idalum sang KR-Panay
agud tasahon ang kabilugan nga dalagan sang mga
hilikuton sa edukasyon kag propaganda. Ginbalay
man sang mga kumperensya ang mga programa sa
edukasyon kag propaganda para sa masunod nga tuig.
Ang mga kumperensya sa edukasyon kag
propaganda napanahon nga pagtinguha agud dugang
iduso ang mga panawagan sang Partido nga i-abanse
ang halintang sang inaway-banwa kag mas patalumon
ang rebolusyonaryong handus sa dughan sang
rehimeng US-Duterte.
Yara sa pinakamaayo nga kahimtangan ang
hilikuton sa rebolusyonaryong edukasyon kag
propaganda para sa dugang nga pagbwelo sang mga
nasambit nga hilikuton.
Ang mga kadre nga nagatungod sang hilikuton
sang rebolusyonaryong edukasyon kag propaganda, sa
lain-lain nga lebel, may madalum nga gagap sang
rebolusyonaryong teorya kag relatibo may malawig
nga praktika sa rebolusyonaryong edukasyon kag
propaganda. Daku nga bahin sang delegado mga
pamatan-on kag natunga-tunga nga pang-edaron
(pareho nga 42%), kag 16% naman mga abanse nga
pang-edaron nga kadre.
Bastante ini nga puhunan sa paglab-ot sang
ginatos ka libo, kun indi man minilyon, nga pumuluyo
agud sila mamuklat, ma-organisa kag magpartisipar sa
rebolusyonaryong kawsa.
Sa pagtapos sang kumperensya sa edukasyon,
ginpanawagan nga dugang pataason ang kapasidad
M
10 DABA-DABA, DISYEMBRE 2019
(Halin sa fb.com/PanayToday)
sang mga organo sang Partido sa paghatag sang mga
pangmasa kag pang-Partido nga edukasyon, bugkuson
sa ideolohiya ang pumuluyo, organisadong masa kag
mga katapuan sang Partido paagi sa malaparan nga
paghatag sang pangmasang edukasyon kag sang 3-ka-
halintang nga kurso pampartido.
Samtang, sa idalum sang panawagan nga
“Palaparon kag Pabaskugon ang Hukbong
Propaganda sang Partido sa Rehiyon! Angkunon ang
Opensiba nga Postura sa Propaganda!”
ginpanawagan sa kumperensya sa propaganda ang
dugang pagpabaskog sang kontra-opensiba nga
propaganda batuk kay Duterte. Ginpanawagan man
sang Partido sa iya hukbong propaganda nga itodo
bwelo ang pagbuyagyag sang kahimtangan sang
basehang masa kag ibandila ang mga panawagan para
sa pungsudnon demokrasya kag armado nga
paghimakas.#DD
Pangkalibutanon nga adlaw sang tawhanon nga kinamatarung,
ginhanduraw sang mga Panayanon
umuluyo, magbato! Dampigan ang aton
mga kinamatarung! Ini ang nangin tema sa
pagsaulog sang pumuluyo sa ika-71 nga tuig
nga komemorasyon sang pagkalibutanon nga adlaw
sang tawhanon nga kinamatarung (International
Human Rights Day) sang tinalikdan nga Disyembre
10.
Ang Disyembre 10 ang nabun-ag matapos
ideklarar sang United Nations sadtong tuig 1948 ang
30 tanan ka mga basehan nga kinamatarung sang
pumuluyo nga dapat hatagan igtalupangod kag
respetuhon sang tagsa-tagsa ka estado.
Masobra 2,000 ka pumuluyo ang nagpartisipar
sa kahiwatan nga napakat sa apat ka mga mayor nga
syudad kag banwa sa apat ka probinsya sang Panay
bilang sentro sang paghulag. Ginpangunahan sang
Bayan Panay kag Panay Alliance Karapatan ang
kahiwatan sa syudad sang Iloilo sa Sunburst Park sa
diin nangin sentrong atraksyon ang effigy ni Duterte
nga nabutang sa kaldero nga ginsindihan matapos ang
aktibidad.
Suno kay Lucy Francisco, tigpamaba sang
Panay Alliance Karapatan, nagapabilin nga numero
uno nga tagabayolar sang kinamatarung sang
pumuluyo ang rehimeng US-Duterte samtang padayon
ini nga nagapakatuta sa imperyalistang Estados
Unidos, mga agalon mayduta kag burukrata-
kapitalista.
Nangin kasangkapan dugang ni Francisco sang
estado ang mersenaryo kag idu-buang nga armadong
kusog sini agud labi nga ipton ang paghimakas sang
pumuluyo para sa matuod-tuod nga kahilwayan kag
demokrasya.
Mayor nga mga polisiya subong ni Duterte
para papason kag pahipuson ang pumuluyo amo ang
Oplan Kapanatagan, Memorandum Order No. 32, kag
Executive Order No. 70 nga naglatag sang de-facto
martial law sa bilog nga pungsod kag sunod-sunod
ang mga pagpamatay, iligal nga reyd kag pag-aresto
sang mga mangunguma kag kilala nga lider sang mga
demokratiko nga organisasyon.
Sa datos sang Karapatan, 293 na ang
ginpamatay sa kubay sang demokratiko nga pwersa
sang pumuluyo wala labot ang kapin 30,000 ka mga
biktima sang Oplan Tokhang samtang 629 ang ara sa
presohan bangud sang wala basehan kag patu-pato
nga kaso.
Wala man nakatibawas sa kaimulon ang
pumuluyo bangud sa nagasinampaw nga mga kontra-
pumuluyo nga patakaran pang-ekonomiya ni Duterte.
Halin sa TRAIN Law, padayon nga pagtaas sang
produktong petrolyo, ang hanot sang Rice
Liberalization Law, kag epekto sang pagbag-o sang
klima, nalubong pa gid sa kautangan ang mga
mangunguma kag nagbuhin ang ikasarang magbakal
sang basehan nga produkto sang malapad nga imol sa
syudad samtang labi naman nga nagamanggad ang
manggaranon.
Sa datos sang Ibon Foundation, sa 22.7
milyones nga pamilyang Pilipino, 29% sini ukon
6.471 milyones ka pamilya ang nagakita sang manubo
pa sa P10,000 kada bulan. Samtang, 66% (15
milyones) sini nagakita P10,000 – P60,000 kada
bulan. Sa pihak nga bahin, 1.2 milyones lang nga
pamilya ang nagakita halin P60,000 tubtob P8
milyones pataas kada bulan. Sa naulihi, 0.8% lang
P
11 DABA-DABA, DISYEMBRE 2019
sang tanan nga pamilya ang nagakita sang P140,000
tubtob P8 milyones kada bulan.
Nanawagan ang Bayan Panay sa pumuluyo
nga dapat pabaskugon ang kubay kag batuan tubtob
madugmok ang ini nga tuta, makahalalit, paantos kag
korap nga rehimeng US-Duterte. Dapat ipanawagan
sang pumuluyo nga ibasura ang polisiya kag
patakaran kaangay sang TRAIN law, rice
liberalization law, Memo No. 32 kag EO No. 70.
Pagkasunod nga adlaw sang Disyembre 11,
naghiwat naman sang caravan halin sa syudad sang
Iloilo padulong sa syudad sang Bacolod ang
Philippine Ecumenical Peace Platform (PEPP) –
Panay nga ginapasakupan sang nagkalain-lain nga
denominasyon sang mga taong-simbahan.
Katuyuan sang caravan nga ibuyagyag ang
padayon kag nagalala nga pagpanglapas sang
kinamatarung sang pumuluyong Negrense nga
ginahimo nga laboratoryo sang pasistang rehimen ni
Duterte.
Ginpanawagan sang PEPP nga dapat na
mauntat ang kultura sang impunidad ukon pagkawala
salabton sa mga kriminal nga ginapangunahan sang
berdugo nga AFP kag PNP.
Ginaduso man sang grupo nga padayunon sang
GRP kag NDFP ang estoryahanay panglikanungan
agud malubad ang dinekada nga pagbakho sang
malapad nga pumuluyo kag magluntad demokrasya
kag kalinong nga nakasandig sa hustisya. (Ka Imbo,
Daba-daba correspondent)
Bugal Kag Dungog Ko Ang Akon Partido
Luyag ko isinggit sa bug-os nga kalibutan
Bugal kag dungog ko ang akon Partido
Handum ko nga maamba sa pag-abot sang tion
Ang imo ambahanon sa tanan nga dalanon.
Kasanag kag kaisog ko ang akon Partido
Ang kinaalam mo naghilway sa pang-inuino
Sa naglambong nga prehuwisyo kag kabutigan
Nagbukas sang pensar sa layi sang kalibutan
Sa tunga sang kagumon ikaw nangin dalangpan
Agud matul-id ang putli nga kamatuoran.
Katingob sang akon balatyagon ang Partido
Nagdabong ang kangil-ad tuhoy sa paghimulos
Pag-ulikid, pagbatyag sa kabuhi sang pigos
Ang gatong nga nagapadabdab sa paghimud-os
Nga sa katilingban ang komunismo malab-ot.
Ang Partido pagpalangga nga nagapursige
Kadungganon sang tinutuyo indi mabanggi
Tampad kag mapainubuson sa pagpanadlong
Handa magsakripisyo matuman lang ang handum.
Paglaum kag bwas-damlag ko ang akon Partido
Pagbutlak sang adlaw sa tunga sang kadudulman
Tigbalagtik o tingulan mapangibabawan
Kalig-on nagalampuwas tubtob kadalag-an.
Bugal kag dungog ko ang akon Partido.
KDArmada
Disyembre 26, 2018
_________________________________________________________________________________________
Para sa ika-51 nga Anibersaryo sang PKP
Sa malala nga gutom kag inhustisya
Labi nga nagabaskog ang rebolusyonaryo nga
kahublagan sang masa
Sa ika-51 anyos na nga pagsulong sang PKP
Padayon ini nga nagamadinalag-on, nagadamo ang
rebolusyonaryo
Ginapangunahan sang reaksyunaryong estado nga ini
papason
Apang kapaslawan lamang ang ila naangkon
Ang pumuluyo nagahandum sang hustisya kag
kasulhayan
Gani ang paghimakas nagabaskog, nagabato sa Oplan
Kapanatagan
Ang gutom kag pamasista gatong sa pagpakigbato
Sa handum nga matapos ang gutom kag mga
pagbakho
Sa rebolusyon magapadayon tubtob sa kahilwayan
Bisan pa nagakahulugan sang pangmalawigan kag
sang kabuhi madagasan
Mientras kita ginasakop kag hamak nga ginaulipon
Ang pumuluyo maningkaras sa gihapon
Bangud kay gutom kag inhustisya ang nabatyagan
Kag wala sang iban nga solusyon, rebolusyon ang
padulungan
BINALAYBAY
12 DABA-DABA, DISYEMBRE 2019
Sa subong sa madinalag-on nga paghiwat sang ika-51
nga anibersaryo
Nagapaabot sang pagsaludar sa pagkaisganan ninyo
Ang rebolusyonaryo nga paghimakas labi nga
pabaskugon
Agud nga madugmok ang mga sahing pasista kag
sakon
Dugang nga kaisog kag pagkapag-on
Ang malapad nga masa magaserbi nga inspirasyon
Ang mabaskog nga panghangkat ululupod nga
atubangon
Agud ang rebolusyonaryo nga kahublagan padayon
nga magamadinalag-on
Mabuhay ang Partido Komunista ng Pilipinas!
Ann Patria
Armas – Panay
Disyembre 26, 2019
“REBANEK” Kompaylasyon sang
Rebolusyonaryo nga mga Anekdota.
Suno sa tagsulat nga mga kaupod, Ang
‘REBANEK’ isa ka pagtipon sang mga panaysayon
kag istorya halin sa “tunay nga mga hitabo sa kabuhi
sang mga rebolusyonaryo nga kaupod kag masa sa isla
sang Panay nga nagalakip sadtong dekada 70 sa lugar
nga ginatawag Border Area sang Iloilo, Capiz kag
Aklan.”...
“Mga kahalam-utan ini nga inagihan—mga gawi,
aksidente, nga ang iban, bunga sang agwat-kultural sa
tunga sang kaumhan kag kasyudaran sang mga
kaupod nga naghalin sa nagkalain-lain nga sahi kag
impluwensya, nga nagahimakas sa pagbag-o sang
kaugalingon kag sang katilingban.”…
“Sa pihak sang pagkaseryoso kag kabuhi-kamatayon
nga paghimakas sang mga kadre, katapo sang partido
kag mga Pulang hangaway, may katimbang ini nga
mga hitabo nga makapakadlaw, hungod man ukon
indi.”…
“Sa kabilugan nagahatag sang pagpamag-an sang
sitwasyon kag panahon nga makakadlaw nga normal
sa kabuhi sang rebolusyonaryo sa luyo sang masa,
diin man sila ukon bisan sa aktwal nga pagpakig-away
sa pasistang militar.”
“Kilala si Reagan”
Nagaoperasyon ang armi sang mag-imbestiga
sila kay Totoy, isa ka bata.
“Kilala mo ‘To si Reagan?” Ginapangita sang
armi si Ka Reagan.
“Huod eh!” Madasig nga sabat ni Totoy.
Nagtulukay ang mga armi, dayon nila dakop sang kahigayunan nga makakuha sang impormasyon.
“Ti diin na siya? Nakalabay man siya diri?”
“Huod eh, didto siya dampi sa may bato…”
Tudlo man sang bata.
Madasig pa sa alas kwatro nga tren nga
nagmaniobra ang mga armi agud likupan ang daku
nga bato nga nahamtangan ni Reagan. Nadakpan nila
si Reagan, nagaluko sa duta.
Reagan man gali ang ngalan sang idu sang
kaingud nga balay nanday Totoy.
* * *
HULATON ANG MADASON NGA MGA REBOLUSYONARYONG ANEKDOTA SA MASUNOD NGA ISYU SANG DABA-DAB
REBANEK
13 DABA-DABA, DISYEMBRE 2019
CADUY
14 DABA-DABA, DISYEMBRE 2019
PAHIGDA
1. Ngalan sang bagyo nga nagdalasa sa pungsod sang
ulihi nga bahin sang Disyembre.
2. Kaadlawan sang ika-51 nga tuig sang liwat nga
pagtukod sang Partido Komunista ng Pilipinas kag
ginaselebrar sang bilog nga pumuluyong Pilipino.
3. Ingles sang untat-lupok.
4. Ini ang postura sang tanan nga yunit sang NPA sa
panahon sang untat-lupok bilang depensa sa
pumuluyo kag teritoryo sang rebolusyonaryong
gobyerno.
PATINDOG
5. Kinaiya sang AFP nga magbaton sang pamaylo
para sa ila serbisyo ilabi na sa mga korporasyon
kag sa nagahari nga sahi.
6. Naghalin sa tinaga nga propago nga buot
hambalon pagpalapnag. Hilikuton ini sang tanan
nga rebolusyonaryo.
7. Ingles sang pag-imponer sang militar para
limitahan ang paghulag sang komunidad sa mga
baryo sang San Joaquin, Miagao, Igbaras, kag
Sibalom, nga kabahin sang ila Focused Military
Operations.
8. Kinaiya sang operasyon sang reaksyonaryong
militar sa mga kabanwahanan sang San Joaquin,
Miagao, Igbaras kag Sibalom.
HULATON ANG SABAT SA KROSWORD SA MASUNOD NGA ISYU SANG DABA-DABA
Sabat sa Krosword Nobyembre 2019
KROSWORD