Download - Pyaar Ki Ek Kahani
It’s not just a Lovestory, it’s a song. It’s a saga.
AYE ZINDAGI
Har subah uthta hoon main rozi roti kamane ko
Sochta hoon, kis mod par le aayi hai yeh zindagi
Kisi ka na ishq mila hai,
Na hi kisi ki bandagi.
Mohaulle se nikalta hoon aate jaate daftar se
Sab apna apna kaam chhod mera muh tadte hain.
Gham chha jaata hai, jahan se main nikalta hoon,
Dil karta hai ki muh chhupaloon apna chaddar se.
Sab khush haal hain apni zindagi se,
Main hi kyon hoon itna khafa?
Aisa kausa kaam hai jo karta hai karne vale ki aisi haalat?
Haan janaab, karta hoon main logon ke talaaq ki vakaalat.
Dil kya jaane pyaar ka swaad
Zindagi bhar sirf nafrat hi mili hai
Log kehte hain panauti mujhe,
Bear k idol se zindagi sili hai.
Izzat toh uski hoti hai, jo dilon ko milata hai
Voh hi mahan, voh hi bhagwaan, vo hi sabka jahan
Main toh bani banayi shadiyan tudvata hoon
Sabki nazar mein main toh hoon haiwaan
Dil toh karta hai, ek kamre mein apne aap ko band karloon
Par kaam karna majboori hai
Aisa kaam karke khud ko kaise pasand karloon
Badhti jaa rahi apne aap se meri doori hai
Hoon main tujhse naaraz aye zindagi
Na kisi ka ishq mila hai
Na hi kisi ki bandage
MUSAFIR GRAHAK
Kehte hain subah ke sapne sach nahi hote
Sapne dekhne ka kya faayda?
Pehle dikha ke phir tod deta hai
Kaisa zaalim hai khuda ka yeh kaayda
Maine chhod diya zindagi se ummeed rakhna
Main akela hi rahoonga
Yeh tanhaayi aur akelapan
Main akela hi sahoonga
Sham ko main nikalta hoon thandi hawaa khaane
Nazar daalta hoon us kachchi sadak par
Mitane meri berozgaari, koi toh grahak dikhjaaye
Vaise bhi duniya banati hai chehre banati hai meri ek hi jhalak par
Dikhta hai ek akela, chalta musafir
Haath mein ataichi, chehre par zor
Dheere dheere, sehme sehme
Badhta hai meri or
Dekhta hai voh chaaron taraf
Saara mauholla uspar dhikkar kar raha hai
Par mauholla kya jaane uski majboori?
Voh bhi uske talaaq ko rokne ke liye andar hi andar mar raha hai
Aata hai voh mere paas, sir jhukae
Deta hain mujhe voh ataichi, jo aaya tha voh lekar
Main use voh leta hoon sonchte hue,
Khuda tu kaise khush hai yeh sab dekhkar?
Mujhse milkar chala jata hai voh
Mujhe apne akelepan mein sadne
Main toh tallaq karwaata hoon janaab
Akele rehne ki aadat hai, akele hi chhod diya hai duniya ne mujhe marne
MERE MAUHOLLE AAYI EK PARI
Subah ki ghanti uthati hai sabko
Koyal ki kuhuk se neend khulti hai
Roz ka aam admi kaam karne lag jaata hai
Subah ki chaay banti hai aur kisaan ki bhains dhulti hai
Mehek aati hai har subah gaushaala se
Aalas ko peeche chhod sab kaam par nikal jaate hain
Main chup chap jaata hoon bazaar
Mere aate hi mujhse door jaane ke liye sabhi vyapaari sabha se bikhar jaate hain
Daahini taraf hai ameeron ka nivaas
Baahini or kismat ke maaron ka
Beech mein rehte hain saahukaar aur zamindaar
Main nukkad par rehta hoon kyonki mera nahi koi yaar, yaaron ka
Koi nahi mera apna yahan
Sab mujhse rehte hain khafa
Koi naya aata nahi hai yahan rehne
Ummeed bhi hai mujhse bewafa
Phir ek din hua jaise jaadu
Jaise khuda ki meherbani mujhpe aa giri
Apsara jaise vo mauholle mein aayi
Ek hi nazar mein aise laga jaise hum dono ki kismat aa mili
Pehli baar dil dhadakne laga
Ummeed ki chahat jagi
Phir mujhe yaad aayi kadhvi hakeekat
Paas na jaa paunga uske, vo bhi mujhko shola lagne lagi
Beech bazaar mein muh khole khada tha
Tank raha tha uska chehra
Jaise vo meri taraf aane lagi, jaadu sa chhane laga
Aisa laga ki kuch hai humare beech. Kuch gehra.
Vo mere paas se guzri
Uski mehek thi man lubhani
Ek din tujhe apna main banaunga
Yeh baat maine apne mann mein thaani
KYA YEH PYAAR HAI
Tu chalti hai toh aati hai bahaar
Pheeki lagti hai sher ki dahaad
Akela rehta hai dil hamesha
Par lagta hai khuda ne kiya ek hamsafar ka jugaad
Phool bhi teri hasi ke aage sharmaye
Teri ek nazar hi mera dil dhadkaaye
Main gaa toh nahi sakta magar
Tujhe dekhkar dil bhi taraane gungunaye
Tera chehra hi mera sukoon hai
Tera ishq hi mera junoon hai
Mere ragon mein daudta hai tera ishq
Tera ishq hi mera apna khoon hai
Tere paas hoon jab agar megha barse
Tujhe choone ko mera dil tarse
Par mein aisa nahi karta
Mauholle ki nafrat aur teri sharafat ke darr se
Tujhe main paaoon, yeh hai meri chaahat
Tera chehra dekhne se hi milti hai raahat
Tujhse zyaada khoobsurat ladki maine dekhi nahi
Tu hai khuda ki koi anokhi banaawat
Maine pehle nahi dekha tumsa haseen
Iss baat ka hai mujhe pura yakeen
Dekha hai maine pariyon ka mela
Magar tumsa koi maine dekha shaayad hi hai kahin
Teri zulfein jab lehraatin hain
Lagta hai jaise voh mere gaalon ko sehlaatin hain
Mujhe jo abhi ho raha hai
Kya voh sach much mohobbat kehlati hai?
Tere palko ki ek jhapak mujhe deti hai chhaya
Paani ki tarah behti hai teri kaaya
Mujhe pehle kabhi hua nahi, isliye nahi pata
Kya yeh pyaar hai, ya phir koi maaya?
PEHLI MULAKAT
Dopahar ko khaat par araam farma raha tha
Use theesri baar dekhne par, besharam dil bhi sharma raha tha
Voh chalet aa rahi thi meri or
Yahi dekhkar tham gaya baaki saara shor
Jaise jaise voh aati gayi aage
Samay thamne laga ho, aisa laage
Safed kaagaz vo laa rahi hai
Shaayad vo koi kaam se aa rahi hai
Hakeekat mujhpe aa jhapki
Yaad aaya ki ishq ki duniya mere haath se jaa chuki kabki
Sapne dekhta rahega tu kab tak?
Bhulja pyaar ko, nafrat mein jeeta aaya hai tu ab tak
Vo mujhse aake boli, “suna aap ek vakeel hain?
Meri aap hi madad kar sakte hain, is baat ka mujhe poora yakeen hai”
“main kaise karoon apki madad?
Kya hai aapka yahan aane ka sabab?”
Voh boli “mere bhai ko sata rahe the kuchh log
Khudko bachane ki koshish ki, par raha hai jail ki saza vo bhog”
Maine kaha “main nahi kar sakta uski zamanat
Main to karta hoon talaak ki vakaalat”
Yeh sunke vo do kadam peechhe gayi
Jaise mauholle ki nafrat se vo bhi keenche gayi
Vahi hua jiska mujhe darr tha pehle
Ab vo mujhse nahi milegi; na agle din, na agle haftem na agle mahine
“maaf kijiyega, mujhe nahi tha pata
Galat mat samajhna, aapse nahi hai koi khata
Socha tha aap kuchh aur karte hain
Isliye shaayad mauhollewaale aapse darte hain”
Main muskuraya, “darr? Nahi yeh log mujhse karte hain nafrat
Aapko maafi mangne ki nahi hai koi zaroorat”
Vo bhi muskurayi, “mujhe nahi lagta ki aap hain koi bure insaan
Kyon rehte hain aap is ghar mein, jo hai itna sunsaan?”
Main bola, “kahani hai badi lambi,
Kya aapko nahi hai ghar jaane ki thodi jaldi?”
Vo boli, “mauholle mein sabko janna zaroori hai
Aur aapko jaanne mein kahan ki majboori hai?”
Maine khatiye ko apne paas kheecha
Socha “aaj khuda mere saath hai, nahi dikha sakti kismet mujhe ab neecha”
Usse bola “baitho. Aao sunaoon meri yeh kahani
Hai to nayi hi, par sunne mein lagegi jo sadiyon puraani”…
KAHANIYAAN - 1
“Us din sirf das saal ka tha
Duniya ke taur tareekon se anjaan
Dekh raha tha duniya ka sabse khaufnaak nazara
Kaise do dilon ke beech kadvahat laa raha tha bhagwaan
Do hanson ka joda kehlate the voh
Is jahaan ki sabse pyaari Jodi
Pandrah saal ki shaadi ko
Ek chhoti si pudiya ne todi
Ek kasam khaai thi baba ne maa se
Dhuein se rahengein door
Magar peene ki zid thi itni puraani
Ek mazboot bharose ko kardiya chakna choor
Maa ne shaayad galat aadmi par bharosa kiya
Meri pehli ibaadat ko laga ek dhakka
Kachchi umar thi, kachche irade the
Lekin is ek ghatna ne, kardiya shaadi ke bare mein mera irada pakka
Shadi shraap nahi hai, par vardaan bhi nahi
Yeh baat maine us din jaana
Aaj ek se pyaar, kal usi se dhokha,
Aisa toh roz chalta rahega, maine maana
Phir poore dus saal baad aayi
Maa-baba ki pachcheesvi varshgaanth
Baba se kabki bichhdi hui meri maa, ghar aa rahi thi
Kaali raat thi, kaali barsaat
Baba achaanak maa ke samne aaye
Aur thama unka haath
Dari hui meri maa, haath chhuda kar ghar aayi
Baba ne kiya unka peecha
Mein gusse mein chillake chowkhat par aaya aur bola
‘chale jaao baba! Tumne dikhaya tha maa ke bharose aur pyaar ko neecha!’
Baba gidgidaye, ‘aisa nahi hai jaisa tum log sochte ho
Main aya hoon tumhe batane
Anjaan khatre the tumhari jaan ko
Main tumhara baap hoon, mujhe dharti par bheja gaya hai tumhe unke raaste se hatane’
Pachchees saal maa ne intazaar kiya tha baba ka
Maa ke kaan, baba ki baat sunne ko taras rahe the
Unko itna rote hue pehle kabhi nahi dekha
Aankhon mein se jaise aasuon ke teer baras rahe the
Maa ne baba ka haath thaama
‘sunao tumhari kahani’, voh boli
Magar kismet ne phir ek tamacha maara humein
Jab baba ke badan ko cheerti aayi, ek jaanleva goli
Khoon mein laplapaate baba neeche girgaye
Pachcheesvi saalgirah pe toda dum
Samajh nahi aaya ke kya hua,
Khauf, darr, aur ghum ke beech jujh rahe the hum
Maa toot gayi is sadme mein
Baba ko doosri baar unhone khoya tha
Voh bhi chali gayi baba ke saath, mujhe chhodke
Toot gaya us suhaane bhavishy ka sapna, jo maine apne aap ke liye boya tha”
PEHLI MULAAKAT KI RAAT
Mere aankhon mein tha paani
Voh boli “badi dukhbhari thi aapki kahaani”
Mujhe yakeen tha ki maine usko kardiya tha tang
Meri pehli mulakat uske saath, maine kardi bhang
Main has pada aur bola “kya tumne lagta hai ye hakeekat hai?
Talaaq vakeelon ka bharosa mat karo. Ye meri ek naseehat hai”
Voh boli “sach nahi toh kya hai ye, mujhpe karo meherbaani”
“Nahi nahi, yeh to hai keval ek filmy kahaani”
Voh hasi aur boli “achhi hai. Bahut achhi hai
Bhagwaan na kare ki ye sachchi hai”
“Talaaq karwaata hoon. Yeh kala mere ragon mein rehti hai
Kabhi kabhi ye apne aap mere labon pe aati hai”
“Maa baba ke bichhadne ke baad
Mujhe ek baat aayi yaad
Pehle humen rehti hai jeevansaathi chunne ki azaadi
Phir hoti hai araam se shaadi
Phir ek din tanaav mein lagta hai ki shaadi nahi koi mazaak
Phir se azaadi chaahiye, lene aajao talaaq”
Vo muskurai
Mere dil mein baji shehnai
Vo boli “par sab log nahi rehte hain nakhush
Shaadi bhatke logon ka hota hai ankush”
Main haske bola, “sabke liye toh nahi
Unke liye main karta hoon vahi jo unke liye sahi”
Uski aankhon mein thi jhalak hasi ki
Uski nazar mujhko pyaar se dasi thi
“Maine tumhe mere bare mein bata diya
tumhe maine kaafi der tak sata diya”
Vo muskura ke boli “nahi nahi aisa nahi hai
Meri bhi kahani vaisi hi kahin hai”
Mai bola, “magar tumhe ab jaana hai,
Koi tumhe bulaane aa raha hai”
“Maaf kijiyega, haan mujhe jaana hoga
Kal phir ummeed hai ki aapse milna hoga”
Usne le li mujhse bidaai
Mere saath phir rehgayi meri tanhaai
Vo chali gayi lekin paas thi mere dil ke
Mera mann khush ho gaya usse milke
Meri hui usse pehli mulakaat
Neend nahi aayegi mujhe aaj ki raat
NAYI DOSTIYAAN
Bazaar mein aaj kafi shor tha
Aaj guruwaar jo tha
Hungama chaaron or tha
Har kisi pe tarakki karne ka bhaar jo tha
Main gaya uske ghar ke paas
Dekhne ki kab vo aayegi aaj
Vo aagayi thi mere dil ko raas
Par mujhe pata tha, hamara rishta nahi sweekarega samaj
Door se dekh raha tha main
Voh khadi thi apni car ke paas
Aankhen sek raha tha main
Aur vo jaa rahi thi bazaar ke paas
Main ghar legaya apne saath meri tanhaayi
Agar aana ho, to voh khud aayegi
Dheere dheere band hone lagi dil ke shehnayi
Meri zindagi ko use jaana ho, to vo khud chali jayegi
Baithe baithe ho gayi shaam
Aayi nahi vo ab tak
Intazaar mein neend ho gayi meri haram
Sone jaa raha tha main, intazaar karun main kab tak
Jaise hi main gaya andar
Dekha use main aate hue
Kud utha mere dil ka Bandar
Thumak rahi thi uski kamar mujhe rijhaate hue
Main bahar phir se aa gaya
Chehre par mere ek unkahi anjaani muskaan leke
Lagta hai main uske dil ko bhaa gaya
Dekho aa gayi meri jaan, uske sang mera jahaan leke
Hum der raat tak baat karte rahe
Sunte sunate ek doosre ko apni baaten
Uske baad, roz hum mulakat karte rahe
Chahe garmi ho ya phir barsaaten
Aise hui humaari pehchaan
Mauholle mein mera pehla chaahne vaala mila
Achha hai ki vo yahan rehti hai, nahi hai yahan ki mehmaan
LADKA BADA ANOKHA
Hui shuruaat ek naye rishte ki
Lagaa ki baat thi ye zindagi ki
Na hi koi kishte ki
Baat thi us ladke mein koi gazab ki
Uske saath na mauholle ka darr rehta hai
Na hi kisi ke mazhab ki
Aankhe meechke uspe karti hoon bharosa
agar voh kudne ko kahe,
toh chabutra lagta hai haveli ka jharokha
ab ke pehle nahi ki kisi ki itni fikr
itna dil ke kareeb aa gaya hai vo
ki har lavz mein rehta hai mere, uska hi zikr
uski parvah karna toh jaise hai meri fitrat
uske khayaal mujhe itne aate hain
mere liye ban gaye vo aafat
raat mein neend nahi aati
bas dhyaan uske ghar ke khaat par rehta hai
subah ko uthoon, to meri apni awaaz mujhe nahi suhaati
vo hi hai mera aasma, voh hi hai zamee
uske saath hoon to sab kuch hai
phir nahi rehti koi kami
mere dost samajh rahe hain ke mujhe ho gaya hai pyaar
pyaar? Voh kya hota hai?
“Pyaar jaisa kuch nahi hota”, baba ne kaha tha pichli baar
Us ladke ko main apna sab kuch dene ko thi taiyaar
Vo hi mera pehla sachcha dost tha
Is mauholle mein tha vo hi mera sansaar
Man manne ko nahi manta mera, kaise karoon ezhaar
Parvah uski hi karti hoon main sada
Haan, mujhe us deewane se shaayad ho gaya hai pyaar.
KYA HAI HAMARA BHAVISHY?
Do saal ho gaye use jaane mujhe
“mujhe tumse pyar hai” usse kahane mujhe
Kehke bhi vo kya karegi
Vo meri to nahi ho sakegi
Hum kabhi ek nahi ho sakte
Hum dono apne aap mein nahi kho sakte
Main ek talaaq vakeel, vo ek khoobsurat ladki
Aisi baat sonchke hi mere mann mein bijli kadki
Magar jaane bagair toh main nahi reh sakta
Ye anjaanapan main nahi seh sakta
poochhoonga usse main kal uske dil ki baat
bhagwaan kare ke vo mujhe nakaarde, nahi to so nahi sakoonga main kal raat
Aaj hum chale baazar
Hoke hum taiyaar
Maine liya tha thaan
Banaunga use main apni jaan
Teen ghanton ke baad
Dekhke baazar abaad
Ab sach ko jaanna hoga
Kare vo mujhse pyaar ya nahi, ye maanna hoga
Maine dheere se use dekha
Uski aankhon ke aage, duniya ko kar diya andekha
Meri nazar ki baat vo pehchaan gayi
“Haan.” Kehke vo bhi vahan se bhaag gayi
Aisa lag raha tha ke seena phat jaayega
Samajh nahi aa raha tha ke dil ka deewanapan kab ghat jayega
Vahi khada reh gaya main haath neech latkaye
Dekh raha tha use jaate hue, kamar yahan se vahan chhalkaye
Chup chap main gaya ghar
Vahi hua jiska mujhe tha darr
Mujhe pata hai ki ishq bhaav khaaega
Mauholla humare rishte ko nahi chaahega
Khush hoon main kyun nahi ye mujhe nahi malum
Sonch raha hoon, “aaj sabse bada din hai, jaante ho na tum?”
Maayus nahi tha main, na hi tha main khush
Ek hi pal mein ban gaya, ya lut gaya mera sab kuch
Ho raha hoga uska bhi yahi haal
Kaisa hai kismet ka ye janjaal?
Kardiya maine usse apne pyaar ka exhaar
Par aisa kyun lage hai ke lut gaya mera sansaar?
Kya sach mein jee payega humara pyaar?
KARNA PURA YE KAAM
Phir mulakat hui agle din
Meri jaan se milne main pahuncha
Baat nahi kar rahi thi vo mujhse
Ek hi din mein bikhar gaya sansaar samucha
Bas chup chap uske saaye mein
Baitha tha mein aankhen band kiye
Vo bhi kuch nahi bol rahi thi
Main bhi baitha tha bina ghamand kiye
Chuppi main baithe the hum dono bahut der
Phir vo uthke chali gayi ghar
Main bhi sar jhukake vahan se uth gaya
Mann mein leke bhavishya ka darr
Agle din baat karne gaya main usse
Kyon vo is baat ko taal rahi thi?
Zaroori hai humein baat saaf karna
Kyon vo is jale par namak aur daal rahi thi?
Vo peeche mudkar jaane lagi
Na jaane kyun, par vo bhi bhaav khaane lagi
Main bhaaga uske peeche
Pukaarke uska naam
Humein baat karna hai iske bare mein
Pura karna hai humein ye kaam
Maine uska haath thaama
Aur usko apne paas kheecha
“kya chaahti ho tum is rishte se?”
Maine zor se poocha
“Kya chaah sakti hoon main?” vo boli
Sach bataaun to mujhe bhi nahi tha pata
Bade pechida the haalat
Uspar chid uth rahi thi mujhko, par nahi thi koi khata
Main vahan se palatkar jaane laga
Usne mujhe dheere se roka
“Mujhe pata hai ke humare rishte ko koi nahi samajh sakta
Aur ise aage badhane se hum apne aap ko de rahe hain dhokha”
Main bola “kya tum kehna chaahte ho
ke humein ye khatm karna hoga meri jaan?”
vo dheere se gham mein muskurayi aur boli
“haan.”
SAMET KE SAARA JAHAAN
Samaan bandh gaya tha
Ummeed ka ghada toot gaya tha
Kalki train pakadke main jaa raha hoon
Duniya se saara sampark mera choot gaya tha
Udaas hoke dil behek gaya
Kyun main ab chain se so bhi na sakoon?
Mann nahi lage hai koi bhi kaam mein
Ab toh vakalat mein bhi nahi hai koi sukoon
Kyun kiya maine kuch bhi aisa?
Mere paagalpan ki hai ye kaali kartooth
Sar phira ho gaya tha main tab
Naa samjhi ka sawaar tha mujhpe bhoot
Meri saari zindagi main yahan pada raha
Aaj teen saal baad, phaans liya hai mujhe maya ka ye jaal
Samraat tha mein akelepan ka, ab nahi reh sakta akela
Karma kar sakta hai pehelwaano ka bhi yahi haal
Murjhaaye hue phool sa main baitha tha ghar pe
Raat ko bhi theek se so na saka
Dukh ka saaya itna mandra raha tha mere aas paas
Chaahun to bhi main theek se ro na saka
Jaag kar main gaya baahar khaat pe
Dekh raha tha sadak ki or
Dekhte dekhte aankh lagi hi thi
Achaanak aayi awaaz bilji ke kadak ki zor
Ghabra ke main chamak gaya
Boondein girne lagi barsaat ki
Chaah raha tha ke vo mujhe dikhegi par nahi thi vo vahan
Sannata tha yahan, shaanti gaayab ho gayi raat ki
Baitha raha main sonchte hue key a gaon mera ab nahi
Par vaise hi peeche se awaaz aayi, “Rahul”
Main palta dekhne ke kaun hai.
Vo khadi thi… “maaf karna, mujhse ho gayi thi bhool”
Main hairaan tha
Vo mere saamne thi roobaroo
Andar le ke gaya main use
Kya uska pyaar sachmein tha hoobahoo?
Kahaani thi uski badi romanchak
Raat bhar humnein baat ki
Uski galat fehmi, meri galat fehmi door hui
Humnein ek naye rishte ki shuruaat ki…
USKA RASTA CHHODU NA
Do mahine ho gaye us raat ko
Shaanti mil gayi us halaat ko
Hum bhi bhool gaye us baat ko
Ab do mahine ho gaye the us vakeel ke guptghaat ko
Tezi se badh rahi thi zindagi
Aakhir mil rahi thi us hi ki bandagi
Sir par chha gayi thi deewangi
Samajh aa gaya tha ki vahi thi meri zehnasee
Badal gaya tha mera naseeb
Phir bhi pyaar ki duniya mein main tha gareeb
Chain bas tabhi aata tha jab main tha uske kareeb
Ab to tha aata jaata har pal ajeeb
Samaj ke khilaaf ja rahe the hum
Do mahine se sabko bana rahe the hum
Ek doosre ke saath rehne ki kasmein kha rahe the hum
Zindagi ki ek khoufnaak sadak bichhaa rahe the hum
Kya aisa karna asaan tha?
Nahi, ye yudh bada hi ghamasaan tha
Humaare is rishte mein chupa, ekta ka ek nishaan tha
Vo vaishy gharaane ki thi, main to bola bhala sa ek kisaan tha
Vakaalat maine chhod diya
Bandishon ko bhi tod diya
Meri nafrat ko maine bator diya
Jeevan ki patri ko maine mod diya
Use mile bagair din na kate
Kisi aur se mera ya pyaar na bate
Uske chehre se mera dhyaan na hate
Chaahke bhi dil ka akelapan na ghate
Shaam ko vo mujhse milne aayi
Door karne meri tanhayi
Aayi jaise uparwaale ki thi vo badhai
Uske saath toh kum lage zindagi ki khai
Koi sarhad nahi thi, gehra tha ye pyaar
Anokha tha mera yaar
Nahi thi hum dono ke beech koi deewar
Par kya rakh paayengen hum isko barkaraar?
Sochenge hum iske bare mein kabhi aur
Humpe hai kisika bhi nahi zor
Mere chain ko le gaya tanaav ka chor
Karke badan ke hisse hisse mein shor
Is raste par hai mujhe chalna
Uske peeche peeche hai jalna
Ye kasam main todu na
Main uska rasta chhodu na
DIL KARTA HAI
Uski nazron ki lehron mein beh jaane ka dil karta hai
Uske hoton ke sargam mein reh jaane ka dil karta hai
Jab jab uske khayaal mujhko aate hain
Tab tab use apne pyaar mein baandhke lejaane ka dil karta hai
Sitaare jab nikal aate hain raat mein, main so nahi sakta
Uske bina itna akela rehta hoon, kisi par sar rakh kar ro nahi sakta
Jab bhi tanhaayi ki chape mein aata hai dil
Uske khoobsoorti ke noor mein dehjaane ka dil karta hai
Sehta hoon main gaaliyaan sirf uske liye
Nahi hai fikr mujhe apne liye
Bas itna usse chaahta hoon main
Mujhse hai use pyaar, yeh uska keh jaane ka dil karta hai
Uske ghar main aaunga
Use main sabke saamne lekar jaaunga
Papaji se uska haath maangne aaunga
Use apna banakar le jaane ka dil karta hai
Aaj yeh baat tay hone ko hai
Dono dilon ke eek hone ka samay hone ko hai
Baat pakki karoonga main use bulake
Usko dulhan jaise sajaane ka dil karta hai
Rooh mein mere uske hi ishq ka junoon hai
Mere sargam, uske raag, dono ka ek anokha suroor hai
Jab bhi main uske ghar ke paas jaata hoon
Use doli mein bithake use chura lejane ka dil karta hai
BAAT SAAF
Kahani badhti gayi aage
Samay beetta gaya
Bandhna tha ab rishte ki dor
Mere andar ka pyaar cheekhta gaya
Usne apne papa se ki baat
Aur agle din mere paas aayi
Seedhe chalke, rote hue
Na vo lachak rahi thi, na hi vo balkhai
“kya hua?” main uthke bola
Vo chillai “tumne mujhe diya hai dhokha!”
Main achambhe mein tha
Vo palatke jaane lagi aur maine use roka
“batao to sahi ki maine kya kiya?”
Mehenga pad gaya akhiyon ka jharokha
Vo palatke boli, “tumne jhooth bolkar mera dil jeeta”
Mujhe kuch nahi aaya samajh
“kaunsa jhooth? Maine to tumse aaj tak sirf sach bola hai”
Vo boli “tum soch kar bolo, vaise bhi apne alava tumhe nahi kisi ki garaj”
Vo chali gayi rote hue ghar
Aur main sochta reh gaya
Kya kaha tha maine aisa
Jisse itna gussa hoke yaar mera be gaya?
Phir achanak jaise koi bijli kadki
Mujhe yaad aayi ek baat
Jhooth maine usse kaha tha
Jhoothi thi humaari pehli mulakaat!
Jab main usse pehli baar mila tha
Main sunayi thi use ek kahani
Usko kaha tha maine ki vo jhoothi kahani thi
Par thi vo asal mein mere ateet ki sachchi zubani
Jhooth ke bal par maine uska dil jeeta hai
Jayaz hai uski narazgi
Chala main uthke uske ghar usko manane
Baat batani thi usko raaz ki
Jaise hi main pahucha
Maine dekha ki vo kar rahi thi mera intazaar
Itna gehra tha use mujhpar vishwaaas
Main bhi maafi mangne ko ho gaya taiyyar
Maine kaha, “mujhe aisa nahi karna chahiye tha
Kardo please mujhe maaf”
“nahi chahiye tumhare maafi ki maang
Kyon kiya aisa, ye baat kardo saaf”
“Tumhare baba ki vajah se
Tumse nahi keh saka puri baat
Tum nayi aayi thi is mauholle mein
Naye the tumhare liye haalat
Tumse sirf ek baar baat karna tha mujhe
Toh suna di thodi si kahani us raat
Pata tha ki ek din tumhare baba ko mere bare mein malum padega
Aur darr tha ki chhoot jayega tumhara saath”
Vo boli, “vakeelon ki tarah hi swarthy ho tum
Mujhe hona chahiye tha pata
Ab sach batakar manao mujhe
Ki hai tumne bahut badi khata”
Toh maine aarambh ki punah meri kahani
Sach keh kar thi use jo manani…
KAHANIYAAN – 2
“maa baba ke baad, toot sa gaya tha main
Saare jahan se chhoot sa gaya tha main
Jaanne nikla main ab kyat ha aakhir yeh sach
Jise bataate bataate baba bhi nahi sake bach
“padhi baba ki maine dairy
Bhari hui thi usme shairi
Ek jagah se doosri, dhoondta gaya surag
Lekin nahi dikh raha tha sach ka ek bhi chiraag
“dhoondte dhoondte aa pahuncha main yahan
Pata chala ki yahin hain vo saare jawaab jinke liye main dhoond raha tha saara jahaan
Mauholle ke kone mein tha ek makaan
Jiska maalik tha fauj mein ek jawaan
“makaan toh tha us vaqt khaali
Rehta tha vahan sirf ek vafadaar maali
Kuch dinon ke baad pata chala ki us makaan ka malik mere baba ka mitr hai
Thodi baatcheet ke baad saaf hota gaya ye dhundla sa chitr hai
“baba the mere ek police ufser
Jinke mitr ke saath unhone atankvaad mitane ki lee thi shapath pasraspar
Shaadi ke baad unhe bulaya gaya kashmir
Hum sabki jaane uda le gaya ye judaai ka teer
“lautke aane ki nahi thi baba ki ummeed
Kyonki maut ko de rahe the vo dil se khushaamdeed
Kashmir se pachchees saal baad magar vo aaye
Unse ajnaan, maut ka nyauta saath laaye
“aatankiyon ko pakadna unka kaam tha
Aur ek bhi galati karna haram tha
Par baba ne ki galati is baar
Ve aaye vaapas lautke
Aatankiyon ne unhe dhoondkar diya unko maar
“is beech us mitr se sarkaar ne liya isteefa
Apne dost ko bachane ke chakkar mein
usne aatankiyo ko sheher mein aane ka diya nyota
dost bhi maara gaya, aur kaptaan banne ka uska iraada bhi
rehta hai vo isi mauholle ke us hi makaan mein
aur naam hai uska Faraada Veer
“tumhare baba hi the mere baba ke vo veer mitr
Jinhe saari fauj maanti hai dalidr
Yahi kaaran hai ki ve karte hain mujhse nafrat
Shaayad yahi kaaran hai ke unhone ki tumhare saath kal vaali harkat
“yahi kaaran hai ke hum do kabhi ek nahi ho sakte
Tumhare baba mere saath ek chat ke neeche rehna to kya, nahi so sakte
Ab jao, koi aaya hai tumhe le jaane
Mere saath dekh liya toh hum dono ki jayengin jaanein…”
PYAAR HAI EK KHEL
Khaamosh sham thi
Main bhi khamosh tha
Is chuppi mein kuch samajh nahi aaya
Sab kuch madhosh tha
Vo chalti hui aayi mere paas
Aur boli “tumne jo kahani sunaayi kal
Vo sach hai main janti hoon”
Mera ladkhadata dil achanak gaya sambhal
Main halke se muskuraya
“ek baar jhooth bolkar tumhe khoya hai
Dobara thodi na tumhara dil dukhaunga?
Tumhe nahi pata, kale ek raat mein kitna mera dil roya hai
Usne mera haath dheere se thaama
Aur “par hona hoga humko juda
Mere baba ki yahi hai maang”
Kya aisa sach mein ho raha tha, khuda?
Sunkar aa gaya main achambhe mein
Zindagi mein pehli baar ehsaas hua darr ka
Maine use roka, par vo rote hue bhaagi
Maine sochliya, ki us ladki ko jaane na dega ye ladka
Main uske peeche dauda
Poochte hue ki baba ne kyon inkaar kiya
Vo boli, “kyonki unke ghaav ab tak bhare nahi”
Maine poocha, “toh phir tumne kyon ikraar kiya?!”
Vo rote hue boli, “tum ghar laut jao
Kaam nahi hai tumhara yahan!”
“abhi jaa raha hoon, kal lautke aaunga,
Is ishq mein kabool nahi hai, sirf tumhara hi bayaan!”
Main chala gaya ghar palatkar
Pehli baar hua tha asli vaala pyaar
Magar kudrat ko meri khushi bardaasht nahi
Karaadi usne meri jaan se meri takraar
Bahut taala hai humne is shaadi ko
Ab nahi sakta main ye jhel
Ya to shaadi karoonga, ya use chhod dunga
Pyaar toh lag raha hai sirf ek khel
USKE GHAR
Agle din darr darr ke uske ghar gaya
Kaise samna karoon Faraada Veer ka?
Jaanta hoon ki insaan hai vo,
Koi visfot hone vale bum nahi
Saans lekar ghanti bajaayi
Andar kadam rakha ghar ke
Sonch raha tha apnea p mein, manobal badhane,
“tub hi shehenshah hai, tu kisi se kum nahi”
Ameeron ka ghar tha, alishaan makaan
Faraada Veer aaye mujhse milne
Vo bole, “tum jaante ho tum mera mann nahi badal sakte
Tumme mujhe manane ka dum nahi”
Main muskurake bola, “main yahan aaya hoon
Aapko manane nahi, aapko dhamkane
Uthake le jaaunga Pari ko
Pakki baat hai, koi jhoothi kasam nahi”
Vo has pade, “mazaak achha hai
Tum bologe aur hum maan lenge
Hum Faraada Veer hain, koi vakeel nahi
Darengein tumse hum nahi”
Main darwaaze ki or badhte hue bola,
“main toh aaya tha sifr chetavni dene
Jo aapko maine de di hai
Aap nahi dare, us baat ka koi gham nahi”
Main nikla unke ghar se, aur Pari mere peeche aayi
Vo mujhko rok kar, mujhpe chillayi
“dhamkee kyon de baba ko?!
Ye shaadi karne ka koi dhung nahi!”
“baat sunn meri sahi se
Pyaar kiya hai tujhse maine
Agar uske liye dushman banane pade
Toh banaloonga, hum kisi ke yaarum nahi”
“unki marzi ke bina main shaadi nahi karungi
Pyaar tumse maine bhi kiya hai
Aur shaadi ke liye tumhe baba ko manana hoga
Sharm karo, baba hain vo mere, tumhare dushman nahi”
“talaaq karwaaya hoon zindagi bhar
Mujhe manana nahi aata
Waqt chahiye uske liye, nazakat chahiye charitr mein
Mujhme vo sharam nahi”
Vo bhadki “chalte ban tu phir na lautna!
Mooh main tera nahi dekh sakti
Chala jaa kahin door tu
Paththar jaisa bankar yahan jum nahi!”
Yeh bolkar vo chali gayi,
Yakeen nahi hua apne kaanon par
Dung tha main vahan khade khade
Kya Pari ab mere sung nahi?
CHALA JAYEGA MERA YAAR
Pyaar karti hoon main usse
Magar aise shaadi nahi kar sakti
Baba ne mujhe itna pyaar diya hai
Unko tod kar main andar hi andar nahi mar sakti
Jaane ke liye usko maine gusse main kaha tha
Andar se toh tooti hoon saari ki saari main
Mohobbat ke saath-saath mera bhi maan hai
Nahi koi naazuk si bechaari main
Thand thodi padne par, baat karni hogi aaram se
Abhi toh bahut tanaav hai
Baba ko is sadme se bahar aane ko samay lagega
Bahut gehra yeh ghaav hai
Deewana hai vo, use samajh nahi
Halaat gehre hain, vo nadan hai
Phir bhi hua hai mujhe usse pyaar
Aakhir dil se vo ek achha insaan hai
Dobara lautke vo is ghar mein na aaye
Is baat ka rakhna hoga mujhe poora dhyaan
Kyunki baba use maarne ko aadmi bhejdenge
Vo use chhodenge nahi, hain ve bahut bade haiwaan
Agle din gayi main usse baat karne
Vo bandh raha tha apna gharbaar
Usne meri taraf ek baar bhi nahi dekha
Mauholla chhodne ko tha vo taiyyaar
Main boli, “main tumse shaadi karna chaahti hoon,
Par abhi iska sahi vaqt nahi”
Vo muskuraya, “Faraada kabhi nahi maanengein”
Maine usko samjhaya, “vo itne bhi sakht nahi”
Vo bola, “mere jaane ke baad
Mujhe maarne ka aadesh kiya
Mujhme thoda toh dimaag hai,
Unki sab kriyaaon ka maine samavesh kiya”
Main usse aur jhooth nahi keh sakti thi
“haan vo tumhe maarna chaahte hain zaroor
Par mere baat karne ke baad shaayad nahi maarengein
Kyonki vo samajhte hain ki humaari shaadi hi hai mera fitoor”
Usne mujhe apne saamne se hataate hue kaha,
“kal main chala jaaunga tumhari zindagi se
Agar Veerji mane, toh tumhare ghar aane par mujhe keh dena
Nahi toh chhutkara tumhe miljayega meri bandage se”
Vo apni jagah theek tha,
kitna karega vo intezaar?
Mujhe apne baba ko manana hoga ek din mein
Nahi toh humesha ke liye chala jayega mera yaar
SACHCHE PYAAR KI KAHANI
Main gidgida rahi thi
Par baba nahi maane
Humaara pyaar sachcha hai,
Uss baat ko nahi maane
Vo aayega tab vo use maardenge
Main aisa hone nahi de sakti
Uska khoon mere sar hoga
Main use humesha ke liye sone nahi de sakti
Main kamre mein baithe ro rahi thi
Tabhi neeche se kisi ne mera naam pukara
Vo aa gaya tha mujhse door jaane ke liye
Kaisi kismat mili hai isko he bhagwaan, bechara
Main neeche daudi usse milne
Khada tha vo vahan, bandhe apna samaan
Mujhe dekhte hi usne muskuraate hue kaha,
“lagta hai tum nahi dila sakti ho mujhe jeevandaan”
Main use marne nahi de sakti thi
Maine badi koshish ki
“ruk jao tum, main baba se baat phir karoongi”
Vo bola, “ab ghadi nahi hai ugr hone ke kashish ki”
Utne mein hi baba ke log bandookon ke saath bahar aaye
Vo muskuraya, “Pari, mujhe ab yahan se chalna hoga”
Use jaane dena hoga mujhe, nahi toh vo marjayega
Zindagi bhar is pyaar ko khone ki aag mein mujhe jalna hoga
Utne mein baba aaye baahar, aur unhone kaha,
“bach kar toh tum yahan se jaa nahi sakte
Badla toh mera hoga poora
Kyonki tum mere in aadmiyon ko haraa nahi sakte”
Mere mann mein ek jhatka laga
Main palatkar baba se boli,
“shaadi nahi karvaana hai toh mat karao
Magar use maarna hai, toh mujhpar chalao goli!”
Usne mujhe halke se dhakla aur mere baba se kaha,
“main jaa raha hoon, maarna ho toh maar dijiye
Mera pyaar sachcha hai aur main marne se nahi darta
Peet ke peechhe se maut ke ghaat utaar dijiye!”
Usne mujhse kuch kaan mein kaha
Aur peeche mudkar jaane laga
Baba uski himmat dekhkar dung the
Lagta hai ki uska aashiqana, Faraada Veer ki goliyon ko darane laga
Main ro rahi thi vahin khadi khadi
Uske aakhri shabd mann mein sahej rahi thi
Dikh raha tha uska muskurata chehra sham ke aasmaan mein
Uski jaati hui rooh ko main aakhri baar dekh rahi thi
Kehke gaya vo sachcha aashiq,
“tere aur mere sachche hain, rishtey yeh maasoom se
Dauhrayengein milan ki yeh kahani aur ek baar agle janam mein
Aur milengen, toh zara Dhoom se!”
Love is not defined by your past or future. Love is felt in the present. Don’t let the past or future destroy
you love. Ever.