as natxum ivatz unqꞌa uxhchileꞌ, as jit oora ni tul aviꞌ tiꞌ
unqꞌa tenameꞌ, tan xoꞌn veꞌt unqꞌa uxhchile see as
najalpu vatxumbꞌaleꞌ. Estiꞌeꞌ cheel Pap tan nunjaj bꞌaꞌnil
see uvaꞌ la eesa veꞌt in vatz u txꞌavaꞌeꞌ, tan aal bꞌaꞌneꞌ taꞌ
uvaꞌ la kam in, tiꞌ uvaꞌ la atin in vatz u txꞌavaꞌeꞌ. Tiꞌk u
Jonáseꞌ tal te u Tiixheꞌ.
As tal veꞌt u Tiixheꞌ te u Jonáseꞌ:
—As ¿Ma bꞌaꞌn veꞌt bꞌa see avaꞌ ni tul veꞌt aviꞌ sviꞌ? Tiꞌk
u Tiixheꞌ tal te u Jonáseꞌ.
As el veꞌt chꞌuꞌl u Jonáseꞌ tu u Niniveeꞌ, as
txakebꞌ veꞌt naj tu bꞌuuqꞌebꞌal qꞌii. Kat ilak veꞌt naj
umaꞌl u tal pach as xonebꞌ veꞌt naj tu imuiil u pacheꞌ,
ikaꞌya veꞌt bꞌen naj u nimla tenameꞌ tiꞌ itxꞌebꞌat ikuꞌ
chꞌuꞌl u kꞌaxkꞌoeꞌ tiꞌ u tenameꞌ.
As ichꞌiisa veꞌt u Tiixheꞌ umaꞌl u kꞌuaach uvaꞌ
jeꞌ veꞌt viꞌ vipach u Jonáseꞌ, aqꞌal uvaꞌ yeꞌ la
bꞌujlu veꞌt naj taꞌn u qꞌiieꞌ. Achaꞌv chit veꞌt u kꞌuaacheꞌ
te u Jonáseꞌ.
As tul ul veꞌt umaꞌl qꞌii as ichaj veꞌt u Tiixheꞌ umaꞌl u
tzoj noꞌy tiꞌ ikꞌuxat veꞌt u kꞌuaacheꞌ, as oora chit kat tzaj
veꞌt u kꞌuaacheꞌ. As tul bꞌuuqꞌ veꞌt u qꞌii as ul veꞌt umaꞌl
u kajiqꞌ uvaꞌ vaꞌl chit ijulbꞌeꞌ, as itzꞌeꞌsa veꞌt u qꞌiieꞌ viviꞌ
u Jonáseꞌ, as bꞌujlu veꞌt naj. As ech tal veꞌt naj ileꞌ:
—Aal bꞌaꞌneꞌ uvaꞌ la kam veꞌt in tiꞌ uvaꞌ la atin veꞌt in
vatz u txꞌavaꞌeꞌ. Tiꞌk naj tal jeꞌ ste.
Ech tal veꞌt u Tiixheꞌ ileꞌ:
— ¿Ma bꞌaꞌn bꞌa see uvaꞌ kat ul veꞌt a viꞌ tiꞌ uvaꞌ kat tzaj
veꞌt u kꞌuaacheꞌ? Tiꞌk u Tiixheꞌ.
—Kanoj, — aal bꞌaꞌn sve. Tiꞌk u Jonáseꞌ.
Ech tal veꞌt u Tiixh ileꞌ:
—As kꞌuxh jit axh avan tetz u kꞌuaacheꞌ, as jit axh kat
chꞌiisan as tu umaꞌl aqꞌbꞌal kat chꞌii as tu umaꞌt aqꞌbꞌal
as kat sotz veꞌteꞌ as ¡Natxum ivatz u kꞌuaacheꞌ! ¿Estiꞌeꞌ
taꞌ uvaꞌ nuntxum ivatz u tenameꞌ uveꞌ Ninive? Tan pal
veꞌt u tachul unqꞌa talaj intxaꞌeꞌ uveꞌ yeꞌl ipaav ati tiꞌ u
vajkꞌalal mil, as kech unqꞌa vaakaxheꞌ tukꞌ unqꞌa
carneroꞌeꞌ. Tiꞌk u Tiixheꞌ tal te u Jonáseꞌ.