Download - Góð ráð við lestur og ritun
1
Leiðbeiningar og hagnýt ráð
Foreldrar geta hjálpað börnum sínum með lestur og ritun
2
Efnisyfirlit Formáli ..................................................................................................................................................... 3
Um lestur og læsi ..................................................................................................................................... 3
5 – 8 ára ................................................................................................................................................... 5
Hvernig verður barnið mitt læst? ........................................................................................................ 5
Hvernig get ég hjálpað barninu mínu? ................................................................................................ 7
Hvaða ráð get ég notað? ..................................................................................................................... 7
1. Talaðu við barnið. ........................................................................................................................ 7
2. Gerðu lestur og ritun skemmtileg ............................................................................................... 8
3. Lesið daglega ............................................................................................................................... 9
4. Ræðið um bækur ....................................................................................................................... 10
5. Hlustaðu á barnið lesa ............................................................................................................... 11
6. Vertu barninu góð fyrirmynd ..................................................................................................... 12
9 – 11 ára ............................................................................................................................................... 12
Hvernig get ég hjálpað barninu mínu? .............................................................................................. 12
1. Hjálpaðu barninu að skilja lesefnið............................................................................................ 13
2. Talaðu við barnið ....................................................................................................................... 14
3. Gerið lesturinn ánægjulegan ..................................................................................................... 15
4. Hvettu barnið til að skrifa .......................................................................................................... 16
5. Glæðið lesturinn lífi í gegnum listsköpun .................................................................................. 16
6. Vertu góð fyrirmynd .................................................................................................................. 17
7. Taktu upp gagnrýninn lestur á heimilinu ................................................................................... 18
Hvar get ég fundið hjálp? ...................................................................................................................... 19
Kennarinn .......................................................................................................................................... 19
Aðrir í samfélaginu ............................................................................................................................ 20
Stjórnvöld .......................................................................................................................................... 20
Nokkrar vefsíður fyrir ungt fólk ............................................................................................................. 20
3
Formáli
Í aðalnámskrá grunnskóla frá 2011 er fjallað um læsi sem einn af sex grunnþáttum menntunar. Tekið er fram að meginmarkmið læsis sé „að nemendur séu virkir þátttakendur í að umskapa og umskrifa heiminn með því að skapa eigin merkingu og bregðast á persónulegan og skapandi hátt við því sem þeir lesa með hjálp þeirra miðla og tækni sem völ er á (bls. 14)“. Læsi og lesskilningur eru jafnframt meginþættir í aðgerðaáætlun núverandi skólayfirvalda í Reykjavík og eitt af höfuðmarkmiðum í stefnu þeirra að efla læsi í víðum skilningi. Stefnt er að því að Reykjavík verði í forystu um að efla læsi og lesskilning á öllum skólastigum.
Því hefur verið ráðist í að þýða og staðfæra bækling frá menntamálaráðuneyti Ontario-fylkis í Kanada sem hefur veitt góðfúslegt leyfi til að þýða bækling sem á ensku ber yfirskriftina Helping Your Child With Reading and Writing. A Guide for Parents.
Um lestur og læsi
Foreldrar eru mikilvægir þátttakendur í námi barna sinna. Sem foreldri stuðlar
þú að einstakri reynslu sem getur hjálpað barni þínu til að læra. Þetta hefti
hefur fram að færa ýmis ráð sem þú getur notað til að hjálpa barni þínu við
lestur og ritun. Ráðleggingar sem varða 5 – 8 ára börn snúast fyrst og fremst að
því að hjálpa þeim til að læra að lesa og skrifa. Ráðleggingum varðandi 9 – 11
ára börn er ætlað að hjálpa þeim til að lesa flóknara lesefni og til að efla færni
þeirra í ritun.
Þú þarft ekki að gera allt sem bent er á í þessu hefti. Margar tillögur eru gefnar
til að benda á ýmsa möguleika sem hægt er að grípa til. Lestu þær yfir og veldu
þær sem þú telur að séu gagnlegastar fyrir þig og barnið þitt. Notaðu líka aðrar
leiðir sem þú telur ánægjulegt og skemmtilegt fyrir ykkur að fara saman.
Ef barnið þitt hefur sérstakar þarfir, er ráðlegt að aðlaga verkefnin sem bent er
á að þörfum barnsins þíns.
Læsi er meira en bara að lesa orð. Það snýst um að skilja merkingu málsins sem
víða er að finna, s.s. í bókum, tímaritum, á vefsíðum, á merkjum og skiltum, í
auglýsingum, í kvikmyndum og jafnvel í samræðum. Læsi fjallar um að hlusta og
lesa með gagnrýnum hætti. Það felur líka í sér að vera fær um að miðla
hugsunum sínum á skilmerkilegan hátt til annara í gegnum tal, ritun og aðra
miðla.
4
Að ræða hugmyndir og deila viðhorfum eru meginþættir í læsi. Margar
fjölskyldur hér á landi koma úr ólíku umhverfi og bera með sér sögu og sérstaka
reynslu af læsi. Mismunandi reynsla af lestri, ritun og öðrum samskiptaleiðum
getur orðið að umræðuefni í bekk barnsins þíns. Kennari barnsins veit að
virðing fyrir ólíkri reynslu nemenda er jafn mikilvæg og að virða það sem
nemendur eiga sameiginlegt. Með því að meta fjölbreytileikann gefast tækifæri
til að deila með öðrum. Sem foreldri getur þú stutt við þessar hugmyndir heima
um leið og þú hjálpar barninu með lestur og ritun.
Hér eru nokkur atriði til að hafa í huga við lestur heftisins:
Merking orðsins læsi er í stöðugri þróun:
Læsi er meira en færnin við að lesa prentað mál.
Læsi er færnin til að lesa og skrifa, hlusta og tala við aðra ásamt því að
kynnast hugmyndum og skoða myndir í ólíkum miðlum. Það er líka
færnin til að hugsa á gagnrýninn hátt um leið.
Kennari barnsins talar e.t.v. um „gagnrýninn lestur“. Það sem átt er við er
að hugsa á gagnrýninn hátt um þætti s.s. sanngirni, jafnræði og jafnrétti.
Auk þessa heftis eru margar bjargir í boði til að aðstoða þig við að styðja
við lestrarfærni barnsins þíns. Þú getur ráðfært þig við kennara,
bókasafnsfræðinga og starfsmenn ýmissa félagasamtaka sem vinna að
hagsmunum barnsins þíns.
Hvers vegna er læsi mikilvægt?
Margar ástæður eru fyrir því að fólk les og skrifar:
af ánægju og áhuga
til að halda sambandi við fjölskyldu og vini
til að sækja og nota upplýsingar sem gagnast við að leysa vanda og taka
ákvarðanir
til að læra um heiminn og deila hugsunum sínum með öðrum
vegna vinnu
Læsi í víðum skilningi er nátengt samskiptum okkar við aðra. Það tengist
félagslegum venjum og tengslum, þekkingu, tungumáli og menningu okkar.
Læsi er hluti af lífi okkar ásamt öðrum leiðum til samskipta. Fyrir marga er læsi
5
sjálfsagður hlutur – en þeir sem geta ekki lesið eru í dag einangraðir frá margs
konar samskiptum.
Að geta lesið og skrifað er lykill að velgengni í námi, það byggir upp sjálfstraust
og hvetur barnið til að setja sér verðug markmið í námi.
5 – 8 ára
Hvernig verður barnið mitt læst?
Besti tíminn fyrir barnið til að læra að lesa og skrifa er á unga aldri. Þá er barnið
móttækilegast fyrir jákvæðum viðhorfum til lestrar og ritunar og er næmast
fyrir þeim undirstöðuþáttum sem nám í lestri og ritun byggir á. Þegar barnið
byrjar að lesa og skrifa, er gott að ræða við barnið um hugmyndir þess um
lestur og ritun – fremur en að bara tala um lestrar- eða skriftarnámið. Það
hjálpar barninu til að skilja hvað það þýðir að geta lesið og skrifað.
Að læra að lesa og skrifa gerist ekki í einu vetfangi. Það gerist í nokkrum
þrepum sem að lokum leiða til þess að barnið verður fluglæst og sjálfstætt í
lestri og ritun. Meðfylgjandi er yfirlit yfir helstu þrep í þróun lestrar og ritunar.
Þróun lestrar- og ritunar
1. Áður en barnið fer að lesa og skrifa getur það:
lært um orð með því að leika með stafakubba, skoða myndabækur, leika
með segulstafi, o.fl.
lært um orð í gegnum lög, vísur, umferðarmerki og vörumerki
lært hvernig ritmálið virkar, t.d. hvar saga byrjar og endar og í hvaða átt
er lesið og skrifað
haft gaman af að skoða bækur og hlusta á bækur lesnar
lært að eigin hugsanir má setja í ritmál með því að nota myndir, tákn og
stafi
byrjað að hegða sér eins og lesandi, t.d. haldið á bók og þóst vera að lesa
byrjað að hegða sér eins og ritfær maður, t.d. haldið á blýanti og þóst
vera að skrifa
notað bæði myndir og minni til að segja og endursegja sögu
6
2. Þegar barnið byrjar að læra að lesa getur það:
vitað að fólk segir sögur og fær upplýsingar úr ritmáli
sýnt áhuga á lesefni
byrjað að para saman ritmál og talmál og áttað sig á tengslum hljóða og
stafa
byrjað að prófa sig áfram með lestur og er tilbúið að reyna að lesa
upphátt
notað myndir til að auðvelda sér að skilja lesefnið og áttað sig á að
lesmálið og myndefnið tengjast
byrjað að prófa sig áfram með ritun, t.d. notað myndir, skrifað tákn sem
líkjast stöfum, skrifað stafi eða stafaklasa (sem ekki eru orð), skrifað orð
með því að nota suma stafi orðsins en ekki alla
skilið að mynd er ekki það sama og ritmál
3. Þegar barnið er byrjað að læra að lesa getur það:
verið öruggara við að nota ólíkar aðferðir til að þekkja einstök orð
aðlagað lestrarlag að mismunandi lestrarefni
þekkt mörg orð, skilið þau og verið tilbúið til að reyna að lesa nýjan texta
skrifað einfaldar setningar með því að nota stóra og litla stafi, hafa
stafabil á milli orða og nota helstu greinarmerki, s.s. punkta og
spurningarmerki
notið þess að skrifa og sýnt ritun áhuga á margan hátt, t.d. skrifað
innkaupalista, stutt skilaboð, á kort og merkimiða
byrjað að skipuleggja, endurskoða og yfirfara einfalda texta
4. Þegar barnið er orðið vel læst og skrifandi getur það:
notað margar aðferðir til að þekkja orð og merkingu þeirra þegar það les
tengt hugmyndir og reynslu í bókum við eigin þekkingu og reynslu
sagt fyrir um atburði í sögu og lesið fjölbreytt lesefni
verið jákvætt gagnvart lestri og ritun og lesið og skrifað að eigin
frumkvæði og í ákveðnum tilgangi
byrjað að nota ólíkar aðferðir við að stafa orð rétt
notað margvíslegar setningagerðir í ritun, t.d. staðhæfingar og
spurningar og byrjað að raða setningum í málsgreinar
7
notað margar aðferðir við að skipuleggja, endurskoða, yfirfara og birta
eigin texta
Hvernig get ég hjálpað barninu mínu?
Þú ert fyrsti og mikilvægasti kennari barnsins þíns. Þegar þú hjálpar barninu að
læra að lesa, skrifa og hugsa á gagnrýninn hátt, opnar þú dyr fyrir barnið að
þeirri auðlegð sem nám er.
Barnið þitt getur byrjað að læra að lesa með því að hlusta á þig lesa upphátt
sögur og blaðagreinar. Fljótlega fer barnið að fá áhuga á að lesa sögur og annað
lesefni á eigin spýtur. Það er mjög mikilvægt að ræða um hugmyndir sem fram
koma í bók eða tímariti, spyrja spurninga sem hvetja barnið til rökhugsunar og
segja frá eigin viðbrögðum við því sem lesið er.
Þú getur auðveldað barninu þínu að læra að lesa og skrifa. Með reglulegri
æfingu mun barnið öðlast færni í lestri og ritun. Um leið lærir barnið að hugsa á
gagnrýninn hátt um efni sögunnar eða upplýsinganna sem það les.
Fjölskyldur geta fléttað lestrarverkefnum inn í hvað sem er – þróun læsis er ekki
bara eitthvað sem gerist í skólanum. Það er mikilvægt að nota öll tækifæri sem
bjóðast til að styðja við lestrarnámið. Læsi er hluti af okkar daglega lífi óháð
stað og stund. Lestrarfærni er notuð við ólíkar aðstæður, s.s. í innkaupaferðum,
á fótboltavellinum, í umræðum um kvikmyndir eða þegar skrifaðir eru
minnislistar.
Það er mikilvægt að hvetja barnið þitt og sýna að þú hefur trú á því. Forðastu að
bera stöðu barnsins saman við önnur börn. Mundu að nám í lestri og ritun
gerist ekki í einu vetfangi. Lestrarnámið er ekki alltaf auðvelt og börn þurfa að
vita að það læra ekki allir á sama hraða. Lestrarnám tekur tíma og börn þurfa
æfingu og stuðning frá foreldrum og kennurum til að ná góðri færni í lestri og
ritun.
Hvaða ráð get ég notað?
1. Talaðu við barnið.
Mjög mikilvægt er að tala við barnið og hvetja það til að tala við þig. Hlustun og
tal eru aðgöngumiði barnsins að máli og læsi. Í gegnum tal og söng lærir barnið
8
um hljóð og uppbyggingu málsins en hvort tveggja auðveldar og styður við nám
í lestri og ritun.
Hér eru nokkrar ábendingar til foreldra um hvernig þeir geta stutt við
málþroska barns síns:
Segðu barninu sögur af fjölskyldunni, af þér, öfum og ömmum og öðrum
skyldmennum.
Hvettu barnið til að segja frá hvernig dagurinn leið, frá viðfangsefnum,
íþróttum og leikjum.
Spurðu spurninga til að sýna barninu að þú hafir áhuga á því sem það
gerir.
Talaðu við barnið um það sem þið gerið og hugsið.
Hvettu barnið til að segja frá eigin hugsunum og líðan.
Ekki grípa fram í fyrir barninu. Láttu barnið sjálft finna orðin sem það
vantar.
Syngdu með barninu vísur, t.d. stafrófsvísur og farðu með ljóð og kvæði
og hvettu barnið til að taka þátt.
Farðu í rím- og orðaleiki við barnið.
2. Gerðu lestur og ritun skemmtileg
Að lesa upphátt fyrir barnið er ein besta leiðin til að vekja áhuga þess á lestri.
Það er skemmtilegt og hjálpar barninu að læra hvað lestur er. Hvettu barnið líka
til að skrifa. Hér eru nokkrar leiðir til að gera nám í lestri og ritun áhugaverð:
Lesið saman alls konar lesefni – sögur, ljóð, fræðibækur, tímarit,
blaðagreinar og teiknimyndasögur.
Lestu sögur upphátt af innlifun og með spennu! Notaðu ólíkar raddir fyrir
mismunandi persónur í sögunni. Notaðu nafn barnsins í stað persónu í
sögunni. Útbúið saman einfaldar leikbrúður og notið til að leika söguna.
Lestu uppáhaldsbækurnar aftur eins oft og barnið vill hlusta á þær og
veljið saman bækur og höfunda sem höfða til barnsins.
Lestu sögur þar sem orð eða málsgreinar eru oft endurtekin og hvettu
barnið til að taka þátt í endurtekna hlutanum (Dæmi: Baulaðu nú, Búkolla
mín ef þú ert nokkurs staðar á lífi).
9
Bentu á einstök orð um leið og lesið er. Það hjálpar barninu að tengja
saman talmál og orðin í bókinni.
Ræðið saman um þemu sem fram koma og spurðu barnið spurninga um
persónurnar. Spurðu líka spurninga sem hvetja barnið til að spá fyrir um
hvað gerist næst eða velta fyrir sér hvernig það hefði brugðist við í sömu
aðstæðum.
Ræðið saman um meginefni í upplýsingatexta, t.d. dagblöðum.
Hvettu fjölskyldu og vini til að gefa barninu bækur eða annað lesefni
þegar tilefni er til.
Farðu með barnið á bókasafn. Skoðið saman geisladiska, myndbönd,
tímarit og internetið ásamt bókum. Útvegið ykkur bókasafnskort en þau
eru ókeypis fyrir börn og unglinga undir 18 ára aldri. Þá getur barnið sjálft
fengið lánaðar bækur í eigin nafni.
Vertu áskrifandi að barnablaði. Börn elska að fá sendingar í pósti.
Sendu barninu skrifleg skilaboð á blaði eða með tölvupósti.
Hvettu barnið til að skrifa lista og kort eða senda tölvupósta til vina og
fjölskyldu.
Mundu að lestur og ritun eiga að vera skemmtileg. Ef þér finnst gaman,
finnst barninu það líka.
3. Lesið daglega
Flestum börnum hentar vel að hafa hlutina í föstum skorðum og lestur er
eitthvað sem þú og barnið þitt getið hlakkað til á hverjum degi. Með því að gefa
barninu tíma til að lesa og hlusta á það, gefur þú barninu til kynna að lestur
skipti máli og sé ánægjulegur.
Reyndu að lesa eins oft með barninu og mögulegt er. Lestur er eitt af því
mikilvægasta sem foreldrar geta gert til að styðja við nám barna sinna. Lestur
gefur þér líka tækifæri til gæðastunda með barninu og að mynda sterk og
jákvæð tengsl sem byggja á því að deila hugsunum og hugmyndum. Hér eru
nokkrar hugmyndir að lestrarstundum:
Byrjaðu að lesa fyrir barnið á meðan það er mjög ungt.
Taktu frá tíma á hverjum degi þar sem þú getur einbeitt þér að því að
lesa fyrir barnið.
10
Veldu þægilegan stað til að lesa, þar sem þú getur haft barnið nálægt
þér. Búið til „lestrarsvæðið“ saman.
Veldu margar ólíkar bækur. Ef íslenska er ekki móðurmál barnsins, veldu
bæði bækur á íslensku og móðurmáli barnsins. Góður grunnur í
móðurmálinu auðveldar barninu að læra annað eða þriðja mál.
Miðið lestrartímann við aldur og áhugasvið barnsins. Betra er að lesa
oftar og í styttri tíma í einu fyrir yngri börn (10 mín. í einu) fremur en að
lesa í lengri lotum (30 mín.).
Lestu hægt svo að barnið geti gert sér í hugarlund hvað gerist í sögunni.
Hrósaðu barninu fyrir að tala um hugmyndir sínar og að spyrja spurninga.
Þegar þið farið að heiman taktu með bækur, tímarit og hljóðbækur fyrir
barnið að lesa og hlusta á.
Haltu áfram að lesa fyrir barnið þó svo að það sé byrjað að lesa sjálft.
Með því að lesa fyrir það bækur sem það getur e.t.v. ekki lesið sjálft,
getur þú aukið skilning þess á lesefninu og viðhaldið töfrum þess að
upplifa góðar bækur saman.
4. Ræðið um bækur
Að ræða um bækur er jafn mikilvægt og að lesa þær! Að ræða við barnið um
sögu eða bók hjálpar barninu að skilja efnið og tengja það við eigin reynslu. Það
hjálpar líka við að auka orðaforða barnsins. Hvettu barnið til að lesa fleira en
bækur, s.s. vísindatímarit og vefsíður. Ræðið um efnið og spurðu spurninga um
það.
Hér eru nokkar leiðir til að hjálpa barninu að tileinka sér þá færni sem
nauðsynleg er fyrir skilning, rökræðu og gagnrýna hugsun:
Spurðu barnið hvað það langar til að lesa um.
Lestu og talaðu um uppáhaldsbækurnar þínar þegar þú varst lítil(l).
Skoðaðu bókarkápuna og titil bókar með barninu og spurðu hvað það
haldi að gerist í sögunni.
Hvettu barnið til að spyrja spurninga og tala um myndir og söguþráðinn
áður en lesið er, á meðan á lestrinum stendur og eftir að sagan hefur
verið lesin.
11
Hvettu barnið til að hugsa gagnrýnið um bækur. Er það sammála eða
ósammála höfundinum? Af hverju? Eru upplýsingarnar nákvæmar eða
ekki?
Hugsaðu upphátt um bækur meðan þú lest og hvettu barnið til að gera
það sama. Spurðu t.d. „Getur þetta passað? Hvers vegna eða hvers vegna
ekki?“
Gefðu barninu tíma til að hugsa um bókina og ræddu svo um bókina við
það aftur eftir nokkra daga.
5. Hlustaðu á barnið lesa
Þegar barnið er að læra að lesa er mikilvægt að hlusta á það lesa upphátt. Með
æfingunni gefst barninu tækifæri til að auka færni sína í lestri. Einnig eykst
öryggi barnsins í lestrinum.
Mundu að viðbrögð þín skipta máli þegar þú hlustar á barnið lesa. Mikilvægast
er að hlusta án þess að grípa fram í. Sýndu áhuga og notaðu öll tækifæri til að
hrósa barninu. Vertu eins nákvæm(ur) og kostur er þegar þú hrósar barninu svo
að það viti hvað það gerði rétt. Gleymdu heldur ekki að hvetja barnið til að lesa
á eigin spýtur. Hér eru nokkur ráð:
Sýndu barninu að þér finnist bókin skemmtileg með því að sýna áhuga og
spyrja spurninga.
Vertu þolinmóð(ur). Gefðu barninu tíma til að glíma við erfið orð. Sýndu
barninu hvernig það getur lært af mistökum sínum.
Veldu heppilegan tíma fyrir lesturinn þegar ekki er von á truflun.
Tryggðu að barnið velji ekki of erfiðar bækur. Hafðu ekki áhyggjur þó
barnið velji léttari bækur en það les í skólanum. Ef barnið hins vegar velur
bækur sem eru örlítið yfir lestrargetu þess, skaltu hrósa því fyrir valið og
vera tilbúin(n) til að aðstoða það eftir þörfum. Barnið mun læra að það er
gott að takast á við áskoranir.
Hvettu barnið til að hlusta á eigin lestur. Hlustunin hjálpar því að heyra
eigin mistök og lagfæra þau.
Þegar barnið er nýbyrjað að lesa getið þið lesið saman með því að
skiptast á eða lesa í kór.
Eftir lesturinn, ræðið saman um söguna til að tryggja að barnið hafi skilið
hana.
12
6. Vertu barninu góð fyrirmynd
Foreldrar eru mikilvægustu fyrirmyndir barna sinna. Hér er nokkrar hugmyndir
til að örva lestur og ritun hjá barninu þínu:
Lesið saman uppskriftir, á umbúðir, áætlanir, kort, leiðbeiningar,
auglýsingar, dreifibréf og bæklinga.
Lesið á umferðarmerki, skilti verslana og veitingastaða.
Lesið saman bækur, dagblöð og tímarit ykkur til ánægju.
Leitið saman upplýsinga í símaskránni, matreiðslubókum, leiðbeiningum,
landakortum og orðabókum.
Skrifið saman innkaupalista, símaskilaboð, minnislista og merkimiða.
Skráið á dagatal fjölskyldunnar mikilvægar dagsetningar og tíma.
Lesið og skrifið tækifæriskort, bréf og tölvupósta.
Notið hvert tækifæri sem gefst til að sýna barninu hvernig lestur og ritun
eru notuð á fjölbreyttan hátt. Komdu því þannig fyrir að barnið sjái þig
lesa og skrifa. Notaðu tækifærið til að kynna ný orð og setningar fyrir
barninu þegar þið lesið og skrifið saman.
9 – 11 ára
Á þessu stigi er áherslan í lestrarnáminu á að hjálpa nemandanum að nota
lestur og ritun á gagnrýninn, ábyrgan og virkan hátt. Nemendur á þessum aldri
eru á misjöfnum stigum í lestrarnáminu. Sumir eru að byrja að ná tökum á góðri
lestrar- og ritunarfærni á meðan aðrir hafa öðlast öryggi í lestri og ritun. Á
þessum aldri breytast börn líkamlega, vitsmunalega, tilfinningalega og
félagslega. Mikilvægt er að gera sér grein fyrir hvaða áhrif þessar breytingar
hafa á lestrarnámið.
Hvernig get ég hjálpað barninu mínu?
Foreldrar geta stutt við lestrarnám barna sinna með ýmsum hætti bæði heima
og í skólanum. Hér er nokkur dæmi um það sem foreldrar geta gert með
börnum sínum:
13
Haltu áfram að byggja upp góð tengsl við kennara barnsins þíns, leitaðu
ráða hjá honum og fáðu tillögur um það hvernig þú getur hjálpað barninu
þínu.
Hjálpaðu barninu þínu að hafa reglu á heimanáminu varðandi tíma og
stað til náms og hvettu barnið til að viðhalda regluseminni.
Ræddu um skólann, námið, árangur, áhyggjur og áhugamál við barnið.
Hvettu barnið til að þjálfa hugann með krossgátum, gátum,
gestaþrautum og orðaleikjum.
Virkjaðu fjölskyldu og vini til að styðja við nám barnsins.
Haltu áfram að hrósa barninu þegar það tekst á við nýjar áskoranir í
náminu og bjóddu fram hjálp og stuðning þegar þörf krefur.
Hafðu í huga að börn sem eru góðir lesarar koma oftast frá heimilum þar sem
foreldrar:
hafa áhuga á lestri
lesa fyrir börn sín
ræða við þau um það sem þau lesa, hugsa og gera.
1. Hjálpaðu barninu að skilja lesefnið
Það er mikilvægt að barnið lesi ekki aðeins orðin í textanum heldur nái
merkingu þess sem lesið er. Þú getur stutt við lesskilning barnsins með því að
nota mismunandi lesskilningsaðferðir, s.s.:
Tengja lesefnið við það sem barnið þekkir
Hjálpa því að sjá fyrir sér það sem gerist í sögunni
Spyrja spurninga um leið og lesið er
Draga fram lykilatriði
Lesa milli línanna
Draga saman upplýsingar
Nota aðferðir við að átta sig á erfiðum orðum
Hér eru nokkrar tillögur um hvernig má nota þessar aðferðir með barninu.
Spyrja spurninga. Spurðu spurninga eins og „Hvers vegna gerist þetta?“, „Hvað
gæti gerst næst?“, eða „Er þetta rökrétt eða líklegt?“ Svona spurningar hjálpa
barninu að tengja söguna saman í heild.
14
Að lesa milli línanna. Barnið þarf að læra að nota upplýsingar sem fram koma í
textanum og tengja við eigin þekkingu og reynslu til að geta dregið ályktanir,
þ.e. finna merkingu sem ekki er orðuð í textanum. Að lesa á milli línanna felur í
sér að safna vísbendingum og nota þær til að skapa merkingu.
Draga saman upplýsingar. Barnið þarf að læra að draga saman upplýsingarnar í
textanum, draga saman mikilvæg atriði og raða þeim saman eins og kubbum í
púsli.
Nota aðferðir til að átta sig á erfiðum orðum. Til eru ýmsar aðferðir sem barnið
getur notað til að átta sig á erfiðum orðum eða orðum sem það þekkir ekki. Ef
barninu nægir ekki að „hljóða sig í gegnum orðið“, má hvetja barnið til að:
Skipta orðinu í minni hluta
Endurlesa orðin á undan og eftir erfiða orðinu
Sleppa orðinu í bili og lesa áfram
Ræða um hvað barnið sér búið að lesa til að kanna skilning
Ef rangt lesið orð hefur ekki áhrif á merkinguna, látið það óáreitt. Gefið barninu
sjálfu tíma til að átta sig á um hvaða orð er að ræða.
2. Talaðu við barnið
Rannsóknir hafa sýnt að tal og hlustun eru grunnurinn að lestrar- og
ritunarfærni. Börn þurfa oft að tala um hugmyndir sínar áður en þau geta sett
þær niður á blað. Hér eru nokkrar hugmyndir um hvernig hægt er að hvetja
barnið til að ræða við þig:
Talaðu oft við barnið um það sem það er að lesa eða skrifa.
Fáðu barnið til að endursegja meginefni textans. Spurðu spurninga til að
hvetja barnið til að segja ítarlega frá efninu og segja skipulega frá.
Ræddu við barnið um kvikmyndir, sjónvarpsefni, söngtexta og leikrit.
Hvettu barnið til að setja fram skoðanir og rökstyðja þær.
Fáðu barnið til að segja sögur þegar fjölskyldan kemur saman í afmælum
eða á tyllidögum.
Segið sögur af skemmtilegum atvikum í fjölskyldunni.
Vertu jákvæð(ur) og hvettu barnið til að deila hugmyndum sínum og
tilfinningum.
15
Vertu góður hlustandi og sýndu áhuga á því sem barnið segir.
3. Gerið lesturinn ánægjulegan
Þú getur hjálpað barninu þínu að njóta lestrarins með því að hjálpa því að finna
áhugavert lesefni. Ef barnið hefur gaman af lestri er það líklegra til að lesa
meira og verða góður lesari. Hér eru nokkrar ábendingar um hvernig hægt er að
hvetja barnið til lestrar:
Lestu með barninu. Talið um það sem þið lesið saman, t.d. berið saman
sögupersónur og fólk sem þið þekkið.
Taktu með bækur, tímarit eða annað lesefni þegar þið farið í ökuferðir og
ferðalög.
Farið saman á bókasöfn og í bókabúðir. Skoðið einnig saman gagnvirka
vefi og internetið.
Hvettu barnið til að skoða myndefni, s.s. ljósmyndir, teikningar, kort og
gröf. Hjálpaðu barninu að skilja hvernig myndefni er notað og hvaða
tilgangi það þjónar.
Nýtið ykkur ókeypis efni af netinu, s.s. Bókaormar
(http://bokaormar.khi.is/), heimasíðu IBBY á Íslandi (alþjóðleg samtök
um barnabókmenntir á http://www.ibby.is/welcome.htm), heimasíðu
Borgarbókasafns
(http://www.borgarbokasafn.is/desktopdefault.aspx/tabid-3259/) o.fl.
Kannið möguleikann á að gerast áskrifandi að tímariti fyrir börn um
áhugasvið barnsins, s.s. um náttúrulíf, íþróttir eða vísindi.
Mörg börn hafa áhuga á að lesa fjölbreytt lesefni, s.s.:
sögur sem endurspegla sjálfsmynd þeirra
söngtexta eða efni sem höfðar til tónlistaráhuga eða listrænna hæfileika
efni sem er skemmtilegt, s.s. brandara eða gamansögur
sögur með áherslu á söguþráð
bókaraðir sem gefa lesandanum tækifæri til að tengjast sögupersónunum
vísindaskáldsögur eða fantasíur
dagblöð og tímarit
efni með bæði prentuðu máli og myndum, s.s. teiknimyndasögur eða
myndaspjöld
16
efni sem börn geta lesið með öðrum, s.s. brandarabækur eða orðaleiki
bækur eða greinar sem innihalda jákvæða mynd af umheiminum
Börn hafa líka gaman af að skoða myndrænt efni, s.s. teiknimyndir og gagnvirkt
efni á diskum eða vefefni (sjá bls. 21)
4. Hvettu barnið til að skrifa
Barnið þitt þarfnast fjölbreyttra tækifæra og tilefna til að æfa ritun. Hér eru
nokkrar hugmyndir sem geta nýst til að hvetja barnið til reglulegrar ritunar:
Tryggðu að barnið sjái þig lesa og skrifa, t.d. að endurlesa bréf sem þú
hefur skrifað, að skrifa innkaupalista eða að skrifa ferðadagbók.
Vertu opin(n) fyrir möguleikum sem gefast heima fyrir ritun sem hefur
tilgang fyrir barnið og hvettu það til að lesa og skrifa bréf, lista, skilaboð,
póstkort, þakkarbréf, o.s. frv.
Hvettu barnið til að halda safnmöppu um frí fjölskyldunnar og til að skrifa
minnisatriði eða stuttar lýsingar undir ljósmyndir.
Útvegaðu áhugavert bréfsefni, dagbækur, penna og límmiða til að hvetja
til ritunar.
Farið í fjölbreytta orðaleiki.
Hvettu barnið til að taka þátt í ritunarsamkeppnum í dagblöðum eða
skrifa bréf til ritstjóra um efni sem það hefur sterkar skoðanir á.
Hvettu barnið til að skrifa bréf til að fá ókeypis efni sem tengist
áhugasviði þess.
Gerðu ritunina ánægjulega og jákvæða upplifun fyrir barnið.
5. Glæðið lesturinn lífi í gegnum listsköpun
Niðurstöður rannsókna á listmenntun gefa vísbendingar um að mikilvæg tengsl
séu á milli listnáms og málþroska. Leikræn tjáning, dans, tónlist og sjónlistir
geta hvatt börn og virkjað þau til þátttöku með því að efla tjáningu og
ímyndunarafl. Fólk úr ólíkum þjóðfélagshópum notar listir til að kanna og tjá
hugmyndir og til að hvetja til aukins skilnings.
Hér eru nokkrar hugmyndir sem geta örvað listuppeldi barnsins:
Vertu skapandi sjálf(ur), t.d. með því að taka ljósmyndir eða móta úr leir.
17
Hvettu barnið til að skapa eigin spil eða leiki með því að nota listform
(tónlist, leikræna tjáningu eða teikningu).
Þroskið hæfileika barnsins til að sjá fyrir sér sögur með því að hvetja það
til að teikna eða mála persónur og sögusvið. Ræðið hugmyndina um að
sérhver mynd segir sögu.
Hlustaðu á tónlistina sem barnið hlustar á og biddu það að lýsa hvað því
líkar eða líkar ekki við lag eða flytjanda.
Skoðið saman gagnvirkar vefsíður sem eru tileinkaðar listum.
Hvettu barnið til að prófa hugmyndir í gegnum teikningu eða leiklist áður
en þær eru skrifaðar á blað.
Hvettu barnið til að leika sögur eða biddu það að skrifa og leika eigin
leikrit.
Sækið listviðburði með barninu, t.d. myndlistarsýningar, tónleika,
leiksýningar eða heimsækið listamenn þegar þeir sýna verk sín.
6. Vertu góð fyrirmynd
Foreldrar eru fyrstu kennarar barnsins og fyrirmyndir og reyna því að gefa þeim
gott fordæmi. Þátttaka þín og stuðningur geta haft áhrif á viðhorf barnsins eða
áhugasvið og um leið árangur þess í lestri og ritun. Hér eru nokkrar leiðir sem
þú getur notað til að vera góð fyrirmynd um áhuga á lestri og ritun:
Talaðu reglulega við barnið um það sem þú hefur lesið í dagblöðum,
tímaritum og bókum. Spurðu barnið hvað það hafi verið að lesa.
Sýndu barninu að þú lesir af mörgu tilefni. Lestu dagblaðagreinar til að fá
upplýsingar um það sem gerist í heiminum. Lestu auglýsingar til að bera
saman ólíkar vöruflokka. Skoðaðu kvikmyndaauglýsingar til að ákveða
skemmtun helgarinnar. Lestu íþróttasíðurnar til að fylgjast með
uppáhalds félagsliðinu. Lestu teiknimyndasögur þér til gamans.
Sýndu að þú notar ritun af mörgu tilefni. Skrifaðu innkaupalista með
barninu. Skrifaðu minnispunkta til að bera saman upplýsingar um vörur,
t.d. stærð og liti reiðhjóla. Skrifaðu bréf til ritstjórnar dagblaðs um efni
sem þú hefur sterkar skoðanir á eða kvörtun til framleiðanda ef vara sem
þú kaupir reynist gölluð eða ófullnægjandi.
18
7. Taktu upp gagnrýninn lestur á heimilinu
Þjóðfélagsbreytingar eru nú svo örar að við þurfum að gefa okkur tíma til að
hugsa um hvort þær hafi jákvæð eða neikvæð áhrif á okkur. Að lesa á
gagnrýninn hátt felst í að skoða og ræða undirliggjandi skilaboð í ritmáli eða
öðrum miðlum í þeim tilgangi að skilja umheiminn betur. Þá lærum við að
skoða ritmál, myndmál, talmál og margmiðlunarefni til að skilja, spyrja og ögra
undirliggjandi afstöðu, viðhorfum og gildum.
Hér eru nokkrar leiðir sem þú getur farið til að hjálpa barni þínu til að lesa á
gagnrýninn hátt:
Talið um tilgang með bók eða blaðagrein og ástæður höfundar fyrir því
að skrifa greinina.
Hjálpaðu barninu að skilja að efni á prenti eða öðrum miðlum ber í sér
sjónarhorn eða viðhorf.
Gefið gaum að jafnrétti í lesefni og leitið að dæmum þar sem upplýsingar
vantar í því skyni að afvegaleiða lesandann.
Miðlið eigin skoðun á sögu eða blaðagrein.
Ræðið á hvern hátt málið er notað til að sannfæra, t.d. um áhrifamátt
málsins í auglýsingum og aðferðir sem notaðar eru til að fá fólk til að
horfa á ákveðið sjónvarpsefni.
Kannið ólíkar túlkanir á viðburði sem aðrir lesendur hafa tjáð sig um, t.d. í
bréfum til ritstjórnar dagblaðs.
Virtu skoðanir barnsins, viðhorf og tilfinningar.
Hér eru nokkrar spurningar sem nota má til að hvetja barnið til að lesa með
gagnrýnum huga:
Um hvað er þessi bók? Af hverju hefurðu áhuga á að lesa hana?
Hvað vill höfundurinn að við vitum eða hugsum? Vill hann að við trúum
einhverju?
Hvað segir höfundurinn um börn, táninga og foreldra í bókinni?
Eru öll börnin í textanum eins?
Hvernig hefur höfundurinn notað orð og myndir til að koma skilaboðum
sínum á framfæri?
19
Eru skoðanirnar sem fram koma í bókinni sanngjarnar?
Hvað finnst þér um þessa bók?
Hvernig heldur þú að persónan sé sem skrifaði bókina?
Hvar get ég fundið hjálp?
Mundu að þú ert ekki ein(n) í að hjálpa barninu við að læra að lesa og skrifa.
Það eru margir sem hægt er að leita til, t.d. kennari barnsins,
fjölskyldumeðlimir, vinir og aðrir í samfélaginu.
Kennarinn
Sá fyrsti sem þú ættir að leita til varðandi nám barnsins í lestri og ritun er
kennari barnsins. Þegar börnin sjá foreldra og kennara sína vinna saman verða
þau öruggari og fá meira sjálfstraust. Með því að sýna áhuga á menntun
barnsins hjálpar þú því til að ná betri árangri í námi. Skólastjórinn og
starfsmenn skóla- og frístundasviðs geta einnig orðið að liði. Hér eru nokkur
atriði sem þú getur spurt kennara barnsins:
Hver eru markmiðin í lestri og ritun? Hvernig get ég sem best hjálpað
barninu mínu til að ná þessum markmiðum?
Hver er námsleg staða barnsins míns í lestri og ritun?
Hvaða bækur getur barnið auðveldlega lesið? Hvers konar bækur finnst
því erfiðari?
Hvaða bókum eða höfundum hefur það gaman af?
Virðist barnið mitt hafa áhuga á lestri? Velur það að lesa sér til ánægju?
Hvers konar lestraraðferðir notar barnið í skólanum?
Hvaða bækur eða leiðbeiningar geta hjálpað mér við að aðstoða barnið
mitt við lestrarnámið?
Kennari barnsins getur bent á ýmsar leiðir sem barnið getur farið í
lestrarnáminu og sérstaklega til að takast á við erfiða texta. Ef barnið t.d.
staðnæmist við ákveðið orð getur kennarinn bent þér á að hvetja barnið til að:
hugsa um hvaða orð eru rökrétt í samhengi sögunnar eða setningarinnar
„hljóða sig“ í gegnum orðið
hugsa um orð sem er svipað í útliti eða hljóðan
20
leita að orðhlutum sem eru líkir
hugsa um hvað hljómar rétt í setningunni
skoða myndir og greinarmerki
fara til baka og lesa textann aftur
biðja um aðstoð við að lesa orðið.
Aðrir í samfélaginu
Auk kennarans getur þú talað við ýmsa í skólasamfélaginu. Hér eru nokkrar
tillögur sem geta komið að gagni:
Virkjaðu fleiri til samstarfs við að hvetja barnið og styðja við
lestrarnámið, s.s. afa og ömmur, eldri systkin og vini.
Farðu á almenningsbókasafnið og leitaðu að bókum sem gætu vakið
áhuga barnsins, s.s. gagnvirkar bækur. Biðjið starfsfólk bókasafnsins um
aðstoð.
Leitaðu til meðlima í félagssamtökum, s.s. landssamtökum foreldra -
Heimili og skóli sem gætu vitað um hjálplegar leiðir.
Ef barnið á í erfiðleikum með lestur, láttu kanna hvort sjón og heyrn séu í
lagi. Líkamlegir þættir geta haft áhrif á lestrarerfiðleika.
Stjórnvöld
Í aðalnámskrá grunnskóla – íslensku koma fram markmið og leiðir til að styðja
við lestrarnám barna. Hún er aðgengileg á vef mennta- og menningarmála-
ráðuneytisins á
http://brunnur.stjr.is/mrn/utgafuskra/utgafa.nsf/SearchResult.xsp?documentId
=B53E86F8E8B16322002576F00058DC5C&action=openDocument
Upplýsingar um samræmd próf í íslensku er að finna á heimasíðu
Námsmatsstofnunar á http://www.namsmat.is/vefur/
Nokkrar vefsíður fyrir ungt fólk
Eftirfarandi vefsíður voru virkar þegar skjal þetta var gefið út. Mælt er með að
þú skoðir síðurnar áður en þú bendir barninu á þær til að meta hvort efnið
hentar barninu þínu. Með því að skoða vefsíður með barninu stuðlar þú að
lestraráhuga og hjálpar barninu til að finna vefsíður á eigin spýtur.
Bókaormar – vefsíða um bóklestur: http://bokaormar.khi.is/
21
Heimasíða Borgarbókasafns Reykjavíkur: http://borgarbokasafn.is/
Reykjavík, bókmenntaborg UNESCO: http://bokmenntaborgin.is/
IBBY – samtök um barnabókmenntir: http://www.ibby.is/
Gagnvirkir vefir o.fl. á heimasíðu Námsgagnastofnunar:
http://www.nams.is/krakkasidur/
Skólavefurinn: http://www.skolavefur.is/
Bókatíðindi 2011: http://www.kvos.is/BF5EADE1-741A-4319-B584-
AC90642E0EAB/FinalDownload/DownloadId-
5F86A48B57193AA5A21A92EF0A7C0FBD/BF5EADE1-741A-4319-B584-
AC90642E0EAB/bokatidindi/bokatidindi_2011.pdf
Greinar á íslensku um barna- og unglingabókmenntir:
http://www.ritlist.is/kennsla/itar_grein_isl.htm
Vefur um rafbækur: http://lestu.is/frettir.html
Netverslanir með bækur og ritföng: http://www.netverslanir.is/baekur.jsp
Listar yfir bækur sem hafa fengið verðlaun:
http://www.bokmenntir.is/desktopdefault.aspx/tabid-3493/
Vefur um læsi og lestrarerfiðleika: http://lesvefurinn.hi.is/