dagbjort gunnarsdottir - ba ritgerd - heim | skemman gunnarsdottir... · ponty, , fenomenologia...
TRANSCRIPT
Myndir ímyndunaraflsins Dagbjört Gunnarsdóttir
Listaháskóli Íslands Myndlistadeild
Myndir ímyndunaraflsins
Dagbjört Gunnarsdóttir Leiðbeinandi: Ólafur Gíslason Vorönn 2013
Í skrifum mínum mun ég skyggnast inn í vitund mannverunnar, skoða flókið
samband hennar við umheiminn [lífheiminn], skynjun einstaklingsins á
lífheiminum og tengsl hans við aðra í samveruleikanum. Ég velti fyrir mér
ímyndunaraflinu, þeim myndum sem það birtir vitundinni. Spyr spurninga eins
og: Hvaðan komar þessar myndir, eru þær bergmál fortíðar eða innihalda þær
djúpstæðari merkingu? Ég leita svara í skrifum franska heimspekingsins Gaston
Bachelard en hann skrifaði áhugaverð rit um hið skáldlega ímyndunarafl út frá
höfuðskepnunum. Virði fyrir mér listaverk Bill Viola og mitt eigið út frá því.
Andstæðurnar ljós – myrkur, líf – dauði koma við sögu og síðast en ekki síst
fyrirbærafræðin sem er undirstaðan í þessu öllu.
Efnisyfirlit
Formáli ............................................................................................................. 4
Inngangur ......................................................................................................... 5
I Fyrirbærafræði ................................................................................................ 6
Hin skáldlega mynd ............................................................................... 8
Hið skáldlega ímyndunarafl ................................................................. 10
Vatnið .................................................................................................. 11
Eldurinn ............................................................................................... 13
II Listin ............................................................................................................... 16
Að hugsa er athyglisverðara en að vita, en ekki jafn athyglisvert
og að horfa ........................................................................................... 16
Bill Viola – Five angels for the millennium ........................................ 17
Andartak .............................................................................................. 18
Lokaorð ................................................................................................ 20
Heimildaskrá .................................................................................................. 21
Viðauki ............................................................................................................ 23
4
Formáli
Sem barn var ég dáleidd af því að horfa upp til himins og dást að öllum þeim
verum sem birtust mér í skýjunum, ég dáðist af þessum klösum sem voru svo
massaðir og sýnilegir auganu en ósnertanlegir. Þegar þau voru lágt á lofti snertu
þau fjallstinda, mig langaði að hlaupa upp fjallshlíðina til að snerta þau, finna
fyrir mjúkri áferð þeirra, faðma og leika við. Ég ferðaðist með þessum
skýjaklösum langt langt í burtu frá stað og stund, tíminn var orðinn afstæður og
öll rökhugsun hvarf, sú litla sem þá var til staðar, það voru engar reglur, heldur
hvarf ég inn í algert frelsi hugans. Þegar ég varð eldri lærði ég að þessir
skýjahnoðrar voru partur af hringrás vatnsins og að þessi ský væru úr sama efni
og þokan sem læddist stundum meðfram jörðinni, ég gat staðið inn í þokunni,
fundið fyrir nærveru hennar og hún faðmaði mig og blindaði, en ég gat ekki
snert hana. Enn þann dag í dag þrátt fyrir alla þá þekkingu sem ég hef viðað að
mér á lífsleiðinni, horfi ég annað slagið upp og læt skýin bera mig inn í
draumaheima.
5
Inngangur
Heimurinn er ótæmandi listabrunnur, hann veitir mér andagift, hvort sem það er
með hinum stórbrotnu efnum sem hann leikur sér með og býr til regnboga,
bergkristalla, spúandi eldfjöll og grátandi ský eða hitt sem er svo erfitt að
útskýra, það sem tengist dulvitund mannverunnar og sambandi hennar við
efnisheiminn.
Hugurinn er sífellt á reiki, við erum að vinna úr myndum, minningum og
lífsreynslum sem við höfum viðað að okkur í gegnum reynsluna. Eina stundina
erum við að ímynda okkur hvað framtíðin beri í skauti sér og aðra stundina er
hugurinn kominn aftur til fortíðar. Hvað er það sem gerist þegar maður stendur
andspænis listaverki og er sviptur öllum orðum og rökhugsun, að láta hugann
reika áfram á ótroðnar slóðir þar sem engin takmörk eru fyrir hinu fullkomna
frelsi hugans fyrir túlkunum og myndum sem birtast óforsjálega í huganum. Að
gefa sig á vald þess og verða heltekinn, gripin, dofin og hverfa inn í rými sem
þekkir ekki takmörk rúms og tíma. Hvernig getur ein mynd kveikt þennan
blossa í hugarrýminu og borið mann á stað sem kemur manni algjörlega óþekkt
fyrir sjónir, sem hefur enga röklega skýringu og á sér enga hliðstæðu í
raunveruleikanum?
Hvað eru þessar myndir? Hvaðan koma þær? Eru þær bergmál fortíðar,
eða innihalda þær djúpstæðari merkingu? Ég leita svara í skrif franska
heimspekingsins Gaston Bachelard sem skrifaði meðal annars um hið skáldlega
ímyndunarafl. Einnig mun ég fjalla um verk listamannsins Bill Viola og skoða
það í samhengi við verkið Andartak.
6
I
„Heimurinn er ekki það sem ég hugsa, heldur það sem ég upplifi; ég er opinn
gagnvart heiminum, á í raunverulegum samskiptum við hann, en ég hef hann
ekki á mínu valdi, hann er ótæmandi“.1
Þessi orð Merleau-Ponty lýsa sambandi einstaklingsins við umhverfið. Við
höfum flest öll upplifað að horfa á regndropa lenda á lygnri tjörn, laufblöð
svigna undan þunga vatnsins, séð liti regnbogans myndast á himnum milli skins
og skúra. Þetta eru allt hlutir sem við höfum upplifað á lífsleiðinni en veitt
mismikla athygli.
Fyrirbærafræðin fjallar ekki um vísindi, greiningu eða röksemdafærslur,
heldur fjallar hún um persónulega upplifun einstaklings á fyrirbærunum sem
heimurinn hefur uppá að bjóða, alla þá þekkingu sem við fáum í gegnum
reynslu okkar og ekki þá eingöngu af snertanlegum hlutum heldur einnig af
draumum, dagdraumum, minningum og skynjunum. Þessi upplifun er í senn
andleg og líkamleg, við skynjum í gegnum hug og líkama og varðveitum þar
minningu og reynslu sem blandast síðan inn í allar upplifanir okkar. Það er hægt
að segja að þetta séu vísindi um það sem er huglægt og líkamlegt í senn.2
Samkvæmt fyrirbærafræðinni er einungis til einn heimur, það er að segja
1 „Il mondo non è ciò che io penso, ma cio che io vivo; io sono aperto al mondo, comunico indubitabilmente con esso, ma non lo posseggo“, (þýðandi Ólafur Gíslason), Maurice Merleau-Ponty, , Fenomenologia della percezione, í ítalskri þýðingu Andrea Bonomi, Milano, 2003, bls 26. 2 Dan Zahavi, Fyrirbærafræði, Björn Þorsteinsson þýddi, rit 11, Heimspekistofnun Háskóla Íslands, Reykjavík, 2008, bls 17.
7
heimurinn sem við þekkjum í hversdagsleikanum og heimurinn sem við
upplifum í gegnum draumsýnir og minningar, eru einn og sami heimurinn, við
köllum hann lífheim. Stephan Strasser líkti lífheiminum við frjósama mold.
„Rétt eins og moldin getur séð fjölskrúðugum gróðri fyrir næringu getur
lífheimurinn séð kerfisbundinni þekkingu fyrir næringu.“3 Hér líkir hann því
saman hvernig gróður sem nærist á moldinni getur breytt eiginleikum
moldarinnar og hvernig vísindi geta haft áhrif á lífheiminn.4
Fyrirbærafræðin var ein af áhrifamestu heimspekistefnum á 20. öldinni
og er þjóðverjinn Edmund Husserl einn af upphafshugsuðum hennar. Hann gaf
henni þá mynd sem við þekkjum í dag. Í byrjun 20. aldar fór hann að skrifa um
hina beinu reynslu fyrirbæranna út frá vísindalegum skoðunum. Það hafði ekki
verið gert áður, áherslan hafði alltaf legið í þekkingu sem fæst af reynslunni en
ekki öfugt. Hann skilgreindi 5 flokka fyrirbærafræðinnar í: 1. fyrirbærin, 2.
mikilvægi fyrstu persónu, 3. frestun og afturfærslu, 4. á vit hlutanna sjálfra, 5.
lífheiminn. Það voru þó aðrir heimspekingar fyrr á öldum sem höfðu velt
þessum hlutum fyrir sér og þar var fremstur í flokki þjóðverjinn Immanuel
Kant. Þó svo að Husserl hafi ekki náð að leggja endanlegan grunn að hugsun
sinni á þeim 38 árum sem hann var að skrifa um stefnuna, þá hafa margir tekið
við af honum og má þar fyrst og fremst nefna þjóðverjann Martin Heidegger
sem var lærisveinn hans. Á sama tíma fóru margir franskir heimspekingar að
fjalla um fyrirbærafræðina og voru það meðal annars Jean-Paul Sarte,
Emmanuel Lévinas, Simone de Beauvoir og Maurice Merleau-Ponty.5 En það er
annar heimspekingur sem vert er að skoða í þessu samhengi og það er Gaston
Bachelard (1884-1962). Bachelard var franskur heimspekingur sem velti fyrir
sér spurningunni um virkni og hlutverki ímyndunaraflsins á heimspeki- og
bókmenntasviðum. Á lífsleið sinni skrifaði hann áhrifamiklar bækur á borð við,
La poétique de l´espace og La flamme d´une chandelle. Bækurnar um
ímyndunaraflið, dagdraumana og höfuðskepnur náttúrunnar skrifaði Bachelard á
seinni hluta ævi sinnar. Ferill Bachelard er áhugaverður að því leyti að við
upphaf ferils hans var hann heillaður af raunvísindum og skrifaði allt út frá 3 Sama rit, bls 36. 4 Sama rit, bls 36. 5 Björn Þorsteinsson, Hvað er fyrirbærafræði, Háskóli Íslands Vísindavefurinn, 2008, sótt 3. janúar 2014, http://www.visindavefur.is/svar.php?id=7104.
8
staðreyndum vísindanna en um miðjan ferill fór hann alfarið að einbeita sér að
skáldskap og dagdraumum.6
Hin skáldlega mynd Í inngangi bókarinnar La poétique de l´espace útskýrir Bachelard hvernig
vísindaleg rökhugsun og heimspeki vísindanna sniðganga þá reynslu sem fólgin
er í skáldskap ímyndunaraflsins og hinni listrænu upplifun. Samkvæmt honum
verður manneskjan að segja skilið við rökhugsun og vísindi ef hún ætlar að
standa andpænis hinni skáldlegu mynd sem sprettur óforvarandis fram úr
sálinni.7 En hvað er hin skáldlega mynd? Hvað er það sem birtist okkur þegar
við lesum áhugaverða sögu, ljóð eða horfum á málverk sem við þekkjum engin
deili á, vitum ekkert um fortíð skaparans, en samt nær verkið að heltaka huga
okkar og skjóta rótum djúpt í sálartetrið. Er þetta bergmál einhverrar upplifunar
eða atburðar sem hefur gerst áður eða er hægt að sækja skýringu í
samveruleikann? Samveruleikinn er sá sem geymir allt sammannlegt, það er
tengingin milli sjálfsins við hinn aðilann.8 Öll sú þekking sem við viðum að
okkur í gegnum söguna, atburði, skáldskap fellur inní samveruleikann, allt sem
við deilum í reynslu okkar. Fyrirbærafræðingar hafa reynt að svara spurningunni
um annan huga í samveruleikanum, og við það hafa verið notuð svokölluð
hliðstæðurök, þau fela það í sér að einstaklingur getur einungis haft aðgang að
sinni eigin vitund en ekki að vitund annarra, eina leiðin að vitund annarra myndi
liggja í gegnum líkamlegt atferli. En hvernig er þá hægt að öðlast aðgang að
vitund annarrar persónu ef það eina sem við þekkjum er í gegnum reynslu af
líkamlegu atferli hennar, orðum og gjörðum eins og þau birtast í verkum hennar
og látbragði? Augljósast væri að rannsaka eigin hegðun og viðbrögð, ég veit
hvernig tilfinning fær mig til að brosa, gæti ég þá ekki áætlað að önnur
manneskja væri að ganga í gegnum sömu reynslu og ég gekk í gegnum þegar
hún brosir. En er þetta ekki frekar grunnhyggin útskýring á uppruna hinnar
skáldlegu myndar? Fyrirbærafræðingar hafa ekki verið hrifnir af þessari 6 Gaston Bachelard – Biography, The European Graduate School, sótt 3. janúar 2014, http://www.egs.edu/library/gaston-bachelard/biography/ 7 Gaston Bachelard, Fyrirbærafræði sálarinnar, endursögn Ólafs Gíslasonar á kafla úr bókinni La poetique de l’espace (1957) eftir Gaston Bachelard. Listaháskóli Íslands, Reykjavík, 2011, bls 1 – 2. 8 Dan Zahavi, Fyrirbærafræði, bls 74.
9
útskýringu á tengingu milli vitundar mannvera í samveruleikanum og hafa þeir
hver af öðrum afneitað henni með rökum á borð við að reynsla einstaklingsins
af sjálfum sér sé af hreinum sálrænum toga og hafa efasemdir um hvort að hún
geti átt sér stað yfir höfuð ef ekki væri fyrir reynsluna af öðrum á undan henni.9
Merleau-Ponty skrifaði:
Við verðum að vísa á bug þeirri fordómafullu afstöðu sem reynir að breyta ást, hatri eða reiði í „innri staðreyndir“, þannig að aðeins sé eitt vitni að þeim, þ.e. sú persóna sem finnur til þeirra. Reiði, skömm, hatur og ást eru ekki sálrænar staðreyndir sem dyljast á botninum í vitund hins, heldur afbrigði hegðunar eða hættir [aðferðir] á að taka afstöðu sem sjást utan frá. Þau eru til í þessu andliti eða í þessum handahreyfingum en dyljast ekki bak við þau.10
Jung kallar myndir sem eiga uppruna sinn að rekja til sammannlegra (kollektiv)
athafna frumlægar, þær má rekja allt aftur til goðsagna og hægt er að rekja
goðsagnir aftur til flestra ef ekki allra þjóðflokka og tímabila. Ef litið er til
uppruna þessa mynda út frá vísindalegu orsakasamhengi Semons11 þá er hægt
að rekja hana til minnisáfalls sem virka sem þrykkmynd minnisins eftir
síendurtekna sálræna reynslu. En Semons tókst ekki að afhjúpa hulunni af
breytingu myndarinnar, þ.e. hvaðan þetta afl sem sér sér fært að breyta
myndinni og rjúfa tengslin frá goðsögum, sem bendir til þess að það sé ekki
eingöngu hægt að rekja vitund mannsins til umhverfisaðstæðna heldur verður að
líta á samhengi milli heilans og hins lifandi efnis.12
Samkvæmt Bachelard er hin skáldlega mynd ekki orsök einhvers sem
gerðist í fortíðinni heldur býr hún yfir sínum eigin krafti og á sinn eigin kjarna.
Við verðum því að kafa dýpra í leit að hinni skáldlegu mynd, þeirri mynd sem
birtist vitundinni beint frá sálinni, frá hjartanu, frá veru mannsins í augnablikinu
og leita í fyrirbærafræði ímyndunaraflsins.13
9 Sama rit, bls 75. 10 Sama rit, bls 76. 11 Richard Wolfgang Semon (1859 – 1918) var þýskur dýrafræðingur og líffræðingur. 12 Carl Gustav Jung, Mynd og frumlæg mynd samkvæmt Jung, endursögn Ólafs Gíslasonar á kaflanum Bild úr Psychologische Typen, bls. 2. 13 Gaston Bachelard, Fyrirbærafræði sálarinnar, bls. 2.
10
Hið skáldlega ímyndunarafl Bachelard greinir ímyndunaraflið í tvo grundvallar flokka, hið formlega
ímyndunarafl sem framleiðir hina formlegu orsök og hins vegar hið efnislega
ímyndunarafl sem gefur hinni efnislegu orsök líf. Hið formlega ímyndunarafl seytlar á yfirborðinu, það vekur upp með
okkur tilfinningar sem eru tengdar hjartanu og beina huganum að útliti, það
leikur sér með form og liti í stað þess að kafa dýpra inn í hina raunverulegu
merkingu efnistaksins öfugt við hið efnislega ímyndunarafl sem kafar í hyldýpi
verunnar á stað þar sem frjókorn ímyndunar liggja og bíða eftir því að fá
næringu til að umbreyta hyldýpinu í gróðursælan stað. Hið efnislega
ímyndunarafl ræktast og vex innra með einstaklingnum og hefur þann mátt að
geta haft áhrif á lífsviðhorf manneskjunnar. 14 Bachelard skrifaði um hið
efnislega ímyndunarafl:
Sjónin sýnir okkur þær [myndirnar], en það er höndin sem fær okkur til að þekkja þær. Það er kraftmikil gleði sem temur þær, mótar þær og kemur þeim á flug. Okkur dreymir þessar myndir efnisins í nánum efnisveruleika þeirra, óháð formunum, óháð þessum yfirborðslegu myndum, þessari yfirborðslegu framsetningu. Þær hafa þyngd og eru hjarta.15
Ef við skoðum þessar tvær gerðir ímyndunarafls með tilliti til listarinnar þá er
hægt að segja að listaverk hafi mismikinn mátt, sum eru hlaðin táknum og
skreytt með allskonar dúlleríi þannig að erfitt er að leiða hugann frá fegurðinni
eða útliti verksins, þessi verk vekja upp með okkur tilfinningu svo sem
hamingju, depurð og reiði. Þessar tilfinningar vara ekki að eilífu, þær stoppa
stutt við eða þar til augað, líkami eða hugur dregst að einhverju öðru
viðfangsefni sem vekur upp aðrar tilfinningar. Þessi verk myndu falla í flokk
hins formlega ímyndunarafls. Hin gerðin af listaverkum býr yfir krafti sem
snertir mannssálina. Slík listaverk grafa sig langt inn að viðjum verunnar og
taka sér bólfestu. Áhrif þeirra munu fylgja einstaklingnum í gegnum lífið og
hafa þann mátt að geta verið vegvísir á tímamótum. Slík reynsla felur í sér
14 Gaston Bachelard, Sársauki vatnsins er án enda, útdráttur úr inngangi að bókinni Sálgreining vatnanna – hreinsun, dauði og endurfæðing (1942) eftir Gaston Bachelard í þýðingu Ólafs Gíslasonar, Endurmennt Háskóla Íslands, Reykjavík, bls. 2. 15 Sama rit, bls. 2.
11
umbreytingu. Það er hægt að segja að því svipi til atburðar eins og að missa
einhvern kærkominn eða að upplifa fæðingu barns, atburða sem breyta viðhorfi
okkar til lífsisns.
En þetta er ekki svona einfalt: þegar þessi tvö ímyndunaröfl mynda eina
heild og ekki er hægt að greina þau í sundur þá myndast þriðja afkvæmið sem
Bachelard nefnir réverie.16 Franska orðið Le reve þýðir draumurinn á íslensku
og er hægt að þýða réverie sem dagdraum eða hin dreymandi vitund, það er að
segja þegar maðurinn er á milli svefns og vöku, yfirgefur stað og stund og
hverfur inn í heim ímyndunaraflsins þar sem hann er sveimandi í sinni eigin
hugsun fjarverandi frá efnisheiminum. Samkvæmt skilningi Bachelards er þetta
hugarástand jafn mikilvægt fyrir þekkingu mannsins á heiminum og sú vitneskja
sem vísindin hafa fært mannkyninu.17 Ef við lítum aftur til samanburðarins sem
við gerðum hér fyrir ofan þá er listaverk sem inniheldur réverie hugtak
Bachelards hið fullkomna listaverk það hefur þann eiginleika að geta tælt
áhorfandann til sín með sínum formum og litum og vekja upp með honum
áhuga á að hefja þá ferð sem afhjúpar þá djúpstæðu og efnismiklu mynd.
Til þess að fá betri skilning á ímyndunaraflinu munum við rýna í tvö rit
Bachelard, Sálgreining vatnanna og Heimspekingur hugleiðir kertaljós þar sem
hann skrifar um hið skáldlega ímyndunarafl verunnar út frá vatninu og eldinum.
Til þess að öðlast skilning á skrifum Bachelards um vatnið og eldinn þarf að
hafa í huga að mannslíkaminn er jafn mikill hluti af heiminum og heimurinn af
líkamanum, þeir eru gerðir úr sama efni og geta því verið með sál, líkama og
rödd.18
Vatnið Líf okkar kviknar í vatni, við mótumst og þroskumst í 9 mánuði umvafin
legvatni. Þegar við fæðumst böðum við okkur uppúr vatni, við lærum að synda
og við vökvum líkama okkar með því. Vatnið er mannverunni lífsnauðsynlegt
til að lifa. Það er máttugt, það getur kveikt líf en einnig tekið það, það er ekki
16 Sama rit, bls. 2. 17 Gaston Bachelard, Heimspekingur hugleiðir kertaljós, endursögn Ólafs Gíslasonar á kafla úr bókinni La flamme d´une chandelle (1961) eftir Gaston Bachelard, Endurmenntun Háskóla Íslands, Reykjavík, bls 1. 18 Gaston Bachelard, Sársauki vatnsins er án enda, bls 5.
12
eðlislægt fyrir mannfólkið að lifa í vatni, við myndum drukkna og deyja, en þó
svo að vatnið geti tekið líf okkar þá vekur það ekki upp ótta í huga okkar, í
staðinn býður það okkur velkomin. Það er seiðandi fyrir augað og mjúkt
viðkomu fyrir líkamann.
Tíminn er eins og vatnið, og vatnið er kalt og djúpt eins og vitund mín sjálfs. Og tíminn er eins og mynd, sem er máluð af vatninu og mér til hálfs. Og tíminn og vatnið renna veglaust til þurrðar inn í vitund mín sjálfs.19
Þetta er upphafsljóðið í ljóðaflokknum Tíminn og vatnið eftir Steinn Steinarr,
Steinn vildi með ljóðlist sinni ná til hins hugsandi manns, meðal yrkisefna hans
voru dauði, von, tilgangur, þrá og draumar, hugtök sem snúa að dýpri vitund
manna.20 Ljóðið býður ekki uppá að verða endursagt í hversdagslegu máli.
Setningarnar forma ekki rökhugsun og eiga sér enga bókstaflega hliðstæðu í
hinu daglega lífi, ljóðið á að vera lesið með opnum huga og láta tilfinningarnar
og skynjunina stjórna upplifun okkar á þeirri veröld sem það hefur að geyma.21
Við fyrstu sýn er vatnið yfirborðskennt og einsleitt, það er auðvelt að
hrífast af leikjum þess og gleyma sér á svamli í yfirborðinu, en ef kafað er undir
yfirborðið hefur það einhverjar leyndustu myndir mannsálarinnar að geyma.
Bachelard lýsir vatninu sem kvenlegri veru, þessi vera leitar lóðrétt niður á við,
hún er friðlaus og föst í hinni eilífu umbreytingu, hinu eilífa falli þar til hún
finnur dauðan í hinni láréttu kyrrstöðu.22 Vatnið býr yfir örlögum, örlögum sem
geta haft áhrif á lífsmáta mannsins, hún [vatnið] ber með sér myndir sem eru
henni eðlislægar, hraðfleygar myndir, myndir drauma sem aldrei taka enda og
19 Steinn Steinarr, „Tíminn og vatnið“ í Steinn Steinarr ljóðasafn, Vaka-Helgafell, Reykjavík, 2008, bls. 193. 20 Gunnar Kristjánsson, „„Hvað táknar þá lífið“?“, í Andvari, 133. árg., 1. tölubl., janúar 2008, bls 79 – 80. 21 Eiríkur Páll Eiríksson, Bókmenntir um miðja öld módernismi 1950/1965-1975, Fjölbrautarskólinn við Ármúla, sótt 3. janúrar 2014, http://www.fa.is/deildir/Islenska2/503/bms/5075.html 22 Gaston Bachelard, Sársauki vatnsins er án enda, bls. 3 – 4.
13
síðast en ekki síst myndir sem innihalda sífellda umbreytingu. Þessar myndir
hafa þann mátt að hafa stöðug áhrif á hlutskipti mannsins. „Maður baðar sig
aldrei tvisvar í sömu ánni vegna þess að maðurinn í kjarna sínum býr yfir
örlögum hins rennandi vatns.“23 Þessi orð Bachelards lýsa hinu stöðugt flæði í
huga manneskjunnar, hugurinn er á stöðugri hreyfingu, hreyfingu í lífinu líkt og
líkaminn sem endar í hinni láréttu stöðu líkt og vatnið. Bachelard bendir á að
vatnið býr einnig yfir andstæðu þessara sífellu umbreytinga og óróleika, hann
tengir það við tungumál mannsins. Raddir vatnsins bera með sér hreinleika og
eru algerlega lausar við alla tilgerð. Þannig tengist vatnið ekki eingöngu líkama
og vitund mannsins heldur einnig rödd hans sem birtist í hinu fljótandi
tungumáli mannsins í gegnum ljóðlist og söng.24
Eftir að hafa lesið myndlíkinguna hans Bachelards um örlög vatnsins er
ekki annað hægt en að sjá samsvörun með vatninu hans og Steins í Tíminn og
vatnið. Sem lýkur með þessum erindum.
Ég finn mótspyrnu tímans falla máttvana gegnum mýkt vatnsins Meðan eilífðin horfir mínum óræða draumi úr auga sínum.25
Eldurinn Eldurinn er ágengur og ofstopafullur, hann klífur loftið með logum sínum og
leið hans liggur alltaf lóðrétt upp á við, hann er andstæða vatsins, hann er
karlkyns vera sem hefur engan efnismassa en hann er engu að síður sterk vera.26
Logi, vængjaði órói ó, andardráttur, rauða endurskin himinsins - sá sem afhjúpar leyndardóm þinn mun vita hvað er lífið og hvað er dauðinn27
23 Sama rit, bls. 4. 24 Sama rit, bls. 5. 25 Steinn Steinarr, „Tíminn og vatnið“, bls 204. 26 Gaston Bachelard, Heimspekingur hugleiðir kertaljós, bls 2.
14
Bachelard lýsir loganum sem endalausri uppsprettu hugans:
Einu sinni, á tímum sem jafnvel draumarnir hafa gleymt, gat loginn á einu kerti komið hinum vitru til að hugleiða; hann gat orðið hinum einmana heimspekingi uppspretta endalausra drauma. Við hlið hlutanna á skrifborði hans, sem voru fangar forms síns, við hliðina á bókunum sem veittu seinvirka leiðsögn, gat kertaloginn vakið upp endalausar hugsanir og kallað fram takmarkalausar myndir. Fyrir mann sem gaf sig á vald draumheimanna var kertaloginn á þeim tíma fyrirbæri heimsins. Menn lögðu sig fram um að læra um byggingu heimsins í þykkum doðröntum, en svo var það örlítill logi – ó, skoplega þekking! – sem tendraði gátuna ljóslifandi fyrir honum.28
Loginn þarf eingöngu örlítinn neista til að lifna við og hann getur slokknað við
hinn minnsta andblæ þannig er hann viðkvæmur eins og hugur manneskjunnar
sem getur flögrað annað við hið minnsta áreiti. Fyrr á tímum var kertaljósið
tengt við rósemd sálarinnar, það á útskýringu sína að rekja til lognsins eða
einsemdar manneskjunnar þ.e.a.s þegar loginn nær að varðveita form sitt og
stöðugleika líkt og hugur einstaklingsins í einsemd sinni. Þá leitar loginn beint
upp eins og formföst hugsun mannsins á vit hinna lóðréttu örlaga.29
Það hafa margir skrifað um eldinn og er hann oft notaður sem tilvísun í
hreinsun [hreinsunareldurinn]. Í umfjöllun sinni um líkingamál eldsins nefnir
Bachelard að dulhyggjumenn fyrri tíma hafi litið svo á að jörðin væri að
„hreinsa sig” með eldvirkni og eldgosum og að30 franski hugsuðurinn Blais de
Vignenére hafi skilgreint bruna sem tvenns konar loga, annars vegar þann hvíta
sem myndar kjarnann og hins vegar þann rauða sem umlykur þann hvíta sem
„vinnur hörðum höndum við að útrýma sjálfum sér til þess að hvíti login geti
dafnað“. Rauði loginn í þessari líkingu er sorinn sem þarf að útrýma til að
kjarninn fái lifað. 31 Í þessu líkingamáli öðlast eldurinn nýja siðferðilega
merkingu sem veitir okkur nýja sýn á samband mannsins og náttúrunnar
almennt. Loginn hefur mátt til að fanga athygli hins upptekna manns, láta hann
27 „Flamme tumulte ailé, o souffle, rouge reflet du ciel, - qui déchiffrerait ton mystére saurait ce qu´il en est de la vie er de la mort.“, í þýðingu Ólafs Gíslasonar, sama rit, bls 1. 28 Sama rit, bls. 2. 29 Sama rit, bls. 3. 30 Sama rit, bls. 7 - 8. 31 Sama rit, bls. 6 - 7.
15
yfirgefa athafnir sínar og láta hugann reika.32 Loginn hans Bachelards er ekki
bara logi, sá sem dreymir í návist logans, getur séð heiminn brenna, jörðina
skjálfa, sjálfið endurspeglast í loganum.33
Myndlíkingar Bachelard um eldinn og vatnið, endurspegla mannleg
örlög. Fall vatnsins endar í láréttri stöðu eins og líf mannanna og lóðréttur
loginn hverfur upp í himininn eins og síðasti andardrátturinn. Eins og hann lýsir
svo listavel með sögninni að slökkva:
Hvert er hið mikla inntak hugtaksins slökkvist? Lífið eða kertið. Myndlíkingarnar geta hrært upp í ólíkustu myndum sínum. Sögnin slökkvist getur látið hvað sem er deyja, hvort sem það er hávaði eða hjarta, ást eða ofsabræði.34
32 Sama rit, bls. 4. 33 Sama rit, bls. 8. 34 Sama rit, bls. 5.
16
II
Að skapa list er eins og að anda. Maður andar heiminum að sér og lætur hann
flæða um skynfæri líkamans og hleypir honum aftur út með part af sjálfum sér.
Þetta er tvístefna, maður tekur við og nærist og gefur af sér til baka. Ef maður
hættir að anda þá deyr maður.
Að hugsa er athyglisverðara en að vita, en ekki jafn athyglisvert og að horfa.
Við gerð verksins Að hugsa er athyglisverðara en að vita, en ekki jafn
athyglisvert og að horfa 35 (Göthe) var ég að rannsaka vinnuaðferð sem
súrrealistarnir36 notuðu í sínu listvinnuferli til að tjá undirmeðvitundina. Þeir
bjuggu til ýmiskonar leiki og þróuðu tækni sem þeir notuðust við, meðal þeirra
var automatic drawing37. Ég byrjaði á því að teikna á A3 blöð en fann fljótt að
þetta viðfangsefni kallaði á meira frelsi og rými fyrir hreyfingu handarinnar, ég
ákvað því að gera teikningu beint á vegg í sýningarrými Kubbsins sem er um
það bil 5 x 10 metrar á stærð. Í ferlinu skapast jafnvægi milli undirmeðvitundarinnar og fullkominnar
meðvitundar. Það er ekki búið að ákveða fyrirfram hvað á að teikna heldur er
opnað fyrir flæði sem leiðir höndina áfram út í óvissu, þegar fyrstu formin hafa
myndast á vegginn og byrja að vera kunnugleg þá tekur hugurinn við og er
35 Sjá viðauka mynd #1 36 Súrrealisminn var listahreyfing sem byrjaði upp úr 1920, fremstir í farabroddi voru André Breton, Man Ray, Max Ernst og Hans Arp. 37 Felst í því að tæma hugann og láta blýantinn reika áfram án meðvitaðra hreyfingar, líkt og að skissa ósjálfrátt þar sem mynd getur birtst óvænt. Brotchie, Alastair tók saman, „Visual techniques“, í A book of surrealist games, Mel Gooding ritstj, Shambhala redstone editions, Boston, 1995, bls 49.
17
haldið meðvitað áfram með það sem hefur birst. Verkið kallar á höndina og
höndin svarar með hreyfingu, hún virkar sem vegvísir að vitund minni. Línurnar
eru misþykkar og á sumum stöðum er eins og þær séu að slitna, þær eru
sálarþræðirnir sem segja söguna, forma myndina, þær eru viðkvæmar fyrir hinni
minnstu röskun eins og eldur Bachelards. Línurnar mynda form sem flæða undir
dyrakarma, undir gólf og út um gluggann þannig að ekki sést fyrir endann á
þeim og er óljóst hvaðan þær koma og hvert þær eru að fara, þær eru partur af
stærra samhengi sem ekki er sýnilegt og bjóða þannig áhorfandaum að
skyggnast lengra inn í verkið. Þessi form koma mér kunnuglega fyrir sjónir en
ég þekki þau ekki, þau kalla fram nýjar myndir sem blandast við bergmál úr
fortíðinni.
Markmið verksins er að skyggnast inn í hugarheim listamannsins og
kalla fram myndir úr dulvitundinni. Ég spyr mig að því hvort formin eigi
uppsprettu sína að rekja djúpt í vitundina eða hvort þær enduspegli minni
handarinnar, hvað bregst við fyrst vitundin eða höndin, eða getur annað ekki
lifað án hins eins og eldur Vignenére? Og hvort nærir myndmálið vitundina eða
öfugt? Verkið skilur eftir þessar spurningar sem ekki verður svarað hér. Það er
erfitt að staðsetja sig þegar maður er staddur í miðjum hvirfilbylnum.
Bill Viola – Five angels for the millennium
Ameríski listamaðurinn Bill Viola vinnur í anda fyrirbærafræðinnar. Fæðing –
ást – ljós – myrkur – trú – dauði eru allt hugtök sem hann vinnur með í list
sinni. Hann vinnur út frá sinni eigin lífsreynslu sem hafa haft djúpstæð áhrif á
hann í gegnum lífið .38 Sem dæmi má nefna andstæðurnar þegar hann missti
móður sína og eignaðist son á einu og sama árinu.39 Þegar hann var á ferðalagi í
Japan varð hann vitni að því í Suntory Museum í Tokyo að kona var að biðja til
styttu, styttu sem var ekkert meira en listaverk fyrir honum sjálfum, þá rann upp
fyrir honum að listaverk geta búið yfir mætti, mætti sem getur kallað fram
umbreytingu hið innra með einstaklingi og breytt afstöðu hans til lífsins. Hann
38 John Walsh, ritsj., Bill Viola: The Passions, The J. Paul Getty Museum, Los Angeles, 2003, bls. 26. 39 Sama rit, bls 29.
18
vildi ekki búa til innihaldslaus verk sem hefðu ekkert annað til að bera en
stundaránægju fyrir augað.40
Verkið Five Angels for the Millennium 41 sem hann gerði 2001
samanstendur af fimm myndbandsverkum sem bera heitið „Departing Angel,“
„Birth Angel,“ „Fire Angel,“ „Ascending Angel,“ og „Creation Angel.“ Þessi
fimm myndbandsverk sýna klæddan mann stökkva í vatnslaug, hann er
hreyfinga og sviplaus, hann svífur niður í dökkt hyldýpið. Líkaminn sekkur inní
nýja vídd, þar sem vísindi og rökhugsun eru fjarlæg, þar sem óendanleiki
alheimsins og líkami verunnar sameinast. Veran ferðast frá ljósinu í myrkrið og
myndar þannig massa á milli himins og jarðar, milli lífs og dauða.42 Öll fimm
myndbandsverkin eru sýnd samtímis í sama rýminu, þau eru öll sitt í hvorum
litnum og er búið að hægja verulega á myndbands-upptökunni.43
Verkið er margbrotið og ekki er hægt að gera grein fyrir því öllu í
þessari ritgerð. Ef við lítum til hugmynda Bachelard um höfuðskepnurnar, að
þær búi yfir siðferðislegu eðli og að vatnið sé í senn lífgjafi og tortímandi lífs.
Þá vísar verkið í tilvistarlegar aðstæður sem tengjast tortímingu og dauða,
fæðingu og sköpun. Í þessum skilningi er verkið táknrænt, en það er um leið
eðli lifandi táknmynda að þær sé ekki hægt að þýða yfir á annað mál án þess að
eyðileggja merkingu þeirra. Táknmyndin vísar alltaf endanlega í sig sjálfa og
reynslu þess sem upplifir hana á sínum eigin forsendum.
Andartak
Jörðin leitar niður, vatnið leitar niður í lárétta stöðu, loftið og eldurinn leitar
upp. Þessar setningar hafa allar mjög einfalda eðlisfræðilega skýringu. Þetta er
reyndar svo sjálfsagður hlutur að við veitum því varla eftirtekt. Þegar við lyftum
upp steini og sleppum honum þá fellur hann til jarðar, þegar við fyllum lófa
okkar af vatni til að fá okkur að drekka þá lekur restin niður. Eftir að hafa heyrt
þessi orð um svo sjálfsagða hluti fór ég að hugsa út í líkama manneskjunnar og
hvar hann er staðsettur í hinum efnislega heimi. Þegar líkaminn er í vatni verða
skynfærin og meðvitundin um hreyfingu hans og staðsetningu næmari, ef maður 40 Sama rit, bls 26. 41 Sjá viðauka mynd #2 42 Sama rit, bls 146. 43 Sama rit, bls 270.
19
andar inn getur það loft sem fangast inn í lungum líkamans haldið honum á floti
og um leið og því lofti er sleppt leitar líkaminn niður.
Myndbandsverkið Andartak44 sem sýnt var í sýningarrýminu Skúrnum
samanstendur af myndbroti sem endurtekur sig á einnar mínútu fresti og hljóði
sem endurtekur sig á 10 mínútna fresti. Ég umbreytti sýningarrýminu að innan
með þvi að klæða veggi og loft með svörtu efni, ég vildi ekki að hljóð eða ljós
utanfrá hefðu áhrif á upplifun á verkinu, rýmið átti að taka utan um áhorfandann
og vildi ég að hann upplifði samveru með verkinu. Myndbrotið sýndi veru
klædda í hvítan kjól og flaut hún í vatni, undir henni var dimmt tómarúm þar
sem sást glitta í jarðveg og speglaðist kjóllinn í yfirborðinu þannig að hann
myndaði skýjahulu yfir henni, regndropar á vatnsyfirborðið og mynduðu þeir þá
sjónhverfingu að ekki var augljóst hvað væri upp og hvað niður. Regndroparnir
falla úr hinni lóðréttu stöðu og leita í örlög sín, tímaleysið og endalokin. Það
sást hvorki í fætur né höfuð verunnar sem var fljótandi milli himins og jarðar,
það var óljóst hvar hún byrjaði og endaði. Hún myndaði lag sem var endalaust
eins og þegar horft er til himins eða eftir jörðu þar sem mörk endans eru óljós.
Hljóðið kemur úr hyldýpi sjávar og endurspeglar það innra hljóð líkamans þegar
þögnin er alger. Það var magnað upp þannig að það mettaði rýmið og faðmaði
áhorfandann.
Í framhaldi af umfjöllumn minni um Bill Viola er verkið mitt með
sambærilegum hætti táknmynd sem felur í sér alla siðferðislega eiginleika
vatnsins og tengist það tilvistarlegum grundvallarspurningum mannsins. Hins
vegar verður endanleg merking þess aldrei skýrð með orðum eða annarri mynd,
því þá værum við komin í þýðingarvandamál sem þurrkaði út hina upprunalegu
merkingu þess, sem felst í sjálfri reynslunni en ekki í útskýringu hennar og vísa
ég aftur í orð Merleau-Ponty:
„Heimurinn er ekki það sem ég hugsa, heldur það sem ég upplifi; ég er opinn gagnvart heiminum, á í raunverulegum samskiptum við hann, en ég hef hann ekki á mínu valdi, hann er ótæmandi”.45
44 Sjá viðauka mynd #3 45 „Il mondo non è ciò che io penso, ma cio che io vivo; io sono aperto al mondo, comunico indubitabilmente con esso, ma non lo posseggo“, (þýðandi Ólafur Gíslason), Maurice Merleau-Ponty, , Fenomenologia della percezione, bls 26.
20
Lokaorð
Það er svo margt í þessari veröld sem erfitt er að setja fingur á og útskýra með
orðum, sumt er mjög fjarlægt, annað það nálægt að við sjáum það ekki með
okkar eigin augum.
Í skrifunum erum við búin að skyggnast inn í fyrirbærafræðina og líta
inní króka og kima ímyndunaraflsins. Við erum búin að rannsaka hin djúpstæðu
tengsl náttúrunnar við vitund mannsins og leitað að uppruna hinna skáldlegu
mynda sem birtast okkur í vitundinni. Í rannsókn okkar höfum við stuðst við rit
Gaston Bachelards sem hann skrifaði með tilliti til höfuðskepnanna og rýmisins.
Einnig höfum við stuttlega skoðað vinnuferli listamannsins Bill Viola, hvernig
hann vinnur með sína persónulegu upplifun og reynslu í verkum sínum og ég
hef gert grein fyrir mínum eigin verkum Að hugsa er athyglisverðara en að vita,
en ekki jafn athyglisvert og að horfa og Andartak.
Ferðalagið hefur leitt mig að dýpri skilning á mínum eigin persónulegu
tengslum við umhverfið. Það er erfitt að koma orðum að þessum lífræna
samruna og hefur það verið mikill innblástur að lesa líkingarmál Bachelards um
eldinn og vatnið.
Það er forvitnin sem dregur mig áfram í listsköpun minni, löngunin í að
fullnægja vitunum knýr mig að lokapunkti, Snertingin leiðir mig nær
sannleikanum, hvort sem hún er líkamleg eða huglæg.
Ég kafa í vatninu ég leik mér í eldinum ég sekk ég brenn ég er vatnið ég er eldurinn.46
46 Dagbjört Gunnarsdóttir, úr eigin skissubók 2013.
21
Heimildarskrá
Útgefið efni Brotchie, Alastair tók saman, „Visual techniques“, í A book of surrealist games,
Mel Gooding ritstj, Shambhala redstone editions, Boston, 1995, bls 49 – 80. Gunnar Kristjánsson, „„Hvað táknar þá lífið“?“, í Andvari, 133. árg., 1. tölubl.,
janúar 2008, bls 69 – 91. Merleau-Ponty, Maurice, Fenomenologia della percezione, í ítalskri þýðingu
Andrea Bonomi, Milano, 2003. Steinn Steinarr, „Tíminn og vatnið“ í Steinn Steinarr ljóðasafn, Vaka-Helgafell,
Reykjavík, 2008, bls. 191 – 204. Walsh, John ritsj., Bill Viola: The Passions, The J. Paul Getty Museum, Los
Angeles, 2003. Zahavi, Dan, Fyrirbærafræði, Björn Þorsteinsson þýddi, rit 11,
Heimspekistofnun Háskóla Íslands, Reykjavík, 2008. Óútgefið efni Bachelard, Gaston, Heimspekingur hugleiðir kertaljós, endursögn Ólafs
Gíslasonar á kafla úr bókinni La flamme d´une chandelle (1961) eftir Gaston Bachelard, Endurmenntun Háskóla Íslands, Reykjavík.
Bachelard, Gaston, Sársauki vatnsins er án enda, útdráttur úr inngangi að
bókinni Sálgreining vatnanna – hreinsun, dauði og endurfæðing (1942) eftir Gaston Bachelard í þýðingu Ólafs Gíslasonar, Endurmennt Háskóla Íslands, Reykjavík.
Bachelard, Gaston, Fyrirbærafræði sálarinnar, endursögn Ólafs Gíslasonar á
kafla úr bókinni La poetique de l’espace (1957) eftir Gaston Bachelard. Listaháskóli Íslands, Reykjavík, 2011.
Jung, Carl Gustav, Mynd og frumlæg mynd samkvæmt Jung, endursögn Ólafs
Gíslasonar á kaflanum Bild úr Psychologische Typen. Vefheimildir Björn Þorsteinsson, Hvað er fyrirbærafræði, Háskóli Íslands Vísindavefurinn,
2008, sótt 3. janúar 2014, http://www.visindavefur.is/svar.php?id=7104 Eiríkur Páll Eiríksson, Bókmenntir um miðja öld módernismi 1950/1965-1975,
Fjölbrautarskólinn við Ármúla, sótt 3. janúrar 2014, http://www.fa.is/deildir/Islenska2/503/bms/5075.html
22
Gaston Bachelard – Biography, The European Graduate School, sótt 3. janúar 2014, http://www.egs.edu/library/gaston-bachelard/biography/
23
Viðauki
#1 Dagbjört Gunnarsdóttir Að hugsa er athyglisverðara en að vita, en ekki jafn athyglisvert og að horfa Akríl máling á vegg Stærð sirka 5m x 10m 2011
24
#2 Bill Viola Five angels for the millennium, stilla úr myndbandi Fimm myndbandsverk varpað í stærð 2.4 x 3.2 metrar 2001
25
#3 Dagbjört Gunnarsdóttir Andartak, stilla úr myndbandi Ein mínuta lúppa 2013