KUO TAIMI KE ‘UNUAKI KIMU‘A ‘A

PEPA FAKAHINOHINO: LAISENI FAKA‘ULI AB 60

‘E kamata ‘i Sanuali 1, 2015 ‘a e malava ‘e ha tokotaha nofo Kalefonia ke ma’u laiseni faka’uli, neongo pe ‘oku fakalao ‘a ‘ene nofo fonua´ pe ‘ikai. Ko kinautolu ‘oku ta’efakalao ‘enau nofo heni´ (nofo ‘ova, nofo ta’epepa), ‘e ala ma’u ‘enau tohi faka’uli AB 60, pea ‘e faka’ilonga’i makehe pē ‘a e fa’ahinga laiseni´ ni.

‘Oku Founga Fēfē ‘a ‘ete Kole ki he Laiseni AB 60?

‘Oku fiema’u ‘e he DMV ‘a e tokotaha kole laiseni faka’uli kotoa pē ke nau ‘ilo ‘a e lao ‘o e hala ke malava ke nau hoko ko ha kau faka’uli lelei. Ko e ngaahi fotu’utu’u eni ‘oku pau ke ke tomu’a ngaue ki ai kimu’a pea ke lava ‘o kole ha’o Laiseni AB 60:

1. Fai ha’o kole ‘apoinimeni ki he DMV ke fakafonu ho’o tohi kole laiseni´. Ko e kole laiseni faka’uli´ ‘oku malava pe ‘i he DMV, ‘o ‘ikai fai ia ha toe feitu’u kehe. Kuo pau ke ‘uluaki totongi ha’o fa’ahinga tikite mo’ua faka’uli, ki mu’a ‘i ha’o tohi kole laiseni.

2. Fakafonu ‘a e foomu kole laiseni DL-44. Kapau na’e ‘oatu ‘e he Potungaue Social Security ha’o fika ngāue fakalao, pea ke hiki mai ia ki he foomu kole´. Pea kapau na’e te’eki ma’u ha’o fika ngāue pea´ ke hanga ‘o faka’ilonga’i na’e ‘ikai ma’u ha’o fika ngāue ‘i he foomu. ‘Oua ‘e fai ha fakamatala loi, pe ko e tohi ha fika ngaue loi, ‘o kapau na’e te’eki ke ‘oatu ha’o fika ngāue ‘e he Potungaue Social Security. Kapau ‘oku te’eki ke ma’u ho’o sitiseni ‘Amelika´, ‘oua te ke fakafonu ‘a e foomu lesisita ki he fili´.

3. Totongi ‘a e tukuhau $33 ‘o e kole laiseni.

4. Fakamo’oni’i ho fotunga´ pea mo ho’o totonu nofo ‘i Kalefonia´ ‘o ngaue’aki ‘a e ngaahi pepa fakamo’oni ‘oku tali ‘e he DMV.

5. Ko ho’o lava he sivi tohi laiseni faka’uli´ ke fakamahino pau ‘oku´ ke ‘ilo ‘a e lao ‘o e hala´.

6. Fai ‘a e faka’ilonganima ‘aki ho motu’a-nima.

7. Fai ha’o tā.

8. Lava he sivi ho’o sio´.

9. Ko ‘ene ma’u pe ho’o ngofua ke ke faka’uli akoako´ pea kole ha taha laiseni ke mo akoako. Ko hono lava ia´, pea kole ha’o ‘apoinimeni ki he DMV ke fai ho’o sivi faka’uli lele he hala´.

10. ‘Omi ha fakamo’oni ‘oku ‘inisiua malu’i ho’o me’alele´.

11. Hili ho’o lava he sivi faka’uli lele he hala´, ‘e ‘oatu leva ho’o laiseni AB 60.

           

 

KUO TAIMI KE ‘UNUAKI KIMU‘A ‘A

Fakamo’oni ho Fotunga mo e Totonu Nofo Kalefonia

Kuo pau ke ke fakamo’oni’i ho fotunga´ pea mo ho’o totonu nofo ‘i Kalefonia´ ‘o ngaue’aki ‘a e ngaahi pepa fakamo’oni ‘oku tali ‘e he DMV. ‘E ala ngaue’aki ho’o paasipooti muli´ fakataha mo ho’o ID mei he Konisela Tonga, pe ko ho’o paasipooti motu’a´ fakataha mo ho’o Tohi Fa’ele’i´ ke fakamo’oni’i ‘aki koe. Kuo pau ke ke fakamo’oni’i ho’o nofo Kalefonia´ ‘aki ha tohi lisi nofo’anga, tohi pila totongi ‘uhila, vai, pe kasa, totongi tukuhau, lekooti fakafaito’o, lekooti fakapangikē, pe lekooti fakaako. Kapau leva ‘oku ‘ikai ke ke ma’u ha fa’ahinga ‘o e ngaahi fakamo’oni’i´ ni pea ke kātaki mai mo ha fa’ahinga pepa fakamo’oni kehe ‘oku ke ma’u´ ke toki faka’eke’eke koe ‘e ha ‘ofisa DMV ke fakapapau’i ho fotunga mo e totonu ho’o nofo Kalefonia´.

Ko e Ngaahi Sivi :

Ko e tokotaha kole laiseni kotoa kuo pau ke ne faka’ali’ali ‘a ‘ene taukei faka’uli hao mo lelei mo ‘ene ‘ilo ki he lao ‘o e hala´ ‘i Kalefonia. Kuo pau ke ke tomu’a lava he sivi tohi laiseni he ‘aho ‘oku fai ai ho’o kole laiseni´. ‘E lava ‘o sivi tohi pe sivi lea, ‘a ia ‘e faingalie atu ‘i he ngaahi lea fakafonua kehekehe. Hili pe hono ‘oatu ho’o ngofua faka’uli akoako´, kuo pau ke ke kole ha’o ‘apoinimeni ke ke foki mai ‘o sivi faka’uli lele he hala´, ke ke faka’ali’ali ho’o poto’i faka’uli lelei mo hao. Ko e lava ho’o sivi ko eni, ‘e ma’u leva ho’o laiseni faka’uli´.

Ko e Hā Nai Te u Fai Ke u Mateuteu ai?

‘Oku kei fakapapau’i ‘e he DMV ‘a e aofangatuku ki ho fotunga mo e ngaahi pepa fakamo’oni totonu nofo´. Ka kuo taimi ke ke tanaki leva ho’o ngaahi pepa he taimi´ ni. Kapau ‘oku ‘ikai ke ‘i ai ha’o ID mei he Konisela pe ko ha paasipooti kole leva kei taimi. Pea kapau ‘oku ‘ikai ke tu’u ha tohi mo’ua ‘uhila, kasa, pe vai ho hingoa pea ke feinga ke liliu ha tohi mo’ua ho ‘api ki ho hingoa ke ke lava ‘o ngaue’aki (ko e me’a ‘e taha ‘e malava ke ke ngaue’aki ha tohi mo’ua ‘oku fakatu’asila ki ho hoa´ ke fakamo’oni’aki ho’o nofo’anga´. He’ikai lau kapau ko ha tohi mo’ua ‘oku mo kaunga totongi mo ha tokotaha kehe).

Kapau na’a ke ‘osi faka’uli he kuohili´ pea ke mo’ua ai, fakapapau’i ‘oku ‘osi totongi kotoa ‘a e ngaahi tikite mo’ua ko ia´. Pea kapau ‘oku ‘ikai ke ke lava ‘o fakapapau’i eni, ‘alu leva ki he DMV ‘o ‘eke ho’o lekooti faka’uli´. ‘Eke ‘aki pē ho hingoa´ mo ho tu’asila he taimi na’a ke mo’ua ai. Ko e mo’ua´ ‘e lava ke totongi ki he Fale Fakamaau’anga ‘a’ana ho’o tikite´. Kapau ‘oku ke veiveiua ha fa’ahinga me’a pea talanoa mo ha loea.

‘Oku mahu’inga foki, ke ke kamata ako leva ki he sivi´. Ngaahi ma’ungatala ‘e ma’u mei he www.driveca.org pea mei he ngaluope he DMV pe ko e ngaahi ‘ofisi ‘o e DMV. ‘OUA ‘e totongi ha me’a ki ha taha ‘o pehē ‘e ma’u ai ha laiseni. Ko e Laiseni ‘e toki ma’u ia ‘i Sanuali 1, 2015 pea ko e DMV pe ‘e ma’u mei ai´.

‘E Lava Fēfē Ke tau Fengaue‘aki Heni?  

‘Oku mahu’inga ho’o ngaahi fakakaukau! Fetu’utaki mai ki he driveslicense@caimmigrant.org ‘o kapau ‘oku ke fiekau mai ki he ngaue´ ni pe fiekau mai ki he Drive California Coalition. Te ke lava toe ma’u mo e fakamatala mei he www.driveca.org!