JUJUMISI TI BIBILIA 52

Diocese na Kajo-Keji

Episcopal Church of South Sudan & Sudan

A tetena ko Rev. Jacob Haasnoot

A nyönyöke i Bari ko Rev. Mikaya Loguli Lubajo

2

Petet na maŋesi Ko nyo jujumbu na Bibilia na gwon ko 'bulit? 3 Ko Ŋutu jujumbu Bibilia ada i pirit na geleŋ? 3 A. Ŋun 'dekan lwöggu na ŋo liŋ ti kak (6) 4 B. Ŋun a ŋa? (5) 7 C. Yesu a ŋa? (6) 10 D. Mulökötyo Loke lo kondya nyo? (6) 13 E. Yi bubulö kebbu Yesu ada? (4) 16 F. Tumatyan na Ŋun na a nyo? (3) 18 G. Saresi puök (11) 20 H. Yi bubulö ŋarju kulyaet lo Ŋun lo ada? (5) 25 I. Yi 'du'durjö i yupet ada? (6) 28

Title: Jujumisi ti Bibilia 52 Title in English: 52 Bible studies Written by Rev. Jacob Haasnoot Translated into Bari by Rev. Mikaya Loguli Lubajo

Bari language, South Sudan. Ethnologue language code: bfa.

Publisher: Episcopal Church of South Sudan & Sudan (ECSS&S), Diocese of Kajo-Keji, South Sudan, 2015.

First edition. 1000 copies printed with funding from GZB, The Netherlands. Copyright © 2015 by ECSS&S, Diocese of Kajo-Keji. We encourage you to use and share this material freely – but please don’t sell it for profit, change the words, or remove the copyright information.

3

Ko nyo jujumbu na Bibilia na gwon ko 'bulit? 1. Anyen ŋutu deden kulya jore ti Ŋun (Yuörö 20:1-2). 2. Anyen ŋutu ryeju gwiliŋit na yeŋ nyin (Yoane 17:3). 3. Anyen ŋutu denundya kaŋo 'bura ko petet na Ŋun a nyo kase i gwiliŋesi (Sauma 25:12). 4. Anyen ŋutu kukurun kulya (Sauma 119:99). 5. Anyen ŋutu deden si'da 'bura i pirit na geleŋ ko kulye ŋutu (Matayo 7:12). 6. Anyen ŋutu bubulö gwo'dan go i mumulukesi ti kaŋöönit (Epeso 6:11,17). 7. Anyen ŋutu bubulö 'durjö i yupet (Sauma 19:12). 8. Anyen ŋutu gwon ko yupet nago adi Ŋun nyanyar se (Yoane 3:16). 9. Anyen ŋutu bubulö Ŋoŋaddu 'bura i yupet (1 Timoteo 6:12) 10. Anyen kweja adi Ŋun nyanyar Ŋutu (Yoane 14:23) Ko ŋutu jujumbu Bibilia ada i pirit na geleŋ? 1. Yutu ta ka'dolanit. 2. Kwakwadddi ta. 3. Kendi ta pirit na wulwe i Bibilia i jujumu ko tokoret nanyit. 4. Metara ta pipiyesi kine geleŋ geleŋ. 5. Iti ta bot i pirit na wulwe i Bibilia i jujumu na i ryöju na rukesi. 6. Mete ta adi ŋutu liŋ gwon i tu i pirit na geleŋ. 7. Kwakwaddi ta i 'dutet na jamet. 8. Tine ta ti diŋit na.

4

A. Ŋun 'dekan lwöggu na ŋo liŋ ti kak (6) 1. Ŋun a gweja ŋo liŋ Kendi: Suluet 1:1 - 2:4. Tokoret: Ŋun a gweja kak ko ki ko ŋo liŋ lo gwon kata yu. Ŋun a gwon a kalyöŋi ko kita nanyit. Lepeŋ a gweja ŋutu i gwesin kanyit. Ti yi tine ta ti ŋo liŋ lo gwe Ŋun kulo. I ŋo liŋ nagon yi kokon, yi bubulö twöju kagweyanit likaŋ. Piyesi: 1. Ŋun tokitaju nyo i gweji na na kak (1:3)? 2. Yi meta gwoso Ŋun i lon kiko (1:27)? 3. Yi bubulö tiju ŋo liŋ lo gwe Ŋun kulo ada (1:28)? 4. Lor toburyo a lor yukaet ko kwakwaset. Ko nyo ŋilo lor wulwe a loke (2:3)? 2. Ŋutu a renya kebbu na saresi ti Ŋun Kendi: Suluet 3:1-20. Tokoret: Ŋo liŋ lo gwe Ŋun kulo köju a lo'but. A kirut Adama ko Awa renyani kebbu na saresi ti Ŋun. Piyesi: 1. Munu (Satani) mumulugga Awa ada (kalet 1)? Köti mete 2:16-17. 2. Ruket na toron na Adama ko Awa na a nyo (kalesi 7-13)? 3. Kalet to 15 na a nago i kurwe ama Ŋun a milyeju tindu na gwiliŋit ludukötyo lo molu. Ŋa molu lo böŋöddu kwe lo munu (Satani)? 4. Toron na Adama ko Awa 'bo'yu yi ada? Mete köti 1 Korinto 15:22. 3. Ŋun a wulundyö Yisaraele Kendi: Suluet 12:1-7 ko 18:17-19.

5

Tokoret: Ŋun a tetendya suluet ludukötyo ko Abarayama. Ŋun a milyekin tindu Abarayama ŋwajik jore (ŋutu), melesen (Kanana) a ko toyiŋakin nake (tomoret). Ŋun a wulundyö Abarayama ko kwe na kulya kata. Ti lepeŋat kweki gweyajin liŋ ti jurön adi Ŋun lo Yisaraele a Ŋun geleŋ lo to'diri. Piyesi: 1. Ko nyo Abarayama a yiŋga luŋit na Ŋun (12:1)? 2. Gweyajin liŋ ti jurön 'bo'boria ada ko Abarayama i karin (18:18)? Mete köti Galatia 3:14. 3. Ko nyo Abarayama dipakindya Matat 'yuret na rubaŋgajin na ‘durökindye nye Kanana nu (12:7)? 4. Ko nyo yi a wulwe gwoso Kristianijin? I kondya na nyo? Mete 1 Petero 2:9. 4. Ŋun sunyundyö Ŋuro lonyit Kendi: Luka 2:1-11, 27-32. Tokoret: Yisaraele ako kon kita nase na. Lepeŋat ako gwon a parara i jurön liŋ. Soŋinana a Ŋun sunyundye ŋuro lonyit kayaŋ i jurön. A lepeŋ twane twan kogwon kulya kayaŋ. Lepeŋ a 'dumaddu riŋet nikaŋ na toron na kanyit i mugun. Yesu a parara na na kak. Lepeŋ po i lwöggu na yi. Piyesi: 1. Ko nyo Yesu ako yuŋwe gwoso mor i kadi na tomoran (kalet 7)? 2. Ko nyo Yesu luŋu a Kalwökönit (kalet 11)? 3. Milye lo Ŋun lo a nyo lo jam Simiona lo (kalet 28-29)? Mete köti Suluet 12:3. 4. Yi bubulö ryöju ŋina lwökit ada (kalet 30)? 5. Kanisa na gwon ko kita Kendi: Konesi 1:1-9. Tokoret: Yesu a takindya yi adi Tumatyan na Ŋun na gwe kayaŋ kiden. Ko yi a yubbö Yesu, yi gwe a swöt lo ŋina

6

Tumatyan. Na tiri Yesu köju ko Monye yu na, lepeŋ a takin kajujumuk kanyit i toriaddu na Loŋe Lo'but lo Tumatyan na Ŋun. Yi köti 'de'dekan kondya gwoso na lepeŋat na. Kanisa köti 'de'dekan tu kaŋo i takindya na kulye ŋutu kulya ti Yesu. Piyesi: 1. Yesu a kondya nyo i mukök na ŋien nanyit i twan (kalet 3)? 2. Mulökölyo Loke kokondya nyo i kajujumuk (kalesi 4-5 ko 8)? 3. Yi bubulö gwon a katokorok ti Yesu ada (kalet 8)? 4. Yerusalema a köji nikaŋ na, Yudaya ko Samaria a tur likaŋ lo a 'dutesi ti kak gwe a piritön kunie liŋ ti kak. Yi gwon i 'dur i kunen piritön ko Loŋe Lo'but lo? Yi bubulö yeŋaddu pajo parik ada? 6. Yesu yiyitwe köti Kendi: Kweyatti 21:1-4 ko 22:12-14. Tokoret: Tumatyan na ako nyuŋ po liŋ. Yi si'da i kak na körju. Toron kata, ŋoŋga a ko twan. Yi kwakwaddu adi: Ti Tumatyan inot ti po! Ko Yesu a yitwe, lepeŋ ko tetenakin ŋo liŋ rigwo. A kak na ko gwe a na'but köti. Yi kulo möndu ŋilu lor. Piyesi: 1. Kweyatti 21:3 jambu adi Ŋun molu sisi’da ko ŋutu kiden. Ki ko kak a ŋo geleŋ. A ŋinu molu gwe ada (kalet 4)? 2. Kweyatti 22:12 jambu adi Yesu popo 'de'de. Ama yi aje gwon i mömöndu ko kiŋajin 2,000. Ko nyo jama adi 'de'de? Do gwon ajo ko yitwe nanyit? 3. Ŋa logon bubulö lupö i Tumatyan na Ŋun (22:14)? 4. Kita nikaŋ a nyo tojo ko yitwe na Yesu? Mete köti Matayo 24:42-44.

7

B. Ŋun a ŋa? (5) 1. Lepeŋ a Kagweyanit Kendi: Yisaya 40:18-31. Tokoret: Ŋun likaŋ a gweja ŋo liŋ. Kak na, kijakwa a ko ŋutu. Lepeŋ a Loke. 'Bayin gwoso kulye ŋunyen. Ŋun nyanyar ŋo liŋ lo gwe nye kulo. Yi pupurja ko kwakwaddu Kagweyanit likaŋ. Piyesi: 1. Yi dendya nyo i kulya ti nyömuejin i kalesi 19-20 yu? 2. Ko nyo Ŋun ti bulö tojuwe ko lele ŋuto kode toberon ko nene gwuluet (kalesi 18 ko 25)? 3. Yi dendya nyo i kulya ti Ŋun, Kagweyanit likaŋ, i kalesi 26 ko 28-29? 4. Kulya ti nyo na jama i kalesi 30-31 yu? Kine kulya a 'bo'yu do nanu? 2. Lepeŋ deden yi Kendi: Saumajin 139:1-16. Tokoret: Ŋun a nye lo yeŋ nyin. Lepeŋ deden ŋo liŋ. Lepeŋ deden diŋit na 'beron, na soŋinana ko diŋit na popo. Lepeŋ deden yi ko nyanyar yi. Yi si’da a ti lepeŋ. Piyesi: 1. Ko nyo Ŋun deden kine ŋo liŋ i kulya kayaŋ (kalesi 1-4)? 2. Ko nyo yi ti bulö wökön kaŋo ko Ŋun i komoŋ (kalesi 7-10)? 3. Yi a gweya ka’de a loke ti Ŋun. Lepeŋ a den yi a kokwe nagon yi ako nyuŋ yuŋwe (kalesi 13-14). Ŋina kwekindya do nyo? 4. Perok ti gwiliŋet nikaŋ a wuröki ko Ŋun i buk (kalet 16). Yi bubulö si’da ada a ti bulet lonyit?

8

3. Lepeŋ bubulö kondya ŋo liŋ Kendi: Luka 1:26-38. Tokoret: Yi kitakindya Ŋun Kabulönit lo ŋo liŋ. Yi a ŋutu lomunyak ama lepeŋ a logo. Ŋun bubulö ŋarakindya yi. Ama lepeŋ a tindu yi toliyen i kondya na wulundyö gwoso i ‘dekesi kayaŋ. Piyesi: 1. Ko nyo nagon Maria köju ti bulö moka 'busan (kalet 34)? 2. Maria a katwöyönit na kulyaet lo Ŋun (kalet 38). Ŋun bubulö kita kayaŋ i gwiliŋisi ko yi ti 'dekan yiŋga nye? Ko nyo? 3. Kunie ŋo kata nagon Ŋun ti bulö kondya. Kine ŋo a nyo? Kendi 2 Timoteo 2:13, Tito 1:2 ko Yakobo 1:13. 4. Yi ruggö ada ko Ŋun ti 'bön löpuggö gwiliŋit logon yi gwon kata lo? Mete köti 2 Korinto 12:7-9. 4. Lepeŋ titi yi Kendi: 1 Petero 5:7-11. Tokoret: Ŋun likaŋ ti gwon pajo. Lepeŋ nyanyar yi. Lepeŋ deden yi. Lepeŋ gaga yi. Lepeŋ gwon kata ko yi 'de'dekan nye. Piyesi: 1. Ko nyo yi bubulö tu ko Ŋun yu (kalet 7)? 2. Yi 'de'dekan kondya nyo (kalesi 8-9)? 3. Ŋun titikindya yi nyo (kalet 10)? 4. Yi kwekwekin Ŋun 'dekesi kayaŋ kune koke ada? 5. Ŋun geleŋ a ŋutu musala Kendi: Yoane 14:8-17. Tokoret: Yi yubbö Ŋun geleŋ Monye, Tore ko Mulökötyo Loke. Lepeŋat 'bayin musala, ama geleŋ. Ŋina 'bayin pölilyö i kurwe. Ŋina nyömöddu yi i kwakwaddu. Lepeŋ a duma lwölwöŋ na yeyeji yi na! Ŋun monye lo gweja yi ko lepeŋ köti nyanyar yi.

9

Ŋun Tore lo lwöggu yi a Mulökötyo ŋarakindye yi i gweya gwoso Yesu. Piyesi: 1. Yi bubulö dendya Ŋun Monye ada (kalet 10)? 2. Ŋuro Yesu kita nyo (kalet 13)? 3. Yi bubulö dendya Mulökötyo Loke ada (kalesi 16-17)? 4. Mulökötyo Loke 'bayin a ri'diet kode a riŋit ama a ŋuto. Yi den ada adi Mulökötyo Loke a ŋuto? Mete Roma 8:26. 5. Jambi ta kwaset lo 'busan i pirit na geleŋ (2 Korinto 13:13) ko kwakwaddi ta Ŋun Monye, Tore ko Mulökötyo Loke.

10

C. Yesu a ŋa? (6) 1. Yuŋwe nanyit Kendi: Matayo 1:18-25. Tokoret: Yesu 'bayin gwoso yi. Ŋote nanyit Maria a ŋuro 'diet. Lepeŋ a gwon ko ŋuro lo Mulökötyo. Yesu a ŋuto ko köti a Ŋun. Lepeŋ a Immanuele. Ŋun gwon ko yi. Piyesi: 1. Karin nagon a Yesu kune nyönyökö ada (kalet 21)? 2. Yesu bubulö joundya Ŋun Monye nyona ko yi ada (kalet 23)? 3. Lele lo merenyejin ti Yesu köju a Dawidi (1:1). Ama nene na yakanyejin kanyit köju a Raba. Lepeŋ 'bayin a Yudayakityo ama kokwe a kalupe (Yosua 2:1). Ko nyo Yesu 'ba yuŋwe i mede na rigwo? 4. Ko nyo ŋutu jore 'de'dekan bu'ya lor lo Kristomasi? 2. Kita nanyit Kendi: Marako 1:14-15, 21-28. Tokoret: Yesu takindya yi kulya ti Tumatyan na Ŋun. Lepeŋ totodindyö ko totoke'ya ŋutu. Ŋutu kulye nyanyar kita nanyit. Kulye ti kurun lepeŋ. Kulye ti ka'dolak maman Yesu. Piyesi: 1. Ti yi ködyö wuji Loŋe Lo'but lo ada (kalet 15)? 2. Yekalu a kadi kwakwaset na Yudayaki. Ko nyo ŋutu a sörju ko kulya ti Yesu (kalet 22 ko 27)? 3. Mulökötyo loron lo jambu to'diri i kulya ti Yesu le (kalet 24)? 4. Yi bubulö yiŋga Yesu ada? Yi bubulö ryöju kelan ada? 3. Twan nanyit Kendi: 1 Petero 2:21-25.

11

Tokoret: Twan na Yesu i ködini na görö a jakindya yi ru. Ŋinu bubulö gwon sona ada? Yi a kokwe twatwa kogwon toron nikaŋ. Yesu a 'dumara ŋina riŋet kanyit i mugun. Lepeŋ a twan kayaŋ i pirit. Ko yi a yubbö nye, yi gwon ko gwiliŋit na yeŋ nyin. Piyesi: 1. Ko nyo Yesu 'bakan na toron (kalet 22)? 2. Ko nyo Yesu yiŋa taliŋ na toŋoŋani nye a kokwe na twan nanyit i ködini na görö nu (kalet 23)? 3. Yi ködyö ruggö ada ko twan na Yesu (kalet 24)? 4. Ŋoŋga na Yesu gwon a kweyet kayaŋ ni ada (kalet 21)? 4. Ŋien nanyit i twan: Lepeŋ kata jörun! Kendi: 1 Korinto 15:12-23. Tokoret: Yesu a ŋien i twan. Lepeŋ kata jörun. Ko yi a yubbö Yesu, a yi ryeji gwiliŋit ludukötyo soŋinana ko gwiliŋit na yeŋ nyin i jur lo popo. Ko nyo na todinet gwon ko 'bulit? Piyesi: 1. Ko nyo yupet nikaŋ gwon 'bak 'bulit ko Yesu ködyö ako ŋien i twan (kalesi 17-19)? 2. Kristo gwon a ludwe togeleŋ. Ko yi meddya ludwe togeleŋ lo yoŋwe i ködini lo maŋga, a yi kurundye adi kulye kilo i kipundyö. Ŋinu nyönyöggu adi; yi köti wuwu mugun ludukö (kalesi 20-23). Ko nyo ŋilo a loŋe lo yenet? 3. Kalet 22 nu nyönyöggu nyo? 4. Ko nyo Kristianijin i kunie diŋitan kekendya 1 Korinto 15 i pirit na twan? 5. Yesu lu ya soŋinana? Kendi: Kolosai 3:1-4, 16-17. Tokoret: I mukök nagon Yesu aje tutuŋgö diŋit nanyit i na kak ni nu, lepeŋ a tu ko Monye yu. Yesu lu ki ko Monye i pirit geleŋ. Lepeŋ sasarju Tumatyan nanyit kwakwaddu ko yi köti. Piyesi:

12

1. Ko nyo Kristo lu gwon i könin lutaten lo Monye (kalet 1)? 2. Toliwakindya na denesi kayaŋ i ŋo ti ki gwon a kondya na 'deket na Ŋun (kalet 2). Yi bubulö kondya ŋinu ŋo ada? 3. Yi ködyö kondya nyo anyen twöju mor likaŋ Yesu (kalesi 16-17)? 4. Gwon a ŋo duma adi Yesu lu kwakwaddu ko yi. Mete Roma 8:34. Yi 'de'deggi ŋina parik nanu? 6. Yesu molu popo köti Kendi: Matayo 24:42-44. Tokoret: Yi kulo möndu Yesu i yitwe i na kak. Lepeŋ popo i 'duŋgö na kulya ti ŋutu a kirut tetendi ŋo liŋ a ludukö. A yi si'dani kanyit i Tumatyan. Yi ti den ko Yesu popo bot nanu? Piyesi: 1. Yesu yiyitwe nanu (kalet 42)? 2. Yi ködyö 'dekan kondya nyo (kalesi 43-44)? 3. Yi teten 'börik ada ko yitwe na Yesu? 4. Do memeddya ŋerot i lu lor? Ko nyo kode 'bayin sona ko nyo?

13

D. Mulökötyo Loke lo kondya nyo? (6) 1. Mulökötyo i Tomoret na 'Beron Kendi: Kenet 11:16-17, 24-30. Tokoret: I Tomoret na 'Beron Mulökötyo Loke tindu ŋutu riŋit na nene gweyari lo kita. Lepeŋ a tiki tuŋ i kulye ŋutu ko i nene diŋit. Nebi Yoele kulya adi i perok ti 'dutet Ŋun molu tindu Mulökötyo lonyit i ŋutu liŋ. Ŋina a kona i lor lo Pentekosta. Piyesi: 1. Ko nyo Ŋun tindu Mulökötyo lonyit i temejik merya buryo kulu (kalet 17)? 2. Kweyet a nyo na tuggö adi Mulökötyo gwon ko lepeŋat loki (kalesi 25-26)? 3. Kalet 29 aje kona nanu? 4. Tuka'de a nyo na kita na Mulökötyo Loke i Tomoret na 'Beron ko i Tomoret Ludukötyo? 2. Pentekosta: Mulökötyo a po kak ni Kendi: Konesi 2:1-12. Tokoret: I mukök nagon Yesu aje tu ki nu, a kajujumuk kulo möndi riŋit na Mulökötyo Loke. Lepeŋ a po i lor lo Pentekosta, lo rorwe lo 'butun. A kajujumuk kulo luŋuni a luyökie. Lepeŋat iti tu kaŋo i ŋarju na Loŋe Lo'but lo Yesu. Piyesi: 1. Ko nyo lepeŋat ryei a momorja i pirit na geleŋ (kalet 1)? Mete köti Konesi 1:14 2. Kunen kweyesi na tuggö po na Mulökötyo Loke (kalesi 2-4)? 3. Ko nyo kulu ŋutu yiyiŋ kulyaet lo Mulökötyo i kutusen nagon se a yuŋwe i kata kunu (kalesi 7-8)?

14

4. Ruket na po na Mulökötyo Loke a kweja adi, ŋutu jore a 'yalaki i teŋ na kayupök ti Kristo i ŋilu lor (2:41). Mulökötyo Loke soŋinana bubulö ŋarakindya yi ada kayaŋ i kita ni? 3. Mulökötyo Loke kwekindya yi to'diri Kendi: Yoane 16:12-15. Tokoret: Mulökötyo Loke tokurukindyö ŋutu ti na kak adi se a lyaŋan i kulya ti toron. Lepeŋ gayaddu kayupök i kulya ti to'diri. Mulökötyo yuddya ko Yesu yu. A Yesu takindye yi ko Monye a ŋa. Piyesi: 1. Ko nyo yi yöŋö Mulökötyo lo to'diri (kalet 12)? 2. Ko nyo Mulökötyo yuddya ko Yesu yu ka'de (kalet 14)? 3. Mulökötyo tindu to'diri i dena ko yi ada (kalet 14)? 4. Yi bubulö dendya Mulökötyo lo to'diri ada? Mete Yoane 14:16-17. 4. Mulökötyo Loke lölöpuggö gwiliŋisi kayaŋ Kendi: 2 Korinto 5:1-5. Tokoret: Mulökötyo Loke bubulö löpuggö yi. Lepeŋ totoluduk gwiliŋisi kayaŋ. I na kak ŋo liŋ ako nyuŋ gwon a na'but. Ama ko Yesu a yitwe, a ŋo liŋ poni po 'bura köti. Gwoso na gwondi i suluki na kak nu. Mulökötyo Loke ŋarakindya yi i tetendya na 'börik i diŋit na popo nu. Piyesi: 1. Paulo kulya adi yi kulo si'da i kadi nagon a gober soŋinana. I diŋit na popo a yi gwe ko kadi na yeyeŋon ki yu. Lepeŋ nyönyöggu nyo (kalet 1)? 2. Ko nyo gwiliŋit likaŋ lo soŋinana i diŋitan liŋ 'bayin pölilyö (kalet 4)? 3. Paulo kulya adi, Mulökötyo Loke a waŋet likaŋ, i kwekindya adi Ŋun bubulö yupö. Yi molu wuwu mugun ludukötyo gwoso

15

na kondi Yesu nu. Yi den ada adi milyejin ti Ŋun kulo a gwak (kalet 5)? 4. Mulökötyo Loke lo ŋilo gwon i löpuggö na do ada? 5. Mulökötyo tindu yi i gwon geleŋ Kendi: Epeso 4:1-6. Tokoret: Mulökötyo Loke tomorja yi gwoso teŋ na kayupök ti Kristo. Ti Kanisa na gwe geleŋ. Yi ti bulö ruggö kokoresi i Kanisa kata. Yi 'dek gwon a lokoyokak ko toilyet lo lilik ko ‘börik. Piyesi: 1. Yi bubulö tiju tomoret kayaŋ kiden ada (kalesi 2-3)? 2. Ko nyo yi ködyö gwon a tomora a ŋo geleŋ (kalesi 4-5)? 3. Ko nyo i kunie diŋitan tomoret 'bayin i Kanisa kata? 4. Mulökötyo ŋarakindya yi ada i gwon geleŋ? 6. Mulökötyo tindu 'dokesi ti Mulökötyo Kendi: 1 Korinto 12:4-12. Tokoret: Mulökötyo Loke tindu 'dokesi ti Mulökötyo. Lepeŋ 'bayin tindu ŋutu liŋ 'dokesi na geleŋ kune. Yi ko tuka'de köti yi gwon ko 'dokesi ka'de ka'de. Yi liŋ i pirit na geleŋ a mugun geleŋ nagon a Kanisa. Kine 'dokesi ŋarakindya yi i gwon a ŋo geleŋ ko i pupurja na Ŋun gwoso mugun geleŋ. Piyesi: 1. Kwe na kulya a nyo na tikini ‘dokesi ti Mulökötyo Loke (kalet 7)? 2. Kunen gweyarijin ti 'dokesi nagon kata (kalesi 8-10)? 3. Ko nyo yi ti bulö gwon ko ŋisa ko 'doket na lele kode na nene ŋuto (kalet 11)? 4. Ko nyo a na'but adi yi liŋ gwon ko 'dokesi ka'de ka'de (kalesi 4-6, 12)?

16

E. Yi bubulö kebbu Yesu ada? (4) 1. Yi yiyiŋ lepeŋ Kendi: Marako 4:9-12. Tokoret: Kayupönit lo Kristo yiyiŋ Yesu. Yi keken kulyaet lo Ŋun. Kulyaesi ti Yesu gaju yi ko togo'yu yi i kunie diŋitan narok. Yesu köti sasar yi. Ti yi yiŋe ta yiŋ lepeŋ i jambu ko yi. Piyesi: 1. Ŋutu liŋ geleŋ geleŋ gwon ko swö (kalet 9) nu nyönyöggu nyo? 2. Ko nyo Yesu ŋarju lwönö ti Tumatyan na Ŋun gelere ko kajujumuk kanyit kulu (kalet 11)? 3. Anyen do kukurun lilim ti do yiŋge yiŋga 'bura ko tindu na riŋit. Ko nyo gwon sona (kalesi 11-12)? 4. Yi bubulö yiŋga Yesy ada kayaŋ i diŋit ni? 2. Yi kugga kulyaet lo lepeŋ Kendi: Yoane 14:21-24. Tokoret: 'Bayin a jukin i yiŋga ka'de na Yesu. Ti yi köti kone kon ŋo na jam lepeŋ kune. Kristianityo lo kwakwaddu, kekendya Bibilia ko köti kikitakin se logon yöŋö ŋo kilo. Kine ŋo liŋ gwon i pirit geleŋ. Piyesi: 1. Ko yi nyanyar Yesu, ŋina kweya i ŋo murek. Kine ŋo murek kine a nyo (kalet 21)? 2. Ko nyo ŋutu ti kak ti 'bön kurundyö 'bura ko Yesu a ŋa (kalesi 22 ko 24)? 3. Kulon saresi logon Yesu jambu se (mete köti Yoane 13:34-35)? 4. Ko nyo i kunie diŋitan gwon a nago i kugga na kulyaet lo Ŋun lo?

17

3. Yi kondya gwoso na kondi Yesu na Kendi: Yoane 13:1-17. Tokoret: Yesu a po i na kak gwoso ŋuto lo kikitakindya. Ti yi köti gwoso kakepok kanyit gwe a ŋutu lo kikitakindya. Yi i diŋitan liŋ nyarju gwon a ŋutu lo kukuka. Ama Yesu tikindya yi miret. Ti yi kondi gwoso na kondi lepeŋ na. Piyesi: 1. Ko nyo Petero a sörju i diŋit nagon Yesu 'deke lalaju na mokosi kanyit nu (kalet 6)? 2. Ŋina ŋo nyönyöggu nyo tulala na mokosi kase geleŋ geleŋ (kalet 14)? 3. Ko nyo ti yi ködyö kepe kep kweyet na Yesu nu (kalesi 16-17)? 4. Yi bubulö kondya ada gwoso na kondi Yesu nu? Tiki kweyesi. 4. Yi 'dumundya ködini na görö nikaŋ na ki Kendi: Luka 9:22-25. Tokoret: Yesu a twan kogwon kulya kayaŋ i ködini na görö. Lepeŋ a tikin yi gwiliŋit na yeŋ nyin. Kepo na Yesu na 'bayin pölilyö. I kunie diŋitan ŋutu maman do. I kunie diŋitan ŋutu konakin do a naron. I kunie diŋitan ti kakeponit lo Yesu lo ŋoŋgi ŋoŋga gwoso na Matat lonyit na. Piyesi: 1. Ko nyo Yesu twa ko twayet logon a loron parik (kalet 22)? 2. Paju na mugun na nyönyöggu nyo (kalet 23)? 3. Ködini na görö nikaŋ na gwon ko tuka'de ada ko ködini na görö nagon Yesu a 'dok na (kalet 23)? 4. Yi bubulö tolikindyö gwiliŋit likaŋ ada ko kulya ti Yesu (kalet 24)?

18

F. Tumatyan na Ŋun na a nyo? (3) 1. Tumatyan ti po liŋ i daŋ geleŋ Kendi: Matayo 13:24-30, 36-43. Tokoret: Yesu a tukökindyö ŋutu kulya ti Tumatyan na Ŋun. Kanyit i mugun Tumatyan na a po nyona. Ama yi nyuŋ meddya toron ko twan kayaŋ i kak ni. Yi kulo möndu Tumatyan na Ŋun i po 'bukuluŋ. Yesu i diŋitan liŋ jambu kulya ti Tumatyan i lilimön. Piyesi: 1. Tokore ŋilo lilim i kulyaesi logon a kulök. 2. Miriku lo a nyo, kaŋöönit lo kondya kököröju na Tumatyan na Ŋun kayaŋ i diŋit ni lo? 3. Ko nyo yi ako sörju adi Kanisa na 'bayin a nago (kalet 30)? 4. Kita nikaŋ a nyo gwoso Kanisa a kokwe nagon 'dutet na na Toberon popondi? Kendi köti 2 Petero 3:17-18. 2. Do bubulö teŋgu mugun i gwon a swöt lo ŋina Tumatyan Kendi: Matayo 13:3-9, 18-23. Tokoret: Yi ako ri'diki i gwon a swöt lo Tumatyan na Ŋun. Kamörök 'bayin lo jojoŋga do. Yi gwon kata ko wulundyö. Yesu ako kita ko riŋit ama tuŋ totodindyö i tikindya na ŋutu i lupö i Tumatyan. Piyesi: 1. Ko nyo nagon nyomot kulo liŋ ti pun a kaden (kalesi 4-7)? 2. Ŋutu kata logon ti ruk Loŋe Lo'but lo Ŋun. Ko nyo gwon sona (kalesi 19-22)? 3. I lon gweyari lo diŋitan logon yi gwon i ŋarju na Loŋe Lo'but? 4. Ko nyo yi ti ri'diyun ŋutu kulo i ruggö na yupet na tokristianan na?

19

3. Ŋun 'de'dekan lwöggu na ŋutu jore Kendi: Luka 14:15-24. Tokoret: Ko nyo yitwe na Yesu na joŋga diŋit a najo? Ko nyo Ŋun ti tutuŋörö kita nanyit na? Kogwon Ŋun 'dekan ŋutu jore i gwon a swöt lo Tumatyan. Piyesi: 1. Do yeyeju ada i 'buresi lo jam kömu logon a luŋwe kulu (kalesi 18-20)? 2. Ko nyo monye 'baŋ woworan (kalet 21)? 3. Ko nyo monye 'baŋ luŋgu lomerika se ko lo babatattu (kalet 23)? 4. Yi bubulö luŋgu ŋutu ada i gwon a swöt lo Tumatyan na Ŋun?

20

G. Saresi puök (11) 1. Do a luitöt! Kendi: Yuörö 20:1-2. Tokoret: Ŋun 'dek yi gwon a lui. Lepeŋ a jondya ŋutu kanyit Yisaraele kaŋo i jur lo Ejipeto. Lepeŋ a lakundya yi kaŋo i toron ko Yesu i mugun. Tuŋ ko yi gwon ko lokokoritan, yi bubulö gwon a lui gwak ti to'diri. Saresi puök kulo lo tindu yi kilo lokokoritan. Yi kepoddu kilo saresi gwoso swöt likaŋ logon yi kwakwaddi Ŋun. Piyesi: 1. Ko nyo Ŋun tindu lo saret i ŋutu kanyit Yisaraele? Mete köti Yuörö 19:5-6. 2. Ko nyo do 'de'dekan kebbu na Saresi puök kulo? 3. Kristianjin ködyö ti kebbu saresi ti Mose kulo liŋ. Ko nyo se ködyö ti kebbu? Yesu aje tutuluŋun saresi kulo ada (Matayo 22:35-39)? 4. Yi bubulö tiju na saresi ti Ŋun ada kayaŋ i gwiliŋisi? 2. Kulye ŋunyen 'bayin Kendi: Yuörö 20:3. Tokoret: Ŋun kata geleŋ tuŋ lo to'diri ko logon gwogwoloŋ. Merenyejin kayaŋ a den Ŋun ama lepeŋ a kwekin mugun koke parik ko ŋuro lonyit i mugun, Yesu Kristo. Ti yi kwakwaddi ŋilo Ŋun ko a lepeŋ ka'de. Piyesi: 1. Ŋun aje kwekin mugun kayaŋ ni ada? Mete köti Ebere 1:1-2. 2. Ŋun a kagweyanit lo kak 'bukuluŋ ama köti nyona ko yi. Ŋun bubulö gwon sona ada? 3. Ko nyo ŋutu wöwöki i mukök na kulye ŋunyön? 4. Ŋa logon a Ŋun kunök ni?

21

3. Kulye nyömuejin 'bayin Kendi: Yuörö 20:4-6. Tokoret: Ŋutu ti Yisaraele a ryö a nago i yubbö na Ŋun logon se ti bulö meddya. Lepeŋat nyanyar ŋunyen ti Kanana parik lwölwöŋgu. Yi 'dek ti se kondi gwoso na nyarji yi na. Kayaŋ i diŋit ni gurut, riŋit kode tulalyan ko tuwatyan bubulö gwon a nyömuejin kayaŋ i gwiliŋisi. Piyesi: 1. Ŋun jambu kulya ti nyömuejin ada i Yisaya 44:14-18 yu? 2. Nyömue lo a ŋa logon kode nagon yi tikin i ŋerot na Ŋun kayaŋ i gwiliŋisi? Nyömuejin kulo a nyo kayaŋ i diŋit ni? 3. Yuörö 20:5 jambu adi Ŋun a kayinönit ko nene ŋo nagon joŋga pirit nanyit. Ko nyo ŋina gwon sona? 4. Ko nyo ŋwajik ŋoŋoŋga ko kayuŋök a wökön i mukök na nyömuejin (Yuörö 20:5)? Yi 'bo'boria ada ko yi a twöju saresi ti Ŋun (Yuörö 20:6)? 5. Yi bubulö tiju 'börik ada i nyömuejin (1 Yoane 5:21)? 4. Karin ti Ŋun Kendi: Yuörö 20:7. Tokoret: Ŋun a Kwagweyanit likaŋ ko a Matat likaŋ. Yi 'dekan kugga na lepeŋ ko karin kanyit. Ti yi gwe ti milyeju. Ti yi gwe ti morju kode laundya karin kanyit. Piyesi: 1. Karin i kutuk na Ebere nagon adi Yekowa (Matat) kune nyönyöggu ada gwoso i Yuörö 3:14-15? 2. Yi laundya karin ti Ŋun kune ada? Mete köti Tito 1:16. 3. Karin ti Matat kune gwon pömöni parik ada (Konesi 2:21)? 4. Yi bubulö kugga karin ti Ŋun likaŋ kune ada? 5. Lor lo Sabata

22

Kendi: Yuörö 20:8-11. Tokoret: Lo logon a saret lojo parik. Ŋun ko mugun nanyit a yukan i mukök na perok buker ti kita. Yi köti 'de'dekan gwon ko lor geleŋ logon a yukaet. Piyesi: 1. Ko nyo ŋutu 'de'dekan kita i lor lo Sabata? 2. Lor lo Sabata lo Yudayaki lo a lor tobuker. Ko nyo Kristianijin kulo 'debba lor toburyo? Mete Matayo 28:1 a ko Konesi 20:7. 3. Yi 'debba lor lo sabata a lor Loke lo Matat ada? 4. Yi 'bo'boria ada ko yi a kebbu lo saret? 6. Bule bu ko munyi kase ŋuti Kendi: Yuörö 20:12. Tokoret: Mede na a yeyeet na Ŋun. Lepeŋ 'de'dekan ti yi gwe a swöt lo mede. Ti ko monye ko ŋote (kayuŋök) nyare nyar ko ti tine ti ŋwajik kase. Ti ŋwajik köti twöni twö kayuŋök kase. Piyesi: 1. Ŋun a milyekin tindu yi nyo ko yi a 'buya kayuŋök kayaŋ (Yuörö 20:12)? 2. Ŋo naron na a nyo ko Yakobo mede yu i Suluet 37:2-4 yu? 3. I Epeso 5 ko 6 luyökie Paulo tikindya kukuet i midijik. Ŋo na pömöni na a nyo gwoso i Epeso 5:18 ko 5:21 yu? 4. Yi meddya midijik jore na 'be'beleŋo kayaŋ i nyona. Ŋwajik logon 'bakan na kayuŋök kase ko wate nagon 'bakan na lyan. Kanisa bubulö gwon a mede ada i se logon 'bakan na mede na'but? 7. An do ko tatuja Kendi: Yuörö 20:13. Tokoret: Ru na a 'doket na Ŋun. Lepeŋ a kagweyanit likaŋ. Lepeŋ lo tindu ru a lepeŋ lo joŋgi nye kaŋo. Yi a gweya i gwesin ti Ŋun. Ŋuto ako ruköki i tatuja na lele ŋuto.

23

Piyesi: 1. Ko nyo ŋutu kulo totoleleŋ? 2. Ko nyo Ŋun ako rukökin ŋutu i tatuja? Mete Suluet 9:6. 3. Ko nyo Yesu tomorja tatuja ko woran i Matayo 5:21-22 yu? 4. Ŋutu jore meddya kulya ti ropundya. Luyökie Paulo takindya yi i kondya na nyo ko woran nikaŋ i Roma 12:19-21 yu? 8. Lubbö 'ban Kendi: Yuörö 20:14. Tokoret: Yemet na a petet na Ŋun. Ti ŋuto lalet ko ŋuto narakwan si'dani gelere ti nyare nyar 'börik ko ti gwe geleŋ. Ti na tomoret i kiden na ŋuto lalet ko nakwan na gwe ti 'beleŋo. Piyesi: 1. Ko nyo ŋutu kulo totolup? 2. Suluet 2:24 nu takindya yi nyo i kulya ti yemet? 3. Yi bubulö gwon ko yemet nago ada gwoso Kristianijin? 4. Tetene ta teŋon 2 geleŋ na a na wate ka'de a nene geleŋ na gwe a na lyan ka'de. Teŋ geleŋ nyönyöggu ŋina piyet geleŋ. Yi bubulö teŋgu towutön ko tolup ada? 9. An do ko koko'ya Kendi:Yuörö 20:15. Tokoret: Ŋutu jore 'de'dekan tukwörien. Bibilia na todindyö adi ŋo liŋ logon yi gwon ko se, pondya ko Ŋun. Kilo 'bayin a kayaŋ. Piyesi: 1. Ko nyo ŋutu koko'ya? 2. Ko Ŋun logon a monye lo ŋo liŋ logon yi gwon ko se kulo (1 Dekat 29:10-13), ŋina nyönyöggu ada kayaŋ i tito? 3. Do yeyeju ada i kine kulya. Ko yi a koko'ya, yi ti yup Ŋun i tikindya na yi? 4. Ryaggu na a koko'ya le? Yi bubulö tolikindyö ryaggu na ada i kiden na ŋutu kayaŋ?

24

5. Tolupesi 30:8-9 nu takindya yi nyo? 10. An do ko liŋikindyö Kendi: Yuörö 20:16. Tokoret: Yi ködyö jambu to'diri. 'Burönö körju tumaratean na ŋutu. Ŋun a to'diri ko nye 'dek ŋwajik kanyit i gwon ko torigwo. Piyesi: 1. Ko nyo ŋutu buburöt? Mete kweyet na i Suluet 12:10-20 yu. 2. 'Buröt to geleŋ na a nyo i Bibilia kata ni (Suluet 3)? Ruket na ŋina 'buröt na köju a nyo? 3. Burönö kune peŋga kulye ŋutu ada? 4. Yi bubulö po a ŋutu ti to'diri ada (Pilipoi 4:8-9)? 11. An do ko gwon ko 'deket naron (be'ya) Kendi: Yuörö 20:17. Tokoret: Ŋutu jore a kaŋisak. Lepeŋat yöŋö ŋo logon kulye ŋutu gwon ko se. Bibilia na todindyö adi a na'but i tikindya lwölwöŋ wuju. Piyesi: 1. Ko nyo ŋutu 'de'dekan gwon ko ŋo logon kulye ŋuto gwon ko se? 2. 'Dekesi na'but kune a nyo? 3. Yi jujumbu nyo i Tolupesi 15:16 i kulya ti tukwörien? 4. Ko nyo goma na a naron parik gwoso na jambi Yesu na (Luka 12:15)?

25

H. Yi bubulö ŋarju kulyaet lo Ŋun lo ada? (5) 1. Ti do gwe ko 'deket Kendi: Matayo 9:35-38. Tokoret: Ko gwe a diŋit na ŋerja. Yi 'dekuri ŋutu jore i 'deja na kuluk kulo. Ko yi ako ryöju ŋariet, a kuluk kulo körji körju. Ŋerja na kinyo ti Ŋun kulo gwe ajo ama ŋa lo 'de'dekan ŋarakindya? Piyesi: 1. Ko nyo Yesu a tu i köjinö kata yu ko i gwokiot i todindyö ko i toke'ya (kalet 35)? 2. Do ŋupi totoyiŋga delya ko ŋutu logon ti den kulyaet lo Ŋun le (kalet 36)? 3. Yi bubulö po ko 'deket na ŋarju na kulyaet lo Ŋun lo ada (kalet 37)? 4. Yi bubulö kondya nyo anyen yi ryöju kakitak jore ti kulyaet lo Ŋun lo (kalet 38)? 2. Ta de ryöryöju riŋit Kendi: Luka 24:36-49. Tokoret: Yi 'de'dekan riŋit i kondi na kita na Ŋun na. Yi ti bulö kondya ko 'börik kayaŋ ka'de. Mulökötyo Loke lo tikindya yi ŋina riŋit. Piyesi: 1. Ko nyo köju kajujumuk kulu gwon ko kujönö na meddi se Kristo logon aje ŋien i twan lu (kalet 36-37)? 2. Ko nyo yi 'de'dekan ŋariet na Ŋun i kurundi na Bibilia na (kalet 45)? 3. Yi ako met Yesu i diŋit nagon lepeŋ gwon kak ni na. Yi bubulö gwon a katokorok ti kine kulya ada (kalet 48)? 4. Ko do a ŋarju kulyaet lo Ŋun ko kulye ŋutu, do a kurun riŋit na po ko Mulökötyo na konut ki ni le (kalet 49)? Do den ada?

26

3. Ti do iti tu Kendi: Yoane 20:19-23. Tokoret: Kipikipik lo ti kutörö kwöŋ tojo ko do a sulu riŋit na lepeŋ nu. Mulökötyo Loke lo ŋarakindya yi i tu kaŋo ko i jambu ko ŋutu kulo i ŋarju na kulyaet lo Ŋun lo. Piyesi: 1. Ko nyo köju kajujumuk ti Yesu kulu gwon gelere i pirit na geleŋ (kalet 19)? 2. Kulon milyejin ko lolon saret logon Yesu a ti'kin kajujumuk kanyit kulo (kalesi 21-22)? 3. Ko nyo yi i kunie diŋitan kukujönö i tu kaŋo ko kulyaet lo Ŋun lo? 4. Nanan kita duma nagon Yesu a tikin yi gwoso Kristianijin ko gwoso Kanisa (kalet 23)? 4. Tokune kulyaet lo Ŋun lo Kendi: 2 Timoteo 4:1-2. Tokoret: Ŋutu jore ryö yupet na Tokristianan na ka'de. Kode lepeŋat ti kurun nye. Ti yi tukuruki ta lepeŋat Loŋe Lo'but lo. Piyesi: 1. Ko nyo Timoteo 'de'dekan tokujö na kulyaet lo Ŋun lo (kalet 1)? 2. Kwe na kulya na tokujö na a nyo gwoso i jamet lo Paulo i kalet 2 nu? Tiki tokoresi 3. 3. Paulo a jambu kulya ti 'demaju a ko kulya ti tokoyok i ŋarju na kulyaet lo Ŋun lo (kalet 2). Ko nyo lepeŋ jambu sona? 4. Do de bubulö tokurukindyö kulyaet lo Ŋun lo ada i lele ŋuto logon ti den? Jujume ko ŋuto logon si'da nyona ko do lo. 5. Si'dani ko kulyaet lo Ŋun Kendi: Yakobo 2:14-17.

27

Tokoret: Konesi kayaŋ kune jajambu parik lwölwöŋ jamesi kayaŋ kulo. Ŋutu kulo deden ko yi ako kon ŋo na jam yi kune. Yi 'de'dekan kondya gwoso na kondi Yesu na. Piyesi: 1. Ŋutu ti koke kulo jambu ada konut i gwoke yu i kulya ti Kanisa ko i kulya ti Krisianijin? 2. Ko nyo ti yi tiki tikin yupet nikaŋ na i konesi (kalesi 15-16)? 3. Yakobo jambu kulya ti yupet nagon a twan (kalet 17). Yi bubulö gwon ko yupet nagon jörun ada? 4. Do bubulö kweja nyaret na Kristo na ada konut i ŋutu kata yu?

28

I. Yi 'du'durjö i yupet ada? (6) 1. Gwe do a kajujumunit Kendi: Marako 1:16-20. Tokoret: Kristianityo lo gwon gwoso ŋuro lo totodinö i sukulu. Matat Yesu a katodinönit likaŋ. Yi jujumbu ko lepeŋ ni. Lepeŋ todindyö ko yi si'da ada. Piyesi: 1. Ko nyo Simona ko Andarea a kebbu Yesu (kalesi 16-18)? 2. Yi bubulö kebbu Yesu ada kayaŋ i diŋit ni? 3. Yesu todinikindyö yi nyo (kalet 17)? 4. Ko nyo 'bayin polilyö i gwon a kajujumunit lo Yesu (mete köti Marako 8:34-35)? 2. Kendi Bibilia inot Kendi: 2 Timoteo 3:14-17. Tokoret: Lupudi 'de'dekan kinyo anyen 'du'durjö. Krisianityo lo 'de'dekan kinyo lo Mulökötyo. Bibilia na a kinyo likaŋ lo Mulökötyo. Yi 'de'dekan kendya ko jujumbu na lepeŋ. I perok liŋ. Piyesi: 1. Ko nyo gwon a 'bulit i kendya na Bibilia na (kalesi 15-17)? 2. Timoteo aje jujum Bibilia na i diŋit nagon lepeŋ nyuŋ gwon a lupudi nu. Yi bubulö ŋarakindya ŋwajik kayaŋ kulo ada i jujumbu na Bibilia na? 3. Ko nyo gwon a nago i kunie diŋitan i jujumbu na Bibilia na? 4. Taki ŋuto lo gwon nyona ko do lo ko Bibilia na a tindu do pusök ada i kulie gwiliŋesi? 3. Kwakwaddi: Jambi ko Ŋun Kendi: Matayo 7:7-11.

29

Tokoret: Ko ŋuro ti jambu ko monye lonyit ŋo kata nagon a naron. Yi 'de'dekan jambu ko Monye likaŋ lo gwon ki lu. Lepeŋ köti kukulya ko yi. I ŋilo kiko a yi yupe yup Ŋun parik. Piyesi: 1. Do ryö kwakwaddu a ŋo na polilyö kode a nago? Ko nyo? 2. Monye likaŋ lo gwon ki lu titikindya yi ŋo na'but (kalet 11). Ko nyo yi ti ryö ŋo liŋ nagon yi 'de'deggi kune? 3. Na kenet jambu kulya ti monye a ko ŋuro. Kwakwaddu na a kulya ti tumaratean. Ko nyo gwon sona? 4. Taki ŋuto lo si'da nyona ko do lo ko do kwakwaddu ada kode nanu? 4. Kondi 'deket na Ŋun Kendi: Yakobo 1:22-25. Tokoret: Yi 'dekuri kondya ŋo nagon Ŋun nyanyar na. Yi ti bulö gwon a Kristianijin a kondi ŋo nagon yi lo nyarju na. Ti yi nyare ta nyar Ŋun köti a ko ŋutu lo gwon kayaŋ nyona kulo (kode maratejin). A yi kirut kondi 'deket na Ŋun. Piyesi: 1. Yi bubulö tindu yupet nikaŋ na i konesi ada (kalet 22)? 2. Saret lo to'diri lo a lolon logon Yakobo jambu kulya kanyit lo? Mete köti Matayo 22:37-40. 3. Ko nyo Ŋun 'bo'boro yi ko yi a kondya 'deket nanyit (kalet 25)? 4. Yi bubulö ŋarakindya ŋutu geleŋ geleŋ ada i kondya na 'deket na Ŋun? 5. Mulötökyo Loke lo ŋaŋarakin yi Kendi: Galatia 5:16-26. Tokoret: Ködini lo manga loke lo raradan ludweki. Kristianityo loke lo kwekweja ludweki ti Mulökötyo. Ko yi si'da nyona ko Ŋun, a kilo ludweki 'durji 'durjö. Piyesi:

30

1. Ko Mulötökyo lo ti yutara gwiliŋesi kayaŋ kulo a gwe ada (kalet 16)? 2. Ludweki ti Mulökötyo kulo a nyo (kalesi 22-23)? 3. Yi ryöryö kulu ludweki ada kayaŋ i gwiliŋesi (kalesi 24-25)? 4. Yi bubulö ŋarakindya ŋuto geleŋ geleŋ ada i gwon ko ludweki? 6. Yi kondya ŋo i pirit na geleŋ Kendi: 1 Petero 2:4-5. Tokoret: Do ti bulö yubbö ko mugun inot. Yi 'de'dekan ŋutu geleŋ geleŋ. Yi jujumbu i pirit na geleŋ. I ŋilo kiko a yi bu'yi Ŋun likaŋ lo. Piyesi: 1. Ko nyo yi liŋ a 'dekarikin i 'duggö na Kanisa na (kalet 5)? 2. Tuka'de na ŋurupit lo twan ko ŋurupit lo gwon jorun lo a nyo (kalesi 4-5)? 3. Nanan 'doket kode tomiri'dian nagon do bubulö gwelakindya konut i Parish yu? 4. Ko nyo yi 'de'dekan ŋutu geleŋ geleŋ anyen yi 'du'durjö i yupet?