� أ وطـ الم� Al Muwatta’

Inisorat o Al Imām Mālik Bin Anas

Pindiyorobasaan i,Alim, Hassanor M. Alapa

الرحيم الرحمن الله بسم

التحقيق مقدمةPitowa o Tomiyanto

على والسالم , والصالة العالمين رب لله الحمد الطاهرين الطيبين وصحبه , وأله األمين النبي ,

, وبعد الدين يوم إلى بإحسان تبعهم ومن :So Samporna a bantog na rek o Allah a kadnan o manga kaaden, so kalilintad ago so kapipiya ginawa na sii ko Nabi a kasasarigan, ago sii ko manga pamiliya niyan ago so manga sahabah niyan a manga soti, a go sii ko tao a inonotan iyan siranm s ataman ko alongan a kaphamalas.

Aya oriyan iyan na:

Giyai so kitab a Al Muwatta’ a rek o Imam Malik Bin Anas Bin Abi Amir Al Asbahi, a imam ko inged a tiyogalinan (darul hijrah) a pangeninta a ikalimo sekaniyan o Allah.

Sekaniyan so kitab a iniropa o Al Imam As Shafii, a sekaniyan so lebi a benar a kitab a matatago ko atag o langit. Ago so betad na datar den o kiyatharoa on o Ash Shafii, sa miyaaden oto ko onaan pen o da kisoraten o Bukhari ago so Muslim ko kitab iran a Sahih, a siran I khatawag a kitab a sahih ko oriyan o Qur’an.

Miyakalawan so Al Muwatta’ ko manga ped a kitab a Sunnah, sabap ko kiyapakambowata niyan ko kadakelan ko manga katharoo manga sahabah ago so manga tabiin a pephayag ko mapipikir ko manga Hadith a ibabangensa ko Rasulullah, odi na so piyakambowat a sabot ko kitab o Allah a Maporo ago Mala, ago so Sunnah o Rasulullah, a sabot o miyaonaan tano a manga pipiya a siran I pezayanan tano ko oriyan o Rasulullah.

So galebek ami sangkai a Kitab.

1. So kibangensaan ko Hadith a so piyakambowat o Bukhari ago so Muslim odi na so isa kiran sii ko Sahih iran, sii ko manga darepa a piyakambowatan iran on ko kitab iran, sa phagalowin ami sa giiami tharoon a so hadith na Sahih, sa pethagoon am iron so manga bilangan o Hdith ko kitab iran.

2. So kibangensaan ko Hadith a piyakambowat o manga ulama ko Hadith a pat ago so salakao kiran ko manga darepa iyan ko manga kitab iran ago pephayagen ami so inikokom on o mala a Ulama a so Al Albani, makapantag sangkoto a Hadith.

3. So kapayaga ko manga Hadith a aya bo a miyakambowat on na so Imam Malik, a ped ko manga katharoo o Sahabah ago so manga galebek iran, sa pembethowan ami sa so Hadith na mawquf.

4. So kapaayaga ko miyakambowat o Imam Malik sa sekaniyan bo a ped ko manga katharoo manga tabiin ago so miyamangonot kiran, sa tharoon ami so Hadith na Maqtu’. Sa ibagak ami so kakokma on sii sangkanan a soson ko kababaloy niyan a sahih ago so kalemek iyan, sabapa sa aden a manga hadith sangkanan a

bandingan a giimbaloy a sahih sabap ko kiyabagera on o salakao ron ago aden a miyakazakesi on a salakao a hadith, apiya pen a den a minitemo ron a kalobay ko sabaad a kiyasanday niyan.

5. So kapayaga ko da makazosopona so kiyasanday niyan a ped ko manga hadith, sa oman isoson iyan na pethendoon ami sa aden oto a tharoon ami a so hadith na Mursal, sabap ko kinibangensaan on o kena a sahabah ko Rasulullah, ago tharoon ami a so hadith na Munqati’ igira kiyagalatan so kiyasanday niyan sa sakatao a miyanothol odi na madakel. Ago igira so hadith na piyakambowat o salakao ko Imam Malik.

6. So kaphagaloya ko manga maana o sabaad a manga kalimah a so khaparampang on so pembatiya sangkai a kitab, sa nggolalan sa pakapontoken so osayan on o Shaykh Muhammad Fuad Abdulbaqi, sa aden a pekhaalin ko kinilapiyat o katharo sa pantag sa kapakakempet iyan.

7. So kabegi sa bilang ko langowan a hadith, melagid o hadith Marfu’ odi na Mawquf, odi na Maqtu’ odi na makatotompotompok I kiyasanday antaa ka di, sa palaya den kiyabegan sa bilang so manga Hadith ipoon sa paganay n ataman sa kaposan. Sa isa nan a kisesenggay angkai a tombok o kitab a Al Muwatta’.

Giyanan, a pephagarapen ami ko Allah a katarimaa niyan sangkai a galebek ami ago balowin iyan a galebek a salih (mapiya) a go balowin ko alongan a Qiyamah a ipakapened o timbangan o manga galebek ami.

Go pagarapen ami ko Allah a kanggonaan sekaniyan o islam ago so manga Muslim, a sekaniyan I mapiya a zarigan ago mapiya a tabanga.

So kalilintag ago kapakadaya na sii ko nabi tano a Muhammad ago sii ko manga pamiliya niyan ago so manga sahabah niyan,langon.

Aya kaposan o pangeni ami na so kapetharoa mi sa so langowan o bantogan na rek o Allah a Kadnan o manga kaaden.

Inisorat sekaniyan o,

Mahmud Bin Al Jamil (Abu Abdillah)

�Al Muwatta’

1-So Bandingan ko manga Waqto o Sambayang

1- Pinto o manga Waqto o Sambayang

1- Pitharo iyan (so Imam Malik) a: Piyanothol raken o Yahya Bin Yahya Al Laythiy, tig o Malik Bin

Anas, a miyakapoon ko Ibn Shihab a so Umar Bin Abdil Aziz na tiyaakir iyan so Sambayang (a Asar) sa isa a gawii, na miyakasoled on so Urwah Bin Az Zubayr na piyanothol iyan on a so Al Mugirah Bin Shu’bah na tiyaakir iyan so sambayang (a Asar) sa isa a gawii, a sekianiyan na sii sa Kufah, na miyakasoled on so Abu Mas’ud Al Ansari na pitharo iyan a: Antonaa nan hay Mugirah? Ba di sabenar a katawan ka aso Jibril na tomiyoron na mizambayang, na mizambayang so Rasulullah (sa tiyondog iyan) oriyan iyan na mizambayang, na mizambayang so Rasulullah, oriyan iyan na mizambayang na mizambayang so Rasulullah, oriyan iyan na mizambayang, na mizambayang so Rasulullah, oriyan iyan na mizambayang, na mizambayang so Rasulullah, oriyan iyan na pitharo iyan (so Jibril) a sabap sii na siyogo ako (odi na sabap sii na siyogo ka sa kapezambayang ka, so Muhammad) na pitharo o Umar Bin Abdil Aziz a: Kenal angka so giingka panotholen hay Urwah, Ba di so Jibril na sekaniyan i minggolalan ko Rasulullah ko waqto o Sambayang? Na pitharo o Urwah a: Lagid anan a miyaaden so Bashir Bin Abi Mas’ud Al Ansari a pephanotholen iyan a phoon ki ama iyan._______________= so Hadith na Sahih a piyakambowat o Bukhari (521) ago so Muslim (610)

2- Pitharoo Urwah a: Sabenar a piyanothol raken o Aishah a karoma o Rasulullah a so Rasulullah na miyaaden a giiniyan zambayangan so Asar a so alongan na sii ko darepa iyan ko da niyan pen kiporo.

_______________= so Hadith na Sahih a piyakambowat o Bukhari (546) ago so Muslim (611)

3- Go piyanothol raken o Yahya, tig o Malik a miyakapoon ko Zayd Bin Aslam a phoon ko Ata’

Bin Yasar a pitharo iyan a: Miyakoam a sakatao a mama ko Rasulullah na iniiza iyan on so waqto o samabayang a Subh. Pitharo iyan a: Tomiren on so Rasulullah (sa daa pitharo iyan) sa kagiya mapita na mizambayang (so Rasulullah) sa Subh ko kiyasebang o Fajr, oriyan iyan na mizambayang sa Subh ko isa a mapita ko oriyan o kiyakhalibabas o maliboteng, oriyan iyan na pitharo iyan a: Anda so phagiza ko waqto o sambayang? Na pitharo o mama a: Saken, katii ako hay Rasulullah, na pitharo iyan a: So pagleletan angkai a (dowa a sambayang a subh) na aya waqto o Subh._______________= so Hadith na Mursal: Iniwasal (zophon) sekaniyan o Nasa-i a miyakapoon ko Anas (641) a sekaniyan na Sahih

4- Go piyanthol raken o Yahya, tig o Malik a phoon ko Yahya Bin Said a phoon ko Amrah Bint Abdirrahman a phoon ko Aishah a karoma o Nabi a pitharo iyan a: Miyaaden so Rasulullah a giizambayang sa Subh, sa peliyo so manga babay a ikhokokos iran so manga nditaren iran a di siran khakilala (o babay siran anta aka mama) ko kaliboteng o kagagawii._______________= so Hadith na Sahih a piyakambowat o Bukhari (867) ago so Muslim (645).

5- Go Piyanothol iyan raken, tig o Malik a phoon ko Zayd Bin Aslam a phoon ko Ata’ Bin Yasar ago phoon ko Busr Bin Said ago phoon ko Al A’raj a langon siran on pephanothol a miyakapoon ko Abu Hurayrah a so Rasulullah na pitharo iyan a: Sa tao a romaot sa sarakaat ko Subh ko da pen kasebang o alongan na sabenar a riyaot iyan so Subh, na sa tao a romaot sa

sarakaat ko Asr ko da pen kasedep o alongan na sabenar a riyaot iyan so waqto a Asr.______________= So Hadith na Sahih piyakambowat o Bukhari (579) ago so Muslim(608).

6- Go piyanothol iyan raken, tig o Malik, a phoon ko Nafi’ a sanasanaan o Abdullah Bin Umar a so Umar Bin l Khattab na pizoratan iyan so manga wali niyan sa pitharo iyan a: Aya mapened rekano a ziyapen iyo na so sambayang, na sa tao a siyapen iyan (sa kenalen iyan sa tarotop) ago inggolalan iyan (lalayon) na masiyap iyan so agama niyan, na sa tao a dadasen iyan (ilangen iyan) na sekaniyan ko salakao ron na lebi a domadadas, oriyan iyan na inisorat iyan a zambayangi niyo so Luhur amay ka so along o shayi na takes a barokan ko katas iyan sa taman sa mabaloy so along o isa rekano a datar iyan sa katas, go zambayangi niyo so Asr a so alongan na mipoporo a mapoti i ranti a lompiyo (da pen makabinaning) sa diyangka a lomalakao so komokoda sa dowa ka Farsakh odi na telo, ko da pen kasedep o alongan, go zambayangi niyo so Magrib anda i kasedep o alongan, go so Isha’ anda i kasedep o pamorawag sa taman ko sabagi ko telo bagi ko kagagawii, na sa tao a makatorog (sa masa nan) na da toroga so mata niyan (sa kiyasoy niyan angkanan a katharo sa miyakatelo) go so Subh na zambayangi niyo a so manga bitoon na masigay pen a makakayar (ko langit)._______________= So Hadith na Munqati’ a piyanothol sekaniyan o Al Bayhaqi ko As Sunan Al Kubra, ago so At Tahawi ko ko Sharh Maani Al Athar sa miyakanggolaln ko Malik, sa so Sanad na Munqati’ ka da maneg o Nafi’ ko Umar, ogaid na mapiya pen Munqati na aden a miyakabager on a Hadith a Marfu’, ago inaloy sekaniyan o As Suyuti ko kitab a Tanwirul Hawalik.

7- Go Piyanothol iyan reken, tig o Malik, a phoon ko bapa iyan a so Abu Suhayl a phoon ki ama iyan a so Umar Bin Al Kattab na pizoratan iyan so Abu Musa a: Zambayangingka so Luhur amay ka mapolid so alongan, na so Asr na amay ka so alongan na mapoti i ranti a linang (da pen makabinaning) na so Magrib na anda i kasedep o alongan, na taakir angka so Isha’ sa di reka pen katoroga, na zambayangingka so Subh a so manga bitoon na mamomotayag a makakayar, sa batiya ka on sa dowa a Surah a manga atas a ped ko Al Muafassal._______________= So Hadith na Mawquf, sa so bo so Malik i miyanothol on, ogaid na aden a somasakesi on a manga hadith a Marfu’ ago mawquf.

8- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a so Umar Bin Al Khattab na pizoratan iyan so Abu Musa Al Asdh’ari a: Zambangka sa Asr a so alongan na mapoti so ranti iyan a linang sa diyangka a makalalakao so komokoda sa telo ka Farsakh, go zambayangka sa Isha’ ko let ka ago so let o sabagi ko ika telo bagi ko kagagawii, na o thaakirangka na sii ko sabagi (saopak) ko kagagawii, go oba ka maaden a ped o manga tao a lomililipat ko sambayang._______________So Hadith na Mawquf, sa sobo so Malik i miyanothol on.

9- Go piyanothol iyan reken, tig o Malik, a phoon ko Yazid Bin Ziyad a phoon ko Abdullah Bin Rafi’ a sanasanaan o Ummu Salamah a karoma o Nabi a iniiza iyan ko Abu Hurayrah so waqto o sambayang, na pitharo o Abu Hurayrah a: Panotholen aken reka, sa zambayangka sa Luhur amay ka so along ka na datar ka sa katas, go zambayangka sa Asr amaya ka so along ka na

dowa takep ko katas ka, na zambayangka sa Magrib amay ka somedep so alongan, na zambayangka sa Isha’ amay ko so let ka ago so let o ika telo bagi ko kagagawii, sa zambayangka sa Subh ko kaliboteng pen o kagagawii._______________So Hadith na Mawquf, sa sobo so Malik i miyanothol on.

10- Go piyanothol yan reken, tig o Malik, a phoon ko Ishaq Bin Abdillah Bin Abi Talhah a phoon ko Anas Bin Malik a pitharo iyan a: Miyaaden kami a giiami zambayangan so Asr, oriyan iyan na lomiyo so manosiya sa somong ko darepa o Bani Amr Bin Awf na maoma niyan siran a giisiran zambayang sa Asr._______________So Hadith na Sahih piyakambowat o Bukhari(548) ago so Muslim (194/621)

11- Go piyanothol iyan raken, tig o Malik, a phoon ko Ibn Shihab a phoon ko Anas Bin Malik a pitharo iyan a: Miyaaden kami a giikami zambayang sa Asr oriyan iyan na somong so phelalakao sa Quba’ na maoma niyan siran a so alongan na mapro pen ( da pen sedep).

_______________So Hadith na Sahih a piyakambowat o Bukhari (551) ago so Muslim (193/621).

12- Go piyanothol iyan rekan, tig o Malik, a phoon ko Rabi’ah Bin Abi Abdirrahman a phoon ko Al Qasim Bin Muhammad a pitharo iyan a: Da ko Raota so manga tao a rowar sa giisiran zambayang sa Luhur sa kagabigabi (maana a malo iran pephakaorin so waqto niyan sa da pen mapokas)._______________So Hadith na Maqtu’, sa so bo so Malik i miyanothol on.

2- So Waqto o Sambayang a Jumuah

13- Piyanothol raken o Yahya, tig o Malik, a phoon ko bapa iyan a so Abu Suhayl Bin Malim, a phoon ko ama iyan a pitharo iyan a: Miyaaden ako a pekhailay aken a dempas a rek a Uqayl Bin Abi Talib ko alongan a Jumuah a pendempasen ko kilid o keleb o masjid sa katampar sa sedepan, na anday ka sapengi ko dempas langon o along o keleb na lomiyo so Umar Bin Al Khattab na zambayang sa Jumuah. Na pitharo o Malik ( a ama o Abi Suhayl) oriyan iyan na lomiyo kami ko kapakazambayang sa Jumuah na makatorog kami sa di mathay ko kayao o kadaondao._______________So Hadith na Mawquf, so bo so Malik i miaynothol on.

14- Go piyanothol iyan raken, tig o Malik, a phoon ko Amr Bin Yahya Al Mazini a phoon ko Ibn Abi Salit a so Uthman Bin Affan na mizambayang sa Jumuah sa Madinah, ago mizambayang sa Asr sa Malal (darepa sa Madinah). Pitharo o Malik, a giyoto na sabap ko kazambayangi ko Jumuah anda den i kaotho o alongan ko lembak o langit (tahjir) ago sabap ko kagaan ko kaphelalakao._______________So Hadith na Mawquf, so bo so Malik i miaynothol on.

3- Pinto a biyanding on so tao a romaot sa sarakaat ko Sambayang

15- Piyanothol raken o Yahya, tig o Malik, a phoon ko Ibn Shihab a phoon ko Abu Salamah Bin Abdirrahman phoon ko Abu Hurayrah a: A so Rasulullah na pitharo iyan a: Sa tao a romaot sa

sarakaat ko sambayang na sabenar ariyaot iyan so sambayang._______________So Hadith na Sahih, piyakambowat o Bukhar i(580) ago so Muslim (607)..

16- Go piyanothol iyan raken, tig o Malik, a phoon ko Nafi’ a so Abdullah Bin Umar Bin Al Khattab na gginiyan tharoon a: Igira miyalepas ka o Rakaat na sabenar a miyalepas reka so Isa Sujud._______________So Hadith na Mawquf, so bo so Malik i miaynothol on.

17- Go piyanothol iyan raken, tig o Malik, a minisampay ron a so Abdullah Bin Umar ago so Zayd Bin Thabit na giiran tharoon a: sa tao a romaot sa sarakaat na sabenar a romiyaot sa isa a Sujud._______________So Hadith na Mawquf, so bo so Malik i miaynothol on.

18- Go piyanothol raken o Yahya, tig o Malik, a minisampay ron a so Abu Hurayrah na giiniyan tharoon a: Sa tao a makaraot sa sarakaat na sabenar a romiyaot sa isa a sujud, na sa tao a malepas on so kapembatiyaa ko Fatihah (sa da niyan raota) na sabenar a aden a miyalepas on a madakel a mapiya._______________So Hadith na Mawquf, so bo so Malik i miaynothol on.

4- Pinto a Piyayagan ko Kapolid o Alongan ago so Kaliboteng o Kagagawii

19- Piyanothol raken o Yahya, tig o Malik, a phoon ko Nafi’ a so Abdullah Bin Umar na giiniyan

tharoon a: Aya Duluk na so kapolid o Alongan sa kaothowan._______________So Hadith na Mawquf, so bo so Malik i miaynothol on.

20- Go piyanothol iyan raken, tig o Malik, a phoon ko Daud Bin Al Husayn a pitharo iyan a: Piyanothol raken a pephanothol a so Abdullah Bin Abbas na giiniyan tharoon a: Aya kakhapolid o alongan na igira miyapolid so along, na so kaliboteng o kagagawii (gasaq al layl) na so katimo o kagagawii ago so kaliboteng iyan._______________So Hadith na Mawquf, so bo so Malik i miaynothol on.

5- Pinto a piyayagan ko manga Waqto

21- Piyanothol raken o Yahya, tig o Malik, a phoon ko Nafi’ a phoon ko Abdullah Bin Umar a so Rasulullah na pitharo iyan a: So (tao) a lipas iyan so sambayang a Asr na datar o ba miyabinasa so pamiliya niyan ago so tamkok iyan._______________So Hadith na Sahih piyakambowat o Bukhari(552) ago so Muslim (226).

22- Piyanothol iyan raken, tig o Malik, a phoon ko Yahya Bin Said, a so Umar Bin Al Khattab na lominiyo ko kiyazambayang sa Asr, na miyabalak iyan a sakatao a mama a da makazambayang sa Asr, na pitharo on o Umar a: Antonaa i miyakatarongko reka sa dangka kapakazambayang sa Asr? Na mitharoon sa sendod, na pitharo o Umar a: Komiyorangka. Pitharo o yahya, a pitharo o Malik a:

Giitharoon a: Oman i shayi na den a rek iyan a katarotop ago kakorang._______________So Hadith na Mawquf, so bo so Malik i miaynothol on.

23- Go piyanothol iyan raken, tig o Malik, a phoon ko Yahya Bin Said, a giiniyan tharoon a: So pezambayang na pezambayang sa sambayang ago so milyalepas on so waqto niyan. Ka so miyalepas on so waqto niyan na lebi a mala ago makalelebi a di so karoma niyan go so tamok iyan.Pitharoo Yahya a: Pitharoo Malik a: Sa tao a raoten iyan so waqto a sekaniyan na madadalem sa kapelayalayag na go niyan tiyaakhir so sambayang sa kiyalipatan iyan, sa taman sa miyakaoma ko pamiliya niyan (miyakainged) na amay ka den pen a lamba ko waqto na zambayang sa sambayang o makaiinged, na amay peman ka miyakoama sa miyaipos so waqto na zambayang sa sambayang o giimelayalayag, ka aya khabayadan iyan na so mipapaliyogat on (a so sambayang ko kapelayalayag).Pitharoo Malik, a: Giyangkai a betad ba sekaniyan i riyaot aken on ko manga tao, ago so manga tao ko katao ko inged ami.Go pitharoo Malik a: So pamorawag a mariga na so pekhaaden ko Magrib. Na amay ka mada so mariga, na miyatangked so sambayang a Isha’go miyakaliyo ka ko waqto a Magrib._______________So Hadith na Mqtu’, so bo so Malik i miaynothol on.

24- Go piyanothol iyan raken, tig o Malik a phoon ko Nafi’ a so Abdullah Bin Umar na kiyadaan sa tanod, sa miyada so akal iyan. Na da niyan bayadi so sambayang (a miyalepas iyan ko kaada i ron sa tanod).

Pitharo o Malik a: Giyanan i tindeg ami, so Allah i lebi a Matao. Amay ka so waqto na miyaipos, na sa peman sa tao a makatanod (ko kiyada o akal iyan) a aden a lamba ko waqto na makapezambayang._______________So Hadith na Mawquf, so bo so Malik i miaynothol on.

6- Pinto a Piyayagan ko Katoroga ko Tao sa mibagak iyan so Sambayang

25- Piyanothol raken o Yahya, tig o Malik, a phoon ko Ibn Shihab, a phoon ko Said Bin Al Musayyib a so Rasulullah na gowani a maling phoon sa Khaybar sa miyangelem, na kagiya khapopos so kagagawii na domikha, na pitharo iyan ko Bilal a: Pagayaningka rekami so Subh, sa miyakatorog so Rasulullah ago so manga sahabah niyan, na miyagipat so Bilal ko diyangka a khagaga niyan sa rominda ko potos iyan (rahl) sa phenayaon iyan so Fajr, na tiyoratod sa tiyorog, sa da makanao so Rasulullah ago da pen so Bilal ago da pen so a isa bo ko pagtao sa taman sa sibangan siran o alongan, na miyakanao so Rasulullah, na pitharoo Bilal a: hay Rasulullah minisogat raken so datar o minisogat reka, ibet ko somiyogo reka ko benar, na pitharoo Rasulullah a: Lalakao kano, na piyamogao iran so manga ayam iran ka an makalalakao na lomiyalakao siran, oriyan iyan na siyogo o Rasulullah so Bilal na kiyamatan iyan so Sambayang na piyagimaman siran o Rasulullah ko samabayang a Subh, oriyan iyan na pitharo iyan ko kiyapasad o sambayang a:Sa tao a kalipatan iyan so sambayang na zambayangi niyan amay ka katanodan iyan, ka mataan a so Allah a Maporo ago Mala na pitharo iyan ko kitab iyan

(Qur’an) a: Go tindegen ka so sambayang sa pantag sa tadem raken._______________So Hadith na Mursal,go ziyophon sekaniyan o Muslim (680) a phoon ko Abu Hurayrah..

26- Go piyanothol iyan raken, tig o Malik, a phoon ko Zayd Bin Aslam, a pitharo iyan a: Domikha so Rasulullah ko kaphelalakao sa isa a kagagawii, sa lalan sa Makkah, sa inisana niyan ko Bilal so kaphkawa kiran, na tiyorog so Bilal ago tiyorog siran, sa miyakanao siran a somibang so alongan, na miyamagenao siran, sa kiyatekawan siran, na inisogo kiran o Rasulullah so kakhoda iran ko manga ayam iran sa makaliyo siran sangkoto a balintad, sa pitharo iyan a aden sangkai a balintad a shaytan on, na mikhoda siran sa taman sa miyakaliyo siran on, oriyan iyan na siyogo siran o Rasulullah sa tomepad siran sa mamagabdas siran, sa siyogo iyan so Bilal ko kapagbang iyan ko manga tao odi na komamat, na piyagimaman o Rasulullah so manga tao, sa siyangoran iyan siran sa miyailay niyan so kiyatekawi kiran na pitharo iyan a: Hay manga manosiya mataan a so Allah na giyamak iyan so manga niyawa tano, na o kiyabayai niyan na pakandodedn iyan rekitano sii ko masa a salakao sii, na amay ka torogen so isa rekano sa mibagak iyan so sambayang odi na kiyalipatan iyan oriyan iyan na kiyatanodan iyan na zambayangi niyan sa datar o giiniyan on kazambayangi ko waqto niyan, oriyan iyan na diningilan o Rasulullah so Abu Bakr na pitharo iyan a: Mataan a so shaytan na miyaoma niyan so Bilal a tomitindeg a pezambayang na piyakaiga iyan sa linilang iyan sa datar o kaphelilanga ko maito a wata sa taman sa torogen, oriyan iyan na tiyalowan o Rasulullah so Bilal, na piyanothol o Bilal ko Rasulullah so datar o piyanothol

o Rasulullah ko Abu Bakr, na pitharo o Abu Bakr a: Pezakesian aken a seka na sogo o Allah. _______________So Hadith na Mursal, so bo so Malik i miaynothol on.

7- Pinto a piayayagan ko kinisaparen ko kazambayang ko kapangalaothowan

o alongan ko lembak o langit

27- Piyanothol raken o Yahya, tig o Malik, a phoon ko Zayd Bin Aslam, a phoon ko Ata’ Bin Yasar, a so Rasulullah na pitharo iyan a: Mataan a so kapanonobera o mayao na ped ko sorazab o naraka, na amay ka somagompot so mayao na pamakatenggao kano ko sambayang (nayawa niyo a lomenggao so mayao na go kano bo zambayang). Go pitharo iyan a: Miphanon so naraka ko Kadnan iyan sa pithato iyan a: Kadnan ko tiyotog o sabagi raken so sabaad, na inidinan iyan sa dowa a kaginawa, ko oman ragon, saginawa ko musim a barata ago saginawa ko masa a pangolaon._______________So Hadith na Mursal, so bo so Malik i miaynothol on.

28- Go piyanothol rekami o Malik, a phoon ko Abdullah Bin Yazid a sanasanaan o Al Aswad Bin Sufyan a phoon ko Abu Salamah Bin Abdirrahman, ago phoon ko Muhammad Bin Abdurrahman a phoon ko Thawban a phoon ko Abu Hurayrah a so Rasulullah na pitharo iyan a: Igira miyanagompot so mayao na pamakatenggao kano ko sambayang, ka so

kitataralo o mayao na ped ko sorazab o naraka, go inaloy niyan a so naraka na miphanon ko Kadnan iyan, na inidinan iyan ko oman ragon sa dowa a kaginaw isa ka kaginawa ko pangoran ago isa a kaginawa ko pangolaon.____________So Hadith na Sahih, piyakambowat o Muslimi (617).

29- Go piyanothol iyan raken, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a: So Rasulullah na pitharo iyan a: Igira miyanagompot so mayao na pamakatenggao kano ko sambayang, ka so kayao o mayao na ped ko sorazab o jahannam._______________So Hadith na Sahih, piyakambowat o Bukhari (533) ago so Muslim (615).

.7- Pinto a Piyayagan ko Kinisaparen ko kasoled ko Masjid sabap ko kiyakan

sa Lasonaago so Kasapengi ko Ngari

30- Piyanothol raken o Yahya, tig o Malik, a phoon ko Ibn Shihab a phoon ko Said Bin Al Musayyib, a so Rasulullah na pitharo iyan a: Sa tao a koman sangkai a kayo (so lasona) na di pagobay ko masjid ami, sa peringasaan kami niyan ko bao o lasona._______________So Hadith na Mursalf, siyophon sekaniyan o Muslim (536) a phoon ko Abu Hurayrah.

31- Go piyanothol iyan raken, tig o Malik, a phoon ko Abdurrahman Bin Al Mujabbar, a miyaaden

sekaniyan a pekhailay niyan so Salim Bin Abdillah a igira ana miyailay niyan a tao a sasapenga iyan a ngari iyan a sekaniyan na giizambayang na ganderen iyan so nditaren a misasapeng ko ngari iyan sa mabager sa taman sa mapokas iyan on so sapeng iyan._______________So Hadith na Maqtu’, so bo so Malik i miaynothol on.

2- So Kitaban o Kazoti1- Pintoan o Kanggalebeka ko Kapagabdas

1/32 – Piyanothol raken o Yahya, tig o Malik, a phoon ko Amr Bin Yahya Al Mazini, a phoon ki ama iyan a pitharo iyan ko Abdullah Bin Zayd Bin Asim, a sekaniyan na ama a dato o Amr Bin Yahya Al Mazini a sekaniyan na ped ko manga sababah o Rasulullah a: Ino khagagangka a kapakiilain ka raken o andamanaya i kiyaaden o Rasulullah a giimagabdas? Na pitharo o Abdullah Bin Zayd Bin Asim a: Oway, na miyakikowa sa ig a iphagabdas, na inonaban iyan a mbala a lima niyan sa miyakadowa, miyakadowa, oriyan iyan na miyamomog ago miyangilek sa ig na singa niyan, sa miyakatelo, oriyan iyan na miyanagop sa miyakatelo, oriyan iyan na inonaban iyan a mbala a lima niyan sa miyakadowa, miyakadowa, sa taman ko siko niyan, oriyan iyan na siyapo niyan a olo niyan (bok iyan) sa so den so mbala a lima niyan sa piyakasagad iyan on a lima niyan sa inipoon iyan sa poro a beneng iyan na tiyampos iyan sa tengo oriyan iyan na piyakakasoy niyan a lima niyan sa miyakandod ko piphoonan iyan on oriyan iyan na inonaban iyan so mbala a seki niyan.__________________So Hadith na Sahih, piyakambowat sekaniyan o Bukhari (185) ago so Muslim (235).

2/33 – Go piyanothol iyan raken, tig o Malik, a miyakapoon ko Abu Az Zinad a phoon ko Al A’raj a phoon ko Abu Hurayrah a so Rasulullah na pitharo iyan a: Igira miyagabdas so isa rekano na tagoi niyan so ngirong iyan sa ig, oriyan iyan na sengaa niyan, na sa tao a mamangit sa ator ko kiyaodo na baloya niyan a gansar (so kadakel iyan sa isa odi na telo di na lima timan).__________________So Hadith na Sahih, piyakambowat sekaniyan o Bukhari (162) ago so Muslim (20/237).

3/34 – Go piyanothol iyan raken, tig o Malik, a phoon ko Ibn Shihab, a phoon ko Abu Idris Al Khawlani, a phoon ko Abu Hurayrah a so Rasulullah na pithar o iyan a: Sa tao a magabdas na pangilek sa ig na sengaa niyan, na sa tao a mamangit sa ator na baloya niyan a gansar (so kadakel iyan).Pitharoo Yahya a: Miyaneg aken so Malik, a giiniyan tharoon ko mama a giimamomog ago giimanglek sa ig ko ig a miyakaisa niyan maakop ko tatagoan on a giyoto na da a marata on.__________________So Hadith na Sahih, piyakambowat sekaniyan o Bukhari (161) ago so Muslim (22/237).

4/35 – Go piyanothol iyan raken, tig o Malik, a mataan a minisampay ron a so Abdurrahman Bin Abi Bakr na somiyoled ko Aishah a karoma o Rasulullah ko gawii a kiyawafat o Sa’d Bin Abi Waqqas, na miyakikowa sa ig a iphagabdas, na pitharo on o Aishah a: Hay Abdurrahman, tarotopangka so abdas, ka miyaneg aken ko Rasulullah a giiniyan tharoon a: Aden a sikesa a wayl ko naraka a bagian o manga palo (a da mabasa ko kiyapagabdas o tao).__________________

So Hadith na Munqati’ (magegetas), piyakambowat sekaniyan o Muslim (240) a aden a katotompokan on (mawsul), aya pakaasal o Hadith na piyagayonan o dowa a Imam (muttafaqun Alayhi).

5/36 – Go piyanothol iyan raken, tig o Malik, a phoon ko Yahya Bin Muhammad Bin Tahla’ a phoon ko Uthaman Bin Abdirrahman a so ama iyan na piyanothol iyan on a miyaneg iyan so Umar Bin Al Khattab, a phagabdasen iyan a ig so madididalem ko tinambed iyan (maana a giimamopo sa ig). Pitharoo o Yahya, a: Inizaan so Malik, makapantag sa mama a miyagabdas na kiyalipatan iyan, na miyakapanagop ko da niyan pen kapakapamomog, odi na kiyaonaban iyan ambala a lima niyan ko da niyan pen kapakapanagop, na pitharo iyan a: So miyakapanagop ko da niyan pen kapakapamomog, na pamomog sa di niyan khasowi so kapanagop, na so peman so kiyaonaban iyan ambala a lima niyan ko da niyan pen kapakapanagop, na panagop oriyan iyan na kasoya niyan so kaonabi niyan ko mbala a lima niyan ka an mabaloy so so kaonabi ron a oriyan o kiyapanagop iyan, amay ka giyoro na sii ko darepa iyan, odi na sii ko kimamasa niyan. Pitharoo Yahya a: Go inizaan so malik, makapantag sa mama a kiyalipatan iyan so kapamomog ago so kapangilek sa ig, sa miyakazambayang, na pitharo iyan a: Da a patoray ron oba niyan kasowi so sambayang iyan, sa pamomog ago pangilek sa ig ko phakatalingoma a abdas iyan, amay ka pezambayang.__________________So Hadith na Mawquf, so bo so Malik i miyanothol on.

2- Pinto o Abdas o tiyorog amay ka pezambayang

6/37- Piyanothol raken o Yahya, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a mataan a so Rasulullah na pitharo iyan a: Igira miyagenao so isa rekano ko kiyatorog aon na onabi niyan so lima niyan ko da niyan on pen kisoleden ko ig a iphagabdas iyan, ka mataan a so isa rekano na di niyan katawan o anda niyan minibetad a lima niyan.__________________So Hadith na Sahih, piyakambowat sekaniyan o Bukhari (162) ago so Muslim (278).

7/38- Go piyanothol iyan raken, tig o Malik, phoon ko Zayd Bin Aslam, a so Umar Bin Al Khattab na pitharo iyan a: Igira tiyorog so isa rekano a thatapaya a miiga na pagabdas.__________________So Hadith na Mawquf,so bo so Malik i miyanothol on

8/39- Go piyanothol iyan raken., tig o Malik, a phoon ko Zayd Bin Aslam, a so tafsir angka-i a ayah a: Hay so siran oto a miyamaratiyaya igira tominindeg kano ko kapezambayang na onabi niyo so manga paras iyo ago so manga lima niyo sa taman ko manga siko niyo, go sapowa niyo so manga olo niyo (ago onabi niyo so manga seki niyo) sa taman ko dowa a boko a seki” aya kon a maana oto na igira tominindeg kano phoon ko igaan ko kiyatoroga rekano. Pitharoo Malik, a aya betad rekami na daa kapagabdas ko kalimamadi ko tao, go da pen ko sii ko kadoyagas o rogo, go da pen sii ko dana a pethoga ko lawas, go daa kapagabdas inonta

misabap sa hadas a phakaliyo ko dowa a piyamalongan odi na torog.__________________So Hadith na Maqtu’, so bo so Malik, i miyanothol on.

9/40- Go piyanothol iyan raken, tig o Malik, a phoon ko Nafi’ a mataan a so Ibn Umar na miyaaden a pethorogen a moontod, oriyan iyan na zambayang sa di den phagabdas.__________________So Hadith na Mawquf, so bo so Malik, i miyanothol on.

3- Pinto a piyayagan ko Ig a iphagabdas

10/41- Piyanothol raken o Yahya, tig o Malik a phoon ko Safwan Bin Sulayim, a phoon ko Sa’d Bin Salamah a ped ko mbawataan o Al Azraq, a phoon ko Al Mugirah Bin Abi Burdah, a sekaniyan na ped ko mbawataan a Abdud Dar, a miyaneg iyan so Abu Hurayrah a giiniyan tharoon a: Miyakaoma a sakatao a mama ko Rasulullah na pitharo iyan a: Hay Rasulullah pekhetasen ami so ragat, sa phagawid kami sa maito a ig, na opagabdasen ami na khawao kami, na ino iphagabdas ami? Na pitharoo Rasulullah a: Sekaniyan a ragat na soti so ig iyan, a halal so miyatay ron a seda (lepok).__________________So Hadith na Mawquf, so bo so Malik, i miyanothol on.

11/42- Go piyanothol iyan raken, tig o Malik, a phoon ko Ishaq Bin Abdillah Bin Abi Talhah a phoon ko Humaydah Bint Abi Ubaydah Bin Farwah a phoon ko pakinaan iyan a so Kabshah Bint Ka’b Bin Malik, a sekaniyan na sii sa tangan o Abu Qatadah Al Ansari, a piyanothol iyan on a: So Abu Qatadah na

somiyoled on na inododoan iyan sa ig a iphagabdas iyan, na miyakoma a maito a bedong ka maginom na inibaba iyan on so tatagoan ko ig sa mininom on. Na pitharoo Kabshah a: Miyailay ako niyan a tetentengan ko sekaniyan, na pitharo iyan a: Baka pephamemesa hay pakiwataan? Na pitharo iyan a: Pitharo aken a oway, na pitharo iyan a: So Rasulullah na pitharo iyan a: Sekaniyan a bedong na kena o ba najis, ka sekaniyan na ped ko lomilibet rekitano lalayon. Pitharoo Yahya a: Pitharoo Malik, a da a marata on, inonta bo o ba aden a mailay a najis ko ngari iyan.__________________So Hadith na piyakambowat sekaniyan o manga kitab a pat, go biyaloy sekaniyan o Bukhari a Sahih a hadith ko kiyapanothola on o Tirmidi.

12/43- Go piyanothol iyan raken, tig o Malik, a phoon ko yahya Bin Said a phoon ko Muhammad Bin Ibrahim Bin Al Harith At Timi a phoon ko Yahya Bin Abdirrahman Bin Hatib, a so Umar Bin Al Khattab na lominiyo a aden a manga ped iyan a ped kiran so Umar Bin Al As, sa minisampay siran sa tabay, na pitharoo o Amr Bin Al As ko khirek ko tabay a ino baaden a phaginom ko tabaingka a binatang? Na pitharoo Umar Bin Al Khattab a hay khirek sangkai a tabay, di ngka rekami petharoa (oba aden a paginom on a binatang) ka sekami na pephamakaig kami ko piyamakaigan o binatang, ago pephamakaig so binatang ko piyamakaigan ami.__________________So Hadith na Mawquf, so bo so Malik, i miyanothol on.

13/44- Go piyanothol iyan raken, tig o Malik, a phoon ko Nafi’, a so Abdullah Bin Umar na giiniyan tharoon a: Amay ka so manga mama ago so manga babay ko masa o Rasulullah na giisiran langon

mamagabdas, (maana a so karoma a mama ago so karoma a babay na giisiran magatoang magabdas ko satiman a pananagoay a tatagoan sa ig).__________________So Hadith na Sahih piyakambowat o Bukhari (193).

4- Pinto a nganin a da on mipatoray so kapagabdas

14/45- Piyanothol raken o Yahya, tig o Malik, a phoon ko Muhammad Bin Umrah a phoon ko Muhammad Bin Ibrahim a phoon sa ina a wata o Ibrahim Bin Abdirrahman Bin Awf, a sekaniyan (so babay) na inizaan iyan so Ummu Salamah a karoma o Nabi sa pitharo iyan a: Saken na babay a pakaatasen aken so nditaren aken sa pekhatoyok aken, ago phelalakao ako ko darepa a marezik, na pitharoo Ummu Salamah a: Pitharoo Rasulullah a: Zotin sekaniyan o maooriyan iyan (aya maana niyan na so nditaren o babay a pekhizising ko lopa na amay ka kanajisan na khasoti o lopa a pekhazisingan on ko oriyan o kiyanajisi ron).__________________So Hadith na piyakambowat o khirek ko pat a kaitab a Hadith, ago pitharo i Al Albani a sekaniyan na Sahih.

15/46- Go piyanothol iyan raken, tig o Malik, a miyailay niyan so Rabiah Bin Abdirrahman a aden a pekhithopha niyan a datar o gowa a sekaniyan na sa Masjid na di meliyo ago di phagabdas sa taman sa zambayang. (so pitharo a Qals, na giyoto so pekhidoda o tao a phoon sa lawas iyan a peno o ngari a datar o gowa odi na maito, a kena ba sekaniyan gowa, na o malalayaon a kapekhagowaa niyan on na pembaloy a gowa).

Pitharoo Yahya, Go iniiza ko Malik a sakatao a mama a miyakadoda sa pangenengken, ino makaphagabdas? Na pitharo iyan a: Da a paliyogat on a kapagabdas, sa ba den pamomog ago onabi niyan a ngari iyan.__________________So Hadith na Maqtu’ , so bo so Malik, i miyanothol on.

16/47- Go piyanothol iyan raken, tig o Malik, a phoon ko Nafi’ a so Abdullah Bin Umar na biyorokan iyan a maito a wata o Said Bin Zayd ago siyakopo niyan, oriyan iyan na somiyoled sa masjid na mizambayang sa da pagabdas. (so Hanut na langowan a borok a mamot a pethagoon ko bangkay o tao a miyatay igira ipelebeng) Pitharoo Yahya a: Inizaan so malik, o ino aden ko kapakagowa a Abdas? Na pitharo iyan a: Da’, ogaid na makaphamomog ago onabi niyan so ngari iyan (so tao a miyakagowa) sa daa patoray ron a kapagabdas.__________________So Hadith na Mawquf, so bo so Malik, i miyanothol on.

5- Pinto a kibagaken ko kapagabdas ko kakana ko nganin a miokit sa apoy

17/48- Piyanothol raken o Yahya, tig o Malik, a phoon ko Zayd Bin Aslam a phoon ko Ata’ Bin yasar a phoon ko Abdullah Bin Abbas a so Rasulullah na komiyan sa waga a kambing, oriyan iyan na mizambayang sa da pagabdas. (giyanan na dalil sa so kakan sa pangenengken a miyakaokit sa apoy na di niyan khabatal so abdas).__________________So Hadith na Sahih piyakambowat o Bukhari 207) ago so Muslim (254).

18/49- Go piyanothol iyan raken, tig o Malik, a phoon ko Yahya Bin Said a phoon ko Bashir Bin Yasar, a sanasanaan o Banu Harithah a phoon ko Suwayd Bin An Nu’man, a piyanothol iyan on a sekaniyan na lominiyo a ped o Rasulullah ko ragon a kiyagobata niyan sa Khaybar, na kagiya matago siran ko darepa a Sahba’ a marani sa Khaybar na tomipad so Rasulullah na mizambayang sa Asar, oriyan iyan na piyakikowa niyan so manga loto iran, na daa minioma a rowar sa Sawiq (tapong), na inisogo iyan a kabonawa on ago loto on na komiyan so Rasulullah ago komiyan kami, oriyan iyan na tominindeg ko kapezambayang sa Magrib, na miyamomog ago miyamomog kami, oriyan iyan na mizambayang sa da pagabdas.__________________So Hadith na Sahih piyakambowat o Bukhari (209).

19/50- Go piyanothol iyan raken, tig o Malik, a phoon ko Muhammad Bin Al Munkadir, ago phoon ko Safwan Bin Sulaym a siran a dowa na piyanothol iran on a phoon ko Muhammad Bin Ibrahim Bin Al Harith At Timi a phoon ko Rabiah Bin Abdillah Bin Al Hudayr a sekaniyan na gomiyabi a ped iyan so Umar Bin Al Khattab, oriyan iyan na mizambayang sa da pagabdas.__________________So Hadith na Mawquf, so bo so malik i miyanothol on.

20/51- Go piyanothol iyan raken, tig o Malik, a phoon ko Dhamrah Bin Said Al Mazini a phoon ko Uban Bin Uthman a so Uthman Bin Affan na komiyan sa roti ago sapo oriyan iyan na miyamomog ago inonaban iyan a lima niyan ago inisapo niyan sa paras iyan, oriyan iyan na mizambayang sa da pagabdas..__________________

So Hadith na Mawquf, so bo so Malik i miyanothol on.

21/52- Go piyanothol iyan raken, tig o Malik, a minisampay ron a so Ali Bin Abi Talib ago so Abdullah Bin Abbas na miyaaden siran a dowa a di siran phagabdas ko kakan iran sa miyakaokit sa apoy.__________________So Hadith na Mawquf, so bo so Malik i miyanothol on.

22/53- Go piyanothol iyan raken, tig o Malik, a phoon ko Yahya Bin Said, a inizaan iyan so Abdullah Bin Rabiah makapantag ko mama a miyagabdas oriyan iyan na komiyan sa miokit sa apoy, ino phagabdas? Na pitharo iyan a: Miyailay aken si ama a giiniyan oto nggolaolaan sa di phagabdas.__________________So Hadith na Mawquf, so bo so Malik i miyanothol on.

23/54- Go piyanothol raken o Yahya, tig o Malik, a phoon ko Abu Nuaim a so Wahb Bin Kisan, na miyaneg iyan so Jabir Bin Abdillah Al Ansari a giiniyan tharoon a: Miyailay aken so Abu Bakr As Siddiq a komiyan sa sapo oriyan iyan na mizambayang sa da pagabdas.__________________So Hadith na Mawquf, so bo so Malik i miyanothol on.

24/55- Go piyanothol iyan raken, tig o Malik, a phoon ko Muhammad Bin Al Munkadir a so Rasulullah na inimbitar sa pangenengken sa inenatan sa roti ago sapo na komiyan on, oriyan iyan na miyagabdas ago mizambayang, oriyan iyan na minioma so lamba ko pangenengken na komiyan on oriyan iyan na mizambayang sa da pagabdas.__________________So Hadith na Mursal, siyophon sekaniyan o Abu Daud (191) ago so Tirmidi (50)

25/56- Go piyanothol iyan raken, tig o Malik, a phoon ko Musa Bin Uqbah a phoon ko Abdurrahman Bin Yazid Al Ansari a so Anas Bin Malik na miyakaoma a phoon sa Iraq, na somiyoled on so Abu Talhah ago so Ubayyi Bin Ka’b na inenatan iyan siran sa pangenengken a miokit sa apoy, na komiyan siran on na tominendeg so Anas na miyagabdas, na pitharoo Abu Talhah ago so Ubayyi Bin Ka’b a antonaa nan hay Anas? Bangkanan miyasowa sa kiyasong ka sa Iraq?! Na pitharoo Anas a: Oba bo da ko manggolaola, na tominindeg so Abu Talhah ago so Ubayyi Bin Ka’ab, na mizambayang siran a dowa sa da siran pagabdas.__________________So Hadith na Mawquf, so bo so malik i miyanothol on.

6- Pinto o Kapagabdas

26/57- Go piyanothol raken o Yahya, tig o Malik, a phoon ko Hisham Bin Urwah a phoon ki ama iyan a so Rasulullah na inizaan ko kapamangit ko kiyaodo, na pitharo iyan a: Ba da a khatoon o isa rekano a telo a manga ator?!__________________So Hadith na Mursal inikampet o Abu Daud (40) a phoon ko Aishah, na pitharoo Al Albani a sekaniyan na Sahih.

27/58- Go piyanothol iyan raken, tig o Malik, a phoon ko Al Ala’ Bin Abdirrahman a phoon ki ama iyan a phoon ko Abu Hurayrah a so Rasulullah na lominiyo ko pekhoboran na pitharo iyan a: So Salam na sii rekano, hay darepa a pagtao a mu’min, mataan a sekami omiyog so Allah na khatondog ami sekano (phamatay kami a datar iyo), miyazimalao aken a oba ko bo khailay so manga pagari tano, na pitharo iran a: Hay Rasulullah, ba di sekami i manga pagaringka?

Na pitharo iyan a: Ogaid na sekano na manga bolayoka aken, aya manga pagari tano na so siran oto a da siran pen makaoma, ago saken i kamonaan iyo ko paridi. Na pitharo iran a: Hay Rasulullah andamanaya i kakhakilalaangka ko tao a phakaoma ko oriyan ka a ped ko ummat ka?! Na pitharo iyan a: Bangka da mailay a o aden a rek a isa a mama a koda a bangkadan a misasaog sa manga koda a manga iitem i warna, na ba niyan di khakilala so koda iyan, na pitharo iran a: Engkaino niyan di khakilala, na pitharo iyan a: Mataan a siran (so manga ummat iyan a pekhaori) na phakaoma siran ko Alongan a Qiyamah a tihaya so manga anggaota iran a phagabdasen iran ko sambayang, sa saken i kamonaan iran ko paridi (phenayaon ko siran ko paridi aken), sa oba ana manga mama anggolaola siran sa kabogawa kiran ko paridi aken, sa datar o kapembogawa ko onta a miyadadag, sa pethalowan ko siran a: Songkano sii, Songkano sii, Songkano sii! Na matharo a: Mataan a siran na somiyambi siran ko oriyan ka (da iran okiti so inokitan ka a so Sunnah o Rasulullah), na matharo aken a: Mawatan siran den, mawatan siran den, mawatan siran den..__________________So Hadith na Sahih piyakambowat o Muslim (649) aya pakaasal iyan na piyagayonan o dowa a imam.

28/59- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Humran a sanasanaan o Uthman Bin Affan a so Uthman Bin Affan na miontod ko manga ontoda, na miyakaoma so pageebang na piyakitokawan iyan on so sambayang a Asar, na miyakikowa sa ig na miyagabdas, oriyan iyan na pitharo iyan a: Wallahi ka aden a phanotholen aken rekano a thotol, oda bo ka kagiya sekaniyan na sii ko kitab o Allah na di ko rekano panotholen sekaniyan, oriyan iyan na pitharo

iyan a: Miyaneg aken so Rasulullah a giiniyan tharoon a: Da a ped sa tao a magabdas na phiyapiyaan iyan so abdas iyan oriyan iyan na zambayangan iyan so sambayang, inonta a irila on so dosa niyan ko pageletan angkoto a sambayang iyan ago so isa a phakaoma a sambayang sa taman sa kazambayangan iyan. Pitharoo Yahya a: Pitharoo Malik, a aya kaiilaya ko ron na aya bantak iyan na giyangkai a ayah a: Go tindegen ka so sambayang ko dowa a kaposan o kadaondao ago sii ko sagintas ko kagagawii, mataan a so manga pipiya (so sambayang) na maphakada iran so manga rarata (so dosa), giyoto na pananadem a rek o manga papasang i kapananadem.__________________So Hadith na Sahih piyakambowat o Bukhari (207) ago so Muslim (160).

29/60- Go piyanothol iyan raken, tig o Malik, a phoon ko Zayd Bin Aslam a phoon ko Ata’ Bin Yasar a phoon ko Abdullah As Sunabihi a so Rasulullah na pitharo iyan a: Igira miyagabdas so oripen a mu’min na go pamomog na makaliyo so manga dosa phoon ko ngari iyan, na amay ka mangilek sa ig na go niyan sengaa na makaliyo so manga dosa niyan phoon ko ngirong iyan, na amay ka sagopan iyan so paras iyan na makaliyo so manga dosa ko paras iyan, sa taman sa makaliyo ko kaposan o manga takeb a mata niyan, na amay ka onaban iyan so mbala a lima niyan na makaliyo so manga dosa niyan ko dowa lima niyan, sa taman sa makalioyo phoon ko kaposan o manga kanoko niyan, na amay ka sapo niyan a ig so olo niyan na makaliyo so manga dosa niyan phoon ko olo niyan sa taman sa makaliyo phoon ko mbalaa tangila niyan, na amay ka onaban iyan so mbalaa seki niyan na makaliyo so manga dosa niyan phoon ko mbala a seki niyan sa taman sa makaliyo ko kababaan o

manga kanoko niyan. Pitharo iyan a: Oriyan iyan na maaden so kapezong iyan sa masjid, na so sambayang iyan na pangoman iyan.__________________Piyakambowat sekaniyan o Nasa’i (1/74) go so Ibn Majah (282) go iniitong sekaniyan o Al Albani a sahih a hadith.

30/61- Go piyanothol iyan raken, tig o Malik, a phoon ko Suhayl Bin Abi Salih, a phoon ki ama iyan a phoon ko Abu Hurayrah a so Rasulullah na pitharo iyan a: Igira miyagabdas so oripen a muslim odi na mu’min na go niyan onabi so paras iyan na makaliyo ko paras iyan a langowan a dosa a iniilay niyan on so mata niyan sa makaonot ko ig odi na makaonot ko kaposan a thak o ig a inipanagop iyan, na amay ka onaban iyan so mbala a lima niyan na makaliyo ko lima niyan a langowan a dosa a kiyakapetan o lima niyan odi na makaonot ko kaposan a magethak ko ig, na amay ka onaban iyan so mabala a seki niyan na makaliyo a langowan a dosa a liyalakao sekaniyan o seki niyan sa makaonot ko ig odi na sii ko kaposan a thak o ig, sa makaliyo sekaniyan a malolompiyo ko manga dosa.__________________So Hadith na Sahih piyakambowat o Muslim (244)

31/62- Go piyanothol iyan raken, tig o Malik, a phoon ko Ishaq Bin Abdillah Bin Abi Talhah, a phoon ko Anas Bin Malik a pitharo iyan a: Miyailay aken so Rasulullah a miyakarani so sambayang a Asr, na miloloba so manga tao sa ig a miphagabdas iran na daa miyatoon iran, na aden a minioma ko Rasulullah a ig a iphagabdas a matatangel, na inibetad o Rasulullah a lima niyan sangkoto a tatangelen a ig, oriyan iyan na siyogo iyan so manga tao a magabdas siran on. Pitharoo Anas a: Miyailay aken so ig a phagembowat ko pageletan o manga kemer iyan, na

miyamagabdas so manga tao sa taman sa miyapopos siran mamagabdas.__________________So Hadith na Sahih piyakambowat o Bukhari (169) ago so Muslim (2779)

32/63- Go piyanothol iyan raken, tig o Malik, a phoon ko Nuaim Bin Abdillah Al Madani Al Mujmir, a miyaneg iyan so Abu Hurayrah a giiniyan tharoon a: Sa tao a magabdas sa impidan iyan so abdas iyan oriyan iyan na lomiyo sa bantaken iyan so kapezambayang, na sekaniyan na madadalem den ko sambayang ko tenday a kababantaka niyan ko kapezambayang, sa aden a ipezorat a rek iyan a mapiya ko oman i salakad iyan, ago pephonasan sa dosa sa datar oto, na amay ka maneg o isa rekano so qamat na di phalalagoy. Aya mala rekano i balas na so lebi a mawatan rekano i walay (ko masjid) na pitharo iran a: Ino to hay Abu Hurayrah? Na pitharo iyan a: Sabap ko kadakel a pekhalakad iyan (ko kapezong iyan ko masjid).__________________So Hadith na Mawquf, so bo so Malik i miyanothol on, ogaid na miyakokom sa Marfu’, sabap sa aden a datar iyan a piyanothol sa Marfu’.

33/64- Go piyanothol iyan raken, tig o Malik, a phoon ko Yahya Bin Said, a miyaneg iyan so Said Bin Al Musayyib a phagizaan makapanatg ko kapagabdas phoon ko kapamopo ko kiyaodo. Na pitharoo Said a: Giyoto na abdas o manga babay.__________________So Hadith na Maqtu’, so bo so Malik i miyanothol on.

34/65- Go piyanothol iyan raken, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a so Rasulullah na pitharo iyan a:

Igira mininom so aso ko pananagoay o isa rekano na onabi niyan sa makapito.__________________So Hadith na Sahih, piyakambowat o Bukhari (176) ago so Muslim (279)..

35/66- Go piyanothol iyan raken, tig o Malik, a minisampay ron a so Rasulullah na pitharo iyan a: Paginontolan kano, go di niyo den khagaga so katarotopi ko manga paliogat rekano, go nggalebeka niyo so manga paliyogat rekano, go aya mapiya ko manga galebek iyo na so sambayang, go da a ziyap ko kaaabdas lalayon a rowar sa (tarotop i) paratiyaya.__________________So Hadith na Mursal, siyophon sekaniyan o Ibn Majah (277) a phoon ko Thawban, go iniitong sekaniyan o Al Albani sa Hadith a sahih..

7- Pinto a Piyayagan ko Kasapowa ko Olo

Ago so dowa a Tangila

36/67- Piyanothol raken o Yahya, tig o Malik, a phoon ko Nafi’ a phoon ko Abdullah Bin Umar a miyaaden a pekhowa ko ig sa nggolalan ko manga kemer iyan sa iphagonab iyan ko tangila niyan.__________________So Hadith na Mawquf, so bo so Malik i miyanothol on.

37/68- Go piyanothol raken o Yahya, tig o Malik, a inisampay ron a so Jabir Bin Abdillah al Ansari na inizaan makapantag ko kasapowa a ig ko Imamah (tobao ko olo) na pitharo iyan a: Di’ taman sa di masapowa ig so bok ko olo.

__________________So Hadith na Mawquf a Munqati’ so bo so Malik i miyanothol on.

38/69- Go piyanothol iyan raken, tig o Malik, a phoon ko Hisham Bin Urwah a so Abu Urwah Bin Az Zubayr na miyaaden a pephokasen iyan so tobao niyan sa pezapon iyan a olo niyan a ig.__________________So Hadith na Maqtu’, so bo so Malik i miyanothol on.

39/70- Go piyanothol iyan raken, tig o Malik, a phoon ko Nafi’ a miyailay niyan so Safiyyah Bint Abi Ubayd a karoma o Abdullah Bin Umar a pephokasen iyan so salimot iyan sa pezapon iyan a olo niyan a ig, a so Nafi’ sa masa oto na maito pen i idad. Go inizaan so Malik, ko makapantag ko kasapowa ko tobao ago so salimot, na pitharo iyan a: Di ndait oba sapowa o mama go di pen so babay so tobao niyan ago so salimot iyan, sa aya khasapo iran na so olo iran a dowa. Go inizaan so Malik, makapantag sa mama a miyagabdas, na kiyalipatan iyan oba niyan masapo a ig so olo niyan, sa taman sa miyamara so abdas iyan, na pitharo iyan a aya tindeg aken na khasapo niyan a olo niyan, na amay ka miyakazambayang den, na khakasoy niyan so sambayang iyan.__________________So Hadith na Mawquf, so bo so Malik i miyanothol on.

8- Pinto a Piyayagan ko Kasapowa ko Dowa a Muza

40/71- Piyanothol raken o Yahya, tig o Malik, a phoon ko Ibn Shihab a phoon ko Ubbad Bin Ziyad, a

ped ko wata i Al Mugirah Bin Shu’bah a phoon ki ama iyan a phoon ko Al Mugirah Bin Shu’bah a so Rasulullah na tomiyonay sa hajah (ko kaodo odi na katiti) ko kiyathidawa sa Tabuk, na pitharoo Al Mugirah a lomiyalakao ako a ped iyan a maawid ako sa ig, na miyakaoma so Rasulullah na inododan aken sekaniyan sa ig na miyanagop, na ipeliyo niyan a lima niyan ko peso o jubbah niyan na da niyan magaga sabap ko kailiget iyan, ka pagonaban iyan a ig, na sii niyan piyakaliyo a lima niyan ko sagayadan o jubbah niyan na inonaban iyan a lima niyan ago siyapo niyan a olo niyan a go siyapo niyan so dowa a talompa iyan, na miyakaoama so Rasulullah ago so Abdurrahman Bin Awf, sa phagimaman iyan siran, sa pizambayangan iyan siran sa sarakaat, na pizambayangan kiran o Rasulullah so rakaat a miyalamba kiran, na kiyatekawan so manga tao, na kagiya makapasad so Rasulullah na pitharo iyan a: Minggolaola kano sa mapiya. (Aya petharoon a muza na so talompa a kobal a gagakoten ko seki a maregen so kaphagendai ron o somosolot on, di saya kithakes so manga taompa a kalalayaman a malebod a soloten, sopeman so manga talompa a maregen a soloten ka datar o manga talompa o manga sondaro a pembethowan sa tropical na khapakay a aya iran den pezapon ka datar o muza. So mindiyorobasa.)__________________So Hadith na Sahih, piyakambowat o Bukhari (182) ago so salakao ron, go so Muslim (274) So Jubbah na soson a nditaren a ipekhokos ko lawas..

41/72- Go piyanothol iyan raken, tig o Malik, a phoon ko Nafi’ ago so Abdullah Bin Dinar a piyanothol iran on a so Abdullah Bin Umar na miyakaoma sa Al kufah ko Sa’d Bin Abi Waqqas a sekaniyan i dato roo na miyailay sekaniyan o Abdullah Bin Umar a pezapo sekaniyan sa muza. Na siyangka iyan oto, na pitharoon o Sa’d a: Izaingka si

ama aka amay ka makaoma ka on, na miyakaoma so Abdullah na kiyalipatan iyan oba niyan oto miiza ko Umar, sa taman sa miyakaoma so sa’d, na pitharo iyan a: Ino miniiza aka ki ama aka? Na pitharo iyan a: da’, na iniiza on a Abdullah, na pitharo iyan a: Igira inisoled ka asekingka ko muza a siran na maaabdas na sapowangka siran, na pitharoo Abdullah a apiya miyakaodo so isa rekami (na zapo den) na pitharoo Umar a: Oway, apiya miyakaodo so isa rekano.____________________So Hadith na Sahih, piyakambowat o Bukhari(202)

42/73- Go piyanothol iyan raken, tig o Malik, a phoon ko Nafi’ a so Abdullah Bin Umar na tominiti sa padian oriyan iyan na miyagabdas, na siyagopan iyan so paras iyan, ago so mbalaa lima niyan ago siyapo niyan so olo niyan, oriyan iyan na tiyawag sa janazah ka an iyan kasambayangi kagiya makasoled sa masjid na siyapo niyan so dowa a muza niyan oriyan iyan na siyambayangan iyan.____________________So Hadith na Mawquf, so bo so Malik i miyanothol on.

43/74- Go piyanothol iyan raken, tig o Malik, a phoon ko Said Bin Abdirrahman Bin Ruqaysh a pitharo iyan a: Miyailay aken so Anas Bin malik a miyakaoma sa Quba na tominiti, na oriyan iyan na kiyaomaan sa ig a iphagabdas iyan. Na siyagopan iyan so paras iyan ago so mbala a lima niyan sa taman ko dowa siko, na siyapo niyan so olo niyan, ago siyapo niyan so talompa iyan, oriyan iyan na somiyong sa masjid na mizambayang. Pitharoo Yahya a inizaan so Malik sa isa a mama a miyagabdas sa abdas a sambayang oriyan iyan na siyolot iyan so muza niyan oriyan iyan na tominiti, oriyan iyan na inendaan iyan oriyan iyan na siyolot

iyan pharoman, ino itharos iyan den so abdas iyan? Na pitharo iyan a: Endai niyan so muza niyan na onabi niyan a seki niyan, ka aya phakasapo sa muza na so tao a siyolot iyan sekaniyan a sekaniyan na maaabdas. Na amay peman ka siyolot iyan a di maaabdas na di niyan khasapo so talompa iyan. Pitharo iyan a inizaan so Malik, sa mama a miyagabdas a somosolot sa muza na kiyalipatan iyan oba niyan masapo a ig sa taman sa miyamara so abdas iyan ago miyakazambayang, na pitharo iyan a: Khasapo niyan so muza niyan ago khakasoy niyan so sambayang iyan, sa di niyan khakasoy so kapagabdas. Go inizaan so Malik, sa mama a inonaban iyan a palo niyan oriyan iyan na siyolot iyan so muza niyan oriyan iyan na initaros iyan so kapagabdas, na pitharo iyan a: Endai niyan so muza niyan oriyan iyan na pagabdas sa onabi niyan a seki niyan.____________________So Hadith na Mawquf, so bo so Malik i miyanothol on.

9- Pinto a piyayagan ko galebek ko kasapowa ko dowa a Muza

44/75- Piyanothol raken o Yahya, tig o Malik, a phoon ko Hisham Bin Urwah a miyailay niyan si ama iyan a pezapo sa muza, na pitharo iyan a miyaaden a daa zapon iyan igira somiyapo sa muza a rowar ko liyawao niyan sa di niyan zapon so didalem iyan (palad iyan).

____________________So Hadith na Maqtu’ so bo so Malik i miyanothol on.

45/76- Go piyanothol iyan raken, tig o Malik, a inizaan iyan so Ibn Shihab, makapantag ko kasapo sa muza o andamanaya sekaniyan? Na inisoled o Ibn Shihab so isa ko lima niyan ko kababaan o muza a so sabala on na sii ko liyawao niyan oriyan iyan na piyakasagad iyan on a dowa oto. Pitharoo Yahya a: Pitharoo Malik, a so katharoo Ibn Shihab na aya lebi a pekhababayan a miyaneg aken ko makapantag roo.____________________So Hadith na Mawquf, so bo so Malik i miyanothol on.

10- Pinto a Piyayagan ko Limamad

46/77- Piyanothol raken o Yahya, tig o Malik, a phoon ko Nafi’ a so Abdullah Bin Umar na igira linimamadan na lomiyo na magabdas, oriyan iyan na komasoy na itaros iyan so sambayang iyan, sa di den petharo.____________________So Hadith na Mawquf, so bo so Malik i miyanothol on.

47/78- Go piyanothol iyan raken, tig o Malik, a minisampay ron a so Abdullah Bin Abbas na miyaaden a phelimamadan na pheliyo na onaban iyan so limamad iyan oriyan iyan na komasoy na itaros iyan so kiyazambayangan iyan.____________________So Hadith na Mawquf, ago Munqati’ so bo so Malik i miyanothol on.

48/79- Go piyanothol iyan raken tig o Malik, a phoon ko Yazid Bin Abdillah Bin Qusayt Al laythi a

miyailay niyan so Said Bin Al Musayyib a linimamadan a sekaniyan na giizambayang na somiyong ko bilik o Ummu Salamah a karoma o Nabi na inewitan sa ig a iphagabdas na miyagabdas oriyan iyan na komiyasoy na giyanap iyan so kiyazambayangan iyan.____________________So Hadith na Maqtu’ so bo so Malik i miyanothol on.

11- Pinto a Piyayagan ko Galebek ko Limamad

49/80- Piyanothol raken o Yahya, tig o Malik, a phoon ko Abdurrahman Bin Harmalah Al Aslami a pitharo iyan a: Miyailay aken so said Bin Al Musayyib a phelimamadan, sa pephakapoon on so rogo sa taman sa mabasa so manga kemer iyan ko rogo a pephakaliyo ko ngirong iyan, oriyan iyan na zambayang sa di phagabdas.____________________So Hadith na Maqtu’ so bo so Malik i miyanothol on.

50/81- Go piyanothol iyan raken, tig o Malik, a phoon ko Abdurrahman Bin Al Mujabbar, a miyailay niyan so Salim Bin Abdillah a aden a pephakapoon ko ngirong iyan a rogo, sa taman sa mabasa so manga kemer iyan, sa pekhaogen iyan oriyan iyan na giizambayang sa di phagabdas.____________________So Hadith na Mawquf, so bo so Malik i miyanothol on.

12- Pinto a piyayagan ko tao a miyakala on so rogo sabap sa pali odi

na limamad

51/82- Piyanothol raken o Yahya, tig o Malik, a phoon ko Hisham Bin Urwah a phoon ki ama iyan a so Miswar Bin Makhramah na piyanothol iyan on, a sekaniyan na miyakasoled ko Umar Bin Al Khattab ko kagagawii a kiyagonongi ron, sa piyokao niyan so Umar ko sambayang a Subh, na pitharoo Umar a: Oway, da a kipantag ko Islam i tao a ibagak iyan so sambayang, na mizambayang so Umar a so pali iyan na pezolapay sa rogo.____________________So Hadith na Mawquf, so bo so Malik i miyanothol on.

52/83- Go piyanothol iyan raken, tig o Malik, a phoon ko Yahya Bin Said a so Said Bin Al Musayyib na pitharo iyan a: Antonaai ka pipikira niyo ki tao a makala on so rogo a ped sa limamad sa di ron khapinda? Na pitharoo Malik a: Pitharoo Yahya Bin Said, oriyan iyan na pitharoo o Said Bin Al Musayyib a: Aya mapipikir aken on na ipaginsarat iyan so olo niyan sa kapaginsarat (ko giikazambayang ko roko ago so sojud). Piharoo Yahya a: Pitharoo Malik, a giyoto i mapiya sii raken sangkoto.____________________So Hadith na Maqtu’ so bo so Malik i miyanothol on.

13- Pinto a piayayagan ko Kapagabdas phoon ko Madi

53/84- Piyanothol raken o Yahya, tig o Malik, a phoon ko Abu An Nadhr a sanasanaan o Umar Bin Ubaydillah a phoon ko Sulayman Bin Yasar, a phoon ko Al Miqdad Bin Al Aswad, a so Ali Bin Abi Talib na siyogo iyan sekaniyan sa kiizaan iyan on ko Rasulullah, makapantag ko mama a igira miyakarani ko karoma niyan na pheliyowan a madi na antonaa i zowaan iyan? Pitharoo Ali, a kagiya karoma ko so wata a babay o Rasulullah na ipekhaya aken o ba ko ron oto izaan, na pitharoo Al Miqdad a: Iniiza aken oto ko Rasulullah na pitharo iyan a: Igira miyasowa oto o isa rekano na onabi niyan a piyamalongan iyan sa ig, na pagabdas sa abdas ko sambayang.____________________So Hadith na Munqati, go piyakambowat sekaniyan o Bukhari (132) ago so Muslim (303) a ped ko thotol o Ibn Abbas a phoon ko Al Miqdad..So Madi na sekaniyan so ig a malindeg a pephakapoon ko piyamalongan o mama igira riyaot a kabaya.

54/85- Go piyanothol iyan raken, tig o Malik, a phoon ko Zayd Bin Aslam, a phoon ki ama iyan a so Umar Bin Al Kattab na pitharo iyan a: Mataan a pekhatoon aken sekaniyan a (madi) a pekhalilid raken sa datar o maito a khuzayrah????, na amay ka matoon oto o isa rekano na onabi niyan a piyamalongan iyan, na pagabdas ko abdas sa sambayang.____________________So Hadith na Mawquf, so bo so Malik i miyanothol on.

55/86- Go piyanothol iyan raken, tig o Malik, a phoon ko Zayd Bin Aslam, a phoon ko Jundub a sanasanaan o Abdullah Bin Ayyash a pitharo iyan a: Iniiza aken ko Abdallah Bin Umar so makapantag ko Madi, na pitharo iyan a: Igira miyatoon ka sekaniyan

na onabingka so piyamalongan ka, na pagabdas ka ko sambayang.____________________So Hadith na Mawquf, so bo so Malik i miyanothol on.

14- Pinto a piyayagan ko Philebolebod ko kibagaken ko Abdas phoon ko Madi

56/87- Piyanothol raken o Yahya, tig o Malik, a phoon ko Yahya Bin Said, a phoon ko Said Bin Al Musayyib, a miyaneg iyan ago aden a sakatao a mama a phagizaan iyan sa pitharo iyan a: Pekhatoon aken a mawasa a saken na giiako zambayang, ino pembengkas ako? Na pitharoon o Said a: Opama o toga ko bobon aken na di ako mbengkas sa taman sa matonay aken so sambayang aken.____________________So Hadith na Maqtu’ , so bo so Malik i miyanothol on.

57/88- Go piyanothol iyan raken, tig o Malik, a phoon ko As Salt Bin Zubayd a pitharo iyan a: Iniiza aken ko Sulayman Bin Yasar, so makapantag ko basa a pekhatoon aken sekaniyan, na pitharo iyan a: Onabingka so miyatago ko nditaren ka, na dapay angka den.____________________So Hadith na Maqtu’, so bo so Malik i miyanothol on.

15- Pinto a piyayagan ko abdas phoon ko Kazekhoa ko sangoran

(piyamalongan)

58/89- Piyanothol raken o Yahya, tig o Malik, a phoon ko Abdullah Bin Abi Bakr Bin Muhammad Bin Amr Bin Hazm a miyaneg iyan so Urwah Bin Az Zubayr a giiniyan tharoon a: Somiyoled ako ko Marwan Bin Al hakam, na piyangangaloy ami so nganin a khaaden on so abdas, na pitharoo Marwan a: Go sii ko kazekhoa ko piyamalongan na khaaden so abdas. Na pitharoo Urwah a: Da ko anan katokawi, na pitharoo Marwan Bin Al Hakam a: Piyanothol raken o Busrah Bint Safwan a miyaneg iyan so Rasulullah a giiniyan tharoon a: Igira miyazeko o isa rekano a piyamalongan iyan na pagabdas.____________________So Hadith na piyakambowat sekaniyan o khimanga rek ko manga haditha sunan, go pitharoo Al Albani a sekaniyan na hadith a sahih.

59/90- Go piyanothol iyan raken, tig o Malik, a phoon ko Ismail Bin Muhammad Bin Sa’d Bin Abi Waqqas a phoon ko Mus’ab Bin Sa’d Bin Abi Waqqas a pitharo iyan a: Miyaaden ako a komakapet ako sa Mushaf (Qur’an) ko Sa’d Bin Abi Waqqas, na miyangongokot ako, na pitharoo Sa’d a obangka baden kiyakapetan a sangoran ka? Na pitharo aken a: Oway, na pitharo iyan a: Pagabdas ka, na tominindeg ako na miyagabdas ako oriyan iyan na komiyasoy ako ron,____________________So Hadith na Mawquf, so bo so Malik i miyanothol on.

60/91- Go piyanothol iyan raken, tig o Malik, a phoon ko Nafi’ a so Abdullah Bin Umar na giiniyan

tharoon a: Igira miyasekho o isa rekano a piyamalongan iyan, na miyawajib on so kapagabdas.____________________So Hadith na Mawquf, so bo so Malik i miyanothol on.

61/92- Go piyanothol iyan raken, tig o Malik, a phoon ko Hisham Bin Urwah a phoon ki ama iyan, a giiniyan tharoon a: Sa tao a masekho iyan a piyamalongan iyan na sabenar a miyawajib on so abdas.____________________So Hadith na Maqtu’ , so bo so Malik i miyanothol on.

62/93- Go piyanothol iyan raken, tig o Malik, a phoon ko Ibn Shihab, a phoon ko Salim Bin Abdillah a pitharo iyan a: Miyailay aken so Abu Abdillah Bin Umar a giiphaygo oriyan iyan na giimagabdas, na pitharo aken on a hay ama ba reka di phakaampel so kaphaygo ko abdas? Na pitharo iyan a: Engkaino di, ogaid na saken na pekhakapetan aken a piyamalongan aken, na giiako magabdas.____________________So Hadith na Mawquf, so bo so Malik i miyanothol on.

63-94- Go piyanothol iyan raken, tig o Malik, a phoon ko Nafi’ a phoon ko Salim Bin Abdillah a pitharo iyan a: Miyaaden ako a ped aken so Abdullah Bin Umar sa isa a kapelayalayag na miyailay aken sekaniyan ko oriyan o kiyasebang o alongan a miyagabdas na mizambayang, na pitharo aken on a: Giyai na sambayang a kena o bangka giizambayangi? Na pitharo iyan a: Oriyan o kiyapagabdas aken ko sambayang a Subh na miyasekho aken a piyamalongan aken oriyan iyan na kiyalipatan aken o ba ako pagabdas, na miyagabdas ako ago mizambayang ako.____________________So Hadith na Mawquf, so bo so Malik i miyanothol on.

16- Pinto a piyayagan ko Abdas ko kaareki o mama ko karoma niyan

64/95- Piyanothol raken o Yahya, tig o Malik, a phoon ko Ibn Shihab a phoon ko Salim Bin Abdillah a phoon ki ama iyan a so Abdullah Bin Umar a sekaniyan na miyaaden a giiniyan tharoon a: So kaareki o mama ko karoma niyan ago so kapangapeti niyan on, na sa tao a arekan iyan so karoma niyan odi na kapetan iyan sa soden so lima niyan, na miyawajib on so kapagabdas. ____________________So Hadith na Mawquf, so bo so Malik i miyanothol on.

65/96- Go piyanothol iyan raken, tig o Malik, a minisampay ron a so Abdullah Bin Mas’ud na giiniyan tharoon a: So kaareki o mama ko karoma niyan na khipatoray niyan so abdas.____________________So Hadith na Mawquf, so bo so Malik i miyanothol on.

66/97- Go piyanothol iyan raken, tig o Malik, a phoon ko Ibn Shihab, a sekaniyan na miyaaden a giiniyan tharoon a: Sii ko kaareki o mama ko karoma niyan so kapagabdas. Pitharoo Yahya a pitharoo Malik, a giyoto i mapiya sii raken.____________________So Hadith na Maqtu’ so bo so Malik i miyanothol on.

17- Pinto a Piyayagan ko Galebek ko Kaphaigo ko Junub

67/98- Piyanothol raken o Yahya, tig o Malik, a phoon ko Hisham Bin Urwah a phoon ki ama iyan a phoon ko Aishah a ina o miyamaratiyaya a so Rasulullah na igira miphaygo ko kiyajunub na phagephoonan iyan monab so mbala a lima niyan, oriyan iyan na magabdas sa datar o abdas ko sambayang, oriyan iyan na isoled iyan a manga kemer iyan ko ig, sa isogi niyan ko manga itado o bok iyan, oriyan iyan na akopan iyan sa ig a olo niyan sa manga telo akop, oriyan iyan na pakasolapayan iyan sa ig a lawas iyan langon.____________________So Hadith na Sahih, piyakambowat o Bukhari(248) ago so Muslim (316)

68/99- Go piyanothol iyan raken, tig o Malik, a phoon ko Ibn Shihab a phoon ko Urwah Bin Az Zubayr a phoon ko Aishah a ina o miyamaratiyaya a so Rasulullah na miyaaden a giiphaigo ko pananagoay, a sekaniyan na ig a peno o telo ka gantang, ko kiyajunub iyan.____________________So Hadith na Sahih, piyakambowat o Bukhari(250) ago so Muslim (219).

69/100- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a igira miphaygo sa junub na managipoon sa onaban iyan a kawanan iyan a lima, oriyan iyan na onaban iyan a piyamalongan iyan, oriyan iyan na mamomog ago mangilek sa ig, oriyan iyan na managop ago basaan iyan a ig a mata niyan, oriyan iyan na onaban iyan a kawanan a lima niyan oriyan iyan na giya diwang iyan oriyan iyan na basaan iyan a olo niyan, oriyan iyan na pakalangkapen iya so ig sa lawas iyan.____________________

So Hadith na Mawquf, so bo so Malik i miyanothol on.

70/101- Go piyanothol iyan raken, tig o Malik, a minisampay ron, a so Aishah na inizaan makapantag ko kaphaigo o babay sa junub, na pitharo iyan a: Pagododan o babay a olo niyan sa telo akop a ig, sa zoroden iyan a olo niyan sa giya lima niyan.____________________So Hadith na Mawquf, so bo so Malik i miyanothol on.

18- Pinto a piyayagan ko kiyawajib o kaphaigo igira miyakambaratemowa

so dowaa tiyorian ko mama ago so babay

71/102- Piyanothol raken o Yahya, tig o Malik, a phoon ko Ibn Shihab a phoon ko Said Bin Al Musayyib a so Umar Bin Al Khattab, ago so Uthman Bin Affan, ago so Aishah, a karoma o Nabi na miyaaden siran a giiran tharoon a: Igira miyasekho o isa a tori so datar iyan a tori (maana so kasangkapan o mama ago so babay) na miyawajib so kaphaigo.____________________So Hadith na Mawquf, so bo so Malik i miyanothol on. Mimbaloy a marfu’ ko kiyasanday niyan ko Aishah, ago piyagayonan o dowa Imam.

72/103- Go piyanothol iyan raken, tig o Malik, a phoon ko Abu An Nadhr a sanasanaan o Umar Bin Ubaydillah a phoon ko Abu Salamah Bin Abdirrahman Bin Awf a pitharo iyan a: Iniiza aken ko Aishah a karoma o Nabi so nganin a phakawajib ko kaphaigo, na pitharo iyan a: Ino katawan ka so ibarat

ka hay Abu Salamah? Datar ka o piyak a manok a pekhaneg iyan so lomezad a pekhoko na komoko a ped iyan, igira miyakapelawasa so tori o mama ago so tori o babay na miyawajib so kaphaigo. (aya maana o Hadith na andai kapakambaratemowa o dowa a sangoran o mama ago so babay sa makasoled on so diyangka a tiyorian ko mama na miyawajib so kaphaigo sa junub, melagid o miyakaliyo so mani o mama antaa ka da. So mindiyorobasa).____________________So Hadith na piyakambowat sekaniyan o Bukhari (108) ago pitharoo Al Albani a Sahih.

73/104- Go piyanothol iyan raken, tig o Malik, a phoon ko Yahya Bin Said, a phoon ko Said Bin Al Musayyib a so Abu Musa Al Ash’ari na miyakaoma ko Aishah a karoma o Nabi na pitharo iyan on a: Miyakaregen raken so kiyasobag o manga Sahabah o Nabi, sa betad a maregen raken so kaaloya ko reka on, na pitharo iyan a antonaa sekaniyan? So ipagizaaka ko ina aka na izaan ka raken sekaniyan. Na pitharo iyan a: So mama a phelawasan iyan so karoma niyan oriyan iyan na pokasen iyan on sa da makatoron so mani niyan, na pitharo iyan a: Igira miyakalampas so tori ko isa a tori na sabenar a miyawajib so kaphaigo. Na pitharoo o Abu Musa Al Ash’ari a: Da a pagizaan ko san a isa bo ko oriyan ka.____________________So Hadith na Mawquf, go piyakambowat sekaniyan Muslim a marfu’ (349).

74/105- Go piyanothol iyan raken, tig o Malik, a phoon ko Yahya Bin Said, a phoon ko Abdullah Bin Ka’b a sanasanaan o Uthman Bin Affan a so Mahmud Bin Lubayd Al Ansari na iniiza iyan ko Zayd Bin Thabit so makapantag ko mama a phelawasan iyan so karoma niyan oriyan iyan na tomareg sa di makatoron so mani niyan? Na pitharoo Zayd a

makapephaigo, na pitharoon o Mahmud a so Ubayyi Bin Ka’b na aya tindeg iyan na daa kaphaigo? Na pitharoon o Zayd Bin Thabit, a so Ubayyi Bin Ka’b na inawaan iyan oto a kepit ko da niyan pen kapatay.____________________So Hadith na Mawquf, so bo so Malik i miyanothol on.

75/106- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a giiniyan tharoon a: Igira miyakalampas so tori ko isa a tori na miyawajib so kaphaigo.____________________So Hadith na Mawquf, so bo so Malik i miyanothol on.

19- Pinto a piyayagan ko kapagabdas o tao

a miyajunub amay ka phakatorog odi na khan ko da niyan pen kapakaphaigo

76/107- Piyanothol raken o Yahya, tig o Malik, a phoon ko Abdullah Bin Dinar a phoon ko Abdullah Bin Umar a pitharo iyan a: Inaloy o Umar Bin Al Khattab ko Rasulullah a pekhasogat sekaniyan a junub ko kagagawii, na pitharoon o Rasulullah a: Pagabdas ka ago onabingka a piyamalongan ka oriyan iyan na pakatorog ka.____________________So Hadith na Sahih piyakambowat sekaniyan o Bukhari (290) ago so Muslim (306).

77/108- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Aishah a karoma o Nabi a sekaniyan na miyaaden a giiniyan tharoon a: Igira liyawasan o isa

rekano so karoma niyan, oriyan iyan na kiyabayaan iyan a kaphakatorog iyan ko da niyan pen kaphaigo, na di phakatorog taman sa di makapagabdas sa abdas sa sambayang.____________________So Hadith na Mawquf, go piyakambowat o Bukhari a Marfu’ (288) ago so Muslim (305).

78/109- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a igira phakatorog odi na khan a sekaniyan na junub, na onaban iyan a paras iyan ago so mbalaa lima niyan sa taman ko dowa a siko ago sapon iyan a olo niyan oriyan iyan na koman odi na makatorog.____________________So Hadith na Mawquf, so bo so Malik i miyanothol on.

19- Pinto a piyayagan ko kakasoy o tao a junub ko sambayang ago so

kaphaigo iyan igira mizambayang a da niyan katanodi, ago so kapipii niyan ko

nditaren iyan

79/110- Piyanothol raken o Yahya, tig o Malik, a phoon ko Ismail Bin Abi Hakim a so Ata’ Bin Yasar na piyanothol iyan on a so Rasulullah na tomiyakebir sa isa a sambayang a ped ko manga sambayang oriyan iyan na miyaginsarat kiran sa tareg siran, na lominiyo oriyan iyan na komiyasoy a sii ko lawas iyan so rarad o ig (miphaigo sa junub).____________________So Hadith na Mursal. Go piyakambowat sekaniyan o Abu Hurayrah a Marfu’, go so Bukhari (275) ago so Muslim (605).

80/111- Go piyanothol iyan raken, tig o Malik, a phoon ko Hisham Bin Urwah a phoon ko Zubayd Bin As Salt a pitharo iyan a: Lominiyo ako a ped aken so Umar Bin Al Khattab sii ko darepa a Al juruf, na kiyatademan iyan a mithataginep (sa mimbabangonan sa walay) ago miyakazam-bayang sa da makaphaigo, na pitharo iyan a: Wallahi, ka mithataginep ako, ago da ko magedam, ago miyakazam-bayang ako ago da ako makaphaigo, na pitharo iyan a: Miphaigo sekaniyan ago inonaban iyan so miyailay niyan ko nditaren iyan a rarad o mani, na siyamborakan iyan sa ig so da a miyailay niyan on, sa miyagebang odi na komiyamat oriyan iyan na mizambayang ko oriyan o kiyathenganaik o alongan.____________________So Hadith na Mawquf, so bo so Malik i miyanothol on.

81/112- Go piyanothol iyan raken, tig o Malik, a phoon ko Ismail Bin Abi Hakim, a phoon ko Sulayman Bin Yasar, a so Umar Bin Al Khattab, na miyangabalaga ko lopa iyan sa Al Juruf, na kiyatoonan iyan so nditaren iyan sa rarad a kiyathataginep na pitharo iyan a: Sabenar a tinioba ako sa kathataginep kembo aken miphaapaar so betad o manga tao (so kiyadato iyan) na miphaigo ago inonaban iyan so miyailay niyan a mani ko nditaren iyan, oriyan iyan na mizambayang ko oriyan o kiyasebang o alongan.____________________So Hadith na Mawquf, so bo so Malik i miyanothol on.

82/113- Go piyanothol iyan raken, tig o Malik, a phoon ko Yahya Bin Said, a phoon ko Sulayman Bin Yasar, a so Umar Bin Al Khattab na piyagimaman

iyan so manga tao ko sambayang a subh oriyan iyan na miyangabalaga ko lopa iyan sa Al Juruf, na kiyatoonan iyan so nditaren iyan sa rarad a kiyathataginep na pitharo iyan a: Gowani koman kami sa sibo a ayam na miyakaomel so manga ogat. Na miphaigo ago inonaban iyan so rarad o mani ko nditaren iyan ago kiyasoy niyan so sambyang iyan.____________________So Hadith na Mawquf, so bo so Malik i miyanothol on.

83/114- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Yahya Bin Abdirrahman Bin Hatib a sekaniyan na miyagumrah a ped o Umar Bin Al Khattab, sa ped siran sa salompok a moonot kiran so Amr Bin Al As, na so Umar Bin Al Khattab na domikha ko lalan sangkoto a kagagawii a marani ko manga pakaig, na mithataginep so Umar sa marani den so Subh, na daa kaawidan o lompokan a ig, na mikhoda sa somiyong ko ig, na inonaban iyan so nditaren iyan ko katatagoan on sa rarad o kiyathataginep, sa taman sa miyakaliwanag, na pitharoon o Amr Bin Al As a: Kiyapitaan ka a aden a manga nditaren tano, sa bagaken ka angkanan a nditaren ka ka an kapipii, na pitharoo Umar Bin Al Khattab, a: Piyakamemesa ka hay Amr Bin Al As! Amay ka aden a nditaren aken (a salakao) na ba langon a tao na aden a nditaren iran (a salakao) Wallahi, ka onggolaolaa ko to, na disomala a mbaloy a sunnah (lalan a phagokitan o salakao ron) ogaid na pagonaban aken so khailay aken on, na phirikan aken sa ig so da ko ron mailay. Pitharoo Malik, sa mama a kiyatoonan iyan so nditaren iyan sa rarad a kiyathataginep a di niyan katawan i kiyaaden oto, ago daa khatoosan iyan a pithataginep iyan, na pitharo iyan a: Phaigo ko

marani a kiyatoroga on, na o miyakazam-bayang sangkoto a kiyatoroga on, na kasoya niyan so kiyazambayangan iyan ko oriyan angkoto a kiyatoroga on, pantag sa so mama na khapakay a mithataginep sa da a miyailay niyan a shayi, na amay ka katoonan iyan so nditaren iyan sa mani na miyawajib on so kaphaigo, sa datar oto a so Umar na kiyasoy niyan so kiyazambayangan iyan ko kaposan a kiyatoroga on, sa da niyan kasoya so miyaonaan iyan.____________________So Hadith na Mawquf, so bo so Malik i miyanothol on.

21- Pinto a piyayagan ko kaphaigo o babay amay ka thataginep sa datar o

taginepen a mama

84-115- Go piyanothol iyan raken, tig o Malik, a phoon ko Ibn Shihab a phoon ko Urwah Bin Az Zubayr a so Ummu Sulaym na pitharo iyan ko Rasulullah a: So babay a mithataginep sa datar o kiyathataginep o mama ino makapephaigo? Na pitharoon o Rasulullah a: Oway, makapephaigo, na pitharoon o Aishah, a sayana ka, ino giithataginep so babay? Na pitharoon o Rasulullah a: Miyamiskin ka, anda pekhaaden so kapezowa o wata ko isa ko dowa lokes iyan (aya maana oto na ndatar so mama ago so babay a palaya aden a pephakapoon kiran a ig a giimakazaog a ron pephakapoon so kapezowa o wata ko oman i isa kiran, sa palaya siran makapephaigo amay ka thataginep siran. So mindiyorobasa).____________________So Hadith na Sahih piyakambowat sekaniyan o Bukhari (211).

85/116- Go Piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Zaynab Bin Abi Salamah a phoon ko Ummu Salamah a karoma o Nabi a pitharo iyan a: Miyakaoma so Ummu Sulaym a karoma o Abu Talhah Al Ansari ko Rasulullah na pitharo iyan a: Hay Rasulullah mataan a so Allah na daa ikhamamala niyan ko benar, ino ba makapephaigo so babay amay ka thataginep? Na pitharo iyan a: Oway, amay ka mailay niyan so ig (so miyakapoon on a ig ko kiyathataginep).____________________So Hadith na Sahih piyakambowat sekaniyan o Bukhari (130) AGO SO Muslim (282).

22- Pinto a piyayagan ko kiyatimoan ko

kaphaigo sa Junub

86/117- Piyanothol raken o Yahya, tig o Malik, a phoon ko Nafi’ a so Abdullah Bin Umar na giiniyan tharoon a: Daa marata a kaphaigo o mama ko miyalamba a ig a iniphaigo o babay (karoma niyan) amay ka kena o ba sekaniyan mahahaydh ago majujunub (so babay).____________________So Hadith na Mawquf. So bo so Malik i miyanothol on.

87/118- Go piyanothol iyan raken, tig o Malik, a phoon ko Nafi’ a so Abdullah Bin Umar na mkiyaaden a giimagating ko nditaren a sekaniyan na

junub oriyan iyan na giiniyan izambayang (angkoto a nditaren).____________________So Hadith na Mawquf. So bo so Malik i miyanothol on

88/119- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a phagonaban o manga oripen iyan a babay so mbalaa seki niyan a go pembegan iran sa satebi a dempas a pesojudan iyan, a siran na khihahaydh (pherogoan siran).. Go inizaan so Malik, sa mama aden a manga karoma niyan ago manga oripen a babay ino phamakain iyan siran langon ko da niyan pen kapakaphaigo? Na pitharo iyan a: Daa marata ko kasoledi o mama ko oripen iyan a babay ko da niyan pen kapakaphaigo (ko kiyalawasi niyan ko karoma niyan a maradika) na khamakruh oba pamakaya o mama so karoma niyan a maradika sii ko alongan o dowaya iyan, so peman so kaphamakaya niyan ko oripen iyan oriyan iyan na pamakain iyan so salakao ron, a sekaniyan na junub, na daa marata on. Go inizaan so Malik, sa mama a junub a iniobay ron so ig a ipephaigo iyan na miyalipat na minisombo niyan on a lima niyan ka gidam iyan i katenggao o ig ago so kayao niyan. Na pitharoo Malik, a amay ka daa a marzik ko lima niyan na aya tindeg aken na di niyan khanajisan so ig.____________________So Hadith na Mawquf. So bo so Malik i miyanothol on.

23- Pinto a piyayagan ko Kathayammum

89/120- Piyanothol raken o Yahya, tig o Malik, a phoon ko Abdurrahman Bin Al Qasim a phoon ki ama iyan a phoon ko Aishah a ina o miyamaratiyaya a pitharo iyan a: Lominiyo kami a ped o Rasulullah ko sabaad a kiyalalakao niyan, na gowani a matago kami sa Al Bayda’ odi na sa Datul Jaysh na miyarantas so salay aken na tomiyareg so Rasulullah sa piloloba iyan ago so manga tao, a da a ig sangkoto a darepa ago daa awid iran a ig, na somiyong so manga tao ko Abu Bakr As Siddiq sa pitharo iran a bangka da mailay so siyowa o Aishah, a miyasendod iyan so Rasulullah ago so manga tao, a di siran matatago ko darepa a ana ig on a go daa awid iran a ig, na pitharoo Aishah a miyakaoma so Abu Bakr ago so Rasulullah na moolon sa bobon aken a tiyorog, na pitharo iyan a: Tiyarongko oka so Rasulullah ago so manga tao a daa ig sii ago daa awid a ig?! Sa pimbongetan ako o Abu Bakr sa miyamanaro sa manga katharo, sa ipezokhar iyan a kemer iyan sa kasadan aken na daa miyakasapar raken ko kakhaokhaog a rowar ko kaoolon raken o Rasulullah, sa miyakatorog so Rasulullah sa taman sa kiyapitaan a da den a ig, na piyakatoron o Allah so ayat a kathayammum na mithatayammum siran, na pitharoo Usayd Bin Hudhayr a: Kena o ba sekaniyan i paganay a kabarakat iyo hay pamiliya o Abu Bakr. Na pitharo iyan (so Aishah) a piyakaganat iran so onta a khokodaan aken na miyatoon iran so salay ko kalelekowan iyan. Go inizaan so Malik, sa mama a mithayammum sa sambayang a kapapantagan oriyan iyan na miyakaoma so isa a waqto a sambayang ino pethayammum on pharoman? Antaa ka ampel on so tayammum iyan a paganay? Na pitharo iyan a: Makapethayammum ko oman i sambayang, ka kagiya patoray ron a kapeloba iyan sa ig ko oman i

sambayang, na sa meloba sa ig oriyan iyan na daa matoon iyan na makapethayammum. Go inizaan so Malik, sa mama a mithayammum ino kaphagimaman iyan so manga ped iyan a miyagabdas siran? Pitharo iyan a aya phagimam na so salakao ron, ogaid na o pagimam na daa marata on. Pitharoo Yahya a: Pitharoo Malik, sa mama a mithayammum sabap ko kadaa ig, na tominindeg ago tomiyakebir ko sambayang, na miyakagemao ron a manosiya a maawid sa ig, na pitharoo Malik, a: Di niyan khitareg so sambayang iyan, ogaid na khitaros iyan a sekaniyan na mithayammum, ogaid na makaphagabdas ko phakaoma a sambayang. Pitharoo Yahya a: Pitharoo Malik a: Sa tao a tomindeg ko sambayang sa daa miyatoon iyan a ig sa pinggalebek iyan so inisogoon o Allah a ped sa tayammum na sabenar a kiyaonotan iyan so Allah, na kena o ba so miyakatoon sa ig na ba lebi a soti a di sekaniyan ago kena o ba so sambayang iyan i lbe a mapiya. Ka kagiya siyogo siran a dowa na oman i isa kiran na ininggolalan iyan so inisogoon o Allah, na aya inisogoo Allah ko abdas na sii ko kaaden o ig, na so tayammum na sii ko tao a daa miyatoon iyan a ig, ko da niyan pen kasoled ko sambayang. Go pitharoo Malik, ko mama a majijunub a sekaniyan na makapethayammum, ago khabatiya iyan so misesenggay a pembatiyaan iyan ko Qur’an (hizb) ago makaphanambayang so sunat sa taman sa di makatoon sa ig, sa sii oto ko darepa a khapakay ron so kazambayang iyan sa nggolalan sa tayammum.____________________So Hadith na Sahih, piyakambowat o Bukhari (334) ago so Muslim (367).

23- Pinto a piyayagan ko galebek ko kathayammum

90/121- Piyanothol raken o Yahya, tig o Malik, a phoon ko Nafi, a miyakaoma sekaniyan ago so Abdullah Bin Umar a phoon siran sa Al Juruf na kagiya matago siran sa Al Mirbad, na tomipad so Abdullah na mithayammum sa bayanek a soti, na siyapo niyan a paras iyan ago so mbala a lima niyan sa taman ko dowa siko, oriyan iyan na mizambayang.____________________So Hadith na Mawquf. So bo so Malik i miyanothol on

91/122- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a giithayammum sa taman ko dowa a siko, go inizaan so Malik, o andamanaya so kathayammum ago anda taman? Na pitharo iyan a: Indapelak iyan a palad a lima niyan ko bayanek sa makaisa na izapo niyan sa paras iyan, ago sadapelak a pantag ko mbala a lima niyan sa taman ko dowa a siko.____________________So Hadith na Mawquf. So bo so Malik i miyanothol on.

25- Pinto a piyayagan ko kapethayammum

o tao a junub

92/123- Piyanothol raken o Yahya, tig o Malik, a phoon ko Abdurrahman Bin Harmalah a aden a sakatao a mama a inizaan iyan so Said Bin Al Musayyib makapantag ko mama a junub a

mithayammum oriyan iyan na matoon iyan so ig? Na pitharoo Said a: Amay ka matoon iyan so ig na makapephaygo ko sambayang iyan a phakatalingoma. Pitharoo Malik, ko tao a mithataginep a sekaniyan na giimelayalayag ago daa makokowa niyan a ig a rowar ko iphagabdas iyan, a sekaniyan na di khawao sa taman sa misampay ko aden a ig on, na pitharo iyan a ipagonab iyan angkoto a ig sa piyamalongan iyan ago so kiyataresikan sangkoto a mani niyan, oriyan iyan na makapethayammum sa bayanek a soti, sa datar o kiyasogoa on o Allah. Go inizaan so Malik makapantag sa mama a junub a khabaya thayammum, na daa a miyatoon iyan a bayanek a rowar sa lopa a matimos na ino ipethayammum iyan angkoto a soson a lopa? Ago ino ba makru so kazambayang ko lopa a matimos? Pitharoo Malik, a: Da a marata ko kazambayang ko lopa a matimos ago so kathayamum on, kagiya so Allah na pitharo iyan a: Thayammum Kano sa bayanek a soti a sekaniyan so lopa, na langowan a lopa na mipethayammum, melagid o matmos antaa ka di.____________________So Hadith na Maqtu’. So bo so Malik i miyanothol on.

26- Pinto a Piyayagan ko khahalal ko mama so kasawiti niyan on ko karoma niyan a mahahaydh

93/124- Piyanothol raken o Yahya, tig o Malik, a phoon ko Zayd Bin Aslam, a aden a sakatao a mama a inizaan iyan so Rasulullah sa pitharo iyan a: Antonaa i khahalal raken ko karoma ko a sasagaden

a haydh? Na pitharoo Rasulullah a: Ilota niyan so tinambed iyan na sawitingka so kaporoan iyan.____________________So Hadith na Mursal, So bo so Malik i miyanothol on.Ogaid na aden a miyakabager on a salakao a hadith.

94/125- Go piyanothol iyan raken, tig o Malik, a phoon ko Rabiah Bin Abdirrahman a so Aishah a karoma o Nabi na miyaaden a miiga a totorogen a ped o Rasulullah, sa thatanggob siran sa satiman a nditaren, na minitekao a tominikharas sa magaan, na pitharoo o Rasulullah a: Inoka nan? Baanda reka miyakaoma. Na pitharo iyan a: Oway, na pitharo iyan a: Ilot angka so tinambed ka sa ginawangka, na kasoy ka ko igaan ka.____________________So Hadith na Mursal. So bo so Malik i miyanothol on. Ogaid na miyaaloy ko dowa a Sahih so thotol ogaid na sii panonompang ko Ummu salamah.

95/126- Go piyanothol iyan raken, tig o Malik, a phoon ko Nafi a so Ubaydullah Bin Abdillah Bin Umar na piyakisogoan iyan so Aishah sa inizaan iyan o ino khapakay a lawasan o mama so karoma niyan a mahahaydh? Na pitharo iyan a: Ilota niyan so tinambed iyan sa kasadan na lawasi niyan sa poro o khabayai niyan.____________________So Hadith na Mawquf. So bo so Malik i miyanothol on.

96/127- Go piyanothol iyan raken, tig o Malik a minisampay ron a so Salim Bin Abdillah ago so Sulayman Bin Yasar na inizaan siran a dowa makapantag ko babay a mahahaydh, o ino khapakay a lawasan o karoma niyan, amay ka mada on so basa a da pen makaphaigo? Na pitharo iran a: Di’ taman sa di makaphaigo.

____________________So Hadith na Mawquf. So bo so Malik i miyanothol on.

27- Pinto a piyayagan ko kakhasoti o babay a mahahaydh

97/128- Piyanothol raken o Yahya, tig o Malik, a phoon ko Alqamah Bin Abi Alqamah a phoon ko ina iyan a sanasanaan o Aishah a ina o miyamaratiyaya na pitharo iyan a: Miyaaden so manga babay a ipephakawit iran ko Aishah a pananagoay a tatagoan iran sa gapas a aden a tanda on o haydh a warna a mabinaning, sa iphagiza iran o khapakay oto a izambayang, na giiniyan kiran tharoon a: Di kano penggagaan sa taman sa mailay niyo so ig a mapoti, aya bantak iyan roo na so kiyasoti ko haydh.____________________So Hadith na Mawquf. So bo so Malik i miyanothol on.

98/129- Go piyanothol iyan raken, tig o Malik, a phoon ko Abdullah Bib Abi Bakr a phoon ko babo iyan a phoon ko wata a babay o Zayd Bin Thabit a inisampay ron a so manga babay rekano na pekhowa siran sa palitaan ko look a gawii sa phagilain iran so kiyasoti ran ko basa (rogo) na miyaaden sekaniyan a pephaawingen iyan oto sii kiran, sa giiniyan tharoon a: Da maaden so manga babay oba iran oto giinggolaolaa. Inizaan so Malik, makapantag ko babay a mahahaydh a miyasoti na daa khatoon iyan a ig ino pethayammum? Na pitharo iyan a: Oway, pethayammum ka aya ibarat iyan na datar o madijunub a may ka daa matoon iyan a ig na makapethayammum.____________________

So Hadith na Mawquf. So bo so Malik i miyanothol on.

28- Pinto a piayayagan ko Kahaydh

99/130- Piyanothol raken o Yahya, tig o Malik, a minisampay ron a so Aishah a karoma o Nabi na pitharo iyan makapantag ko babay a maogat a pherogoan a khibagak iyan so sambayang (ko kasasagad o rogo).____________________So Hadith na Mawquf. So bo so Malik i miyanothol on.

100/131- Go piyanothol iyan raken, tig o Malik, a inizaan iyan so Ibn Shihab makapantag ko babay a maogat a phrogoan? Na pitharo iyan a: Phakatapelek zambayang. Pitharoo Yahya a: Pitharoo Malik, a giyoto i tindeg ami.____________________So Hadith na Maqtu’. So bo so Malik i miyanothol on.

101/132- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Aishah a karoma o Nabi a pitharo iyan a: Miyaaden ako a pezaledain aken so bok o Rasulullah a saken na mahahaydh.____________________So Hadith na Sahih, piyakambowat o Bukhari (295) go so Muslim (297).

102/133- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Fatimah Bint Al Mundir Ibn Az Zubayr a phoon ko Asma’ Bint Abi Bakr As Siddiq a pitharo iyan a: Aden a babay a inizaan iyan so Rasulullah sa

pitharo iyan a: Antonaa amay ka so isa rekami na masogat a rogo so nditaren iyan antonaa i ikhidia niyan on? Na pitharoo Rasulullah a: Igira kiyatagoan sa rogo a haydh so nditaren o isa rekano (a manga babay) na kosowa niyan ko ig ago onabi niyan a ig oriyan iyan na zambayangen iyan.. ____________________So Hadith na Sahih, piyakambowat sekaniyan o Bukhari (307) ago so Muslim (291).

28- Pinto a piyayagan ko babay a di ron

khada so rogo sa mathay

103/134- Piyanothol raken o Yahya, tig o Malik, a phoon ko Hisham Bin Urwah a phoon ki ama iyan, a phoon ko Aishah a karoma o Nabi, a pitharo iyan a: Pitharoo Fatimah Bin Abi Hubaysh a: Hay Rasulullah saken na di ako khasoti (di raken khada so rogo) ino imbagak aken so sambayang? Na pitharoon o Rasulullah a: Giyoto na sakit, a kena o ba haydh na amay ka somagad so masa a kapekhahaydh ka na bagaken ka on so sambayang, na amay ka maipos so masa niyan na onabangka sa lawas ka so rogo na zambayang ka (apiya pen perogoan ka sa masa oto).____________________So Hadith na Sahih, piyakambowat sekaniyan o Bukhari (228) ago so Muslim (333).

104/135- Go Piyanothol iyan rekaen, tig o Malik, a phoon ko Nafi’ a phoon ko Sulayman Bin Yasar, a phoon ko Ummu Salamah a karoma o Nabi a aden a babay a di khadaan sa rogo ko masa o Rasulullah, na iniiza o Ummu Salamah so betad iyan ko Rasulullah, na pitharo iyan a: Khanayao niyan so

bilangan o manga kagagawii ago daondao a pekhahaydh on, ko da on pen kisogat angkoto a misosogat on, na khibagak iyan roo so sambayang sangkoto a manga gawii, na amay ka maipos na makapephaigo ago khaolen iyan so pekhapoonan o rogo sa bengawan iyan a nditaren, oriyan iyan na makapezambayang.____________________So Hadith na piyakambowat sekaniyan o Abu Daud (274) ago so An Nasai (1/182) go so Ibn Majah (623) ago pitharoo Al Albani a sekaniyan na Sahih.

105/136- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a phoon ko Zayban Bint Abi salamah a miyailay niyan so Zaynab Bint Jahsh a matatago sa tangan i Abdurrahman Bin Awf a miyaaden a pherogoan sa di ron khada, na giiphaygo ago giizambayang.____________________So Hadith na Mawquf. So bo so Malik i miyanothol on.106/137- Go piyanothol iyan raken, tig o Malik, a phoon ko Sumayya a sanasanaan o Abi Bakr Bin Abdirrahman a so Al Qa’qa’ Bin Hakim ago so Zayd Bin Aslam na siyogo iran a dowa sekaniyan ko Abu Said Bin Al Musayyib sa phagizaan iyan o andamanaya i kapephaigo o babay a di rob khada so rogo, na pitharo iyan a: Makapephaigo ko sa kasoti sa taman sa isa a kasoti ago makaphagabdas ko oman i sambayang, na amay ka makareges on so rogo na makapendaphik (khaolen iyan a tiyabas od na gapas so pekhapoonan o rogo sa bengawan iyan).____________________So Hadith na Maqtu’. So bo so Malik i miyanothol on.

107/138- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a pitharo iyan a: Da a patoray ko babay a dikhadaan sa

rogo a rowar sa kaphaigo iyan sa paigo a satiman, oriyan iyan na makaphagabdas ko oriyan oto ko oman i sambayang. Pitharoo Yahya, a: Pitharoo Malik, a: Aya tindeg ami na so babay a di khadaan sa rogo na amay ka makazambayang na khapakay ko karoma niyan a kalawasi niyan on, sa datar oto mambo so manga babay a phrogoan ko kiyambawata amay ka maipos so masa a kaninipas iyan na amay ka rogoan na khapakay ko karoma niyan a kalawasi niyan on ka sekaniyan na datar o mustahadhah sa kokoman. Aya mustahadhah na so babay a di ron khada so rogo. Pitharoo Yahya a pitharoo Malik, a aya tindeg ami ko mustahadhah, na so miyaaloy o Hisham Bin Urwah, a phoon ki ama iyan, sa giyoto i mapiya rekami a tindeg.____________________So Hadith na Maqtu’. So bo so Malik i miyanothol on.

30- Pinto a piayayagn ko kokoman o titi

o maito a wata

108/139- Piyanothol raken o Yahya, tig o Malik, a phoon ko Hisham Bin Urwah a phoon ki ama iyan a phoon ko Aishah a karoma o Nabi a pitharo iyan a: Aden a minioma ko Rasulullah a maito a wata na tinitian iyan sonditaren iyan (so Rasulullah) na miyakikowa so Rasulullah sa ig, na inodod iyan on.____________________So Hadith na Sahih, piyakambowat o Bukhari (222) ago so Muslim (101).

109/140/ Go piyanothol iyan raken, tig o Malik, a phoon ko Ibn Shihab, a phoon ko Ubaydullah Bin

Abdillah Bin Utbah Bin Mas’ud a phoon ko Ummu Qays Bint Mihsan, a aden a minioma niyan a wata iyan a maito a da pen pakakana sa pangengken sii ko Rasulullah na inaben iyan, na tinitian iyan so nditaren iyan, na miyakikowa sa ig so Rasulullah na inodod iyan on, sa da niyan pipii.____________________So Hadith na Mawquf. Piyakambowat o Bukhari (223) ago so Muslim (286).

31- Pinto a piyayagan ko katiti a tomitindg so pethiti

110/141- Piyanothol raken o Yahya, tig o Malik, a phoon ko Yahya Bin Said a pitharo iyan a: Miyakasoled a sakatao a A’rabi (Arab sa lomang) ko masjid o Nabi na siyawaan iyan a piyamalongan iyan ka thiti, na liyalis sekaniyan o manga tao sa taman sa miniporo so sowara, na pitharoo Rasulullah a: Awai niyo, na inawaan iran, na tominiti, oriyan iyan na inisogo o Rasulullah a kowaan so isaka panabo a ig sa ododen ko tinitian iyan.____________________So Hadith na Mursal, initompok o Bukhari (220) ago so Muslim (284)..

111/141- Go piyanothol iyan raken, tig o Malik, a phoon ko Abdullah Bin Dinar a pitharo iyan a: Miyailay aken so Abdallah Ibn Umar a pethiti a tomitindeg. Pitharoo Yahya aL Inizaan so Malik, ko kaonabi ko piyamalongan phoon ko katiti ago so kaodo oba aden a miyaaloy ron a hadith? Na pitharo iyan a: Minisampay raken a so sabaad ko miyangaiipos na miyaaden siran a giisiran magabdas ko kiyaodo

(pephamopo siran sa ig), na khabayaan aken a kaonabi aken ko sangoran ko kiyatiti (kapamopo sa ig).____________________So Hadith na Mawquf. So bo so Malik i miyanothol on.

32- Pinto a piyayagan ko kapanisig

112/143- Piyanothol raken o Yahya, tig o Malik, a phoon ko Ibn Shihab a phoon ko Ibn As Sabaq a so Rasulullah na pitharo iyan sa isa a Jumuah aL Hay manga Muslim mataan a giyai na gawii a biyaloy sekaniyan o Allah a kaliyala na phapaigo kano na sa tao a aden a borok iyan na mborok ago patoray rekano so kapanisig (kapameras).____________________So Hadith na Munqati,. Initompok sekaniyan o Ibn Majah (1098) ago piyakapiya sekaniyan o Al Albani.

113/144- Go piyanothol iyan raken, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a so Rasulullah na pitharo iyan a: Odi ko bo kaphakaregeni so manga ummat aken na disomala a isogo aken kiran so kapanisig.____________________So Hadith na Sahih, piyakambowat o Bukhari (887) ago so Muslim (252).

114/145- Go piyanothol iyan raken, tig o Malik, a phoon ko Ibn Shihab, a phoon ko Humayd Bin Abdirrahman Bin Awf, a phoon ko Abu Hurayrah a pitharo o Rasulullah a: Odi ko bo kaphakaregeni so ummat aken na disomala a isogo aken kiran so kapanisig ko oman i abdas.____________________So Hadith na Mawquf. Go aden a rek iyan a kababaloy niyan a Hadith a Marfu’.

2- Kitaban o kazambayang

1- Pinto a piyayagan ko kapagebang ko

sambayang

1/146- Piyanothol raken o Yahya, tig o Malik, a phoon ko Yahya Bin Said, a pitharo iyan a: Miyaaden so Rasulullah a kiyabayaan iyan a kakowa niyan sa dowa a watang a kayo a pendebakan sa kapakathimoo manga tao ko sambayang (datar o tabo) na mithataginep so Abdullah Bin Zayd Al Ansari a ped ko Banu Al Harith Bin Al Khazraj sa miyailay niyan a dowa a kayo ko katotoroga on. Na pitharo iyan a giyai so datar o nganin a khabayaan o Rasulullah, na miyatharo a: Ino kano di phananawag ko sambayang (so kapagbang) na somiyong ko Rasulullah kagiya makanao, na inaloy niyan on oto, na inisogo o Rasulullah so kapagebang.____________________So Hadith na Mursal, piyakambowat o Abu Daud (499) ago so At Tirmidi (189) go so Ibn Majah (706) go pitharoo Al Albani a sekaniyan na hadith a hassan.

2/147- Go piyanothol iyan raken, tig o Malik, a phoon ko Ibn Shihab, a phoon ko Ata’ Bin Yazid Al Laythi a phoon ko Abu Said Al Khudri a so Rasulullah na pitharo iyan a: Igira miyaneg iyo so bang na tharoa niyo so datar o giitharoon o pageebang.____________________

So Hadith na Sahih, piyakambowat o Bukhari (611) AGO SO Muslim,(383).

3/148- Go piyanothol iyan raken, tig o Malik, a phoon ko Sumayya a sanasanaan o Abu Bakr Bin Abdirrahman a phoon ko Abu Salih As Saman, a phoon ko Abu Hurayrah a so Rasulullah na pitharo iyan a: Opama o katawi o manga tao so nganin a madadalem ( a mapiya) ko bang ago so saaf a paganay oriyan iyan na da a matoon iran a kakowaa iran on odi nggolalan sa kaperipa na disomala a peripaan iran, opama o katawi ran so nganin a balas a madadalem ko kapangabalagai ko sambayang a lohor na disomala a pagoradoradan iran, opama o katawi ran so nganin a madadalem ko samabayang a Isha ago so Subh na disomala a talingomaan iran apiya ba siran den pephakadola.____________________So Hadith na Sahih, piyakambowat o Bukhari (615, 654) ago so Muslim (437)..

4/149- Go piyanothol iyan raken, tig o Malik, a phoon ko Al Ala’ Bin Abdirrahman Bin Yaqub, a phoon ki ama iyan ago so Ishaq Bin Abdillah a siran a dowa na piyanotol iran on a miyaneg iran so Abu Hurayrah a giiniyan tharoon a: Pitharoo Rasulullah a: Igira kiyamatan so sambayang na di kano ron thalingoma sa pephalalagoy kano, sa talingoma kano ron a lomalanat kano, na sa riyaot iyo ron na zambayangi niyo, na so miyaipos rekano ron na tarotopa niyo, ka kagiya so isa rekano na madadalem sa sambayang ko tenday a kababantaka niyan ko sambayang.____________________So Hadith na Sahih, piyakambowat o Bukhari (636) ago so Muslim (602).

5/150- Go piyanothol iyan raken, tig o Malik, a phoon ko Abdurrahman Bin Abdillah Bin Abdirrahman Bin Abi Sa’sa’ah Al Ansari a Al Mazini a phoon ki ama iyan a piyanothol iyan on a so Abu Said Al Khudri na pitharo iyan on a: Miyailay aken seka a pekhababayan ka so (kapangayam) sa kambing ago giya pagonayan, na igira zisiika ko

kambing ka oodi na sii ko pagonayan ka na go ka miyagebang ko sambayang na poroon ka so sowarangka ko kapagbang, ka mataan a da a makaneg ko bang a jinn go da pen a manosiya do da pen a shayi inonta a zakesian iran sekaniyan ko alongan a Qiyamah, sa pitharoo Abu Said, a miyaneg aken sekaniyan ko Rasulullah.____________________So Hadith na Sahih, piyakambowat o Bukhari (609, 3296).

6/151- Go piyanothol iyan raken, tig o Malik, a phoon ko Abi Az Zinad a phoon ko Al Araj. A phoon ko Abu Hurayrah a so Rasulullah na pitharo iyan a: Igira inipananawag so kapezambayang (piyagebangan) na tomalikod so shaytan sa malagoy, sa giimamagetot sa taman sa di niyan maneg so bang, na amay ka mapasad so bang na tomalingoma, na amay peman ka kamatan so sambayang na tomalikod, na amay ka mapasad sokamat na makaoma sa phagwaswasan iyan so tao ko poso iyan, sa giiniyan tharoon a tademingka ini, tademingka ini so nganin a kalilipatan iyan, sa matatap so tao a di niyan katawan o pira rakaat i kyazambayangan iyan.____________________So Hadith na Sahih, piyakambowat o Bukhari (608) ago so Muslim (389).

7/152- Go piyanothol iyan raken, tig o Malik, a phoon ko Abu Hazim Bin Dinar a phoon ko Sahl Bin Sa’d As Saidi a pitharo iyan a: Aden a dowa a masa a phelekaan kiran so manga pinto o langit, sa mainot i pephamangeni i ba on di tarimaa so pangeni niyan: Sii ko masa a kapephagebangi ko sambayang, ago so saaf ko giikapakithidawa sa lalan ko Allah.

Go inizaan so Malik, makapantag ko bang ko alongan a Jumuah, o ino khaaden ko da pen kaoma o waqto? Na pitharo iyan a: Di khaaden inonta ko oriyan o kakhapolid o alongan. Go inizaan so Malik, ko makapantag ko kapephakadowaa ko manga lapiyat o bang ago so qamat? Go andai kakhawajib a kathindeg o manga tao ko masa a kaqamati ko sambayang? Na pitharo iyan a: Da a minisampay raken sii ko bang ago so qamat a rowar ko riyaot aken ko manga tao a giiran nggolaolaan, na so qamat na di khasowin sa makadowa, a giyoto i maaden a kekepitan o manga ulama sii ko inged tano, so peman so kathindeg o manga tao ko masa a kaqamati ron, na daa a miyaneg aken roo a taman a diyangka iyan, sa aya pekhailay aken na sii ko diyangka a khagaga o manga tao, ka kagiya aden kiran so mapened (lenggaan) na ped kiran so makhap (makasag) sa di ran khagaga o ba siran mabaloy a datar o sakatao a mama ko kapekhaokaog. Go inizaan so Malik, sa pagtao a makadadarepa sa kiyabayaan iran a katimoa iran ko sambayang a paralo, sa khabaya siran komamat sa daa bang on? Na pitharoo Malik, a giyoto na phakaampel kiran, ka so bang na khawajib sii ko masjid a giinjiyamaan ko sambayang. Go inizaan so Malik, ko makapantag ko kasalama o pephagebang ko Imam, ago so kipamangenin iyan on ko sambayang, go antawa onon i paganay a zalam on? Na pitharo iyan a: Daa minisampay raken a ba so kazalam na miyaaden ko paganay a masa. Pitharoo Yahya a: Inizaan so Malik, sa makapantag sa mama a miyagebang ko pagtao, oriyan iyan na nomiyayao o aden a phakaoma on a tao, na da a miyakaoma on a tao, na komiyamat ago mizambayang sa sekaniyan bo, oriyan iyan na miyakaoma so manga tao ko oriyan o kiyapakapasad

iyan zambayang, ino khasowin iyan so sambayang a ped iran? Na pitharo iyan a: Di niyan khakasoy so sambayang, sa sa tao a makaoma ko oriyan o kiyapakapasad iyan na zambyang sa rek o ginawa niyan. Pitharoo Yahya a: Inizaan so Malik, sa makapantag sa mama a miyagbang oriyan iyan na mizonat, na kiyabayaan iran a kazambayang iran, sa nggolalan ko kaqamat o salakao ko miyagbang, na pitharo iyan a: Daa marata roo a kaqamat iyan, odi na aya komamat na so salakao ron. Ka melagid oto. Pitharoo Yahya a: Pitharoo Malik a: Tatap den so Subu a phagebangan ko da pen kasebang o fajr (pidiyar) na so peman so salakao ron a manga sambayang, na di ami pethindegan o ba pagebangi inonta ko oriyan o kapakasoled o waqto niyan.____________________So Hadith na Mawquf, sa aden a kiyakokoma on sa Hadith a Marfu’. Go piyakambowat o Abu Daud (2450) sa pitharoo Al Alnabi a sekaniyan na Sahih.

8/153- Go piyanothol iyan raken, tig o Malik, a mnisimpay ron a so pageebang na miyakaoma ko Umar Bin Al Khattab a phagebangan iyan sa waqto a Subu, na miyaoma niyan sekaniyan a totorogen, na pitharo iyan a: So sambayang na tomo a di so torog, na inisogoon o Umar a kabaloya niyan sangkoto a katharo a sii ko bang ko Subu.____________________So Hadith na Mawquf a Munqati’ so bo so Malik i miyanothol on.

9/154- Go piyanothol raken o Yahya, tig o Malik, a phoon ko bapa iyan a so Abu Suhayl Bin Malik, a phoon ki Ama iyan a pitharo iyan a: Daa katawan aken a shayi a ped ko riyaot aken ko manga tao a rowar ko kapagebang ko sambayang.____________________

So Hadith na Mawquf, so bo so Malik, i miyanothol on.

10/155- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaneg iyan so qamat, a sekaniyan na zisii sa Al Baqi’ na minggagaan lomalakao sa somiyong ko masjid.____________________So Hadith na Mawquf, so bo so Mali i miyanothol on.

2-Pinto a piyayagan ko Kapagebang ko Gii kapelayalayag ago sii ko

di kaabdas

11/156- Pityanothol raken o Yahya, tig o Malik, a phoon ko Nafi’ a so Abdullah Bin Umar na miyagebang sa isaa sambayang sa isa a kagagawii a manenenggao ago giimanamber na pitharo iyan a: Zambayang kano ko manga darepa iyo, oriyan iyan na pitharo iyan a: So Rasulullah na miyaaden a pezogoon yan so pageebang igira gagawii a manenenggao a phagoran sa petharoon iyan a: Zambayang kano ko manga darepa iyo (so walay ago so kakadenan).____________________So Hadith na Sahih, piyakambowat o Bukhari (666)) ago so Muslim (697)..

12/157- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a di niyan pelawanan so kaqamat sii ko giikapelayalayag inonta bo sii ko subu ka giiron magebang ago pekhamat on, ago giiniyan tharoon a: So bang na pantag ko Imam a so giithimotimoan o manga tao a magonot on ko sambayang.____________________

So Hadith na Mawquf, so bo so Malik i miyanothol on.

13/158- Go piyanothol raken o Yahya, tig o Malik, a phoon ko Hisham Bin Urwah a so ama iyan na pitharo iyan on a: Igira miyaaden ka sa kapelayalayag, na okhabayaingka a magebang ka ago komamat ka na nggolaolaangka, na okabayaingka a komamat ka na kamat ka sa daa bang on. Pitharoo Yahya a: Miyaneg aken so Malik a giiniyan tharoon a: Daa marata sa kapagebang o tometembeng a sekaniyan na khokoda.____________________So Hadith na Maqtu’ so bo so Malik i miayanothol on.

14/159- Go piyanothol iyan raken tig o Malik, a phoon ko Yahya Bin Said, a phoon ko Said Bin Al Musayyib a miyaaden sekaniyan a giiniyan tharoon a: Sa tao a zambayang sa lopa a mamamayas (a daa ig on) na sambayang a malaikat ko kawanan iyan, ago sii ko diwang iyan, na amay ka magebang ago komamat ko sambayang na zambayang ko talikhodan iyan a ped sa manga malaikat a ndadatar o palao.____________________So Hadith na Maqtu’ ago miyapanothol a Marfu’ so datar iyan.

3-Pinto a piyayagan ko diyangka o kapitapita ko kapagebang

15/160- Piyanothol raken o Yahya, tig o Malik, a phoon ko Abdullah Bin Dinar a phoon ko Abdullah Bin Umar a so Rasulullah na pitharo iyan a: Mataan a so Bilal na giimagebang sa kagagawii na kan kano

ago inom kano sa taman sa magebang so Ibn Ummi Maktum.____________________So Hadith na Sahih, piyakambowat o Bukhari (620) ago so Muslim (1092)..

16/161- Go piyanothol iyan raken, tig o Malik, a phoon ko Ibn Shihab a phoon ko Salim Bin Abdillah a so Rasulullah na pitharo iyan a: So Bilal na phagebang sa kagagwii na kan kano ago inom kano sa taman sa bagebang so Ibn Ummi Maktum, na pitharo iyan a: Miyaaden so Ibn Ummi Maktum a mama a bota, a di phagebang sa taman sa di ron tharoon a miyakasoled ka ko waqto a subu.____________________So Hadith na Mursal, ogaid na iniwasal o Bukhari (617) ago so Muslim (1092).

4-Pinto a piyayagan ko kalekai ko samabayang (so kapangintakbir)

17/162- Piyanothol raken o Yahya, tig o Malik, a phoon ko Ibn Shihab a phoon ko Salim Bin Abdillah a phoon ko Abdullah Bin Umar a so Rasulullah na miyaaden a igira likaan iyan so sambayang (miyangintakebir) na iporo iyan a lima niyan sa diyangka a mapapantag iyan a waga niyan, ago igira biyangon iyan a olo niyan ko kiyaroko na sowaan iyan oto, ago tharoon iyan so: Samiallahu liman hamidahu, Rabbana wa lakal Hamdu (tiyarima o Allah so bantog o tao a miyantog on) Kadnan ami rek ka so bantogan, ogaid na di niyan oto penggolaolaan ko kasojod.____________________So Hadith na Sahih, piyakambowat o Bukhari (735) ago so Muslim (390)..

18/163- Go piyanothol iyan raken, tig o Malik, a phoon ko Ibn Shihab, a phoon ko Ali Bin Huassain Bin Ali Bin Abi Talib, a pitharo iyan a: Miyaaden so Rasulullah a pethakbir ko sambayang oman bomaba (ko karoko ago so sojud) ago mbangon, sa miyatatap den a giyoto i kazambayang iyan sa taman sa miyawafat.____________________So Hadith na Mursal, so bo so Malik i miyanothol on..

19/164- Go piyanothol iyan raken, tig o Malik, a phoon ko Yahya Bin Said, a phoon ko Sulayman Bin yasar, a so Rasulullah na miyaaden a ipephoro iyan a lima niyan ko sambayang iyan.____________________So Hadith na Mursal, so bo so Malik i miyanothol on.

20/165- Go piyanothol iyan raken, gtig o Malik, a phoon ko Ibn Shihab a phoon ko Abu Salamah Bin Abdirrahman Bin Awf a so Abu Hurayrah na miyaaden a giiniyan siran sambayangan na pethakbir oman momaba ago mbangon, na amay ka makapasad na tharoon iyan a: Wallahi ka pezayanan ko rekano so sambayang o Rasulullah.____________________So Hadith na Sahih, piyakambowat o Bukhari (785) ago so Muslim (292)..

21/166- Go piyanothol iyan raken, tig o Malik, a phoon ko Ibn Shihab a phoon ko Salim Bin Abdillah, a so Abdullah Bin Umar na miyaaden a pethakbir sii ko sambayang oman bomaba ago mbangon.____________________So Hadith na Mawquf, so bo so Malik i miyanothol on.

22/167- Go piyanothol raken o Yahya, tig o malik, a phoon ko Nafi’ a so Abdullah Bin Umar na phelekaan iyan so sambayang sa ipephoro iyan a lima niyan sa pantag a waga niyan, ago igira mimbangon ko kiyaroko na iporo iyan a lima niyan.____________________So Hadith na Mawquf, go piyakambowat sekaniyan o Abu daud (742) go pitharoo Al Albani a sekaniyan na Sahih.

23/168- Go piyanothol iyan raken, tig o Malik, a phoon ko Abu Nuaym a si Wahb Bin Kisan, a phoon ko Jabir Bin Abdillah a sekaniyan na miyaaden a pephangendaon iyan siran sa katakbir sii ko sambayang sa pitharo iyan a: Miyaaden a ipezogo iyan rekami a katakbir ami ko oman kami bomaba ago mbangon.____________________So Hadith na Mawquf, so bo so Malik i miyanothol on.

24/169- Go piyanothol iyan raken, tig o Malik, a phoon ko Ibn Shihab a miyaaden sekaniyan a giiniyan tharoon a: Igira riyaot o mama so rakaat na takbir sa makaisa sa phakaampel on angkoto a takbir. Pitharoo Malik a: Giyoto igira piniat iyan sangkoto a takber so kapelekai niyan ko sambayang. Go inizaan so malik sa mama a somiyoled a ped o Imam na kiyalipatan iyan so takbir ko paganay ago so takbir ko karoko sa taman sa miyakazamabayang sa isa ka rakaat, oriyan iyan na kiyatademan iyan a da makatakbir sa takbir a kaleka ko sambayang, ago da pen so takbir ko karoko, sa sii miyakatakbir ko rakat a ika dowa, na pitharo iyan a: Pagephoonan iyan so sambayang iyan na aya raken mapiya apiya pen miyalipat a ped iyan so imam ko kiyatakebir ko paganay a rakaat ago tomiyakbir ko kaperoko a

paganay na aya tindeg aken na phakaampel on oto amay ka aya niyat iyan ko kiyatakebir iyan na so kapelekai niyan ko sambayang. Pitharoo Malik sii ko mizambayang a kiyalipatan iyan so takber a paganay a kaleka sa khitaros iyan so sambayang iyan. Go pitharoo Malik, sii sa Imam a kiyalipatan iyan so takbir a kaleka sa taman sa miyapasad iyan so sambayang iyan. Na pitharo iyan a: Aya kepit aken na khakasoy niyan so sambayang ago so moonot on apiya pen miyakatakebir siran ko manga ginawa iran.____________________So Hadith na Maqtu’ so bo so Malik i miyanothol on.

5-Pinto a piyayagan ko kabatiya koSambayang a magrib ago Isha

25/170- Piyanothol raken o Yahya, tig o Malik, a phoon ko Ibn Shihab a phoon ko Muhammad Bin Jubayr Bin Mut’im, a phoon ki Ama iyan, a pitharo iyan a: Miyaneg aken so Rasulullah a biyatiya iyan so Surah At Tur sii ko sambayang a magrib.____________________So Hadith na Sahih, piyakambowat o Bukhari (765) ago so Muslim (463)..

26/171- Go piyanothol iyan raken, tig o Malik, a phoon ko Ibn Shihab a phoon ko Ubaydullah Bin Abdillah Bin Utbah Bin Mas’ud a phoon ko Abdullah Bin Abbas a so Ummul Fadhl Bint Al Harith na miyaneg iyan a pembatiyaan iyan so Wal Mursalati Urfa (Surah Al Mursalat) na pitharo iyan on a: Hay wata ko sabenar a kiyapakitademan ka raken ko kiyabatiyaangka sangkai a surah a sekaniyan i

kaposan a miyaneg aken ko Rasulullah a pembatiyaan iyan ko sambayang a magrib.____________________So Hadith na Sahih, piyakambowat o Bukhari (763) ago so Muslim (462)..

27/172- Go piyanothol iyan raken, tig o Malik, a phoon ko Abu Ubayd a sanasanaan o Sulayman Bin Abdil Malik a phoon ko Ubbadah Bin Nusayyi a phoon ko Qays Bin Al Harith a phoon ko Abu Abdillah As Sunabiji a pitharo iyan a: Miyakaoma ko sa Madinah ko kandadato o Abu Bakr As Siddiq, na mizambayang ako ko talikhodan iyan sa Magrib, na biyatiya iyan ko dowa a rakaat a paganay so Al Fatihah ago Surah ago Surah a ped ko manga baba ko Al Mufassal, (aya petharoon a Al Mufassal na so manga surah ko Qur’an a ipoon ko Surah Qaf na taman ko kapos o Qur’an) oriyan iyan na tominindeg ko ika telo na miyakarani ako ron sa maito bo na so nditaren aken na mizekho ko nditaren iyan, na miyaneg aken sekaniyan a biyatiya iyan so Al Fatihah ago giyangkai a Ayah a: “Rabbana la tuzig qulubana ba’da id hadaytana wa hab lana min ladunka rahmatan innaka antal wahhab” Hay Kadnan ami di ngka phalinga so manga poso ami ko oriyan o kiyatoroangka rekami, go begi kamingka sa phoon reka a limo, ka mataan a seka so Lebi a Pephamemegay (baramora).____________________So Hadith na Maqtu’ so bo so Malik i miyanothol on.

28/173- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a igira mizambayang a sekaniyan bo na pembatiyaan iyan ko sambayang a pat i rakaat langon sii ko oman i rakaat iyan so Al Fatihah ago surah a ped ko

Qur’an, go miyaaden a pembatiyaan iyan ko sabaad a manga masa so dowaa a surah ago telo a surah ko isa a rakaat ko sambayang a paralo, go pembatiyaan iyan ko dowa rakaat ko Magrib so Al Fatihah ago ped a surah.____________________So Hadith na Mawquf, so bo so Malik i miyanothol on.

29/174- Go piyanothol iyan raken, tig o Malik, a phoon ko Yahya Bin Said, a phoon ko Adi Bin Thabit Al Ansari a phoon ko Al Bara Bin Azib a pitharo iyan a: Mizambayang ako a ped aken so Rasulullah sa Ishaa na biyatiya iyan on so Surah At Tin.____________________So Hadith na Sahih, piyakambowat o Bukhari (767) ago so Muslim (464)..

6-Pinto a piyayagan ko galebek ko kabatiya

30/175- Piyanothol raken o Yahya, tig o Malik, a phoon ko Nafi’ a phoon ko Ibrahim Bin Abdillah Bin Hunayn, a phoon ko ama iyan, a phoon ko Ali Bin Abi Talib, a so Rasulullah na inisapar iyan so kanditar sa nditaren a babatekan sa sotera (al Qasiyyi) ago so kazising sa bolawan, ago so kabatiya sa qur’an ko karoroko.____________________So Hadith na Sahih, piyakambowat o Muslim (480)..

31/176- Go piyanothol iyan raken, tig o Malik, a phoon ko Yahya Bin Said a phoon ko Muhammad Bin Ibrahim Bin Al Harith At Timi a phoon ko Abu Hazim At Tammar, a phoon ko Al Buyadhiy a so Rasulullah

na lominiyo ko manga tao, a siran na giisiran zambayang a miniporo so manga sowara iran ko kabatiya, na pitharo iyan a: So giizambayang na giiniyan imbitiyarai so Kadnan iyan na ilaya niyan so giiniyan imbitiyarai, sa di pephakatanoga o sabaad rekano ko sabagi ko kapembatiyaa niyan ko Qur’an”.____________________So Hadith na piyakambowat sekaniyan o Abu Daud (1332) go pitharoo Al Albani a sekaniyan na Sahih.

32/177- Go piyanothol iyan raken, tig o Malik, a phoon ko Humayd At Tawil a phoon ko Anas Bin Malik, a pitharo iyan a: Tominindeg ako ko talikhodan o Abu Bakr ago so Umar ago so Uthman, na langon siran na di ran mbatiyaan so Bismillahir Rahmanir Rahim igira likaan iran so sambayang.____________________So Hadith na Sahih, piyakambowat o Bukhari (743) ago so Muslim (399)

33/178- Go piyanothol iyan raken, tig o Malik, a phoon ko bapa iyan a so Abu Suhayl Bin Malik, a phoon ko ama iyan a pitharo iyan a: Miyaaden kami a pekhaneg ami so batiya o Umar Bin Al Khattab phoon ko walay o Abu Jahm sa Al Bulat.____________________So Hadith na Mawquf, so bo so Malik i miyanothol on.

34/179- Go piyanothol iyan raken, tig o Malik, a phoon ko Nafi’ a so Abdullah Bin Umar na igira aden a miyalepas on a ped sa sambayang a ped iyan so imam sii ko piyakatanog on o imam so batiya, na amay ka makazalam so imam, na tomindeg so Abdullah Bin Umar na batiyaan iyan sa ginawa niyan so da niyan mabatiya sa pephakatanogen iyan.____________________So Hadith na Mawquf, so bo so Malik i miyanothol on.

35/180- Go piyanothol iyan raken, tig o Malik, a phoon ko Yazid Bin Ruman a pitharo iyan a: Miyaaden ako a giiako zambayang sii ko kilid o Nafi’ Bin Jubayr Bin Mut’im, na giiakoniyan paginsataran, na pheleka ako ron a giikami zambayang.____________________So Hadith na Mawquf, so bo so Malik i miyanothol on.

7-Pintoa a piyayagan ko kabatiya ko sambayang a Subu

36/181- Piyanothol raken o Yahya, tig o Malik, a phoon ko Hisham Bin Urwah a phoon ki ama iyan a so Abu Bakr As Siddiq na mizambayang sa subu na biyatiya iyan on so Surah Al Baqarah sii ko dowa a rakaat langon.____________________So Hadith na Mawquf, so bo so Malik i miyanothol on.

37/182- Go piyanothol iyan raken, tig o Malik, a phoon ko Hisham Bin Urwah a phoon ki ama iyan a miyaneg iyan so Abdullah Bin Amir Bin Rabiah a giiniyan tharoon a: Mizambayang kami ko talikhodan o Umar in Al Khattab sa subu na biyatiya iyan on so Surah Yusuf ago so Surah Al Hajj sa kabatiyaa a malombat, na pitharo aken a: Wallahi, ka giyanan na pethindeg sekaniyan ko kasebang o pidiyar! Na pitharo iyan a: Oway.____________________So Hadith na Mawquf, so bo so Malik i miyanothol on.

38/183- Go piyanothol iyan raken, tig o Malik, a phoon ko Yahya Bin Said ago so Rabiah Bin Abi Abdirrahaman, a phoon ko Al Qasim Bin Mohammad a so Al Qarafisah Bin Umair Al Hanafi na pitharo iyan a: Da ko makowa (milangag) so Surah Yusuf inontaa phoon ko kapembatiyaa on o Uthman Bin Affan ko oman subu ko kadakel a kapekhasoya niyan on matiya sii rekami.____________________So Hadith na Mawquf, so bo so Malik i miyanothol on.

39/184- Go piyanothol iyan raken, tig o Malik, a phoon ko Nafi’ a so Abdullah Bin Umar na pembatiyaan iyan ko subu ko kapelayalayag so manga surah a sapolo a ped ko mufassal, sa oman i rakaat na batiyaan iyan so Al Fatihah a go isa a surah.____________________So Hadith na Mawquf, so bo so Malik i miyanothol on.

8-Pinto a Piyayagan ko Al Fatihah

40/185 – Piyanothol raken o Yahya, tig o Malik, a phoon ko Al Ala’ Bin Abdirrahman Bin Ya’qub, a so Abu Said a sanasanaan o Amir Bin Kurayz na piyanothol iyan on, s so Rasulullah na tiyalowan iyan so Ubayyi Bin Ka’b a sekaniyan na giizambayang, na gowani a makapasad zambayang na somiyong ko Rasulullah na inibetad o Rasulullah a lima niyan sa lima niyan a khabaya lomiyo ko pinto o masjid na pitharo iyan a: Pagarapen aken a di kapen makaliyo sa masjid na katokawan ka a Surah a daa initoron o Allah ko Tawrah go da pen ko Injil go da pen ko Qur’an i datar iyan, na pitharoo Ubayyi, a milombat ako lomalakao sa arapaken roo, oriyan iyan na

pitharo aken a: Hay, Rasulullah so surah a pitharooka raken, na pitharo iyan a: Andamanaya i kapembatiyaaka igira likaan ka so sambayang, na pitharo iyan a: Biyatiya aken so Al Hamdulillahi Rabbil Alamin, sa taman sa miyapos aken, na pitharoo Rasulullah a sekaniyan angkoto a surah a sekaniyan so pito a giikhasokasowin matiya ago qur’an a mala a inibegay raken.____________________So Hadith na Sahih, piyakambowat o Bukhari (4474,4647)..

41/186- Piyanothol iyan raken, tig o Malik, a phoon ko Abu Nuaym aso Wahb Bin Kisan, a miyaneg iyan so Jabir Bin Abdillah a giiniyan tharoon a: Sa tao a zambayang sa isa ka rakaat a da niyan on batiyaa so Al Fatihah na da makazambayang, inonta ko talikhodan o Imam. ( ka so batiya o imam na giyoto den i batiya o phagonot on ko batiya o imam a matanog. So mindiyorobasa)____________________So Hadith na Mawquf, so bo so Malik i miyanothol on.

9-Pinto a piyayagan ko kabatiya ko talikhodan o imam ko sambayang a

di ron matanog so batiya

42/187- Piyanothol raken o Yahya, tig o Malik, a phoon ko Al Ala’ Bin Abdirrahman Bin Yaqub, a miyaneg iyan so Abu As Saib a sanasanaan o Hisham Bin Zuhrah a giiniyan tharoon a: Miyaneg aken so Abu Hurayrah a giiniyan tharoon a: Miyaneg aken so Rasulullah a giiniyan tharoon a: Sa tao a zambayang sa sambayang a di niyan on batiyaan so Al Fatihah na sekaniyan na kakokorangan a di tarotop. Na

pitharo iyan a pitharoaken a: hay Abu Hurayrah saken na pekhaaden ako ko talikhodan o Imam sa isa a masa, na kiyapetan iyan a lima ko oriyan iyan na pitharo iyan a: Batiyaangka sekaniyan a (Al fatihah) sa ginawangka, hay tao sa Faris, ka miyaneg aken ko Rasulullah a giiniyan tharoon a: Pitharoo Allah (maana a hadith Qudsi) a: Biyagi aken so Al Fatihah ko let aken ago so oripen aken sa dowa bagi, na so sabagi on na rek aken na so sabagi on na rek o oripen aken, ago rek o oripen aken so nganin a piyangeni niyan. Pitharoo Rasulullah a: Batiyakano sa giitharoon o oripen a: Al Hamdulillahi Rabbil Alamin, na tharoon o Allah a: Biyantog ako o oripen aken, na tharoon o oripen a: Arrahman Ar Rahim, Na tharoon o Allah a piyodi ako o oripen aken, na tharoon o oripen a: Malik Yawmiddin, na tharoon o Allah a: Pimasela ako o oripen aken, na tharoon o oripen a: Iyyaka Na’bud wa iyyaka nastain, na tharoon o Allah a: Giyangkai a ayah i let aken ago so oripen aken sa bagian o oripen aken so nganin a piyangeni niyan, na tharoon o oripen a: Ihdinas Siratal Mustaqim, Siratal Ladina An amta alayhim Gayril magdhubi alayhim walad dallin, na tharoon o Allah a: Giyai na rek o oripen aken sa bagian o oripen aken so nganin a piyangeni niyan.____________________So Hadith na Sahih, piyakambowat o Muslim (395).

43/188- Go piyanothol iyan raken, tig o Malik, a phoon ko Hisham Bin Urwah a phoon ko ama iyan a miyaaden sekaniyan a pembatiya ko talikhodan o imam sii ko sambayang a di ron phakatanogen o imam so batiya.____________________So Hadith na Maqtu’, so bo so Malik i miyanothol on.

44/189- Go piyanothol iyan raken, tig o Malik, a phoon ko Yahya Bin Said, ago phoon ko Rabi’ah Bin Abi Abdirrahman a so Al Qasim Bin Muhammad na miyaaden a pembatiyaan iyan so Al Fatihah ko talikhodan o imam ko sambayang a di niyan on phakatanogen so batiya.____________________So Hadith na Mawquf, so bo so Malik i miyanothol on.

45/190- Go piyanothol iyan raken, tig o Malik, a phoon ko Yazid Bin Ruman, a so Nafi’ Bin Jubayr Bin Mut’im na miyaaden a pembatiyaan iyan so Al Fatihah ko talikhodan o imam ko sambayang a di ron matanog so batiya o imam.____________________So Hadith na Mawquf, so bo so Malik i miyanothol on.

10- Pinto a piyayagan ko kabatiya ko talikhodan o imam ko sambayang

a matanog on so batiya

46/191- Piyanothol raken o Yahya, tig o Malik, a phoon ko Nafi’ a so Abdullah Bin Umar na igira inizaan o ino aden a pembatiya sa Fatihah ko talikhodan o imam? Na pitharo iyan a igira mizambayang so isa rekano ko talikhodan o imam na phakaampel on so batiya o imam, na amay ka zambayang a sekaniyan bo, na batiyaa niyan so Al fatihah. Pitharo iyan a: Miyaaden so Abdullah Bin Umar a di mbatiya sa Fatihah ko talikhodan o imam (a matanog on so batiya iyan). Pitharoo Yahya a: Miyaneg aken so Malik a giniyan tharoon a: Aya kepit ami na mbatiya so mama ko talikhodan o imam ko sambayang a di ron

matanog so batiya iyan, na imbagak iyan so kabatiya ko sambayang a matanog on so batiya o imam.____________________So Hadith na Mawquf, so bo so Malik i miyanothol on.

47/192- Go piyanothol raken o Yahya, tig o Malik, a phoon ko Ibn Shihab a phoon ko Ibn Ukaymah Al Laythi a phoon ko Abu Hurayrah a so Rasulullah na miyakapasad zambayang sa sambayang a matanog on so batiya iyan, na pitharo iyan a: Ino baaden rekano a miyatiya a ped aken kagiya? Na aden a mitharo a mama a: Oway saken hay Rasulullah na pitharoo Rasulullah a: Petharoon aken a daa ba raken phakaalang ko Qur’an, (aya maana niyan na so kabatiya iran na pekhaalangan iyan so batiya o Rasulullah a matanog) na tomiyapelek so manga tgao ko kabatgiya a ped iran so Rasulullah ko sambayang a piyakatanog iyan on so batiya, gowani a maneg iran oto ko Rasulullah.____________________So Hadith na piyakambowat o Abu Daud (826) go so Rirmidi (312) gos o Nasai (2/141) go so Ibn Majah (848).

10- Pinto a piyayagan ko katharoa ko Amin ko talikhodan o imam

48/193- Piyanothol raken o Yahya, tig o Malik, a phoon ko Ibn Shihab a phoon ko Said Bil Al Musayyib, ago so Abu Salamah Bin Abdirrahman a piyanothol iran on a dowa, a phoon ko Abu Hurayrah a so Rasulullah na pitharo iyan a: Igira miyamin so imam na amin kano ka mataan a sa tao a marengan o kapetharoa niyan ko Amin so kaphagamin o manga Malaikat na irila on so miyaona a miyandosa niyan,

na pitharoo Ibn Shihab a: Miyaaden so Rasulullah a giiniyan tharoon a “Amin”.____________________So Hadith na Sahih, piyakambowat o Bukhari (780) go so Muslim (72/410).

49/194- Go piyanothol iyan raken, tig o Malik, a phoon ko Sumayya a sanasanaan o Abu Bakr a phoon ko Abu Salih As Saman, a phoon ko Abu Hurayrah a so Rasulullah na pitharo iyan a: Igira pitharoo imam a: Gayril Magdhubi Alayhim Walad Dallin, na tharoa niyo so Amin ka mataan sa makarengen so katharo iyan ko katharoo manga malaikat na irila on so miyaona a dosa niyan.____________________So Hadith na Sahih, piyakambowat o Bukhari (782) go so Muslim (76/410).

50/195- Go piyanothol iyan raken, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a so Rasulullah na pitharo iyan a: Igira pitharoo isa rekano a Amin, ago pitharoo o manga malaikat ko langit a Amin, na sa tao a makarengan roo na irila on so miyaona a dosa niyan.____________________So Hadith na Sahih, piyakambowat o Bukhari (781) go so Muslim (75/410).

51/196- Go piyanothol iyan raken, tig o Malik, a phoon ko Sumayya a sanasanaan o Abu Bakr a phoon ko Abu Salih As Saman a phoon ko Abu Hurayrah a so Rasulullah na pitharo iyan a: Igira pitharoo imam so Samiallahu liman hamidahu, na tharoa niyo so: Allahumma Rabbana Lakal Hamdu, ka mataan a sa den sa tao a marengan o katharo iyan so katharoo manga malaikat na irila on so miyaona a dosa niyan.____________________

So Hadith na Sahih, piyakambowat o Bukhari (796) go so Muslim (409).

12- Pinto a piyayagan ko galebek ko kaontod ko sambayang

52/197- Piyanothol raken o Yahya, tig o Malik, a phoon ko Muslim Bin Abi Maryam, a phoon ko Ali Bin Abdirrahman Al Maawiyyi a pitharo iyan a: Miyailay ako o Abdullah Bin Umar a giiaken gitagitaan so maroni a ator sii ko sambayang, na kagiya makapasad ako na siyaparan ako niyan, sa pitharo iyan a: Nggolaolaangka so datar o giinggolaolaan o Rasulullah, na pitharo aken a: Andamanaya i pezowaan o Rasulullah? Na pitharo iyan a: Igira miontod ko sambayang na ibetad iyan a palad a lima niyan a kawanan sa bobon iyan a kawanan ago kemesen iyan a kemer iyan sa itoro iyan so tindoro iyan, na ibetad iyan a palad a lima niyan a diwang sa bobon iyan a diwang, sa pitharo iyan a, datar anan a giiniyan nggolaolaan. ____________________So Hadith na Sahih piyakambowat o Muslim (580).

53/198- Go piyanothol iyan raken tig o Malik, a phoon ko Abdullah Bin Dinar a miyaneg iyan so Abdullah Bin Umar, a mizambayang ko kilid iyan a sakatao a mama, na kagiya montod so mama ko ikapat rakaat, na miyanombilang sa piko iyan ambala a seki niyan, na kagiya makapasad so Abdullah na piyaawing iyan on oto, na pitharoo o mama a: Seka na giingkaoto nggolaolaan! Na pitharoo Abdullah Bin Umar a ka giya saken na makagegedam ako sa masakit.

____________________So Hadith na Mawquf, so bo so Malik i miyanothol on.

54/199- Go piyanothol iyan raken, tig o Malik, a so Sadaqah Bin Yasar a phoon ko Al Mugirah Bin Hakim a miyailay niyan so Abdullah Bin Umar a phagontod ko dowa a kasojud sa pakatitindegen iyan a palad a seki niyan sa idadapo iyan so manga kemer iyan, na kagiya makapasad na inaloy niyan on oto, na pitharo iyan a: Sekaniyan na kena o ba okit ko sambayang, ogaid na pinggolaola ko to sabap sa aden a magegedam aken a masakit.____________________So Hadith na Mawquf, so bo so Malik i miyanothol on.

55/200- Go piyanothol iyan raken, tig o Malik, a phoon ko Abdurrahman Bin Al Qasim, a phoon ko Abdullah Bin Abdillah Bin Umar a piyanothol iyan on a miyailay niyan so Abdullah Bin Umar a giimanombilang ko sambayang igira miontod, na pitharo iyan a: Pinggolaola ko to a saken sa masa oto na maito i idad na inisapar raken o Abdullah, sa pitharo iyan a: Aya okit o sambayang na so kapakatindeg angka sa palongka a kawanan na kayaten ka a palongka a diwang, na pitharo aken on a: Giingkaoto nggolaolaan! Na pitharo iyan a: So mbalaa seki aken na di ako niyan khatanggong.____________________So Hadith na Mawquf, go piyakambowat o Bukhari (827).

56/201- Go piyanothol raken o Yahya, tig o Malik, a phoon ko yahya Bin Said, a so Al Qasim Bin Muhammad na piyakiilay niyan kiran so kaontod ko kathahayyat na piyakatindeg iyan so palo niyan a kawanan, na kiyayat iyan so palo niyan a diwang sa piyakalampas iyan na inirorad iyan a witan iyan a diwang sa da niyan ontodi a palo niyan oriyan iyan na pitharo iyan a: Piyakiilay raken anan o Abdullah

Bin Abdillah Bin Umar, go piyanothol iyan raken a so ama iyan na giiniyan oto nggolaolaan..____________________So Hadith na Mawquf, so bo so Malik i miyanothol on.

13- Pinto a piyayagan ko kathahayyat ko Sambayang

57/202- Piyanothol raken o Yahya, tig o Malik, a phoon ko Ibn Shihab a phoon ko Urwah Bin Az Zubayr, a phoon ko Abdurrahman Bin Abdilqari, a miyaneg iyan so Umar Bin Al Khattab a sekaniyan na zisii ko Mimbar a ipephangendao niyan ko manga tao so kathahayyat sa giiniyan tharoon a: Tharoa niyo so: AT Tahiyyatu Lillahi. Az Zakiyatu Lillahi, At Tayyibatu Lillahi, As Slawatu Lillahi, Assalamu Alayka Ayyuhan Nabiyyu wa rahmatullahi wa barakatuhu, Assalamu Alayna wa ala Ibadillahis Salihinm Ash’hadu Alla Ilaha Ilallahu, wa ash’hadu anna Muhammadan Ab duhu wa Rasuluhu.____________________So Hadith na Mawquf, so bo so Malik i miyanothol on.

58/203- Go piyanothol iyan raken, tig o Malik, a phoon ko Nafi’ a so Abdullah Ibn Umar na miyaaden a giithahayyat sa giiniyan tharoon a: At Tahiyyatu Lillahi As Salawatu Lillahi Az Zakiyyatu Lillahi As Salamu Alallahi wa barakatuhu As Salamu Alayna wa ala ibadillahis salihin, sahidtu anla ilaha Illallah Shahidtu anna Muhammadan Rasulullahi, giiniyan anan tharoon ko kaipos o dowa rakaat a paganay, sa giindowa ko oriyan oto sa khabayaan iyan a dowaa, na amay ka montod ko kaposan o sambayang iyan na thayyat pharoman sa datar oto, sa pephakaonaan iyan so tahayyat oriyan iyan na ndowaa sa khabayaan iyan, na amay ka mapasad iyan so tahayyat iyan na go niyan kabayai so kazalam na

tharoon iyan a: As Salamu Alan Nabi wa rahmatullahi wabarakatuhu, As salamu alayna wa ala ibadillahis salihin, As Salamu laykum, ko kawanan iyan, oriyan iyan na sembagen iyan so salam o imam, na o aden a somalam ko diwang iyan na sembagen iyan.____________________So Hadith na Mawquf, so bo so Malik i miyanothol on.

59/204- Go piyanothol iyan raken tif o Malik, a phoon ko Abdurrahman Bin Al Qasim, a phoon ki ama iyan a phoon ko Aishah a karoma o Nabi a giiniyan tharoon igira mitahayyat a: At Tahiyyatu At Tayyibatu As Salawatu Az Zakiyatu Lillahi Ash’hadu An La ilaha illallah wahdahu la sharikalahu wa anna Muhammadan abduhu wa rasuluhu, As Salamu Alayka Ayyuhan Nabiyyu wa rahmatullahi wa barakatuho, As Salamu Alayna wa ala ibadillahis salihin As Salamu Alaykum.____________________So Hadith na Mawquf, so bo so Malik i miyanothol on.60/205- Go piyanothol iyan raken, tig o Malik, a phoon ko Yahya Bin Said Al Ansari a phoon ko Al Qasim Bin Muhammad a piyanothol iyan on a so Aishah a karoma o Nabi na giiniyan tharoon igira mithahayyat a: At Tahiyyatu At Tayyibatu As Salawatu Az Zakiyatu Lillahi Ash’hadu An La ilaha illallah wahdahu la sharikalahu wa anna Muhammadan abduhu wa rasuluhu, As Salamu Alayka Ayyuhan Nabiyyu wa rahmatullahi wa barakatuho, As Salamu Alayna wa ala ibadillahis salihin As Salamu Alaykum.____________________So Hadith na Mawquf, so bo so Malik i miyanothol on.

61/206- Go piyanothol iyan raken, tig o Malik, a inizaan iyan so Ibn Shihab ago so Nafi’ a sanasanaan o Ibn Umar sa makapantag sa mama a somiyoled a

ped iyan so imam sii ko sambayang sa kiyaonaan sekaniyan o imam sa isa ka rakaat ino pethahayyat a ped iyan sii ko ikadowa rakaat ago sii ko ika pat, apiya pen giyoto reka niyan na gansar? Na pitharo iyan a: Makapethahayyat a ped iyan. Pitharoo Malik, a giyoto i kept ami.____________________So Hadith na Maqtu’, so bo so Malik i miyanothol on.

14- Pinto a piyayagan o penggolaolaan o tao a iniporo iyan a olo niyan ko da

pen kambangon o imam

62/207- Piyanothol raken o yahya, tig o Malik, a phoon ko Muhammad Bin Amr Bin Al Qamah a phoon ko Malih Ibn Abdillah As Sa’di a phoon ko Abu Hurayrah a pitharo iyan a: So tao a ipephoro iyan a olo niyan ago ipembaba iyan ko onaan o imam, na so olo niyan na kakapetan a shaytan. Pitharoo Malik, ko tao a miyalipat na miniporo iyan a olo niyan ko onaan o imam sii ko ruku odi na sujud, na aya okit roo na so kakasoy niyan a romoroko odi na somosujud Sa di niyan penayawa so imam, a giyoto na karibat ko tgao a minggolaola on, ka kagiya so Rasulullah na pitharo iyan a: Inaden so imam kan kaonoti na di niyo pezopaka sekaniyan, go pitharoo Abu Hurayrah a: So ipephoro iyan a olo niyan odi na ipembaba iyan ko onaan o imaam na so olo niyan na mipapaar a shaytan.____________________So Hadith na Mawquf, so bo so Malik i miyanothol on.

15- Pinto a piyayagan ko penggolaolaan o tao a miyakazalam ko dowa rakaat a malilipat

63/208- Piyanothol raken o Yahya, tig o Malik, a phoon ko Ayyub Bin Abi Tamimah As Sukhtiyani a phoon ko Muhammad Ibn Sirin a phoon ko Abu Hurayrah a so Rasulullah na mizalam ko dowa rakaat, na pitharoon o Dhul yadayn a: Ba kiyasar so sambayang antaa ka ba ka miyalipat hay Rasulullah? Na pitharoo Rasulullah a: Ba benar so Dhul Yadayn? Na pitharoo manga tao a oway, na tominindeg so Rasulullah na mizambayang sa dowa rakaat a salakao, oriyan iyan na mizalam, oriyan iyan na tomiyakbir na somiyojud sa datar o kiyasojud iyan odi na matas a di sekaniyan, oriyan iyan na mimbangon, oriyan iyan na tomiyakber na somiyojud sa datar o kiyasojud iyan odi na matas on oriyan iyan na mibangon.____________________So Hadith na Sahih, piyakambowat o Bukhari (714) ago so Muslim, (573).

64/209-. Go piyanothol iyan raken, tig o Malik, a phoon ko Daud Bin Al Husayn a phoon ko Abu Sufyan a sanasanaan o Ibn Abi Ahmad a pitharo iyan a: Miyaneg aken so Abu Hurayrah a giiniyan tharoon a: Mizambayang so Rasulullah sa sambayang a asar na mizalam ko ika dowa rakaat na tominindeg so Dhul Yadayn na pitharo iyan a: Ba kiyasar so sambayang hay Rasulullah antaa ka ba ka miyalipat? Na pitharoo Rasulullah a: Langon oto na da maaden. Na pitharo iyan a: Sabenar a miyaaden so sabaad on hay Rasulullah, na somiyangor so Rasulullah ko manga tao na pitharo iyan a: Ba benar so Dhul Yadayn? Na pitharo iran a: Oway, na tominindeg so Rasulullah na tiyarotop iyan so lamba ko sambayang, oriyan iyan na somiyojud sa dowa a sojud ko oriyan o kiyapakazalam iyan a sekaniyan na moontod.

____________________So Hadith na Sahih, piyakambowat o Muslim (573)..

65/210- Go piyanothol iyan raken, tig o Malik, a phoon ko Ibn Shihab a phoon ko Abu Bakr Bin Sulayman Bin Abi Hathmah a pitharo iyan a: Minisampay raken a so Rasulullah na romiyokosa dowa a roko ko isa ko dowa a sambayang ko kadaondao a so luhur ago so asar, na mizalam ko dowa rakaat, na pitharoon o Dhu As Shumalayn a ba kiyasar so sambayang hay Rasulullah antaa ka ba ka miyalipat? Na pitharoo Rasulullah a: Da ko kasara so samabayang go da ko malipat, na pitharoo Dhu As Shumalayn a sabenar a miyaaden so sabagi roo hay Rasulullah, na siyangoran o Rasulullah so manga tao na pitharo iyan a: Ba benar so Dhul Yadayn, na pitharo iran a: Oway, hay Rasulullah, na tiyarotop o Rasulullah so miyalamba ko sambayang oriyan iyan na mizalam.____________________So Hadith na Mursal so bo so Malik i miyanothol on.

66/211- Go piyanothol iyan raken, tig o Malik, a phoon ko Ibn Shihab a phoon ko Said Bin Al Musayyib ago phoon ko Abi Salamah Bin Abdirrahman so datar oto. Pitharoo Malik, Langowan a kalipat a miyaaden ko da pen katarotop o sambayang na aya sojud iyan na sii ko da pen kapakazalam, na langowan a kalipat a miyaaden sa kiyasoberaan so rakaat o sambayang, na so sojud iyan na sii ko oriyan o kapakazalam.____________________So Hadith na Maqtu’, so bo so Malik i miyanothol on.

16- Pinto a piyayagan ko katarotop o giizamabayang igira mizangka ko kadakel a kiyazambayangan iyan a

rakaat67/212- Piyanothol raken o Yahya, tig o Malik, a phoon ko Zayd Bin Aslam, a phoon ko Ata Bin Yasar, a so Rasulullah na pitharo iyan a: Igira mizangka so isa rekano ko sambayang iyan sa di niyan khatanodan o pira i kiyazambayanagan iyan o telo antaa ka pat (rakaat) na ganap sa sarakaat ago sojud sa dowa sojud ( a sahu) a sekaniyan na moontod ko da niyan pen kapakazalam, ka amay ka so rakaat a pizambayangan iyan na ika lima rakaat na miniganap iyan on so angkai a dowa a sojud, na amay ka pat a kiyazambayangan iyan a rakaat, na so dowa a sojud na iphakadapanas o shaytan.____________________So Hadith na Mursal, so bo so Malik i miyanothol on.

68/213- Go piyanothol iyan raken, tig o Malik, a phoon ko Umar Bin Muhammad Bin Zayd a phoon ko Salim Bin Abdillah a so Abdullah Bin Umar na giniyan tharoon a: Igira mizangka so isa rekano sii ko sambayang iyan, na tangkeda niyan so mapipikir iyan a kiyalipatan iyan on sa zambayangi niyan, oriyan iyan na sojud sa dowa a sojud a sahu (kalipat) a sekaniyan na moontod.____________________So Hadith na Mawquf, so bo so Malik i miyanothol on.

69/214- Go piyanothol iyan raken, tig o Malik, a phoon ko Afif Bin Amr As Sahmi a phoon ko Ata’ Bin Yasar, a pitharo iyan a: Iniiza aken ko Abdullah Bin Amr Bin Al As ago so Ka’b Al Ahbar so tao a mizangka ko sambayang iyan sa di niyan khatanodan

o pira rakaat i kiyazambayangan iyan o telo rakaat antaa ka pat rakaat? Na sii sangkoto a dowa, na pitharo iyan a: Zambayang sa isa ka rakaat oriyan iyan na sojud sa dowa sojud a sekaniyan na moontod.____________________So Hadith na Mawquf, so bo so Malik i miyanothol on.

70/215- Go piyanothol iyan raken, tig o Malik, a phoon ko Nafi’ a so Abdullah Bin Umar na miyaaden a igira inizaan ko kalipat ko sambayang na tharoon iyan a: Tangkeda o isa rekano so mapipikir iyan a miyalipat on ko sambayang iyan na zambayangi niyan.____________________So Hadith na Mawquf, so bo so Malik i miyanothol on.

17- Pinto a piyayagan ko tao a miyakatindeg ko oriyan o kiyatarotop o rakaat o sambayang iyan odi na sii ko

oriyan o dowa a rakaat

71/216- Piyanothol raken o Yahya, tig o Malik, a phoon ko Ibn Shihab, a phoon ko Al A’raj a phoon ko Abdullah Bin Buyahnah a pitharo iyan a: Pizambayangan kami o Rasulullah sa dowa rakaat oriyan iyan na tominindeg sa da ontod (ko ika telo rakaat) na tominendeg a ped iyan so manga tao, na kagiya makapasad, sa niyayao ami so kapezalam iyan, na tomiyakbir oriyan iyan na somiyojud sa dowa a sojud a sekaniyan na moontod, ko da niyan pen kazalam, oriyan na mizalam.____________________So Hadith na Sahih, piyakambowat o Bukhari (1224) ago so Muslim (570).

72/217- Go piyanothol iyan raken, tig o Malik, a phoon ko Yahya Bin Said, a phoon ko Abdurrahman Bin Hurmuz a phoon ko Abdullah Bin buhaynah a pitharo iyan a: Pizambayangan kami o Rasulullah sa luhur na tominindeg ko ikadowa rakaat sa da on ontod, na kagiya mapasad iyan so sambayang na somiyojud sa dowa a sojud oriyan iyan na mizalam ko oriyan oto. Pitharoo Malik, ko tao a miyalipat ko sambayang iyan sa miyakatindeg ko oriyan o kiyatarotop iyan a pat rakaat na miyakabatiya ago muiyakaroko na kagiya makambangon na kiyatademan iyan a miyakatarotop: Na aya zowaan iyan na khasoy sa magontod sa di sojud, na o miyakasojud sa isa ko dowa sojud a sahu na di aken pethindegan o ba niyan tarotopa sa ika dowa, oriyan iyan na amay ka miyaposn iyan so sambayang iyan (na go bo makatanod) na sojud sa dowa sojud a sekaniyan na moontod ko oriyan o kapakazalam iyan.____________________So Hadith na Sahih, piyakambowat o Bukhari (373) GO SO Muslim (556).

18- Pinto a piyayagan ko kailaya o giizambayang ko nganin a phakasendod

on

73/218- Piyanothol raken o Yahya, tig o Malik, a phoon ko Alqamah Bin Abi Al Qamah, a phoon ko ina iyan a so Aishah a karoma o Nabi na pitharo iyan a: Bigan o Abu Jahm Bin Hudayfah so Rasulullah sa rending a phoon sa sham a aden a tolad iyan, na pizambayangan iyan na kagiya makapasad na pithar iyan a: Kasowin ka angkai a rending ko Abu Jahm ka

inilaya aken so manga tolad iyan ko giiaken kazambayang na maito bo na maringgao ako niyan.____________________So Hadith na Sahih, piyakambowat o Bukhari (373) GO SO Muslim (556).

74- 219- Go piyanothol iyan raken, tig o Malik, a phoon ko Hisham Bin Urwah a phoon ko ama iyan a so Rasulullah na minditar sa nditaren a aden a tolad iyan oriyan iyan na inibegay niyan ko Abu Jahm ago kominowa ko Abi Jahm sa nditaren a daa tolad iyan, na pitharo iyan (so Abu Jahm) a : ino to hay Rasulullah? Na pitharo iyan a: Miyailay aken so tolad iyan ko giiaken kazambayang.____________________So Hadith na Mursal, so bo so Malik i miyanothol on.

75/220- Go piyanothol iyan raken, tig o Malik, a phoon ko Abdullah Bin Abi Bakr a so abu Talhah Al Ansari na giizambayang ko asinda niyan, na lomiyayog a papanok a datar o marapatik sa giimeloba sa kaokitan iyan na kiyababayaan iya oto milay sa da mathay oriyan iyan na komiyasoy ko giiniyan kazambayang, na kiyalipatan iyan o pira rakaat i kiyazambayangan iyan, na miyatharo iyan a miyasogat ako a tiyoba sangkai a tamok aken na somiyong ko Rasulullah na inaloy niyan on so miyasowa iyan ko asinda niyan a ped sa tiyoba, sa pitharo iyan a: Hay Rasulullah sekaniyan a asinda ko na sadka ko na nggiragirayangka sa saden sa kabaya aka on.____________________So Hadith na Munqati’ so bo so Malik i miyanothol on.

76/221- Go piyanothol iyan raken tig o Malik, a phoon ko Abdullah Bin Abi Bakr, a aden a sakatao a mama a ped ko Ansar a giizambayang ko asinda

niyan ko isa a balintad sa Madinah ko masa a kiyapakatoa o manga onga, sa tanto a khakarik so manga korma on, na inilay niyan na inipamemesa niyan ko kapiya o onga niyan oriyan iyan na komiyasoy ko sambayang iyan na di niyan khatanodan o pira rakaat i kiyazambayangan iyan, na miyatharo iyan a miyasogat ako sangkai a tamok aken a tiyoba, na somiyong ko Uthman Bin Affan a sekaniyan i Khalifah sangkoto a masa, na inaloy niyan oto, sa pitharo iyan a: Inibegay aken sekaniyan a sadka, sa tagoangka sekaniyan ko manga okit a kamapiyaan o manbga Muslim, na piphasa sekaniyan o Uthman sa limapolo nggibo. Sa bithowan angkoto a tamok sa Lima Polo.____________________So Hadith na Mawquf, so bo so Malik i miyanothol on.

3- Kitaban ko Kalipat ko Sambayang

1- Pinto a Piyayagan ko Galebek ko Kalipat (sahuw)

1/222- Piyanothol raken o Yahya, tig o Malik, a phoon ko Ibn Shihab a phoon ko Abu Salamah Bin Abdirrahman Ibn Awf a phoon ko Abu Hurayrah a so Rasulullah na pitharo iyan a: Mataan a so isa rekano na igira tominindeg ka pezambayang na makaoma so shaytan na rimbotan iyan, sa taman sa di niyan katanodan o pira i kiyazambayangan iyan, na igira miyaoma oto o isa rekano na sojud sa dowa a sojud a sekaniyan na moontod.

____________________So Hadith na Sahih, piyakambowat o Bukhari (1232) GO SO Muslim (569).

2/223- Go piyanothol iyan raken, tig o Malik, a minisampay ron, a so Rasulullah na pitharo iyan a: Mataan a saken na pephakalipat ako????????

____________________So Hadith na Mursal, so bo so Malik i miyanothol on.

3/224- Go piyanothol iyan raken, tig o Malik, a minisampay ron a aden a sakatao a mama a inzaan iyan so Al Qasim Bin Muhammad sa pitharo iyan a: Saken na lalayon ako pekhaparampang ko sambayang aken, na pitharoo Al Qasim Bin Muhammad a dayon kaden ko sambayang ka (taros ka den) ka di reka den oto khada sa taman sa maklapasad ka, sa giingka matharo a: Da ko matarotop so sambayang aken.____________________So Hadith na Maqtu; ago Munqati, so bo so Malik i miyanothol on.

4-Kitaban ko Jumuat

1-Pinto a piayayagan ko galebek ko Kaphaygo ko Jumuat

1/225- Piyanothol raken o Yahya, tig o Malik, a phoon ko Sumayya a sanasanaan o Abu Bakr Bin Abdirrahaman a phoon ko Abu Salih As Saman, a phoon ko Abu Hurayrah, a so Rasulullah na pitharo iyan a: Sa tao a phaygo ko alongan a Jumuayt sa

kaphaygo a junub oriyan iyan na komabalaga somong sa masjid ko paganay a masa, na datar o mikhorban sa onta, na sa tao a somong ko masjid ko masa a ika dowa, na datar o mikhorban sa sa sapi, na sa tao a komabalaga ko masa a ika telo, na datar o mikhorban sa kambing a pangaan, na sa tao a komabalaga ko masa a ika pat, na datar o mikhorban sa manok, na sa tao a somong ko masjid ko masa a ika lima na datar o mikhorban sa orak a manok, na amay ka lomiyo so imam na montod so manga Malaikat sa pephamamakinegen ran so tadentaden ko Allah. (Aya petharoon a masa a paganay ko waqto a jumuat na so kiyaona somong sa masjid na aya masa a ika lima na so aya kiyapakaoama niyan sa masjid na phangotbah den so imam, maana miyaoma den so waqtu a maito so balas iyan. So mindiyorobasa)____________________So Hadith na Sahih, piyakambowat o Bukhari (881) go so Muslim (840).

2/226- Go piyanothol iyan raken, tig o Malik, a phoon ko Said Bin Abi Said Al Maqburi a phoon ko Abu Hurayrah a giiniyan tharoon a: So kaphaygo ko alongan a Jumuat na wajib ko langowan a kiyabaligan, sa datar o kaphaigo sa junub.____________________So Hadith na Mawquf, so bo so Malik i miyanothol on.

3/227- Go piyanothol iyan raken tig o Malik, a phoon ko Ibn Shihab a phoon ko Salim Bin Abdillah a pitharo iyan a: Somiyoled a sakatao a mama a ped ko manga sahabah o Rasulullah sa masjid ko alongan a jumuat a so Umar Bin Al Khattab na giimangosiyat, na pitharoo Umar a: Antonaa a masa imanto? Na pitharo iyan a: Hay Amirul mu’minin miyakaoma ko a

phoon ako sa padian na miyaneg aken so bang, na daa minioman ko a rowar sa miyagabdas ako, na pitharoo Umar a: A go so pen so kapagabdas, a sabenar a kiyatokawan ka a so Rasulullah na ipezogo iyan so kaphaigo (ko alongana jumuat).____________________So Hadith na Sahih, piyakambowat o Bukhari (878) go so Muslim (845).

4/228- Go piyanothol iyan raken tig o Malik, a phoon ko Safwan Bin Sulayim, a phoon ko Ata’ Bin Yasar a phoon ko Abu Said Al Khudri a so Rasulullah na pitharo iyan a: So kaphaigo ko alongan a jumuat na wajib ko lanhgowan a kiyabaligan.____________________So Hadith na Sahih, piyakambowat o Bukhari (879) go so Muslim (846).

5/229- Go piyanothol iyan raken, tig o Malik, a phoon ko Nafi’ a phoon ko Ibn Umar a so Rasulullah na pitharo iyan a: Igira miyaoma o isa rekano so alongan a jumuat na phaigo. Pitharoo Malik a, sa tao a phaigo ko alongan a jumuat ko paganay a kadaondao niyan a aya bantak iyan roo na so alongan a jumuat na giyangkoto a kiyaphaigo iyan na di ron phakaampel sa taman sa di phaigo ko kazong iyan sa masjid, sabap sa so Rasulullah na pitharo iyan ko thotol o Ibn Umar a: Igira miyaoma o isa rekano so jumuat na phaigo. Pitharoo Malik, a sa tao a phaigo ko alongan a jumuat komabalaga odi na miyaori a aya niyat iyan roo na so kaphaigo ko alongan a jumuat na aden a minisogat on a miyakabatal ko abedas iyan, na daa paliyogat on a rowar ko kapagabdas, na so kiyaphaigo iyan na ampel on den.____________________So Hadith na Sahih, piyakambowat o Bukhari (877) go so Muslim (844).

2-Pinto a Piyayagan ko Kapamakineg ko alongan a Jumuat a so Imam

na giimangotba

6/230- Piyanothol raken o Yahya, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a so Rasulullah na pitharo iyan a: Igira pitharooka ko ped ka a: teren ka ago pamakineg ka, a so imam na giimangotba ko alongan a jumuat na sabenar a miyakatharo ka sa daa bali niyan (a katharo).____________________So Hadith na Sahih, piyakambowat o Bukhari (934) go so Muslim (851).

7/231- Go piyanothol iyan raken, tig o Malik, a phoon ko Ibn Shihab a phoon ko Thalabah Bin Abi Malik, Al Quradhi a piyanothol iyan on a miyaaden siran ko masa o Umar Bin Al Khattab a giisiran zambayang sa alongan a jumuat sa taman sa makaliyo so Umar sa amay ka makaliyo so umar ago makaontod ko mimbar sa magebang so pageebang, na pitharoo Tha’labah a: Miontod kami a giikami thotothola, na amay ka makapasad so pageebang ago tomindeg so Umar sa phangotba na tomeren kami sa da den a petharo rekami a isa bo. Pitharoo Ibn Shihab a: So kaliyo imam ko kaphangotba niyan na khitapelek so sambayang na so kapetharo iyan na khitapelek so katharo.____________________So Hadith na Mawquf, so bo so Malik i miyanothol on.

8/232- Go piyanothol iyan raken tig o Malik, a phoon ko Abu An Nadhr a sanasanaan o Umar Bin Ubaydillah a phoon ko Malik Bin Abi Amir a so

Uthman Bin Affan na giiniyan tharoon ko kotba niyan, a maito a kipembagaken iyan roo igira miyangotba a: Igira tominindeg so imam ka phangotba ko alongan a jumuat na pamakineg kano ago teren kano, ka so tometeren a di phamakineg na aden a kipantag iyan a datar o kipantag o tometeren a pephamakineg, na amay ka kamatan so sambayang na pakathithowa niyo so manga saaf, sa pakaphantapantaga niyo so manga waga, ka so kathithoo saaf na ped ko katatarotop o sambayang, sa di den thakbir taman sa di ron makaoma so manga mama a siyanaan iyan ko kaphakathithwa ko saaf sa pakitokawan iran on a so manga saaf na miyakathitho.____________________So Hadith na Mawquf, so bo so Malik i miyanothol on.

9/233- Go piyanothol iyan raken, tig o Malik, a phoon ko Nafi’ a so Abdullah Bin Umar na miyailay niyan a dowa katao a mama a giisiran mbitiyarai a so imam na giimangotba ko alongan a jumuat na libad iyan siran a maito a ator sa katareg iran.____________________So Hadith na Mawquf, so bo so Malik i miyanothol on.

10/234- Go piyanothol iyan raken tig o Malik, a minisampay ron a aden a sakatao a mama a miyakambaan ko alongan a jumuat, a so imam na giimangotaba, na simbag sekaniyan o mipagoobay niyan ko kiyapakambaan, na iniiza iyan oto ko Said Bin Al Musayyib, na inisapar iyan oto, sa pitharo iyan on a di niyan penggolaolaa pharoman.____________________So Hadith na Maqtu’ so bo so Malik i miyanothol on.

11/235- Go piyanothol iyan raken, tig o Malik, a inizaan iyan so Ibn Shihab ko katharo ko alongan a jumuat amay ka tomepad so imam ko mimbar ko da niyan pen kapakatakbir (ko kapzambayang) na pitharoo Ibn Shihab a: Daa marata roo.____________________So Hadith na Maqtu’ so bo so Malik i miyanothol on.

3-Pinto a piyayagan ko tao a romiyaot sa sarakaat ko

sambayang a jumuat

12/236- Piyanothol raken o Yahya, tig o Malik, a phoon ko Ibn Shihab a giiniyan tharoon a: Sa tao a romaot ko sambayang a jumuat sa sarakaat, na tarotopa niyan. Pitharoo Ibn Shihab a: Sekaniyan na sunnah o Rasulullah. Pitharoo Malik, a giyoto i riyaot aken ko manga ulama ko inged ami, sabap sa so Rasuullah na pitharo iyan a: Sa tao a romaot ko sambayang sa sarakaat (ko da pen kaipos o waqto) na sabenar a riyaot iyan so sambayang. Pitharoo Malik a: Ko tao a miyasogat a kaliget ko alongan a jumuat sa meroko, sa di niyan khagaga o ba makasojud, sa taman sa miyakambangon so imam odi na phakaasad so imam ko sambayang iyan a: Okhagaga niyan a makasojud amay ka miyakaroko na sojud amay ka tomindeg so manga tao, na amay ka di niyan khagaga a kapakasojud iyan sa taman sa miyakapasad so imam ko sambayang iyan, na aya mapiya raken a tindeg na zambayang sa lohur a pat rakaat.____________________So Hadith na Mqtu’ so bo so Malik i miyanothol on.

4-Pinto a Piyayagan ko tao a linimamadan

Ko giikazambayang sa jumuat

Pitharoo Malik, sa tao a limamadan ko alongan a jumuat a so imam na giimangotba, na go lominiyo sa da kasoy sa taman sa miyaka[asad zambayang so imam, na aya kapezamba-yangan iyan na lohur.

Pitharoo Malik ko makapantag ko mama a miyakaroko sa saroko a ped iyan so imam ko alongan a jumuat oriyan iyan na linimamadan na lominiyo, na kagiya komasoy na miyakazambayang so imam sa dowa rakaat, na aya zowaan iyan na tharotopen iyan so sarakaat a da niyan mapasad, amay ka da sekaniyan makatharo (sa katharo a di ped ko sambayang)

Pitharoo Malik a: Daa paliyogat ko tao a limamadan odi na masogat sekaniyan a betad a khipatoray niyan on so kaliyo oba odas ko imam ko alongan a jumuat amay ka meliyo.

5-Pinto a Piyayagan ko KanggagaanKo kasong ko samabayang a

Jumuat

13/237 Piyanothol raken o Yahya, tig o Malik, a inizaaan iyan so Ibn Shihab ko katharoo Allah a Maporo ago mala a: Hay so miyamaratiyaya igira inipanaanwag so sambayang ko alongan a jumuat na

song kano ko tadem ko Allah. Na pitharoo Ibn Shihab a: Miyaaden so Umar Bin Al Khattab a pembatiyaan iyan sa: Igira inipananawag so sambayang ko alongan a jumuat na tengkayos kano ko katademi ko Allah. Pitharoo Malik a: Aya petharoon a Sa Sa’iy ko Qur’an na giyoto so kanggalebek, pitharoo Allah a: Go igira tomiyalikhod na nggalebek (manizakay) sii ko lopa. Go pitharoo Allah a: So peman so tao a miyakaoma reka a ginggalebek (pephanizakay), a sekaniyan na ipekhalek iyan (so Allah). Go pitharo iyan a: Oriyan iyan na tomiyalikhod a giinggalbek. Go pitharo iyan a: Mataan a so galebek iyo na disomala ambidabida.

Pitharoo Malik a: Kena o ba so Sa’yi a so inaloy o Allah ko kitab iyan na ba so maana a kanggagaan lomalakao ago so kapalalagoy, ka aya maana oto na so kapanamar nggalebek.____________________So Hadith na Munqati’ so bo so Malik i miyanothol on..

6-Pinto a Piyayagan ko Imam a tomana sa isa a Lipongan ko

alonga a jumuat a sekaniyan na giimelayalayag

Pitharoo Malik a igira tomipad so imam sa isa a inged a paliyogat on so kajumuat a so imam na giimelayalayag na go pangotba sa jumuat na so manga tao sangkoto a darepa na makapjumuat siran a ped kiyan.

Pitharoo Malik a onjumuat so imam a sekaniyan na giimelayalayag sa isa a inged a di ron paliyogat so kajumuat, na da a jumuat iyan (so imam) a go da mambo sangkoto a manga tao sa ngkoto a inged, go da pen ko tao a minjumuat a ped iran a salakao kiran, sa phakaganap angkoto a manga tao sa sambayang a pat rakaat ko langowan a di ron tometembeng.

Pitharoo Malik a: Daa jumuat a patoray ko giimelayalayag.

7-Pinto a Piyayagan ko Matetendo a Masa aso Matatago ko alongan a

jumuat

14/238- Piyanothol raken o Yahya, tig o Malik, a phoon ko Abu Az Zinad a phoon ko Al A’raj a phoon ko Abu Hurayrah a so Rasulullah na inaloy niyan so alongan a jumuat sa pitharo iyan a: Madadalem on a isa a masa (kotika) a daa makarengan on (makatabo ron) a oripen a Muslim a sekaniyan na tomitindeg a giizambayang a aden a pephangenin iyan ko Allah a nganin inonta a ibegay ron o Allah, sa inipaginsarat o Rasulullah a lima niyan.____________________So Hadith na Sahih, piyakambowat o Bukhari (935) go so Muslim (852).

15/239- Go piyanothol iyan reken, tig o Malik a phoon ko Yazid Bin Abdillah Bin Al Had a phoon ko Muhammad Bin Ibrahim Bin Al harith At Timi a phoon ko Abu Salamah Bin Abdirrahman Bin Awf, a phoon ko Abu Hurayrah a pitharo iyan a: Lominiyo

ako sa somiyong ako sa At Tur, na miyabalak aken so Ka’b Al Ahbar, na miyontod ako a ped iyan na piyanonothola iyan raken so At Tawrah na piyanonothol aken o so makapantag ko Rasulullah na ped ko miyapanothol aken on a pitharo aken on a: Pitharoo Rasulullah a: Aya mapiya a gawii a sibangan sekaniyan o alongan na so alongan a jumuat a ron na inaden so Adam ago ron na piyakababa phoon ko sorga, ago ron na piyakatawbat, ago ron miyawafat, ago ron na phakatindeg so bangkit, go daa ped sa baraniyawa inonta a tomatandang sa pamamakinegan ko alongan a jumuat ipoon ko kapipita on sa taman sa kasebang o alongan sa kalek iran sangkoto a bangkit inonta so jinn ago manosiya (liyo sangkoto a mnga kaaden) go aden a masa on (kotika on) a di sekaniyan katabowan o oripen a muslim a sekaniyan na giizambayang a aden a pephamngenin iyan ko Allah inonta a ibageay niyan on. Pitharoo Ka’b a giyoto na sii ko oman saragon na makaisa, na pitharo aken a di ogaid na sii ko oman jumuat na b iyatiya o Ka’b so tawrah na pitharo iyan a benar so Rasulullah. Pitharoo Abu hurayrah a: Miyabalak aken so basrah Bin Abi Basrah Al Giffari na pitharo iyan a: Anda ka miyakapoon, na pitharo aken a phoon ako sa Tur, na pitharo iyan a: O riyaot aken seka ko da ngka pen kapakaliyp na di ka makaliyo, miyaneg aken so Rasulullah a giiniyan tharoon a: Daa a phanompangen a zongowan a rowar sa telo a manga masjid, giya Al masjidil Al haram, ago giya masjid akenai, a go so masjid sa Iliya odi na Baytul maqdis. Pitharoo Abu Hurayrah a miyabalak aken so Abdallah Bin Salam na piyanothol aken on so kinindarepain aken ko Ka’b Al Ahbar ago so miyandagidayan ami makapantag ko alongan a jumuat. Na pitharoo Ka’b a giyoto na sii ko saragon na salongan, na pitharoo Abdullah Bin salam a:

Miyamokhag so Ka’b, na pitharo aken a biyatiya o Ka’b so tawrah na pitharo iyan a: Ogaid na sii ko oman alongan a jumuat na pitharoo Abdullah Bin salam a: Bnar so Ka’b. Oriyan iyan na pitharoo Abdullah Bin Salam a: Sabenar a katawan aken o andaa masa? Na pitharoo Abu Hurayrah a tharoangka raken sekaniyan sa di ngbdullah Bin salam a: Sekaniyan so kaposan a masa ko alongan a jumuat. Na pitharoo Abu Hurayrah a andamanayai kakhaaden iyan ko kaposan a masa ko alongan a jumuat a pitharoo Raulullah a: Daa makatabo ron a oripenm a muslim a giizambayang. A giyangoto a masa a pitharooka na masa a da a baon sambayang? Na pitharoo Abdullah Bin Salam a: ba da matharoo Rasulullah a: Sa tao a moontod sa darepa a phenayaon iyan so sambayang na sekaniyan na madadalem sa sambayang. Na pitharoo Abu Hurayrah a: Engkaino da, na pitharo iyan a: giyoto sekaniyan.____________________So Hadith na piyakambowat sekaniyan o Abu Daud (1046) ago so Nasai (3/113) ago pitharoo Al Albani a sekaniyan na Sahih.So petharoon a Tur, na giyoto so palao a pimbitiyaraiyan o Allah ago so Nabi Musa.

8-Pinto a Piyayagan ko Langka ago so Kasapanga ko manga lig o maga

tao ago so kaadapa ko imam ko alongan a jumuat

16/240- Piyanothol raken o Yahya, tig o Malik, a phoon ko Yahya Bin Said, a inisampay ron a so Rasulullah na pitharo iyan a: Patoray ko isa rekano a kowa sa dowa anditaren a pantag ko jumuat yan a salakao ko nditaren iyan sa galebekan.____________________

So Hadith na Mursal, sa iniwasal sekaniyan o Abu Daud (1078) go so Ibn Majah (1095) a phoon ko Asbdullah Bin salam, biyaloy sekaniyan a Sahih o Al Albani.

17/241- Go piyanothol iyan raken tig o Malik, a phoon ko Nafi’ a so Abdullah Bin Umar na miyaaden a di zong sa masjid ko jumuat inonta a mborok sa manga pipiya i bao. Inonta bo oba sekaniyan magiihram sa umrah odi na hajji ka di pemamot.____________________So Hadith na Mawquf, so bo so Malik i miyanothol on.

18/242- Go piyanothol iyan raken tig o Malik, a phoon ko Abdullah Bin Abi Bakr Bin Hazm a phoon ko tao a miyanothol on a phoon ko Abu Hurayrah a giiniyan tharoon a: So kazambayang o isa rekano sa lopa a Al harrah na tomo on a di so kaontod iyan sa amay ka tomindeg so imam a phangotba na makaoma sekaniyan a giiniyan panapangen so tengo o manga tao ko alongan a jumuat. Pitharoo Malik a: Aya okit rekami na so kaadapa o manga tao ko imam ko alongan a jumuat amay ka giimangotba, sa aadapen iran a qiblat.____________________So Hadith na Mawquf, so bo so Malik i miyanothol on.

9- Pinto a piyayagan ko kabatiya ko sambayang a jumuat a go so Ihtiba ago so tao a ibagak iyan (so Jumuat) sa daa

sendod iyan

19/243- Piyanothol raken o yahya, tig o Malik, a phoon ko Dhamrah Bin Said Al Mazini a phoon ko Ubaydullah Bin Abdillah Bin Utbah Bin Masud a so Dahhak Bin Qays na inizaan iyan so Nu’man Bin

Bashir o antonaa i pembatiyaan o Rasulullah ko alongan a jumuat a phakatondog ko Surah Al Jumuah, na pitharo iyan a: Pembatiyaan iyan so Surah Al Gashiyah.____________________So Hadith na Sahih, piyakambowat o Muslim (877).

20/244- Go piyanothol iyan raken tig o Malik, a phoon ko Safwan Bin Sulayim a pitharoo Malik a: Di ko katawan o miyakapoon ko Nabi antaa ka di a pitharo iyan a: STao a ibagak oiyan so sambayang a jumuat sa makatelo sa daa sendod iyan ago daa sakit iyan inonta atotopan o Allah so poso iyan.____________________So Hadith na piyakambowat o Abu Daud (1052) go so Tirmidi (500) go so Nasai (3/88) go so Ibn Majah (1125) a Marfu’ a phoon ko thotol o Abu Al Ja’d Ad Dhumarim sa biyaloy sekaniyan o Al Albani a hadith a sahih.

21/245- Go piyanothol iyan raken, tig o Malik, a phoon ko Ja’far Bin Muhammad a phoon ki ama iyan a so Rasulullah na miyangotba sa dowa a kotba a go miontod ko pageletan angkoto a dowa akotba.____________________So Hadith na Mursal, go piyakambowat o Bukhari (920) go so Muslim (861) a phoon ko Ibn Umar.

5-Kitaban o Sambayang ko Ramadhan

1- Pinto o Pangoyat ko Sambayang ko Ramadhan (tarawih)

1/246- Piyanothol raken o Yahya, tig o Malik, a phoon ko Ibn Shihab a phoon ko Urwah Bin Az Zubayr a phoon ko Aishah a karoma o Nabi a so Rasulullah, na mizambayang sa masjid sa isa a kagagawii, na aden a miyamangonot on a manga tao, oriyan iyan na mizambayang ko kagagaii a miyakatondog na mindakel so manga tao a mionot on, oriyan iyan na mitimotimo siran ko kagagawii a ika telo, odi na sii ko ika pat, na da kiran liyo so Rasulullah, na kagiya subu na pitharo iyan a: Sabenar a miyailay aken so pinggolaola niyo na daa miyakasapar raken ko kaliyo rekano a rowar sa inikawan aken o ba rekano maparalo. Giyoto na sii ko Ramadhan.____________________So Hadith na Sahih, piyakambowat o Bukhari (1129) go so Muslim (761).

2/247- Go piyanothol iyan raken, tig o Malik a phoon ko Ibn Shihab a phoon ko Abu salamah Bin Abdirrahman Bin Awf, a phoon ko Abu Hurayrah a so Rasulullah na pekhababayaan iyan so kapanambayang ko Ramadhan, sa di niyan iphaliyogat sa giiniyan tharoon a: Sa tao a manambayang ko Ramadhan sa paratiyaya niyan ko Allah ago imbetes iyan so balas iyan ko Allah na irila on so miyaona ko manga dosa niyan. Pitharoo Ibn Shihab a miyawafat so Rasulullah a so betad na datar den oto, oriyan iyan na miyaaden so betad sa datar iyan ko kandadato o Abu Bakr ago sii ko poonan o kiyandato o Umar Bin Al Khattab. (Giyangkoto a sambayang ko kagagawii ko

Ramadhan na giyoto so sambayang a Tarawih. So mindiyorobasa).____________________So Hadith na Sahih, piyakambowat o Bukhari (2008) go so Muslim (759).