2020 · mataupu 1 : ³matua ma le poto? manatua le atua o le poto ´ (older and wiser, celebrating...

EKALESIA FAAPOTOPOTOGA KERISIANO I AMERIKA SAMOA

OFISA O A’OA’OGA KERISIANO

VASEGA MATUTUA FAAPITOA

18

Ianuari - Iuni

2020

Tautua Printing Press

Congregational Christian Church of American Samoa

1 Kanana Fou Street, Box 1537

Pago Pago, American Samoa 96799

www.efkasonline.org

1

Fepuari 02, 2020. MANATU TA’ITA’I: “FAITAUGA O LE TUSI PAIA.” (Reading the Bible)

Mataupu 1: “Matua ma le poto? Manatua le Atua o le poto” (Older and Wiser, Celebrating

the God of wisdom”)

Tusi Faitau: Fa’ata’oto - 8: 22-31

Sini: Ia ma’ea lenei mataupu ua malamalama tamaiti o le Atua e sili lona poto i le lalolagi

uma.

Fesoasoani mo le faiaoga:

Ia fa’amanatu pea i le fanau o le Atua e silisili lona poto i le lalolagi uma. O le fa’amoemoe ia

ta’ape le fanau i lenei taeao ua mausalī i o latou loto “o le Atua e sili lona poto i le lalolagi

uma.” Ia taumafai fo’i e fa’amanatu i le fanau ina ia aua ne’i avea le poto e fai ma auala e galo

ai le Atua. Manatua, o fanau ia ua faigofie ona latou fa’auigaina le Tusi Pa’ia i o latou

mafaufau. Tatala pea le avanoa e fa’asoa ai i latou, ae fa’atonutonu pea e lau Susuga o latou

lagona i lo tatou fa’atuatuaga ma lo tatou talitonuga. Manuia le tapenaga.

Fesoasoani mo le mataupu

O le tusi sa faitauina o lo’o fa’amatala ai e le tusitala le poto o le Atua sa i ai i le amataga, a’o

le i faia le lagi ma le lalolagi. O lona poto lea sa fau ai le lagi ma le lalolagi e pei ona

fa’amatalaina e Kenese i le mataupu muamua ma le lua. O le tala a le tusitala o Kenese fai

mai, sa so’ona nunumi le lalolagi i le amataga. O lona uiga, o se lalolagi matagã ma le

gaogaosā i ai i le amataga. O le tala tatou te ofo ai, fai mai na toe fausia e le Atua i lona poto

ma lona mana silisili-‘ese. Sa ia fa’atulaga le lalolagi ma ua ia silasila atu, ua lelei ona ia

malõlõ ai lea. Sa lē malōlō lava le Atua se’ia o’o ina lelei le lalolagi e nonofo ai lana fanau. A

tatou nonofo ma va’ava’ai i le lalolagi lea tatou te i ai, e leai se tagata ola e mafai ona ia

fa’amafolafola le ma’anuminumi sa i ai, se’i vagana le Atua. Ua lava ma totoe tala o le

foafoaga e ta’u mai ai iā i tatou, o le Atua e sili lona poto i lenei lalolagi. Ua manino nei ma malamalama, e lē gata o le Atua na faia le poto, a’o ia fo’i e sili lona poto.

A’oa’oga:

1. E sili le poto o le Atua i tagata uma

2. O le mafuta i le Atua e maua ai le poto

3. A e maua le poto, ia e fa’afo’i le fa’afetai i le Atua.

4. Ia fa’amuamua le Atua ae lē o le poto.

5. E fia-poto, ae leaga le fa’a-fiapoto.

Galuega Fa’atino: Fa’aaoga api e tali ai fesili ona fa’amalamalama lea o tali.

O fesili nei e fa’amalamalama ai le mataupu.

1. O le ā sou lagona pe ā e va’ai i le matagofie o le lalolagi?

2. O le ā se tulaga sa i ai le lalolagi i le amataga ae le i amataina le galuega foafoa a le

Atua?

3. O le ā se mea tatou te tali atu ai i le Atua e tusa ma le galuega tele sa ia faia?

4. O le ā le mea e tatau ona fai e so’o se tagata soifua pe ā ia mauaina le poto?

5. Aiseā e leaga ai le fa’a-fiapoto?

6. Ia fa’aopoopo ane ma nisi fesili o silafia e lau Susuga.

7. Fa’amolemole e togi lava e lau Susuga tali a le fanau ma fetufa’ai e fa’alautele ai.

2

Nisi mea e fai

Ia faitau leotele le tusi faitau e a’o ai le faitau a tamaiti. Ia tu’u se tolu minute pe sili

atu, se’i tusi mai ai e le tama po’o le teine, po’o le ā so latou lagona i lea tala. Ua lava

se palakalafa se tasi.

Upu ma o latou uiga:

Vavau - amataga Fogātai – o le pito i luga o le sami

Sopoia – ua o’o atu i le isi itu

Tufuga – tagata fau fale, ma isi taleni ‘ese’ese e agava’a ai se tagata.

Pese – #66 (Tusi Pese)

Galuega i le aiga mo tamaiti (homework)

Ia faitau ma su’esu’e i ai. Mika 4:1-7

Ia tofia se tama po’o se teine e saunia se tatalo e fa’ai’u ai le vasega.

*************************IA MANUIA LE TAPENAGA O LE ASO SA*********************

Fepuari 09, 2020. FAITAUGA O LE TUSI PAIA. (Reading the Bible)

Mataupu 2: “Aupega e saunia le matagofie, o le tali lea i le Atua o Perofetaga.”

(Weapons into beauty; responding to the God of prophecy)

Tusi Faitau: Mika 4: 1-7

Sini: Ia mae’a le mataupu ua malamalama tamaiti, e suia e le Atua mea leaga ma avea

ma mea matagofie.”


E pule lava lau Susuga i le faiaoga i le amataina o lau vasega. O si a’u fesoasoani la’ititi, e

manaia fo’i ae amata i nai fesili e toe fa’amanatu ai le mataupu i le Aso Sa ua tuana’i, ona

fa’aauau ai lea o le mataupu o lenei taeao. Ia fa’amatala i au lava upu le uiga o le ulutala o le

nei taeao, pe fesili fo’i i tamaiti pe i ai se isi e mafai ona ia fa’amatalaina i ana lava upu le

uiga o le ulutala. E lē taumate le tele o le tamāoaiga pe ā tu’u le avanoa e fa’asoa ane ai o latou manatu, auā ua matutua fanau ia. Manuia tele le tapenaga, malō le onosa’i.

Fesoasoani mo le mataupu:

O le faitauga o lenei taeao, o lo’o fa’atatau i le silisili-‘ese o le alofa ma le mana o le Atua e

suia ai mea uma. O le feau a le perofeta o Mika o lo’o avatu mo le nu’u o le Atua i lona vaitau.

O le vaitau o Mika sa matuã tetele ai le tamãoaiga i le nu’u o le Atua; ma ua avea lea

tamãoaiga ua fai ma auala e sasao fa’aafi ai le agasala, ma galo ai le alofa o le Alii. O le feau la

mo lea vaitau e pei fo’i ona aumaia e Amosa ma nisi perofeta laiti, o Isaraelu o le ā o’o mai i

ai le to’asa o le Atua e le toe fo’i lava. E ui lava i lea, o le Atua e tele lona alofa ma e televave

fo’i; o le ala lea o lona avatu o le feau alofa mo lona nu’u e pei ona tatou faitauina i le nei

taeao. O le fe’au a le perofeta, e i ai le taimi e suia ai e le Atua mea matagã ma avea ma mea

matagofie.

3

I le fuaiupu e tolu o lo’o ta’ua ai a’upega e pei o le pelu ma le tao. O a’upega ia e fa’aaoga i

taua ma afua ai le oti, a’o lea ua aumaia e le perofeta e fa’amalamalama ai lana feau o lo’o

tau avatu. Fai mai le tala fa’atusa a le perofeta, e tu’i ‘aupega ia ma avea le ‘tao’ e fai ma

suõtosina o le ‘pelu’ fo’i i le polo teu vine. O le polo teuvine o le tama’i naifi e teu ai vine ina

ia matagofie ma lelei. O le suõtosina e galueaina ai le ‘ele’ele mo le ola. Pe a tu’u i se

fa’aupuga faigofie, o lea o le ā suia le ata o le oti i le ola. O le fe’au atoa o le tusi faitau, ua

folafola e le perofeta le manuia o le lumana’i mo le nu’u o le Atua. E ui lava i le to’asā o le Alii o le ā o’o mai, ae sili atu lona alofa e suia ai le oti i le ola.

O aso nei e lē o toe talanoa i ni ‘aupega e pei o naifi ma tao, auã o ‘aupega nã e masa’a ai le

toto. O lea ua tatou i ai i le malamalama o le talalelei. O lona uiga, ua tatau ona tatou talanoa

i ‘aupega e saunia e le loto ma le mafaufau, ua tu’uina atu i le Atua i taimi uma. O le o’o mai o

satani ma ana fa’a’oso’osoga, o se ‘aupega leaga lea ma le malosi e ono lepetia ai lo tatou ola. O le ā la se ‘aupega e mafai ona tatou fa’aaogaina e tau ai le taua lea? E lē faigata le tali, tau

lava o lo tatou fa’amaoni i luma o le silafaga a le Alii ma tausi ana poloaiga ona tatou manumalō lea. E i ai taimi tatou te manatu ai ua leai so tatou fa’amoemoe, i le fa’atuatua

tatou te lagona ai suiga e faia e le Atua. Ia mafuta i le Alii i le tatalo i aso uma i le agaga ma le

fa’amaoni, ona ia a’apa mai lea ma lavea’i i tatou. O ‘aupega na ua saunia e le Atua mo i

tatou, ina ia liua faiga matagā a le tiapolo e avea ma mea matagofie.

A’OA’OGA

1. E suia e le Atua mea matagā e avea ma mea matagofie

2. O le fa’amaoni i le mafutaga ma le Alii e maua ai le mafanafana i taimi o faigatā.

3. O le pule a le Atua e lē suia e se tagata.

4. E fa’a’aupegaina i tatou e le Atua mo so’o se fa’amoemoega lelei.

5. Ia fa’aopoopo ane nisi a’oa’oga ua e silafia fa’amolemole.

Galuega fa’atino:

1. Ia fai fesili nei e fa’amalamalama atili ai le mataupu.

a) O le ā le uiga o le upu “polo teu vine?”

e) Pe fa’apefea ona tatou manumalō i le taua ma satani e pei ona ta’ua i le mataupu?

i) O le ā sou iloa, e mafai ona e suia ni ‘aupega leaga i le matagofie ae pe fa’apefea

fo’i?

2. Nisi fesoasoani

o) Ia faitau felafolafoa’i le Tusi Paia e a’o ai le faitau a tamaiti.

u) Ia fa’aavanoa se tolu minute e tusi mai ai e le tamaititi se palakalafa e fa’amatala

mai ai po’o le ā sona lagona i lea tala.

PESE Saili se fati faigofie e usu ai le pese #168 (Tusi Pese)

Galuega i le aiga mo tamaiti (homework):

Ia faitau le tusi lenei - Ioane 14 : 15-24.

Ia tusia se palakalafa se tasi, e fa’amatala mai ai po’o le ā sou iloa i lenei tusi faitau.

*************************IA MANUIA LE TAPENEGA O LE ASO SA.**********************

4

Fepuari 16, 2020. “FAITAUGA O LE TUSI PAIA.” (Reading the Bible)

Mataupu 3: “Mulimuli i le faiaoga, a’oa’o mai le Atua o a’oa’oga. “

(Following our Rabbi, learning from the God of teaching.)

Tusi Faitau: Ioane 14: 15-24

Sini: Ia mae’a le mataupu ua malamalama tamaiti, o le mulimuli i le faia’oga lelei e

manuia ai.


O lo’o i lau Susuga lava i le faiaoga le fa’asologa o le mataupu i le nei taeao, ae ou te manatu

e manaia fo’i pe ā amata i ni nai fesili e fa’amanatu ai le mataupu i le vaiaso ua tuana’i; ona

fa’asolo ai lea o le mataupu o le nei taeao. O le fefa’asoa’ai ma le vasega lea o le ā matuā ‘oa

ai le mataupu. O le metotia lava o le fesili ma tali, e te fesili iā i latou, e fesili ane foi i latou i lau Susuga. E manaomia pea lau tapenaga o le vaiaso fa’amolemole. Manuia le tapenaga.

Fa.afetai le fa’amalolosi.


O le tusi sa faitauina, o lo’o fa’atatau i le tele o mea lelei o lo’o a’oa’o mai ai Iesu ina ia

mulimulita’i i ai le tagata talitonu iā te ia. E tele faia’oga, ae tulaga ‘ese lava le faia’oga lea. O

ia o le faia’oga atoatoa, e maua i ai mea uma e mo’omia e le tagata soifua e a’oa’oina. O le

mea faigofie le fa’alogo i le faia’oga, ae faigatā lona fa’atinoga. E mamafa saunoaga a le Alii i

ona so’o, ae o lo’o malamalama lava uiga o ana saunoaga. O lo’o taumafai le Alii e

fa’amalamalama i ona so’o le tāua o le tumau i le mea ua a’oa’oina ai i latou. Ua a’oa’o e le

Alii, e tumau le Atua i le tagata, pe afai e loto atu iā te ia ma faia mea uma e finagalo i ai. Ua

ia a’oa’o i ona so’o i mea e manuia ai le tagata i le lalolagi fa’apea fo’i le ola atalī. E iloa le tagata ua mulimuli i le faia’oga, pe afai e mafai ona ia fa’atino ma usita’ia me uma ua ia

a’oa’o mai. E lē o faia’oga uma e lelei i taimi uma, a’o le faia’oga o Iesu, ia e mulimuli i ai ma

le agaga fa’afetai.

E lē tumau le olaga i le tamaitiiti, ae aga’i ina avea ma tagata matua. O lona uiga e i ai taimi e

avea ai foi oe ma faia’oga ma tatou a’oa’o atu i tagata. Ia fa’amanatu i le fanau, a o’o ina

matutua ma avea ma faia’oga; ia avea i latou ma faia’oga lelei e mulimuli i ai tagata ma

manuia ai ā latou a’oa’oga. Ia manatua le Alii i taimi uma, auā o ia o le faia’oga sili. O ia lava

e fesoasoani mai i lo tatou vaivai ma aumaia le mautinoa i o tatou loto. E fa’atauva’a le

tagata, ae tatou te fa’amoemoe pea i le fesoasoani mai o le Agaga i taimi uma e mo’omia ai.

Ia ta’ape le fanau i le nei Aso Sa, ua latou mautinoa o Iesu o le faia’oga sili, ae ā avea i latou

ma faia’oga, ia aua ne’i galo ia fa’alagolago pea i le Alii le faia’oga o faia’oga.

A’oa’oga:

1. Ia e fa’amaoni i le lua mafutaga ma le Alii

2. Ia fa’alogo, usita’i ma savali ai i mea lelei ua a’oa’oina ai oe.

3. Ia e tumau i le Atua

4. Ia fa’aopoopo ane ma isi a’oa’oga ua le maua atu i’inei fa’amlemole.

5

Galuega Fa’atino: Fesili e fa’amalamalama ai le mataupu

1. E fa’apefea ona iloa ua tatou alolofa moni i le Atua?

2. O le ā sou iloa, o le ā le mea tatou te maua pe ā usita’i i le Atua?

3. O le ā sau mea e fai pe ā avea oe ma faia’oga?

4. Aiseā e sili ai Iesu i faia’oga uma.

O nisi fetalaiga a le Alii, e lelei fo’i pe a a’o faatauloto.

1. “Afai tou te alolofa mai ia te a’u, ia outou tausi mai i a’u poloaiga (f-15).”

2. “Ou te le tu’ua outou o matua oti, ou te sau iā te outou (f-18).”

3. Ia faitau fa’alua pe tolu fo’i le fuaiupu e sefuluiva e o’o atu i le luasefulutasi. E tāua upu uma o lo’o iai.

Nisi Fesoasoani:

E manaia fo’i ae fai sa outou fa’atinoga pu’upu’u. Ia tofia se tamaitiiti e fai ma Iesu, ae

fa’aaoga uma tamaiti fai ma so’o. Ia nonofo uma i lalo tamaiti ae ua lava le ua fai ma Iesu e

tu i luga ma faitau atu fetalaiga a le Alii i ona so’o.

Pese

Ua ou filifili e mulimuli ia Iesu x3

Ou te le toe fo’i, ou te lē toe fo’i


Faitau ma su’esu’e i ai (Mataio 19: 16-30)

************************IA MANUIA LE TAPENAGA O LE ASO SA***********************

FEPUARI 23, 2020 **SU’EGA MO LE MASINA O FEPUARI**

FESILI

1. Pe fa’apefea ona iloa le silisili’ese o le poto o le Atua e ala i le foafoaina o le lalolagi?

Tali: Auã sa ia fa’amafolafola le ma’anuminumi sa i ai le lalolagi. Sa ia fa’avasega lelei

mea uma, ma ua ia silasila atu ua lelei.

2. O le ā le mea e tatau ona tatou faia pe afai e maua le poto? Tali: Ia tatou fa’aaoga

lelei mo le manuia o Ekalesia, aiga, nu’u, atunu’u ma le lalolagi atoa. A o le mea sili

ona tãua, ia tatou iloa ona fa’afo’i le faafetai i le Atua le na ia foa’i mai le poto.

3. O ā ni foliga sa i ai le lalolagi i le amataga ae le i amataina le galuega foafoa a le Atua?

Tali: Sa matagã lava ma so’ona nunumi e pei ona ta’ua e le Kenese.

4. O le ā se a’upega malosi e mafai ai ona tatou manumalō ai mai i le tiapolo ma ana

faiga? Tali: O le tatalo i le Atua ma fa’alagolago i le fesoasoani mai o lona mana. Ia õ

fa’atasi le tatalo ma galuega.

5. O le ā le uiga o le upu “polo teuvine? Tali: O le polo o le isi lea igoa o le naifi. O lona

uiga o le naifi teuvine.

6. O Iesu le faia’oga sili, aiseã e tulaga ‘ese ai lea faia’oga lea mai i faia’oga uma? Tali: O

Iesu o le faiaoga e iā te ia agava’a lelei uma lava.

O ana a’oa’oga e tatau ona fa’aa’oa’o i ai tagata uma o lenei lalolagi, auā ua ia a’oa’o

mai na o mea lelei e ola ma manuia ai le tagata.

6

7. O le ā sau tapenaga o le ā fai pe afai e avea oe ma faia’oga? (Ia tusia lau tali i se

palakalafa se tasi pe lua fo’i), ia tu’u le avanoa i le fanau e fa’aali mai ai o latou

lagona.

8. O ā ni a’oa’oga ua e maua mai i nei mataupu ua uma ona fai? Ia fa’aaoga a’oa’oga

uma o lo’o aumaia i mataupu ta’ita’itasi.

Galuega i le aiga (homework)

Ia faitau ma su’esu’e i le Mataio – 19:16 - 30

**************** IA MANUIA LE TAPENAGA O LE ASO SA *************************

Mati 01, 2020

Manatu: Ta’ita’i: “MEA LILO O LE MALŌ O LE ATUA” (Secrets of the Kingdom)”

Mataupu 4: “Oa i le lagi” (Treasure in heaven)

Sini: Ia ma’ea lenei mataupu ua malamalama tamaiti, o oa i le lagi, o le manuia lea e

fa’avavau.

Tusi Faitaau- Mataio 19: 16 -30

Fesoasoani mo faiaoga:

A o le’i fa’amatalaina le mataupu, e lelei ona fesili muamua i tamaiti e fa’amatala mai i ā

latou lava upu le uiga o le upu “oa” lea o lo’o fa’aogaina i le ulutala. E lē tasi se uiga o le upu “oa,” ae afai e malamalama muamua tamaiti i le uiga o lo’o fa’aogaina ai i le ulutala; ou te

manatu lava o le ā faigofie ona malamalama le mataupu.


I le matutua lea ua i ai lau vasega, e tasi lo latou mafaufau o lo’o fa’atatau le ulutala i tupe,

auro ma le tele o isi tamãoaiga. Peita’i, i lenei taeao, o le ā ‘ese se mea e aga’i i ai le mataupu.

O le tusi faitau o lenei taeao o lo’o fetalai ai Iesu i le ‘oa’ e maua pe ā fa’aologo ma talia le

a’oa’iga. Fai mai le tala ua sau le tasi tagata ma fai atu iā Iesu ua ia tausia uma poloaiga.

Peita’i, na suia mea uma ina ua fetalai le Alii e alu e tufatufa atu le tamãoaiga ua ia maua ma

tagata. Ua lē fiafia auã o lo’o mana’o pea le loto i le ‘oa fa’ale-lalolagi o mea e pala, ma misi ai

le avanoa e maua ai le ‘oa i le lagi o le mea e tumau. Mulimuli ane ona fetalai atu lea o Iesu i

ona so’o i ana upu e fa’apea “e faigofie ona ui atu o se kamela i le pū o le au, ae faigatā ona sao o le mauoa i le malō o le Atua (f-24).” O le au o le igoa lea e ave i le nila su’i lavalava. E

mafai fa’apefea e se kamela ona ofi ai? O le tala fa’atusa lenã a le Alii i le faigatā ona sao atu o le tagata i le malō o le Atua pe ā ia le maua ‘oa i le lagi.’ E le aogā le tele o le tamāoaiga ae leai se alofa i le tuāo’i ma isi tagata. O le alofa ma isi uiga lelei uma, o ‘oa ia o le lagi e leai ni

o latou tino ae fa’avavau lo latou aogā.

O ‘oa i le lagi e mafai ona tatou fa’amatalaina i le ola ofo atu mo le Alii. E lē o ni tupe ma mea

taugatã o le olaga nei, ae o le faia o mea lelei uma e finagalo i ai le Atua. O mea e aofia ai le

usita’i, fa’amaoni, fa’amagalo, fealofani, ae taualuga mea uma i le alofa i le Atua ma le loto

atoa.

E fa’amata faigofie i le fa’alogo, ae o le ‘oa lea se i vagana ua e tu’ua tu’inanauga uma o le

lalolagi ona e maua lea. Afai e te maua lea ‘oa, ona iā te oe lea o fa’amanuiaga a le Alii. O le

7

tamãoaiga o le tino lea tatou te milionea ai i lalo nei, e lē taulia i le lagi. E lē fia silasila le

Atua i le tele o ni mea tatou te maua, ae fiafia o ia pe ā tatou alolofa, fa’amaoni, usita’i ma isi

mea lelei uma tatou te faia. Ia ta’u i le fanau e lē leaga le tamãoaiga, auã o mea ia na foa’i mai

e le Atua e tausi ai lo tatou ola; ae leaga pe ā fai e avea ma mea e galo ai le Atua ma lona

alofa. Ia ta’u atu i le fanau, o le ‘oa i le lalolagi nei e pala ma mavae atu; a’o ‘oa o le lagi o mea

e tumau e o’o i le fa’avavau.

A’oa’oga:

1. E tauā lou tausi i poloaiga a le Alii ma savali ai.

2. Aua nei fa’amuamua iā te oe le ‘oa fa’ale-lalolagi.

3. Ia e alofa i le Atua ma le loto atoa.

4. Ia alofa i lou tuāo’i pe a e maua le tamaoaiga.

5. Ia fa’aopoopo i ai ma nisi a’oa’oga o lo’o e silafia.

Galuega Fa’atino

Fesili e fa’amalamalama atili ai le mataupu

1. O le ā sou lagona, aiseā e tāua ai le saili i le ‘oa i le lagi?

2. Fa’aali sou lagona e fa’atatau i le upu lea, “e faigofie ona ui atu o se kamela i le pu o le au, ae faigatā ona sao o le mau’oa i le malō o le Atua.”

3. Fa’amata o le ā se auala faigofie e mafai ai ona tatou maua le ‘oa i le lagi’?

4. Ia fa’aopoopo ane i ai ma ni fesili o lo’o e mafaufau i ai fa’amolemole.

PESE - #70 (tusi pese )


Ia faitau ma su’esu’e iai (Mataio 18: 15-20)

Ia fa’atonuina le fanau ina ia tusia solo e fa’atatau i le mataupu o lenei taeao “’OA I

LE LAGI”ona avatu lea i lau Susuga i le vaiaso fou.

Manuia Sauniga o le Aso Sa

<<<<<<<<<<<<<<<<<>>>>>>>>>>>>>>>>>>

Mati 08, 2020

Manatu Ta’ita’i: “MEA LILO O LE MALŌ O LE ATUA” (Secrets of the Kingdom)

Mataupu 5: “Fa’afesãga’i foliga ma loto” (Face to face, Heart to heart)

Sini: Ia mae’a lenei mataupu ua malamalama tamaiti, e maua le fesoasoani e ala i le

fefa’asoaa’i.

Tusi Faitau: Mataio 18: 15-20

Fesoasoani mo Faia’oga:

I lenei taeao, e lelei pe ā toe fa’amanatu le mataupu i le vaiaso ua tuana’i, ona amata ai lea o

le mataupu o le nei vaiaso. Mo le vasega matutua fa’apitoa, e lelei lava pe ā tofia se tama

po’o se teine e faia se tatalo e amata ai le vasega. O le fa’amoemoe, ia fa’amasani le fanau i le

ola tatalo. Ia fa’afofoga fo’i lau Susuga i le faiaoga i tatalo a tamaiti ma fai i ai se fesoasoani pe ā mo’omia.

8


O lo’o amata lava le parakalafa lea i upu fa’apea a le Ali’i “Afai e agaleaga mai lou uso iā te oe, ia e alu ma a’oa’i iā te ia, tau lava o oulua ma ia.” O le fa’afitauli tele lea o lo’o feagai ma le

tele o tagata i nei aso, o le fefe e fesaga’i pe ā i ai se mea sesē i le va o se to’alua pe sili atu. O

lea ua a’oa’o mai le Ali’i i lenei taeao, afai tatou te iloa se mea e sesē ai se tasi; ia tatou o atu

ma ta’u atu i le nã tagata lona sesē. O nisi taimi e lē mafai e le tagata ona iloa lona sesē se i

vagana ua tatou ta’u atu i ai. O le tatou ta’u atu i le isi tagata o le mea ua ia sesē ai, o se

avanoa lelei fo’i lea ua tatou fesoasoani atu ai iā te ia. I le faia o lea tulaga, e tatau ona iã i

tatou le Agaga o le Ali’i e tatou te fa’asoa atu ai i le uso mafatia. Ia maua le loto maulalo ma

le filemū o le Alii, e avatu ai le galuega fesoasoani. Ia e mua’i fa’amagalo atu iā te ia, ma

avatu upu lelei ina ia ola lona agaga. Pe ā toe mafaufau i le fetalaiga a le Alii, e foliga mai o

lo’o aumaia se fe’au mo i tatou ina ia aua ne’i o tataou tauimasui. O lona uiga tatou te o atu

ma fa’asaga i foliga o le fili ma ia mamā o tatou loto. E leai fo’i se aogā e te fa’asaga atu ai i le

fili ae le mamā lou loto, auā o le ā lē mafai ai ona tatou maua lea tagata. O le agaga atoa ia

mafai ona tatou maua lea tagata.

Fai mai le vaega mulimuli o le fetalaiga a le Ali’i, “Afai e fa’alogo mai o ia iā te oe, ua e maua

lou uso.” E foliga mai i le fetalaiga a le Alii, o lo’o ua tatou fa’atinoina se galuega lavea’i. O lo

tatou fesaga’i ma le tagata ua sesē iā te oe, ma tatala atu o tatou lagona i mea moni e tatou

ona faia; o le faia lava lea o se galuega lelei mo ia. O le taliaina o se upu alofa e avatu, o le

fa’ailoga va’aia lea o ni loto ioe fa’atasi i se mea lelei. E manatua fo’i o le tagata lea lua te

fesaga’i sa agaleaga mai iā te oe. Afai la e te maua lea tagata, e lua ni agaga ua lavea’iina i lea aso. E lē gata ua e maua lou uso na agaleaga atu, ā ua e lavea’iina fo’i lou lava agaga mafatia.

Ia fa’amanatu pea i le fanau ina ia aua ne’i fefefe e ta’u atu le mea moni. Ia maua le loto tele

e fa’asaga atu ai i lē ua agaleaga mai, ma ia e maua o ia i auala o le filemū mai i le Alii.

A’oa’oga

1. Ia maua le lototele e feagai ai ma fa’afitauli o le olaga.

2. Ia fiafia e ta’u le mea moni.

3. Ia maua le ola fesoasoani i le tagata ua vaivai.

4. Ia fa’aopoopo ane ma nisi a’oa’oga lelei o lo’o e silafia.

Galuega Fa’atino

Fesili e fa’amalamalama ai le mataupu

1. O le ā sou lagona, aiseā e mafua ai ona fefe nisi tagata e fesãga’i ma lona fili?

2. O le ã sau mea e fai pe ā agaleaga mai se tasi iã te oe?

3. E fa’apefea ona e maua le lototele e ta’u atu ai i lē ua agaleaga atu iā te oe lona sesē?

4. O le ā lau tali atu i le tagata pe afai o oe ua e agaleaga atu?

PESE - #231 (tusi pese)


Ia faitau ma su’esu’e i le tusi o Mataio 17:14-27.

Ia fa’atonuina tamaiti e fai se lisi o upu fou e maua i le faitauga, ona avatu lea i lau

Susuga i le vaiaso fou.

********************* IA MANUIA TAPENAGA O LE ASO SA****************************

9

Mati 15, 2020

Manatu ta’ita’i: “MEA LILO O LE MALO O LE ATUA” (Secrets of the Kingdom)

Mataupu 6: “Si’itia mauga” (Moving Mountains)

Sini: “Ia malamalama tamaiti, o le fa’atuatua ma galue e mafaia ai mea uma.”

Tusi Faitau- Mataio 17: 14-21

Fesoasoani mo faiaoga:

A’o le’i amataina le mataupu, e tumau pea le lagona i le tofia lea o se tama po’o se teine e

faia se tatalo e amata ai le vasega. A mae’a, ona taumafai pea lea e toe fa’amanatu le

mataupu i le Aso Sa ua tuana’i. E lelei ona fesili pea i tamaiti po’o le ā se mea ua latou iloa i

tusi sa latou su’esu’e ai i le fale e tusa ma le homework sa tu’uina atu i ai.


O lo’o manino ma malamalama le mataupu o le nei taeao. O lea o lo’o talanoa le Alii i le

fa’atuatua e mafai ona fai ai mea uma. Ai lava pe na matuā lagona le fa’anoanoa o le Alii ina

ua sau le tasi tagata ma fai atu iā te ia, e le mafai e ona so’o ona fa’amalōlō le ma’i o lona

atali’i. O le ala lea o le fa’apea o ana upu “Le tupulaga lē fa’atuatua ma le fa’api’opi’o, ou te i ai ea iā te outou se’ia afea?” O lo’o fa’atatau lava ana upu i ona so’o ma tagata lē fa’atuatua

ma le ola fa’api’opi’o. O le uiga o lana fetalaiga, o le ā saga lē fa’atuatau lava o lea ua va’ai ma

fa’alogo i vavega ma mea na ia faia. E mafua ona lē mafai ona fa’atino le galuega ona o le ola lē fa’atuatua. E mafua ona lē fa’atuatua ona o le lē talitonu ma le loto atoa i le Alii. Ua leva

ona mafuta ma le Alii ae lē o ofi lava i ō latou loto mea ua a’oa’oina ai. Fai mai le ulutala “si’itia mauga.” O le mea mautinoa e lē mafai ona tatou si’i se mauga ma sui sona tulaga i lo

tatou malosi. Peita’i, o le malosi o le fa’atuatua i le Alii e maua ai auala e mafai ai ona fai. E

tusa ma le fetalaiga a le Alii, e te lē fa’atali se’ia telē pe lapo’a fo’i lou fa’atuatua; a ia e

fa’atuatua. O le uiga lea o lana saunoga ana se’i i ai lava se fa’atuatua itititi e pei o le fua o le

sinapi. O le fua o le sinapi o se fatu la’ititi tele. E paū lava le mea lea e finagalo i ai le Alii, ia i

ai lava se fa’atuatua e lē afaina po’o le ā le la’ititi. O le uiga atoa o le saunoaga a le Alii, o le

talitonu i le Atua ma le fa’amaoni e mafai ona tatou a’ea mea tetele e pei o mauga. Pe ā toe

fa’aupuina, o le mauga o le ata fa’atusa o se fa’afitauli telē e mafai ona tatou manumalō ai pe ā tatou fa’atuatua i le Alii.

A’OA’OGA

1. Ia talitonu ma le fa’amaoni i le Atua e mafaia mea lelei uma.

2. Aua le ola masalosalo.

3. E fia silasila le Atua i le fa’amaoni o lou loto.

4. Fa’amalosi ia mafai ona e manumalō mai i fa’afitauli.

5. Ia fa’aopoopo ane ma nisi mea tāua ua e silafia.

Galuega Fa’atino: Fa’atalatalanoaga. Ia fa’atalatalanoa le mataupu ma le fanau ma tu’u i

ai le avanoa pe i ai ni ā latou fesili e fa’atatau i le mataupu. Afai e leai ni ā latou fesili, ona e

fesili lea i ai i fesili nei.

1. O le ā le uiga o le upu “FA’ATUATUA?”

2. O le ā le uiga o le ulutala i au lava upu? “SI’ITIA MAUGA?”

3. O le ā sou lagona, o le ā se auala e mafai ai ona tatou manumalō i le tele o fa’afitauli?

10

PESE: Ia toe faamanatu le pese ‘Apera’amo le tamā ma lana fanau, ua to’atele naunau.’ O le pese lea e manatua ai le tamā o Apera’amo, lea e pepese ai le ‘au Kerisiano o le tagata e

sili ona tele lona fa’atuatua.


Mataio 6: 1 -5 Ia faitau ma su’esu’e i le nei tusi mo le aso sa lumana’i.

**********************IA MANUIA LE TAPENAGA O LE ASO SA*************************

Mati 22, 2020

Manatu Ta’ita’i: “MEA LILO O LE MALO O LE ATUA” (Secrets of the Kingdom)

Mataupu 7: “Taupulepulega ma taulamalama” (The plot)

Sini: Ia mae’a le nei mataupu ua malamalama tamaiti, e lē fiafia le Atua i tagata

fa’atupu mea leaga, ma taulamalama.”

Tusi Faitau - Mataio 26: 1-5

Fesoasoani mo Faiaoga

E lelei ona taumafai pea ina ia tofia ni tamaiti e saunia se tatalo amata ma le tatalo fa’ai’u. O

le fa’amoemoe maualuga lava ina ia fa’amasani pea i latou i le ola tatalo i aso uma. A mae’a

ona faia o se tatalo, ona taumafai lea o lau Susuga e fai ni nai fesili e toe fa’amanatu ma iloa

ai po ua malamalama tamaiti i le tala o le vaiaso ua tuana’i. A’o le i amataina lau mataupu o

le nei taeao, e manaia fo’i pe ā e fesili muamua po’o ā uiga o upu e lua o lo’o fa’aaogaina i le

ulutala “taupulepulega, taulamalama.”


O lo’o manino ma malamalama le mataupu o le nei taeao. O le tala i taupulepulega leaga a

toea’iina ma ositaulaga e saili se auala e fasiotia ai le Alii. Fai mai le tala sa o i le fale o le tasi

ositaulaga sili e igoa ia Kaiafa. Ua fai fo’i le taupulepulega ae mumusu e iloa e le nu’u. O le

ala lea o le fa’apea o ā latou upu, “Aua le faia i le tausamiga ina ne’i fa’anunununu ai le

nu’u.” O lea ua latou taumafai e fai fa’ananā le mea leaga ina iloa e le nu’u. E i ai mea lelei e

fai fa’ananā se i fa’aofo ai tagata, a’o le mea lea na faia i le Alii e nei tagata leaga, e lē fiafia i

ai le Atua. Na faia lenei mea leaga e ositaulaga ma toea’iina a o sauni atu le Alii i lona maliu

ma le toetu. O le mea e ofo ai le loto, na silafia lelei lava e le Alii o le ā tutupu ia mea iā te ia.

O le ala lea o le fa’apea o ana upu “Ua outou iloa a mavae aso e lua ona fai ai lea o le paseka,

e tu’uina atu ai le atalii o le tagata ina ia fa’asatauroina.” O i o lo’o ta’u mai ai iā i tatou, e leai

se mea e lilo i le silafaga a le Alii. Ia matuā fa’amamafa i le fanau, o taupulepulega leaga ma le ola taulamalama e lē o ni mea lelei. O mea ia e lē fia silasila i ai le Atua. I lo’u lagona, so’o se tagata e faia ia uiga e i ai taimi

e o’o ai puapuagā ma faigatā i lona ola. Ia manatua, so’o se mea lilo tatou te faia, atonu e lē

iloa e nisi tagata, ae leai se mea e lilo i le silafaga a le Atua. A tatou iloa e i ai ni tagata o lo’o

faia pea ia uiga, aua le fefe e fautua i ai, e taofi lenā mea leaga e lē fiafia i ai le Atua.

A’OA’OGA

1. E leaga le ola taupulepule ina ia faia ni mea leaga.

2. E lē fiafia le Atua i le tagata taupulepule i mea leaga toe taulamalama.

11

3. Aua ne’i fa’asesēina lou mafaufau i upu taufa’asesē a tagata.

4. Ia e tautala i le mea moni ua e iloa.

Galuega Fa’atino

Fesili e fa’amalamalama ai le mataupu.

1. O le ā le togafiti na faia e toea’iina ma ositaulaga ina ia fa’asesē ai le tala ua toetu Iesu?

2. O le ā sou lagona, aiseā ua lē mafai ai ona taofia le salalau o le talalelei iā Iesu Keriso?

3. O le ā sou manatu, o le ā se i’uga e o’o i ai tagata taupulepule mea leaga ma le

taulamalama?

4. Ia tusia I a latou api a latou tali ma togi e lau Susuga.

UPU MA UIGA

Taupulepulega – o le faia lea e ni tagata se to’alua pe sili atu foi, se tonu o se mea

lea o le a fai i se isi tagata po’o ni tagata foi.

Taulamalama – o le sailia lea o se auala e maua pe afaina ai le isi tagata

Nisi fesoasoani

E manaia fo’i ae fa’atonuina tamaiti ina ia fatu mai se solo po’o se pese e fa’atatau i le

ulutala o le nei taeao.

PESE : Sa ou alu atu ia satani, efao mai a’u mea totino.


Ia sauniuni mo su’ega i le vaiaso o muamua.

Ia fa’ailoa i ai mataupu uma o le ā saunia ai fesili o le su’ega e tapena ai.

**********************IA MANUIA TAPENAGA O LE ASO SA****************************

MATI 29, 2020 **SU’EGA MO LE MASINA O MATI**

FESILI:

1. O le ā sou lagona, o le ā le ‘ese’esega o le ‘oa i le lagi’ ma le oa i le lalolagi?

Tali: O le ‘oa i le lalolagi po’o le ‘oa fa’ale-tino o mea pala, ae o le ‘oa i le lagi o mea e

tumau ma manuia ai le tagata.

2. Aiseā na lē fiafia ai le mau’oa ina ua fetalai atu Iesu e alu ma tufatufa atu lona tamāoaiga ma isi tagata?

Tali: O lo’o naunau pea le loto i ‘oa fa’ale-tino. E ola masalosalo ma lē moni le ola fia

auauna i le Alii.

3. Pe fa’apefea ona tatou maua le ‘oa i le lagi?

Tali: Ia to’aga e mafuta i le Atua ma le loto maulalo, ma ia e fa’amaoni i lo oulua va ma

ia. Ia e tauisi i ana tulafono ma fai mea sili mo le Atua.

4. O ā ni uiga fa’a- kerisiano e te tali atu ai i le tagata ua agaleaga mai iā te oe?

Tali: Ia e maua le loto fa’amagalo ma le loto fesoasoani. Ia fusia mea uma i le alofa.

12

5. Aiseā e tāua ai lou ta’u atu i le tagata ua agaleaga ane lona sesē?

Tali: E maua ai lou lototele e te tautala i le mea moni. E tāua atonu e iloa ai fo’i e le na

tagata le leaga o le mea o lo’o ia faia, ma e maua ai fo’i se sa’olotoga i lou loto

ma le mafaufau.

6. O le ā sou lagona, aiseā e tāua ai le ola fa’atuatua i le Alii?

Tali: E tāua auā o le i ai o le fa’atuatua e mafai ai ona faia mea uma e te loto i ai e ala i

le fa’atasi mai o le Alii. A leai se fa’atuatua e faigatā fo’i ona fa’atino mea e loto

iai.

7. O le ā le togafiti na faia e toea’iina ma ositaulaga ina ia fa’asesē ai le tala ua toetu

Iesu? Tali: Sa o latou ave tupe e totogi ai tagata ma fai i ai, e o atu ma tala’i atu ua

gaoia le tino o Iesu e ona so’o.

8. Fa’aali sou manatu e fa’atatau i tagata latou te faia lea mea o le taupulepule ia faia

mea leaga ma le ola taulamalama i isi.

Tali: O tagata fa’apea e manino lava e lē fiafia i ai le Alii. O tagata fo’i nei e le i’u i se

lelei lo latou ola. O le upu o le tusi fai mai, ‘o le mea e te fuaina atu e toe fuaina

mai’. Ia manatua e leai se mea e lilo i le silafaga a le Atua

**************************IA MANUIA LE TAPENAGA O LE ASO SA*********************

Aperila 05, 2020. “ASO SA O LAUPAMA”

Manatu Ta’ita’i: “IESU I ONA ASO MULIMULI” (Jesus – the last days)

Mataupu 8: “Fa’amamā e Iesu le malumalu” (Jesus cleanses the temple)

Sini: Ia malamalama tamaiti e tatau ona tatou tausi ma fa’apelepele i le malumalu o le Alii.


Fesoasoani mo Faiaoga:

E tumau pea le amataga o le aoga i Aso Sa ta’itasi. Ia tofia pea se tamaitiiti e na te faia se

tatalo amata ona fa’agasolo ai lea o le mataupu. Ia taumafai pea e fai ni fesili e toe

fa’amanatu ai le mataupu o le vaiaso ua tuana’i. Mo le nei Aso Sa, o le tala ua malamalama

ona o le laupama e fa’amanatu pea i tausaga uma. E lelei fo’i ae taumafai ni fesili e iloa ai

po’o manatua pea e le fanau le uiga tāua o lenei Aso Sa.


O le tala masani ma e fa’amanatu pea i tausaga uma. O le vaitau masani lenei o le Kalena a le

Ekalesia, e fa’amanatu ai le malaga fa’atupu a Iesu fa’atasi ai ma nisi mea mulimuli sa ia faia

ae le i o’o i lona fa’asatauroina. O le tala i le fa’amamāina o le malumalu, o le tasi lea o

galuega na faia e Iesu na fa’aalia ai lona alofa moni i lona Tamā o i le lagi. Fai mai le tala e lē

i toe fa’atali le Alii ina ua o’o atu, ua fai le fale o lona Tamā (malumalu) ma fale fa’atau ‘oa.

Sa ia fuli laulau uma sa i ai ma ia a’oa’o atu i le mea e tatau ona fai. O le gaioiga sa faia e le

Alii, ua lava lea ma totoe e ta’u mai ai iā i tatou le tāua tele o le malumalu i lona finagalo.

13

E mafai fo’i ona tatou fa’apea ua ita tele le Alii ona e pele iā te ia le fale o lona Tamā. O le isi

lea o mea lelei mo tatou. A tatou va’aia loa se mea sesē e ta’uleaga ai le suafa o le Alii, ia

tatou maua le loto tele e taofi ai ma fa’asa’o. O le mea sa faia e nei tagata e ta’u mai ai iā i tatou; ua galo iā i latou le Atua po’o ua fa’asili fo’i ‘oa o le lalolagi nai lo’o le Atua. O lona uiga

ua ta’u mai iā i tatou, e lē tatau lava ona tatou faia ni mea lē talafeagai i totonu o le

malumalu o le Atua.

O lo’o manino saunoaga a le Alii. Ua fetalai le Alii o le malumalu o le fale- tatalo. O le fale e

tatalo ma tapua’i ai le tagata ola i le Atua soifua. Sa ia fa’amalōlō ai pipili ma tauaso, o lona

uiga o lo’o ta’u mai iā i tatou, o le fale mo galuega fa’aola ae lē saili ai ni tupe. Sa fa’aalia fo’i le silisili ‘ese o le Atua ina ua alalaga ane foi tagata “Osana i le alo o Tavita.” Fai mai le tala a

Mataio o tagata nei o tama valevale ma tama fesusui. Pe ā toe fa’amatalaina, o tagata

fa’atauva’a, mama’i ma laiti. O ituaiga tagata lava nei e va’ai maulalo i ai le to’atele, a’o lea e

auala mai ai le finagalo o le Atua. O le silisili ‘ese o le Atua e alalaga ai le foafoaga uma.

O se mea lelei pe afai e avea i tatou ma tagata e tausolomua ona fa’amamā ma teuteu

fa’amatagofie le malumalu o le Alii. O lo’o manino lava i le tala, e lē o se fale e fa’atau ai ni

oloa. Ia ta’u atu i le fanau afai na latou va’ai i se mea fa’apea, ia loto tele e fai i tagata e tu’u.

O lo tatou teuteu fa’amatagofie ma fa’amamā le malumalu o le Alii, o lo tatou alolofa moni lava lea i le Atua. E tāua i le va’ai a tagata gasolo atu, ae sili ona tāua i le silasila a le Atua. Aua se ā le aogā tatou te nonofo ai i fale mamā ma matagofie, ae leaga ma ‘ele’elea le

malumalu o le Alii.

A’OA’OGA

1. Ia to’aga i le malumalu e tatalo.

2. Ia tausolomua iā i tatou ona fa’amamā ma teuteu le malumalu o le Atua.

3. Ia tutusa lou to’aga i le malumalu ma lau amio i aso uma.

4. Ia e ola fa’aeteete pe ā e alu i le malumalu.

Galuega e fa’atino

Fesili e fa’amalamalama atili ai le mataupu.

O le ā se lagona na o’o iā Iesu ina ua o’o atu ua fai le malumalu ma fale- fa’atau ‘oa, ae o le ā fo’i le mea sa ia faia i lea taimi?

O le ā se tāua o le malumalu o lo’o e iloa?

O le se mea e ao ona e faia, pe ā e alu i le malumalu.

PESE: Sau ta o ma a’u, I le maota o lou Tamā


Ia faitau ma su’esu’e iai – Mataio 28:11-15

*******************IA MANUIA LE TAPENAGA O LE ASO SA*************************

14

Aperila 12, 2020

Manatu Ta’ita’i: “IESU I ONA ASO MULIMULI” (Jesus – the last days)

Mataupu 9: “Taofi aua le ta’ua le mea tonu” (Hush it up! Hush it up!)

Sini: Ia ma’ea le mataupu ua malamalama tamaiti, e lē mafai e se malosi ona taofia

tala o le malō o le Atua.


Fesoasoani mo le Faiaoga:

O le Aso Sa lenei o le Eseta. O se tasi nei o Aso Sa tāua i le Kalena a le ‘au Kerisiano, auā fo’i o

le aso lea na toetu ai lo tatou Ali’i fa’aola ma fa’aolaina ai i tatou i le alofa tunoa o le Atua. O

le mea lea, afai e mae’a se tatalo amata ona taumafai lea o ni nai fesili e te iloa ai po’o manatua pea e le fanau le tāua o le nei Aso Sa. Ia taumafai pea e fa’amatala le mataupu ina ia

feso’ota’i ma le uiga o le toetu o le Alii.


Ua tatou iloa i nei aso le malosi tele o le tupe. O lea malosi o le tupe ua mafai ona tutupu ai

mea lelei, ae sili ai foi le tutupu o mea leaga. O le tala sa faitauina o le tala i le togafiti leaga

sa faia e ositaulaga ma toea’iina i le fa’atoā mae’a ai o le toetu o Iesu. Sa va’ava’ai i latou ma

molimau i galuega ma vavega tetele sa faia e le Ali’i ae le’i maliu ma toetu mai le oti. E lē tau

mate fo’i ua latou talitonu o Iesu lea o le Alo moni o le Atua soifua, e ui lava i le tete’e o

Iutaia, ona o le ‘ese o lo latou fo’i talitonuga e fa’atatau i le Mesia. O le masani lava lea a nei

tagata a’o latou i ai fa’atasi ma Iesu. Sa latou muimui, taufa’aleaga ma taulamalama pea i se

mea e ta’uleaga ai le Ali’i fa’aola. E ui i lea, ua manumalō lava le Alii ma ua toe soifua mai i le

oti ma le tu’ugamau. O le ala lea na taumafai ai ositaulaga ma toea’iina i se auala e fa’asesē

ai le tala i le toetu o Iesu. Fai mai Mataio, ua latou ave tupe i tagata sa i ai, ma ia o atu e tala’i atu ua o atu ona so’o ma gaoi lona tino a o latou momoe, ma sa fa’apenā lava ona faia e ia

tagata.

O le upu e masani ona tatou fa’alogo ai fai mai “e malosi le mea moni, ae lē moni le mea

malosi.” O i tonu e aogā i ai le upu lea i lo’u iloa. O le tala fo’i lea ua to’ilalo ai le malosi o le

tupe. E ui ina o atu tagata ma tala’i atu lenei tala sesē, ae na lē mafai ai lava ona taofia le tala

moni i le toetu o le Alii o Iesu Keriso. O se mea leaga tele sa faia e ositaulaga ma toea’iina. Ua

taumafai e fa’aaogā le malosi o le tupe ina ia aua nei tautatala tagata i le mea moni. E leai se

mea e sili atu i le malosi o le Atua; e lē gata ua faia’ina ai le oti, a’o lea fo’i ua vaivai ai le

malosi o le tupe. O nisi nei o mea tāua ua tatou maua i le nei Aso Sa, o le toe tu o le Alii o

Iesu Keriso, o le tala lea o lo’o mausalī ai pea lo tatou fa’atuatua ma tala’ina ai pea le Atua manumalō. Ia ta’u i le fanau, ina ia aua nei taofia lo latou ta’u atu o le mea moni ona o tupe.

E finagalo le Atua i le tautala sa’o, ae lē o tupe ma mea e faia i auala pi’opi’o. Ia ta’u atu i le

fanau e leai se malosi e mafai ona taofia le malosi o le tala i le toetu o Iesu.

A’O’A’OGA

1. O le talalelei i le Alii e lē mafai ‘ese isi mea o lenei olaga ona taofia.

2. Aua le taofia le tautala i le mea moni ona o tupe.

3. E fia silasila le Alii i le tagata ola fa’amoni.

15

Galuega Fa’atino

Tali fesili nei e fa’amalamalama atili ai le mataupu

1. O ai tagata ia sa latou taumafai e fa’asesē le tala i le toetu o Iesu?

2. O le ā sou lagona, aiseā e lē mafai ai ona taofia le salalau o le tala i le toetu o Iesu?

3. Afai ou te tu’uina atu iā te oe ni tupe se tele, ma ou fa’atonuina oe e te tala’i atu lea lava tala sesē, o le ā lau mea o le ā fai.? Aua le pepelo, auā o le agasala.

PESE - #185 (tusi pese)


Mataio 26: 6-16. Ia faitau ma su’esu’e i ai. A i ai ni upu e lē malamala ai, ia fai se lisi ma

aumai i le faia’oga.


Aperila 19, 2020

Manatu Ta’ita’i: “IESU I ONA ASO MULIMULI” (Jesusu – the last days)

Mataupu 10: “O mea matagofie e manatua pea” (Beautiful and memorable things)

Sini: Ia ma’ea lenei mataupu ua malamalama le fanau, e manatua pea e tagata

galuega lelei tatou te faia.


Fesoasoani mo Faiaoga: E lē ave’ese lava le lagona ina ia fa’aaogaina pea le fanau e faia se tatalo amata ona

fa’agasolo ai lea o le mataupu. Ia tapena lelei ni fesili e toe tuli tatao ai le tāua o le Eseta i le

vaiaso ua tuana’i. I le nei taeao ia fa’amanatu pea i le fanau le tāua o le faia o galuega lelei

ina ia manatua ai pea i latou e tagata. E lelei pe ā saili ni tagata i le Tusi Paia po’o ni ta’ita’i iloga o malō ‘ese’ese sa latou faia ni galuega lelei, e fai ma tala fa’atusa o lenei taeao.

Fa’ata’ita’iga: O Ioane Viliamu sa aumaia le talalelei i Samoa ma manatua ai pea e tagata

Kerisiano uma.


E tolu ni vaega ua ou vaevaeina ai lenei tala. Muamua, o le fafine ma le fagu alapasa ua i ai le suāu’u manogi. O le suāu’u lea e foliga o se suāu’u tāua ma taugatā pe ā fua i tala a le ‘au

so’o. Peita’i, e ui i le taugatā ma le tāua, a ua lē tu’una lava se mea a ua ave lava mo le Alii. E

foliga mai o le fafine lea ua malamalama lelei lava, o Iesu o le Alo o le Atua. E fa’apea fo’i i tatou, a tatou iloa se mea lelei ma tāua, po’o le ā lava le taugatā e tatou te taumafai ia maua. Ua iloa e lenei fafine o le fa’aolataga lea ua o’o mai, ma o le ala lea o lona avatu uma ma ua

leai se fa’atotoe. O le fa’ata’ita’iga o le ola foa’i, ofo atoa atu mo le Alii.

16

Lua, o so’o lē malamalama. A fua i tala fa’amaumau o le soifuaga o Iesu Keriso, fai mai le

molimau e tolu sefulu tolu tausaga o le Alii ae maliu loa. O lona uiga, o se taimi umi o feoa’i le Alii ma ona so’o ma ia a’oa’o atu i le tele o mea e tatau ona fai, ae lē talitonu lava i mea ua

a’oa’oina ai i latou. Ua faigatā ona maua fa’aaliga ona o le lē talitonu moni i le Alii. Ua sili lava iā i latou le tamāoaiga nai lo le Alii o lo’o latou mulimulita’i i ai. E lē i tau ane lava i o

latou mafaufau, o a’oa’oga uma sa fetalai atu ai le Alii o nisi nei o mea matagofie e manatua

pea.

Tolu, ua fetalai le Alii i le tāua o le galuega ua faia. O lo’o manino ma malamalama i

saunoaga a le Alii le tele o le tāua o le galuega ua faia e le fafine. E lē gata i le fa’ataimuaga o

lona maliu, a’o lo’o fa’aalia ai fo’i le silisili’ese o le Atua soifua o lo’o tapua’i i ai. O le mea na faia e le nei fafine o se mea tāua ma le matagofie, ma o le ā manatua pea i aso uma o le ola.

A’OA’OGA

1. Ia maua le lagona o le fai mea sili mo le Alii.

2. Aua le masalosalo i mea lelei e faia mo le Alii fa’ape fo’i lou va ma tagata.

3. Aua le leaga fua lou loto i galuega lelei e faia e nisi tagata.

4. Ia fai oe ma fa’ata’ita’iga o le ola fai mea sili mo le Alii.

Galuega Fa’atino

E manaia fo’i ae fai se tou fa’atinoga o le nei mataupu. Ia tofia se tama e fai ma Iesu ma se

teine e fai ma fafine, a’o i latou uma o totoe ia fai ma so’o o le Alii. E lelei fo’i pe ā taumafai e

fa’atino lenei tala i le taimi e tu’ufa’atasi ai vasega ta’itasi.

Fesili

1. O le ā lau mea e fai pe ana fa’apea o oe lea e i ai le fagu alapasa?

2. O le ā se mea sa mafaufau i ai so’o o Iesu ina ua va’ai atu i le fafine ma le fagu alapasa?

3. O le ā lea mea o le fagu alapasa?

PESE- #40 (Pese Lotu)

Galuega i le aiga(homework)

Ia faitau ma su’esu’e i ai Mataio 10:24-31.

************************IA MANUIA LE TAPENAGA O LE ASO SA ***********************

17

APERILA 26, 2O2O ******* SU’EGA O LE MASINA O APERILA***********

FESILI: 1. Aiseā na lē fiafia ai le Alii ina ua taunu’u atu i le malumalu?

Tali: Auā fo’i ua fai le fale o lona Tamā ma fale e fa’atau ai oloa a tagata.

2. O le ā se mea e tatau ona tatou faia i le malumalu o le Alii o lo’o i totonu o le tatou

nu’u?

Tali: O le mea muamua, e tatau ona tatou toa’aga e o i le malumalu e tapua’i faatasi

ai ma isi tagata ina ia maua lo tatou ola feso’ota’i ma le galulue fa’atasi. E tatau

fo’i ona tatou teuteu fa’amatagofie ma fa’amamā le fale o le Alii.

3. O le ā sou lagona ae avatu e se tagata se tupe e totogi ai oe ina ia e faia se mea sesē?

Tali: Ou te lagona e lē o se mea sa’o, auā o le ā taofia ai le mea moni e tatau ona fai.

Ou te lagona fo’i e lē o se mea amiotonu i le silafaga a le Alii.

4. Pe na mafai e le togafiti leaga a tusiupu ma faresaio ona taofia le salalau o le tala

i le toetu o Iesu?

Tali: E leai, auā e lē mafai e le tagata ona taofia le mea e finagalo i ai le Alii. Fai

mai le upu“ e malosi le mea moni ae lē moni le mea malosi.”

5. Afai ua leai sau tupe ma ua e mo’omia se tupe, fa’amata e te talia se tupe e avatu e

totogi ai oe ina ia e fa’ataunu’uina se mea leaga?

Tali: E leai, auā fo’i o tupe o mea e pala, a’o le ta’uvalea e manatua pea. Ia

fa’a’ete’ete i ou mana’oga auā o lo’o silasila fofoga o le Alii.

6. O le ā sou lagona, aiseā lava na u’u ai e le fafine a’ao o Iesu i le fagu alapasa?

Tali: O le mea muamua o lo’o aumaia i le tala a Mataio, o le fa’ata’imuaga lea o le

maliu o Iesu. O le fafine e foliga mai e malamalama lelei iā Iesu. O le fagu

alapasa o le u’u manogi taugatā, a o lea ua lē taofia lava a ua ia u’u ai a’ao o

le Alii. E lē mafai ona avatu se mea taugatā i se tagata pe ā e lē malamalama i

le na tagata. O lona uiga, ua iloa e le fafine o lana galuega ua fai o lona lea

manuia.

7. Aiseā lava na lē fiafia ai le ‘au so’o ina ua u’u e le fafine a’ao o Iesu i le u’u

manogi? Tali: Ai pe sa manana’o i le u’u manogi auā e maua ai tupe e tele. O lo’o

naunau pea i le tamāoaiga ma mea e pala, ae galo ai lo latou Alii lea ua aga atu i

ona puapuaga.

8. O ā ni a’oa’oga ua e maua mai i mataupu o le nei masina? Ia tu’u le avanoa i le

fanau e tusia ai ao’oa’oga ua mafai ona latou manatua.

** A mae’a le suega ona ave lea o le tusi faitau o le vaiaso o muamua i tamaiti e

faitau i le fale**

Manuia le Suega, manuia foi le Sauniga

<<<<<<<<<<<<<<<<<<<<<<>>>>>>>>>>>>>>>>>

18

Me 03, 2020

Manatu Ta’ita’i: “AUA LE FEFE” (Do not be afraid)

Mataupu 11: “E silasila ona fofoga i manuiti” (His eyes on the sparrow)

Sini: Aua le manatu i le la’iitiiti, ia toa ma aua le fefe o lo o silasila mai lava fofoga o le

Atua, na te le tu’ulafoa’iina i tatou”

Tusi Faitau Mataio 10: 24-31


A mae’a se tatalo, ona fa’afeiloa’i lea o le fanau e pei ona masani ai i Aso Sa ta’itasi. I le nei

taeao, e manaia fo’i pe ā e fesili muamua i tamaiti pe latou te malamalama i le uiga o le upu “manuiti.” Ou te lagona afai e malamalama i latou i le uiga o le upu lea, o le ā faigofie fo’i ona

malamalama le mataupu. Ia faitau fa’alua pe fa’atolu le tusi faitau se i tau maua ai se

fesoasoani mo le fanau. Ia manatua, o le Atua lava le mamafa o mataupu i Aso Sa ta’itasi.


O le tusi faitau o le nei taeao, o lea ua ta’u manino atu e le Alii i ona so’o le tulaga faigatā o le

a i ai i latou o e ua mulimuli ma talitonu i le Atua soifua. O lo ua ta’u e le Alii i ona so’o o le galuega e lē faigofie, ma o le ā feagai i latou ma le tele o fa’afitauli. O le ā inosia i latou ma

itagia e tagata fa’atasi ai ma le ‘au ositaulaga ma toea’iina; ma o le ā saili fo’i tagata i se auala

e o’o ai le oti iā te i latou. O upu lā a le Alii o ni fautuaga, lapata’iga a o se fa’amalosi ‘au mo

ona so’o galulue. E tele mea na fetalai ai le Alii e fa’atatau i lea lava tulaga, ae na fa’ai’u lava

lana saunoaga i upu e fa’apea, “E lē faitaulia ea ni manuiti se lua i le asari? E leai fo’i so

lāua e paū i le ‘ele’ele e aunoa ma lo outou Tamā(f-29)” O le feau o lo’o aumaia, e lē

tu’ulafoa’iina e le Atua lana fanau. Afai o manuiti o lo’o tau fa’amatala ai le agaga o le

fa’atauva’a; o lea ua fetalai le Alii e lē paū i le ‘ele’ele e aunoa ma le Tamā. O le ata o se alofa

ua maoa’e ma silisili’ese. Ua uma ona avatu le fa’atusa i manuiti, soso’o mai ai le fa’atusa i

lauulu e leai se mea e le faitaulia e le Atua(f-30). O le ā la se isi mea o totoe? O upu sili ona tāua na ia saunoa i ai e fa’apea, “e sili outou i manuiti e tele.”O lea lava ua ta’u manino atu

e le Alii i ona so’o le maualuga o le silasila a le Atua i lana fanau o ē talitonu ma fa’atuatua iā

te ia. Ia fa’amamafa i le fanau e lē fa’apito le alofa o le Atua i tagata matutua. Ia fa’amantu

fo’i i le fanau, e pei i latou o manuiti e lavea’iina pea e le Atua i taimi uma. Ia maua le

lototele ma le toa e feagai ai ma tagata leaga ma mea faigatā o le ola. O le fa’amamafa o le mataupu, e lē tu’ulafoa’ina i tatou e le Atua.

A’OA’OGA

1. E lē tu’ulafoa’iina e le Atua ona tagata.

2. Ia maua le lototele e feagai ai ma fa’afitauli.

3. E lē fa’atauva’a le silasila a le Atua i tamaiti.

4. E lē fa’apito le alofa o le Atua i se tagata.

5. Ia fai i tatou ma toa o le talalelei.

6. Ia fa’aopoopo ane ma nisi a’oa’oga o e silafia fa’amolemole.

19

Galuega Fa’atino . Fesili e fa’amalamalama ai le mataupu.

1. O le ā sou iloa, aiseā ua ta’ua ai ‘manuiti’ e le Alii?

2. Ua fetalai le Alii e sili atu le tagata i le tāua o manuiti, o le ā sou lagona i lea mea?

3. Pe fa’apefea ona tatou iloa e lē fa’apito le alofa o le Atua e tusa ma le tala sa

fa’amatalaina?

UPU MA UIGA

1. Pelesepulo – o le temoni sili, po’o le pule o temoni

2. Asari – o le tupe po’o le sene (penny)

PESE - #369 (TUSI PESE)


Ia faitau ma su’esu’e i ai (Luka 2: 36 – 38)

***************************IA MANUIA LE TAPENAGA O LE ASO SA********************

Me 10, 2020. “ASO SA O TINA”


Mataupu 12: “Ua lē tu’ua le malumalu” (Never left the temple).

Sini: Ia mae’a lenei mataupu ua malamalama tamaiti, I le mafuaga na le tuua ai e le

tina o Ana le malumalu.

Tusi Faitau: Luka 2: 36-38


Ia fa’amanatu pea i le fanau le mataupu o le vaiaso ua tuana’i, ma ia taumafai pea e fai ni nai

fesili e te silafia ai po’o latou manatua pea le mataupu ua tuana’i. A mae’a, ona fa’asolo fo’i lea o lau a’oga i se auala ma ni metotia o lo’o e tapena i ai mo le nei Aso Sa.


E pu’upu’u le palakalafa sa faitauina, ae telē lava lona aogā. A toe faitau lelei i ai, e ofo lava le loto i le mea na faia e lenei perofeta fafine, auā o ai se tagata e mafai ona nofo i le malumalu

i se taimi umi fa’apea? O le tala a Luka, na mafua ona nofo umi lenei tinā i le malumalu; sa nofo ma auauna i le Atua e ala i le anapogi ma tatalo. O le anapogi, o le lē ‘ai lea pe inu fo’i i le aso atoa. O le fa’agaogao lea o le tino ma tatalo mo le manuia o tagata uma o lo’o

mana’omia le fesoasoani. E foliga mai i le tala a Luka, sa nofo lava lenei tinā ma tatalo mo se manuia o le nu’u o le Atua. Sa ia fa’afetai i le Atua ina ua ia iloa ua fanau mai Iesu. Ua ia

mautinoa o lea ua taunu’u le togiola mo Ierusalema. O le tina e mafuta i le Alii i lona olaga atoa. Ua lē o toe popole lava i se isi mea o le nei olaga, a ua tu’u atu atoa lona talitonuga i le

Atua soifua. E manino ma malamalama le tala. E lē o se fia nofonofo i le malumalu ma

faitatala ai ma nisi fafine, a’o le anapogi ma tatalo, ma fa’atalitali atu i le fa’aolataga mai le

Atua.

20

Ia fa’amanatu i le fanau, o se mea lelei pe afai e fai le malumalu ma nofoaga e latou te fiafia e ō i ai. E lē o le ō e fa’alapisi ma talanoa ai i mea lē aoga, a’o le ō e talatalanoa ai i le alofa

silisili ‘ese o le Atua lea ua tatou manuia ai. Ia iloa e tamaiti le loloto o le nei mataupu. Afai e

i ai ni mea e mafatia ai o tatou loto, ia maua le loto tele e alu ai i le falesā e tatalo i le Alii. E

leai se mea e faigatā i le Alii. O le anapogi ma tatalo atu iā te ia, tatou te maua ai le tali fiafia

ma fa’amalie loto. Ia fa’amanatu i le fanau le igoa o le tinā ma lona tupu’aga o lo’o aumaia i

le tusi faitau o lenei taeao.

A’oa’oga

1. Ia fai le malumalu ma nofoaga e te fiafia e tatalo atu ai i le Alii.

2. Ia mafuta i le Atua e ala i le tatalo.

3. Ia fa’amoemoe i le Atua ae lē o le poto ma le malosi.

4. Aua ne’i e tatalo fa’apitoa na o oe, ae tatalo fo’i mo nisi tagata o mo’omia le

fesoasoani.

Galuega Fa’atino. Fesili e fa’amalamalama ai le mataupu.

1. O ai le igoa o le perofeta fafine o lo’o aumai i le tala?

2. O ai le tamā o le fafine, ma le ituaiga e tupuga mai ai?

3. O le ā sou iloa, aiseā na nofo ai pea lenei fafine i le malumalu?

4. O le ā le uiga o le anapogi?

5. O le ā se fe’au tāua mo le Aso Sa o tinā mai lenei mataupu?

PESE #122 (TUSI PESE)

Galuega i le fale (Homework)

Ia faitau le tusi faitau o le Aso Sa o muamua. (Fa’aaliga 1:9-18)

Ia tusi se palakalafa se tasi e fa’amatala mai ai, po’o le ā sou iloa i lea tusi.


Me 17, 2020


Mataupu 13: “Ua pa’i mai o ia iā te a’u” (He touched me)

Sini: Ia mae’a lenei mataupu ua malamalama tamaiti, o le pa’i mai o le Alii e ala i lona

Agaga, o lo tatou fesoasoani sili lea.

Tusi Faitau: Fa’aaliga 1: 9-18


O lo’o i lau Susuga i le faiaoga le pule i le fa’asologa o le aoga. Ae lelei fo’i pe ā fa’aaoga pea le

fa’asologa e pei ona masani ai i Aso Sa ua tuana’i atu. Ia manatua pea, o le Atua lava le autū o nei mataupu na e fa’amatalaina. Ia fa’amanatu pea igoa o tagata ma nisi mea tāua o lo’o

aumaia e le matatupu. Ia fa’amalosi e faitau leo tele le tusi faitau ina ia malamalama tamaiti.

21


O le tusi o Fa’aaliga na tusia e le tagata e igoa iā Ioane. O le tusi sa tusia i le motu o Patamo. O le tusi faitau lā o le nei taeao, o le molimau lea a Ioane i le mea na tupu a’o i ai o ia i le

motu o Patamo. E tele fa’aaliga o lo’o fa’amatala e Ioane na tutupu i le taimi a’o i ai i le motu

o Patamo. Peita’i, o le mea tāua o lo’o fia tulituliloa, o le fa’aali tino lea o le Alii i lana auauna.

O lo’o tusia i le fuaiupu e sefulu upu e fa’apea, “Na ou i le Agaga i le Aso o le Alii.” O ia upu o

lo’o fa’amatala manino ai le auai fa’atasi o le Agaga o le Alii i le galuega sa faia e Ioane. O lona uiga e lē i faia to’atasi le galuega ae sa fa’amoemoe lava i le Agaga o le Alii. O lo’o

aumaia ai fo’i i le nei fa’aaliga le lisi o Ekalesia e fitu e tatau ona ave i ai le tusi. O Ekalesia

nei, o Efeso, Semurana, Perekamo, Tuatira, Sarataisa, Filatelefaia, ma Laotekaia.

O le fuaiupu e sefulu-lua e o’o atu i le sefulu ono, o lo’o fa’amatala ai mea matagofie ma le

uiga ‘ese na tutupu i lea taimi. O le fuaiupu e sefulu-fitu o lo’o matuā ta’u manino mai ai e

Ioane le pa’i atu o le Atua iā te ia. I le fuaiupu e sefulu-valu; o lo’o aumaia ai le ata atoa o lo’o

fa’amatalaina i luga. Pe ā tatou faitau manino i ai, o le Alii lea ua pa’i ifo iā Ioane. E lē mate gatā pe ā tatou manatua upu nei “Aua e te fefe; o a’u lē muamua ma lē mulimuli.” O upu nei a le Atua na fai iā Isaia (44:6) e fai atu ai i lona nu’u o Isaraelu. O lona uiga o le Atua lava lea

ua pa’i iā Ioane, ma fa’amalosi atu i le galuega o lo’o fai. O se mea uiga ‘ese ma ofoofogia, a o

le mea lava e mafai ona tupu i tagata uma o ē talitonu moni i le Alii. E fa’apea fo’i i tatou,

tatou te lagona le pa’i mai o le Agaga fesoasoani o le Alii, pe afai tatou te auauna iā te ia i le

alofa, fa’amaoni ma faia le amiotonu i ona luma.

A’oa’oga

1. Ia fa’amoemoe i le fesoasoani mai o le Alii i galuega uma e fai.

2. E tatou te iloa fa’aaliga pe ā moni lo tatou ola ofoina atu i le Atua.

3. Aua le fefe e feagai ma fa’afitauli, auā o lo’o soifua le Alii.

Galuega Fa’atino. Fesili e fa’amalamalama ai le mataupu:

1. O fea le motu na iloa ai e Ioane fa’aaliga?

2. O ā Ekalesia e fitu e fia ave i ai lenei tusi e tusa ma le fa’aaliga?

3. O ā ni upu tāua o lo’o aumaia i le fuaiupu e sefulu fitu, tatou te iloa ai o le Atua lea na

pa’i ane iā Ioane?

Upu ma uiga

Ofu ta-tapuvae- o le ofu solo atoa, e amata mai i tau’au e o’o ifo i tapuvae

Ta’alili – O le leotele uiga ese

F’a’atauma’ai- e ma’ai uma itu. E fa’atautau i se naifi po’o se tao.

Pese: Ua lē maua e le ofisa le pese palagi o le “HE TOUCHED ME” ae talosaga atu afai e

maua si pese lenā mo le mataupu o lenei Aso Sa, fa’afetai tele le lagolago mai mo fanau. Afai

foi e leai, e malō lava le tatou tusi pese, pe ā pepese i le agaga.


Ia faitau le tusi mo le vaiaso fou: Mataio 28: 16-20

Ia faatonuia tamaiti e tusi ni upu e le o malamalama ai ona aumai lea i lau Susuga.

**********************IA MANUIA TAPENAGA O LE SAPATI****************************

22

Me 24, 2020


Mataupu 14: “Ou te i ai pea ma outou” (I am always with you)

Sini: Ia ma’ea le mataupu ua malamalama tamaiti, e i ai pea le Alii iā i tatou i aso uma.



O le fa’asologa masani lava e pei o Aso Sa uma ua tuana’i, ae pule lava lau Susuga i se isi

fa’asologa o lau aoga e sili atu i lau va’ai. Ia matuā fa’amamafa le tāua o le ulutala o le nei

taeao. Ia ta’ape le fanau ma le mautinoa, o le fetalaiga lea a le Alii e tumau pea e o’o mai i le

taimi nei. “Ou te iā te outou i aso uma lava (f-20).


O lo’o manino lava le fa’amatalaina e Mataio tala o le toe taimi o Iesu ma ona so’o ae le i afio

o ia i le lagi. Ia iloa e tamaiti na poloa’i Iesu i ona so’o ina ia o atu i Kalilaia i le mauga. O le nofoaga lea na fai ai ā latou upu fa’ai’u. O se tasi o saunoaga a le Alii e tatau ona manatua

pea i lea fa’amavaega, na fetalai ai Iesu e fa’apea, “Ua tu’uina mai iā te a’u le pule uma

lava i le lagi atoa ma le lalolagi” (f-18). O lea ua ta’utino atu Iesu i ona so’o, o lo’o iā te ia

le pule i le lagi ma le lalolagi. Ua uma lea ona ia toe fa’apea atu lea “O lenei ia outou o atu e

fai nu’u uma lava ma so’o, ma papatiso atu iā te i latou i le suafa o le Tamā, ma le Atalii, ma le Agaga Paia (f-19).” Afai na ia fa’ato’ilalo le oti ma le tu’ugamau, o lona uiga la

ua moni lana saunoaga o lo’o iā te ia fo’i le pule i mea uma lava. Ua tatau fo’i la ona lē toe

masalosalo se tagata. O lona uiga la, o le galuega tala’i lea o le ā aga atu i ai ona so’o, o se

galuega e faia ma le mautinoa. O ana upu mulimuli e fa’apea “Fa’auta foi, ou te iā te outou i

aso uma lava, e o’o lava i le gata’aga o le lalolagi (f-20).”O le mea mautinoa, a’o ni upu

fa’alototele iā i tatou. O ana upu taumavae sa fai i ona so’o, o ana upu fo’i ia mo tatou. O lo

tatou i ai i le nei lalolagi, o lo’o tatou i ai fa’atasi ma le Atua i aso uma lava. E tatou te lagona

le mitamita ma le fiafia auā ua mutinoa lo tatou fa’aolataga, a ia tatou fa’aeteete fo’i auā o

lo’o silasila mai fofoga o le Alii i mea tatou te faia. O le fa’amanatu mo i tatou, o lo’o silasila

mai pea le Atua i aso uma iā i tatou. Ia lē avea le mautinoa o le puipuiga a le Alii, e fai ma

auala e so’ona fai ai le ola. A’oa’oga

1. Aua le ola masalosalo e pei o isi so’o.

2. O tatou uma o ‘ave fe’au o le talalelei.

3. E lē tu’ulafoa’ina i tatou e le Atua.

4. O le Atua e tumau e o’o le gata’aga.

Galuega Fa’atino

E mafai ona outou fa’atinoina le fa’amavaega lea a Iesu ma ona so’o i se lima minute. Ia tofia se tama

po’o se teine e fai ma Iesu. O tamaiti o totoe, ia fa’aaoga e fai ma so’o.

Fesili e iloa ai po’o manatua e le fanau le mataupu o le nei Aso Sa.

1. O fea le nofoaga na poloa’i Iesu i ona so’o e latou te feiloa’i ai pe ā toetu mai?

2. O le ā le galeuga na fetalai atu ai Iesu i ona so’o e o atu e fai?

3. O le ā sou lagona, fa’amata o fa’atasi mai pea le Alii iā i tatou i aso uma?

Galuega i le fale (Homework) Ia ao le tauloto I le fuaiupu e 18 – 20, o le tusi faitau.


23

ME 31. 2020 SU’EGA OLE MASINA O ME

FESILI 1. O le ā sou lagona, o le ā tonu le uiga o le mataupu “E silasila ona fofoga i manuiti.”

Tali: O le mataupu atoa o lo’o atagia ai le fa’amalosi atu o Iesu i ona so’o e fa’atatau i

faigatā o le galuega. O le fatu atoa o le mataupu, e lē fa’atauva’a le silasila a le

Atua i le tagata.

2. O le ā le uiga o le upu “ASARI? Tali: O le tasi sene(penny) po’o le tupe e tasi.

3. O le ā se mea e te iloaina e fa’atatau i le tinā o Ana le afafine o Fanueru?

Tali: O le tinā sa ia lē tu’ua le malumalu i lona olaga atoa. Ua valusefulu fa ona

tausaga o faia pea lea masani. Sa ia auauna i le Atua i anapogi ma tatalo ma

fa’atalitali i se togiola mo Ierusalema.

4. Aiseā na fa’afetai ai Ana i le Atua ia ua fanau mai Iesu?

Tali: Auā ua ia mautinoa ua auina mai e le Atua le togiola mo Ierusalema, e ala iā

Iesu Keriso.

5. O fea le motu na tusia ai le tusi o Fa’aaliga ae po’o ai fo’i na ia tusia?

Tali: Na tusia e Ioane i le motu o Patamo.

6. E fia Ekalesia o lo’o ta’ua e ‘ave i ai le tusi o Faaaliga? Ta’u mai o latou igoa.

Tali: E fitu Ekalesia 1.Efeso 2.Semurana 3.Perekamo 4.Tuatira 5.Sarataisa

6. Filatelefaia 7.Laotekaia

7. Afai o le mau a Ioane na pa’i atu le Alii iā te ia, pe fa’apefea ona tatou lagona le

pa’i mai o le Alii iā i tatou?

Tali: Tatou te lagona e ala i le fa’atuatua ma le tali mai o le Atua i mea tatou te

faia. E mafai fo’i ona tatou lagonaina e ala i le tatalo ma le fa’amaoni o le

loto.

8. Pe fa’apefea ona i ai pea Iesu ma i tatou e tusa ma lana fetalaiga, a o lea ua afio o

ia i le lagi?

Tali: Ua afio o ia i le lagi ae auina mai le Agaga Pai’a.


24

Iuni 07, 2020

Manatu Ta’ita’i: “IA TASI MA LE ATUA” (At -one -with God)

Mataupu 15: O le feagaiga a le Atua ma meaola uma o le fogā’ele’ele. (Gods covenant

with the earth)

Sini: Ia mae’a le mataupu ua iloa ma malamalama tamaiti, e fa’amaoni le Atua i lana

feagaiga ma le lalolagi.

Tusi Faitau: Kenese 9: 8-17

Fesoasoani mo Faiaoga O le tala iā Noa ua masani ai le tele o tamaiti. E manaia fo’i ae tu’u se avanoa e fa’amatala

mai ai e se tamaitiiti le tala lea i ana lava upu. A ma’ea, ona e taumafai lea e fa’amatala le

mataupu o le nei taeao. Ia fa’amamafa i le fanau le alofa o le Atua na fai ai le feagaiga ma le

lalolagi. Ia fa’amanatu i le fanau le nuanua, o le fa’ailoga va’aia lea o le nei feagaiga.

Feasoasoani mo le mataupu:

O le tala masani i le lolo lea na fa’aumatia ai le lalolagi ma mea uma na i ai. Sa tu’uina e le

Atua le lolo i le lalolagi ona o lona alofa ae lē o lona to’asa. Ua ia silasila ifo, ua tele le agasala

o tagata, ae faigatā e lē mafai ona ia toe ave’esea le sa’olotoga i tagata ona o le Atua e

fa’amaoni i ana folafolaga. O le lolo o se auala lea na a’oa’o ai tagata ma taofi ai le faia pea o

le agasala, ona e lē finagalo le Atua e ola lana fanau i se olaga sesē ma agasala. Ui i lea o le

Atua o le alofa lava ia. E ui ina fa’aumatia le lalolagi ona o le agasala, ae tumau lava lona

alofa i lana fanau. Ai o le ala lea na ia fa’atotoe ai Noa ma lana fanau se i toe fa’aauau ai le

amataga o le lalolagi fou. Ua silasila ifo le Atua i le lolo, ua leai lava se tagata po’o se manu,

po’o se isi lava mea o lana foafoaga e lavea’iina, tau lava o Noa ma lana fanau ma mea uma

sa i totonu o le va’a. Ua ia amata le lalolagi fou ma ua ia faia le feagaiga ma le lalolagi uma

ona o lona alofa. O upu tāua o lo’o i le amataga o le feagaiga e fa’apea “O a’u, ou te

fa’atumauina la’u feagaiga ma outou, ma ā outou fanau pe ā mavae atu outou (f-9).” O le

fesili, na toe tupu se isi lolo e o’o mai i nei aso? O le tali e leai. O lea ua fetalai manino le Atua, e lē toe tupu se mea fa’apea. A fua i upu amata o le feagaiga, e foliga mai na matuā

mafatia le Atua i le taimi na tupu ai le lolo. Ua lē gata ina vavao, a ua tu’u mai fo’i le nuanua

ina ia mautinoa lelei e tagata e lē toe i ai lava se lolo i le lalolagi.

Ua tatou iloa i le nei feagaiga le Atua e fa’amaoni i ana upu, ma le Atua alofa. Ua tatou va’aia pea le nuanua pe ā fa’auli le lagi pe tetele fo’i timuga. O le pine fa’amau lenā e manatua ai

pea lea feagaiga. Ua uma ona poloa’i le Atua iā Noa, o le feagaiga e fa’atumauina pea ma au tupulagā; o lona uiga o lo’o aofia ai ma tatou i lea feagaiga. A ia aua ne’i avea le alofa lea o le

Atua e fai ma auala e faia ai pea le agasala ma fa’amoemoe e fa’amagalo mai e le Atua. O le

feagaiga e lē iloa po’o fea le augā-tupulaga e gata mai ai. Na pau le mea ua tatou mautinoa, e lē toe o’o lava se mea fa’apea i le lalolagi. O le mea lea e tatau ai ona tatou fa’afetai i le Atua i aso uma, auā o lona alofa lava iā Noa ma lana fanau lea fo’i ua tatou manuia ai. O se

fa’amanatu lelei lea mo tagata uma o ē fai a latou feagaiga. Afai ua fai se feagaiga ma se isi, ia

taumafai e fa’amaoni ma tausisi i upu o feagaiga

25

A’oa’oga

1. O le alofa o le Atua e tumau ma fa’amaoni

2. Ia fa’amaoni ma mulimuli i upu e tautala ai

3. Aua ne’i avea le alofa mai o le Atua e fai ma auala e fai ai pea le agasala

4. Ia tatou alolofa i le Atua e pei ona ia alofa mai

5. Ia tatou fa’amaoni i le tatou feagaiga ma le Atua.

Galuega Fa’atino. Fesili e fesoasoani i le mataupu.

O le ā sou iloa, aiseā na faia ai e le Atua lenei feagaiga i lo la va ma Noa? 2. O ā ni upu tāua o lo’o aumaia i le tusi faitau, tatou te iloa ai o lo’o manuia foi i

tatou i lea feagaiga?

3. Fa’amata o le ā se mea e te tali atu ai i le Atua e tusa ma lona alofa mai i le nei

feagaiga?

Upu ma uiga

(a) Au-tupulagā: e tele tupulaga po’o tupulaga uma

(e) Fa’amalumalu: o se vaega tele o ao ua ufitia ai le lagi ma ua pogisa uma ai

PESE. #154. Tusi Pese

4. Galuega i le aiga (homework)

Tusi mai sau solo e fa’atatau i le “feagaiga.” Faitau le tusi o le vaiaso fou

(Filipi 3: 1-11)

**********************IA MANUIA TAPENAGA O LE ASO SA****************************

Iuni 14, 2020

Manatu Ta’ita’i: “IA TASI MA LE ATUA” (At- one- with God)

Mataupu: “O lo tatou tasi ua maua mai iā Keriso” (At ones through Christ)

Sini: Ia mae’a lenei mataupu ua malamalama tamaiti, o le talitonu moni i le Alii tatou

te maua ai le nonofo fa’atasi.

Tusi Faitau: Filipi 3: 1-11

Fesoasoani mo Faiaoga E telē le tala’aga o le olaga o Paulo, o se mea lelei fo’i pe ā iloa e le fanau. Ua na o ni nai mea laiti o le ā avatu i le mataupu, a’o le fa’amamafa o le ā palasi tonu i le mataupu o le nei taeao.

Ia manatua, e ui lava iā Paulo ae o Iesu lava le autū o lana fe’au sa talaina. Ia fa’atāua Iesu

Keriso e mafai ona maua ai le tasi o tagata uma. Fa’amanatu, o le maua o le tasi o tagata

uma na tusia i totonu o le falepuipui i Roma.

Fesoasoani mo le mataupu O Paulo o le tagata poto pe ā fua i le tala’aga o lona olaga. O le tagata sa fa’asauā i tagata

Kerisiano a’o le i suia lona olaga. O ia o le tagata ua peritomeina, o le aiga o Isaraelu, o le

ituaiga o Peniamina, o le Eperu o sā Eperū, o le faresaio foi (f-5). O le tala’aga lea o Paulo, e

lelei foi pe ā tauloto e fanau ia mea tāua.

26

Afai o lea, o lona uiga o Paulo o le tagata ua masani ma tulafono ma malamalama i le tele o

mea o le olaga. A tatou mafaufau lelei i ai, o Paulo o se tagata e lē toe popole i se mea. O lea

ua iā te ia le poto, fa’aeaina ma le tamāoaiga. Ui i lea na suia lona olaga ma avea ma

Aposeteolo o le talalelei. Fai mai le tala, ina ua ia maua Keriso, sa liua atoa lona tagata tuai

ma avea ma tagata fou. Ua silafia e Paulo o lona olaga tuai sa tele i mea fa’ale-tonu ma lē maua ai se sa’olotoga moni i le Agaga. O le ola fou iā Keriso, e ui ina puapuagā i le tino, ae o lo’o tamāoaiga i le Agaga. O le ala lea o le tusi atu o lana tusi i le Ekalesia i Filipi. E lē gata i

lana tusi fa’afetai i lo latou alolofa a o i ai o ia i le falepuipui, a ua fa’amanatu atu fo’i e leai se

mea e faigatā pe ā tutū fa’atasi ma le Atua. Ua mautinoa o le Atua e maua ai lo latou tasi. O le talitonu iā Keriso e faia mea lelei ma lavea’iina ai i tatou mai i faiga leaga a le lalolagi. O le mea moni e lē mafai ona maua so tatou tasi i le poto ma le tamāoaiga. Fa’apei ona lafoa’i e

Paulo ia mea uma, ia fa’apea fo’i i tatou. O mea o le olaga e mavae, a’o le Atua ma lona Alo

pele o Iesu Keriso e fa’avavau ia. E iloa fa’apefea ua maua lo tatou tasi ona o Keriso? Pe ā

tatou fealofani ma tausi i ana poloaiga.

A’oa’oga

1. Ia maua le nonofo fealofani

2. Ia fulitua mai i mea sesē o lo’o faia, auauna atu i le Atua e ala i le faia o mea lelei.

3. Ia taumafai e fai se suiga o lou olaga pe afai e lē o lelei

4. Ua na o Keriso e maua ai lo tatou tasi.

Galuega Fa’atino

1. Fesili mo le mataupu.

a) O fea le nofoaga na tusia ai Paulo le tusi lenei o Filipi?

e) O le a sou iloa, fa’amata e mafia ona suia i tatou e pei o Paulo?

i) Pe fa’apefea ona tasi i tatou ona o Keriso?

2. Upu ma uiga

a) Peritomeina: suia le olaga tuai i le olaga fou/fa’amamāina

e) Ma’elegā: sogasogā, tauivi, taumafai malosi i le mea e gata ia le mafai. i) Mata’uleagaina: ta’uleaga, ta’uvalea

3. Pese Ia tasi i tatou uma i le Tamā Tali: Tasi le loto, tasi le fatu

O lona alofa ua tatou maua Tasi le aiga, o le lagi ua ia aumaia

Nei i le lalolagi To’otuli ma tatalo i le Agaga

To’atuli ma tatalo i le Agaga fesoasoani. Fesoasoani, na te faia i tatou uma ina ia tasi

Na te faia, i tatou uma ina ia tasi


Ia tusi sau tala e fa’atatau i le Aso Sa o Tamā. Faitau ma su’esu’e iai – Salamo 8: 1 - 9

**********************IA MANUIA LE TAPENAGA O LE ASO SA*************************

27

Iuni 21, 2020. “ASO SA O TAMĀ”

Manatu Ta’ita’i: “IA TASI MA LE ATUA” (At – One- with God)

Mataupu: “Amanaia nisi tagata” (Mindful of mortals)

Sini: Ia mae’a le mataupu ua iloa ma malamalama tamiti, o lou amanaia o nisi tagata

o le fa’aalia lava lea o lou alofa.

Tusi Faitau: Salamo: 8: 1-9

Mo Faiaoga

O le Aso Sa mulimuli lenei o mataupu ona fa’ai’u ai lea i le suega i le Aso Sa lumana’i. E pule

lava lau Susuga i le faiaoga, ae ou te manatu e manaia fo’i ae saunia e lau Susuga se tatalo

amata mo lenei taeao. A’o le i fa’amatalaina le mataupu, e lelei fo’i pe ā fesili i tamaiti pe

mafai e se tasi ona fa’amatala mai le uiga o le tatou ulutala, “Amanaia nisi tagata” i ana lava

upu. A mae’a lea ona fa’aauau lea i le fa’amalamalamaina o le mataupu.


O le Salamo sa faitauina, o lo’o vivi’i ai le fai Salamo i le Atua ona o le silisili ‘ese, matagofie

ma le mamana o ana galuega sa fai. O le faitauga atoa e foliga mai o lo’o ta aofa’i ai mea uma

lava i le alofa lea o le Atua. O le fuaiupu e lua, o lo’o i ai upu fa’apea ‘tama valevale ma

tama fesusui.’ O lona uiga o tagata lē tauoloa ma fa’atauva’a i le va’ai a isi, po’o tagata

vaivai i le mafaufau fa’atasi ai ma pepe o lo’o fesusui i o latou tinā. O ituaiga tagata nei o lea

e fai mai le fai-Salamo e amanaia uma i le alofa lea o le Atua. O le fuaiupu e tolu ma le fa o

lo’o i ai upu e fa’apea, “A ou va’ai atu i lou lagi, o le galuega a ou tamatama’ lima, o le

masina atoa ma fetu na e faia, se ā ea le tagata ua e manatu mai ai iā te ia ma le atalii

o le tagata e te asiasi mai ai iā te ia?”Ua fa’aalia i ia upu le ofo tele o le tagata i le

maualuga ma le loloto o le silasila alofa o le Atua i le lalolagi na ia faia. O le ala lea o le

fa’apea o ana upu “ se ā ea le tagata e te manatu mai ai?” E leai lava se ‘ese’esega ma le

fesili e fa’apea“o ai i tatou ua manatu mai ai le Atua?” O le fesili i le loto ma le mafaufau, e mafua pe ā tatou malamalama lelei i lo tatou va tu’utu’u nonofo ma le Atua. O le ā lo tatou

va tu’utu’u nonofo ma le Atua? O le Atua e silisili’ese ma maualuga lona pa’ia ma le mamalu,

a o i tatou ua na o ni tagata fa’atauva’a. A ua ā nei? Fai mai le fai – Salamo, “ ua fa’amaulalo

ane teisi o ia i agelu(f-5),”O le molimau atoa lea a le fai – Salamo i le alofa lea o le Atua ua

amanaia ai le tagata fa’atauva’a. Ua fa’ai’u vi’ivi’iga a le fai –Salamo i ana upu e fa’apea“ Le

Alii e, lo matou Alii, e silisili lava lou suafai i le lalolagi uma lava (f-9).” Ua fa’asilisilina

pea e le tagata le Atua auā ua ia iloa ua amana’ia mai o ia e le Atua soifua.

Ia fa’amanatu i le fanau, e fa’apei ona amana’ia i tatou e le Atua, ia fa’apenā fo’i ona tatou

amana’ia nisi tagata. Aiseā e mafua ai ona tatou lē amana’ia nisi tagata? E mafua pe ā fa’apea o i tatou o ni tagata e ola fa’amaualuluga, fiasili, ma va’ai maulalo i nisi, ae maise

lava ē mama’i, vaivai ma matitiva. O le loto maulalo ma le alofa e mafai ai ona tatou

amana’ia nisi tagata. Ia manatua, o tagata tatou te va’ai maulalo i ai, o isi ia tagata o lo’o

auala mai ai le finagalo alofa o le Atua. Fai mai le moto po’o le anava tau a isi sui tauvā i le

tofi Kovana i tausaga ua tuana’i, “Fa’atāua Tagata Uma.”

28

A’OA’OGA

1. O lou amana’ia o nisi tagata o le faia lava lea o lau galuega lavea’i. 2. Aua le manatu fa’apito ua na o oe lava.

3. E iloa le alofa moni i lou a’apa atu i lē ua vaivai.

4. E amana’ia i tatou e le Atua i taimi uma.

Galuega Faatino

Ia fa’aavanoa se isi fitu minute e tali ai le fesili lenei i se laupepa atoa pe sili atu fo’i. O le feili

e fa’apea, A e va’ava’ai i le lagi ma le lalolagi ma mea o tumu ai, o le ā le ituaiga Atua na

ia faia nei mea uma?

PESE - #5 (TUSI PESE)


Ia su’esu’e ma toe fa’amanatu mataupu uma o masina ua mavae mo le su’ega o le afa o lenei

tausaga i le Aso Sa o lumana’i.

************************IA MANUIA TAPENAGA O LE NEI ASO SA**********************

SU’EGA MO LENEI AFA TAUSAGA

IUNI – 28 – 2019

FESILI: Mataupu 1: MATUA MA LE POTO

1. Pe fa’apefea ona tatou iloa e sili le poto o le Atua i tagata uma, ma le lalolagi atoa?

Tali: Ua tatou iloa auā o ia lava na faia le lagi ma le lalolagi. Sa so’ona nunumi le lalolagi i le

amataga, ae sa ia fa’atulaga lelei ma fa’amafolafola. Afai o le Atua na faia le tagata, ua na o ia

fo’i sa i ai i le amataga; o lona uiga, o ia fo’i e sili lona matua ma lona poto i tagata ma mea uma

o le nei lalolagi.

2. O le ā se tulaga sa i ai le lalolagi i le amataga ae le i amataina le galuega foafoa a le

Atua?

Tali: Sa so’ona nunumi ma gaogao.

Mataupu 2: AUPEGA E SAUNIA I LE MATAGOFIE

3. Fa’amatala le vaitau o Mika o lo’o aumaia e le mataupu?

Tali: O le valu seneturi. O le vaitau o le tele o le tamāoaiga i le nu’u o le Atua ma ua avea ma

auala ua galo ai le Atua ma ua sasao fa’aafi ai le agasala.

4. O ā ni ‘aupega tatou te fa’aaogaina e mafai ai ona tatou manumalo i le taua ma le tiapolo?

29

Tali: O le ola fa’amaoni ma le faia o le amiotonu. O le tatalo fa’atauanau i le Atua ma le

fa’amaoni o le loto i le lua mafutaga ma le Alii. Ia ‘alo’alo ‘ese ma mea leaga o le nei olaga.

Mataupu 3: MULIMULI I LE FAIA’OGA, A’OA’O MAI LE ATUA O A’OA’OGA

5. O le ā sou lagona, aiseā e tulaga ‘ese ai Iesu i faia’oga uma e pei ona fa’amatalaina e le

mataupu?

Tali: E tele mea e tulaga ‘ese ai le Alii mai i faia’oga uma o le nei lalolagi. Muamua, o le faiaoga

e silisili lona poto, e iloa i ana mea e fai fa’apea ana a’oa’oga. Lua, o le faiaoga e sili lona

fa’amaoni.Tolu, o le faiaoga e sili lona alofa i tagata, e lē fa’apito ae fa’atauaofia ai tagata uma.

O mea na fa’atasi ai ma nisi mea ua lē ta’ua, a ua outou silafia ma o tatou iloa.

Mataupu 4: “OA I LE LAGI”

6. Pe aiseā na lē fiafia ai le tagata mau’oa ina ua fetalai atu le Alii e alu ma tufatufa atu ana

oloa ma e matitiva?

Tali: Sa lē fiafia o ia auā o lo’o mana’o pea lona loto i mea o lenei olaga. O le tagata e lē o

atoatoa lona ola ofoina atu mo le Alii.

7. O le ã le ‘ese’esega o ‘oa i le lalolagi ma ‘oa i le lagi? Tali: O le ‘oa ma le tamāoaiga i le lalolagi nei, o mea e pala ma mou atu i le va’ai. O ‘oa i le lagi

o mea e tumau ma ta’ita’ina ai le tagata i le manuia e fa’avavau.

Mataupu 5: :FA’AFESAGA’I FOLIGA MA LE LOTO”

8. Aiseã e tãua ai lou ta’u atu i lē ua agaleaga mai iā te oe lona sesē?

Tali: E tãua auã e lē gata o le ā lagona e le nã tagata lona sesē, ae o le ā maua ai fo’i se filemū i lou mafaufau. E tāua fo’i, auã o le finagalo lea o le Ali’i mo i tatou, ia o tatou ta’u atu le mea

moni i tagata.

9. O le ã sou iloa, o ã ni lagona e o’o mai iā i tatou pe afai tatou te lē ta’u atu i lē ua agaleaga atu lona sesē?

Tali: O le ā lē maua se filemū i lou mafaufau, ma o le ã leiloa fo’i e le nã tagata le leaga o le mea

ua ia faia.

Mataupu 6: “SI’ITIA MAUGA”

10. O le ã le uiga o le fetalaiga a Iesu,“afai e tusa lo outou fa’atuatua ma le fua o le sinapi, e

fai atu outou i lenei mauga, alu ia oe i le lã mea; ona alu atu ai lea.”

Tali: O le uiga o le fetalaiga a le Ali’i, pe itiiti lava le fa’atuatua, a ia i ai se fa’atuatua. O

le fa’atuatua lenã e mafai ai ona si’itia le mauga. A leai se fa’atuatua, e lē mafai fo’i ona

tupu se fa’amoemoe.

11. Ua fai atu le tasi tagata i le Alii, “ua lē mafai e ou so’o ona fa’amalōlō lo’u atali’i ua

maua i le ma’i maliu”. O le ā le tali a Iesu i lea tagata?

30

Tali: Ua tali Iesu “Le tupulaga lē fa’atuatua ma le fa’api’opi’o ou te i ai iā te outou se’ia afea?

Mataupu 7: TAUPULEPULEGA MA TAULAMALAMA

12. Aiseā na fa’apotopoto ai toea’iina ma ositaulaga i le fale o Kaiafa le ositaulaga sili e pei

ona fa’amatalaina i le mataupu?

Tali: Sa fa’apotopoto i latou ma taupulepule i se togafiti e o’o ai le oti iā Iesu.

13. Ia fa’amatala mai i au lava upu, pe aiseā e tupu ai le ola taulamalama ma le taupulepule

leaga i tagata. (silasila i tali a le fanau)

Mataupu 8: “FAAMAMA E IESU LE MALUMALU” (LAUPAMA)

14. O le ā le mea na faia e le Alii ina ua taunu’u atu ua fai le malumalu ma fale fa’atau’oa o

tagata?

Tali: Sa ia fuli laulau ma tutuli tagata i fafo ma ia fa’apea atu “Ua tusia, e ta’ua lo’u fale, o le

fale tatalo; a ua faia e outou ma ana o e fao mea.”

15. O le ā sou lagona, o ā ni uiga ma ni mea e tatau ona tatou faia pe ā tatou o i le fale o le

Alii? (silasila i tali a le fanau)

Mataupu 9: “TAOFI AUA LE TA’UA LE MEA SA’O”( ESETA)

16. O le ā le togafiti leaga na faia e ositaulaga ma toea’iina e taofia ai le salalau atu o le tala

ua toetu Iesu?

Tali: Sa o latou avatu tupe ma totogi ai nisi tagata, ina ia o tagata ia, ma tala’i atu le tala sesē e

fa’apea, “na o mai ona so’o i le po ua gaoi iā te ia a o matou momoe”

17. O le ā sou iloa, aiseā ua lē mafai ai ona taofia le salalau o le tala iā Iesu Keriso le Alii

toetu?(silasila i tali a le fanau)

Mataupu 10: “O MEA MATAGOFIE E MANATUA PEA”

18. O le ā le mea matagofie na faia e le fafine na alu ane iā Iesu a o i ai o ia i Petania i le fale

o Simona le lepela?

Tali: Na alu ane le fafine ma le fagu alapasa ua i ai le suāu’u manogi tau tele ua liligi i le ao o

Iesu a o ta’oto ia e taumafa.

19. O le ā sou iloa, fa’amata o le ā se mafua’aga tāua ua fa’ama’imau ai lava e le nei fafine le

suāu’u taugatā mo le Alii? (silasila i tali a le fanau)

20. Aiseā na lē fiafia ai so’o o Iesu i le mea na faia e le fafine i le u’u manogi?

Tali: Auā ua mafaufau lava i latou na o tupe, ae galo ai le galuega tāua o lo’o faia e le nei fafine.

O so’o lē malamalama i le fa’ata’imuaga o le maliu o lo latou Alii.

Mataupu 11: “E SILASILA ON FOFOGA I MANUITI”

31

21. O le ā le uiga o le upu “pelesepulo?”

Tali: O le temoni sili, po’o le ta’ita’i o temoni.

22. O le ā le uiga o le upu “ASARI”?

Tali: O le sene (penny)

23. Ia fa’atumu avanoa o le fuaiupu o lo’o i lalo i upu nei: a) laumata e)lauulu i)taulia

o)faitaulia u)faitau

“A o outou___________ lava ua _______________ uma ia.”(fuaiupu: 30)

Mataupu 12: “UA LE TUUA LE MALUMALU”(ASO SA TINA)

24. O ai le igoa o le tinā matua lea sa ia lē tu’ua le malumalu ina ua oti lana tane?

Tali: O Ana le afafine o Fanueru.

25. Aiseā na fa’afetai ai Ana i le Atua ina ua fanau mai Iesu?

Tali: Aua ua ia mautinoa ua taunu’u le togiola mo Ierusalema.

26. Aiseā na lē tu’ua ai e le tinā o Ana le malumalu i aso e tele o lona olaga?

Tali: Auā sa ia auauna i le Atua i le anapogi ma le tatalo.

Mataupu 13: “UA PA’I MAI O IA IA TE A’U”

27. O fea le motu na tusia ai e Ioane le tusi o Fa’aaliga?

Tali: O le motu o Patamo.

28. E fia Ekalesia na tusi fa’atatau i ai le tusi o Fa’aaliga e pei ona fa’atonuina ai Ioane e le

Agaga? Ta’u mai o latou igoa.

Tali: E fitu = 1.Efeso 2.Semurana 3.Perekamo 4.Tuatira 5. Sarataisa 6. Filatelefaia

7.Laotekaia

Mataupu 14: “OU TE IAI PEA MA OUTOU”

29. O fea le nofoaga mulimuli na feiloa’i ai Iesu ma ona so’o ma fa’amavae ai ona afio loa

lea o ia i le lagi?

Tali: O Kalilaia i le mauga.

30. Pe na talitonu uma so’o o Iesu lea ua toetu?

Tali: E leai, auā sa masalosalo nisi e tusa ma le tala a Mataio.

Mataupu 15: “O LE FEAGAIGA A LE ATUA MA MEAOLA UMA O LE

FOGAELEELE”

31. Ia fa’amatala mai i se parakalafa se tasi, le feagaiga lea a le Atua ma meaola uma o le

lalolagi e pei ona aumaia i le mataupu. (silasila i tali a le fanau)

32. O le ā se fa’ailoga o lo’o tatou va’aia pea i nei aso e fai ma pine fa’amau o le feagaia a le

Atua ma meaola uma o le lalolagi?

Tali: O le nuanua.

32

Mataupu 16: “O LO TATOU TASI UA MAUA MAI IA KERISO”

33. Pe fa’apefea ona maua lo tatou tasi iā Keriso?

Tali: O ana a’oa’oga uma ia tatou mulimuli i ai. E maua fo’i lo tatou tasi iā Keriso pe afai tatou

te tausia lana poloa’iga fa’aauro “Ia tatou fealofani.”

34. O ā ni mea o lo’o ta’ua i le tusi o Filipi tatou te iloa ai o Paulo e lē o se tagata

fa’atauva’a?

Tali: O Paulo o le Eperu o sā Eperu, o le ituaiga o Peniamina, o ia fo’i o le Faresaio.

Mataupu 17: “AMANA’IA NISI TAGATA”

35. Pe fa’apefea ona tatou iloa e amana’ia i tatou e le Atua e tusa ma le tala a le fai - Salamo?

Tali: Auā ua ia saunia le lalolagi matagofie tatou te nonofo ma sa’oloto ai. Ua lē fa’apito fo’i lona alofa i se tagata a ua fa’atauaofia uma i tatou i lona alofa ma lona agalelei.

36. Aiseā e tāua ai lo tatou amana’ia o isi tagata? (silasila i tali a le fanau)

**E fa’amaopoopo lava e lau Susuga a le faiaoga au su’ega ma togi. E pule lava fo’i lau Susuga

pe tapena sau su’ega e ‘ese mai i le su’ega ua saunia e le ofisa **

** Ia saunia ni kopi o le suega ma tufa I tamaiti e sue ai. Pe a talafeagai ma le finagalo, e lelei foi

ae fain i nai faailoga mo le fanau.

MALŌ LE ONOSA’I I LENEI ‘AFA O LE TAUSAGA, IA MANUIA LE MALOLOGA

Tautua Printing Press

Congregational Christian Church of American Samoa

1 Kanana Fou Street, Box 1537

Pago Pago, American Samoa 96799

www.efkasonline.org

2020 · mataupu 1 : ³matua ma le poto? manatua le atua o le poto ´ (older and wiser, celebrating...

Documents